Éxodo 22:1-31
22 Wa juntúul máak ku yoklik juntúul wakax wa juntúul taman, yéetel ku kíimsik wa ku konikeʼ, lelaʼ letiʼe baʼax unaj u beetkaʼ: tu yoʼolal le wakaxoʼ yaan u tsʼáaik cinco wakaxoʼob, yéetel tu yoʼolal le tamanoʼ yaan u tsʼáaik kantúul tamanoʼob.+
2 (Wa juntúul máak ku chuʼukul táan u yookol+ yéetel ku beetaʼal loob tiʼ yéetel ku kíimileʼ, le máax kíimsoʼ minaʼan culpa tiʼ.
3 Pero wa tsʼoʼok u sáastal le ka úuch tuláakal le baʼaloʼobaʼ, le máax kíimsoʼ tiʼ letiʼ yaan u culpail).
Juntúul máax ku yookoleʼ unaj u boʼotik le baʼax tu yokoltoʼ. Wa minaʼan mix baʼal tiʼeʼ unaj u koʼonol bey esclavo utiaʼal ka páajchajak u boʼotik le baʼax tu yokoltoʼ.
4 Wa le kéen chuʼukuk le máak ku yilaʼal kuxaʼan le baʼax u yokoltmoʼ, sea juntúul wakax, juntúul burro, wa juntúul tamaneʼ, unaj u sutik u dobleil.
5 Wa yaan máax u bismaj janal u yalakʼ baʼalcheʼob tiʼ junpʼéel kʼáax wa teʼ tuʼux pakʼaʼan uvaoʼ, yéetel ku chaʼik u yokol janal tu kʼaax yaanal máakeʼ, le kéen u sut u jeel le baʼax tu kʼaskúuntaj u yaalakʼoʼoboʼ unaj u tsʼáaik u maas maʼalobil tiʼ le baʼaxoʼob yaan tu kʼaaxoʼ wa u maas maʼalobil tiʼ le uvaʼob u pakʼmoʼ.
6 Wa juntúul máak ku tʼabik kʼáakʼ, yéetel le kʼáakʼ ku yáalkab tak tuʼux yaan le kʼiʼixoʼob yéetel ku tóokik u yich le paakʼal tsʼoʼok u juntartaʼal bey xan le u yich le paakʼal maʼ cosechartaʼakoʼ, le máax tʼab le kʼáakʼoʼ unaj u boʼotik tuláakal le baʼax eeloʼ. Bey xan unaj u beetaʼal wa ku yelel junpʼéel luʼum tuʼux yaan baʼax pakʼaʼaniʼ.
7 Wa juntúul máak ku tsʼáaik taakʼin wa uláakʼ baʼal tiʼ yaanal máak utiaʼal u líiʼsaʼaltiʼeʼ, chéen baʼaleʼ ku yoklaʼal le baʼaxoʼob tu tsʼáaj kanáantbiloʼ, wa kaxtaʼab máax okolteʼ, le j-ookoloʼ unaj u sutik u dobleil le baʼax tu yokoltoʼ.+
8 Pero wa maʼ kaxtaʼab máax okolteʼ, le máax tiʼ kʼuʼub u kanáantoʼ yaan u taasaʼal tu táan le u jaajil Dios+ utiaʼal ka ilaʼak wa maʼ letiʼ chʼaʼ le baʼax saʼatoʼ.
9 Lelaʼ letiʼe baʼax unaj u beetaʼal wa juntúul máakeʼ ku chʼaʼik juntúul wakax, wa juntúul burro, wa juntúul taman, wa junpʼéel nookʼ maʼ u tiaʼaliʼ, bey xan wa ku kaxtik wa baʼax yéetel ku pʼáataltiʼ. Wa letiʼ ku yaʼalik: ‹¡In tiaʼal lelaʼ!›, pero yaan uláakʼ máak ku yaʼalik u tiaʼal xaneʼ, tu kaʼatúulaloʼobeʼ unaj u binoʼob tu táan le u jaajil Diosoʼ.+ Le máax kun aʼalbil tumen Dios maʼ maʼalob baʼax ku beetkeʼ, yaan u sutik u dobleil le baʼax tu chʼaʼaj tiʼ u yéet máakiloʼ.+
10 Wa juntúul máak ku tsʼáaik kanáantbil u yalakʼ burro, wa u yalakʼ wakax, wa u yalakʼ taman, wa jeʼel máakalmáak tiʼ u yaalakʼoʼobeʼ, chéen baʼaleʼ ku kíimil wa ku pʼáatal móochileʼ, bey xan wa ku yoklaʼal le baʼalcheʼ sin ke u yilaʼal tumen mix máakoʼ,
11 le máax tiʼ tsʼaʼab u kanáantoʼ bey xan u yuumil le baʼalcheʼoʼ unaj u beetkoʼob junpʼéel juramento tu táan Jéeoba. Le máax kanáantik kaʼach le baʼalcheʼoʼ unaj u yaʼalik maʼ tiʼ letiʼ yanchaj u culpail le baʼax úuchoʼ, yéetel u yuumil le baʼalcheʼoʼ unaj u aceptartik. Le máax túun kanáantik kaʼach le baʼalcheʼoʼ maʼ ken u boʼot mix baʼal.+
12 Chéen baʼaleʼ wa ku yoklaʼal le baʼalcheʼ kʼubéentaʼantiʼ tumen maʼ tu kanáantoʼ, unaj u boʼotik le baʼalcheʼ tiʼ u yuumiloʼ.
13 Wa ka xeʼexetʼaʼak le baʼalcheʼ tumen juntúul tsʼíitsʼik baʼalcheʼoʼ, le máax kanáantikoʼ unaj u bisik tu táan u yuumil utiaʼal u yeʼesiktiʼ yéetel maʼ unaj u boʼotik mix baʼal yoʼolal le baʼalcheʼ kíimsaʼaboʼ.
14 Wa juntúul máak ku kʼáatik u majáant u yalakʼ baʼalcheʼ uláakʼ máak, yéetel ku móochtal wa ku kíimileʼ, le máax majáantmiloʼ yaan u boʼotik tiʼ u yuumil.
15 Chéen baʼaleʼ wa tiaʼan u yuumil le baʼalcheʼ le ka úuch le looboʼ, le máax majáantmiloʼ maʼ ken u boʼot mix baʼal. Wa alquilarbil úuchik u beetaʼal le baʼalcheʼoʼ, le bukaʼaj boʼotaʼab úuchik u alquilartaʼaloʼ chéen letiʼe bukaʼaj unaj u pʼáatal yoʼolal le baʼax úuchoʼ.
16 Wa juntúul xiib ku tusik juntúul x-chʼúupal minaʼan u novio yéetel ku yantal baʼal u yil tu yéeteleʼ, le máakoʼ unaj u boʼotik le bajux kun kʼáatbiltiʼ yoʼolal le x-chʼúupaloʼ yéetel yaan u tsʼoʼokol u beel tu yéetel.+
17 Wa u papá le x-chʼúupal jach junpuliʼ maʼ u kʼáat ka tsʼoʼokok u beel tu yéeteleʼ, le máak túunoʼ unaj u boʼotik le bajux kun kʼáatbiltiʼ yoʼolal le x-chʼúupaloʼ.
18 Unaj a kíimsik le koʼoleloʼob ku pulyaʼajoʼoboʼ.+
19 Jeʼel máaxak ka yanak baʼal u yil yéetel juntúul baʼalcheʼeʼ unaj u kíimsaʼal.+
20 Jeʼel máaxak ka u beet junpʼéel sacrificio tiʼ yaanal dioseʼ unaj u xuʼulsaʼaltiʼ,+ chéen tiʼ Jéeoba unaj a kʼubkeʼex sacrificioʼob.
21 Maʼ unaj a maltratartik mix juntúul j-táanxel luʼumiliʼ mix a beetik a kʼasaʼaniltiʼiʼ+ tumen teʼexeʼ kuxlajeʼex bey j-táanxel luʼumileʼex tu luʼumil Egiptoeʼ.+
22 Maʼ unaj a beetkeʼex u muʼyaj mix juntúul viudaiʼ mix juntúul paal minaʼan u papáʼobiʼ.*+
23 Tumen wa ka beetkeʼex u muʼyajoʼob yéetel letiʼob ku kʼáatkoʼobten áantajeʼ, teneʼ yaan in wáantkoʼob.+
24 Teen túuneʼ yaan in sen pʼuʼujul yéetel yaan in kíimskeʼex yéetel espada, yéetel a wataneʼexeʼ yaan u pʼáatloʼob viudail, yéetel a mejen paalaleʼexeʼ yaan u pʼáatloʼob minaʼan u papáʼob.
25 Wa ka tsʼáaik u majáant taakʼin juntúul máax óotsil* tiʼ le máaxoʼob yanoʼob ichil in kaajaloʼ maʼ unaj a cobrartik interés tiʼiʼ, maʼ a beetik jeʼex le máakoʼob ku cobrarkoʼob interés yoʼolal le taakʼin ku tsʼáaik u majáantoʼoboʼ.+
26 Wa ka chʼaʼik u yáal u nookʼ a wéet máakil tu yoʼolal le taakʼin ta tsʼáaj u majáantoʼ+ unaj a sutiktiʼ le táan u tʼúubul kʼiinoʼ,
27 tumen chéen letiʼe único nookʼ yaantiʼ utiaʼal u tepʼkuba yéetel utiaʼal u weenloʼ. Tumen wa maʼeʼ, ¿baʼax yéetel ken u tepʼuba utiaʼal u wenel?+ Le kéen u kʼáatten ka in wáanteʼ yaan in wuʼuyik, tumen teneʼ kin chʼaʼik óotsilil.*+
28 Maʼ unaj a maldecirtik* Diosiʼ+ yéetel maʼ unaj xan a maldecirtik mix juntúul tiʼ u nuuktakil* a kaajaliʼ.+
29 Maʼ u kaʼapʼéeltal a wóol a kʼub tiʼ Dios u yáax ich a paakʼaloʼob, bey xan le yaʼabkach vino yéetel aceite yaantechoʼ.+ A yáax hijoʼexeʼ unaj a tsʼáaikeʼexten.+
30 Lelaʼ letiʼe baʼax unaj a beetik yéetel a walakʼ toro bey xan yéetel a walakʼ taman kun síijloʼoboʼ:+ siete días ken u beet yéetel u maama. Le kéen u chuk ocho días tiʼeʼ unaj a tsʼáaikeʼexten.+
31 Teʼexeʼ in kaajaleʼex yéetel unaj a pʼáatleʼex santoil tin táan.+ Maʼ unaj a jaantikeʼex u bakʼel mix juntúul baʼalcheʼ xeʼexetʼaʼan u bakʼel tumen juntúul tsʼíitsʼik baʼalcheʼ teʼ kʼáaxoʼ.+ Baʼaxeʼ unaj a tsʼáaikeʼex u jaant le peekʼoʼoboʼ.
Notas
^ Wa «kimen u papáiʼ».
^ Wa «juntúul máax ku beetaʼal u muʼyaj».
^ Wa «tumen teneʼ utsen».
^ Wa «waʼalik baʼal tu contra».
^ Wa «gobernanteil».
