2 Crónicas 36:1-23
36 U kajnáaliloʼob Judá túuneʼ tu chʼaʼajoʼob Jeoacaz u hijo Josíaseʼ+ ka tu beetoʼob reyil tu kaajil Jerusalén, tu beetoʼob reyil tu lugar u papá.+
2 Veintitrés años yaan kaʼach tiʼ Jeoacaz ka káaj u reinar, letiʼeʼ tres meses xáanchaj táan u reinar tu kaajil Jerusalén.
3 Chéen baʼaleʼ u reyil Egiptoeʼ tu luʼsaj Jeoacaz tu puesto teʼ Jerusalénoʼ ka tu multartaj le luʼumoʼ, tu kʼáataj 3 toneladas yéetel 420 kilos* plata bey xan kex 34 kilos* oro.+
4 Tsʼoʼoleʼ Nekó, u reyil Egiptoeʼ, tu chʼaʼaj Eliaquim u sukuʼun Jeoacazeʼ, ka tu tsʼáaj u beet u reyil tu yóokʼol Judá yéetel Jerusalén. Tu kʼexaj xan u kʼaabaʼ Eliaquimeʼ ka tu tsʼáaj u kʼaabaʼt Jeoyakim. Nekóeʼ+ tu bisaj xan Jeoacaz tu luʼumil Egipto.+
5 Veinticinco años yaan kaʼach tiʼ Jeoyakim+ ka káaj u reinar, yéetel 11 años xáanchaj táan u reinar tu kaajil Jerusalén. Letiʼeʼ seguernaj u beetik baʼax kʼaas tu táan Jéeoba u Dios.+
6 Nabucodonosor,+ u reyil Babilonia túuneʼ, bin u chʼaʼeʼ ka tu beetaj u kʼaʼaxal yéetel kaʼapʼéel cadena de cobre, ka tu bisaj tak Babilonia.+
7 Nabucodonosoreʼ tu chʼaʼaj xan jujunpʼéel tiʼ le nuʼukuloʼob yanoʼob tu yotoch Jéeobaoʼ ka tu bisoʼob tak tu palacio yaan Babiloniaoʼ.+
8 Tuláakal u maasil baʼaloʼob úuch ichil u kuxtal Jeoyakim, le baʼaloʼob kʼaastak tu beetoʼ bey xan tuláakal u maasil baʼaloʼob kʼaastak ojéeltaʼab tu beetoʼ, tiʼ tsʼíibtaʼan tu Libroil u Reyiloʼob Israel yéetel Judáeʼ. Joaquín, u hijo túuneʼ, káaj u beetik u reyil tu lugar.+
9 Dieciocho años yaan kaʼach tiʼ Joaquín+ ka káaj u reinar. Letiʼeʼ tres meses yéetel diez días xáanchaj táan u reinar tu kaajil Jerusalén. Joaquíneʼ seguernaj u beetik baʼax kʼaas tu táan Jéeoba.+
10 Tu káajbal le añooʼ,* le rey Nabucodonosoroʼ tu túuxtaj chʼaʼabil Joaquín utiaʼal ka taasaʼak tu luʼumil Babilonia,+ junmúuchʼ tu yéeteleʼ tu beetaj xan u taasaʼal le baʼaloʼob koʼojtak yanoʼob tu yotoch Jéeobaoʼ.+ Tu tsʼáaj xan Sedequías, u tío Joaquín, utiaʼal ka u beet u reyil tu yóokʼol Judá yéetel Jerusalén.+
11 Veintiún años yaan kaʼach tiʼ Sedequías+ ka káaj u reinar, yéetel 11 años xáanchaj táan u reinar tu kaajil Jerusalén.+
12 Letiʼeʼ seguernaj u beetik baʼax kʼaas tu táan Jéeoba u Dios, maʼ tu mixbaʼalkúuntuba tu táan le profeta Jeremíasoʼ,+ le máax aʼalik baʼax ku yaʼalik Jéeobaoʼ.
13 Sedequíaseʼ tu tsʼáajuba xan tu contra le rey Nabucodonosoroʼ,+ le máax beet u jurartik tu kʼaabaʼ Dios de ke mantatsʼ ken u beet baʼax ku yaʼalikoʼ. Sedequíaseʼ seguernaj u beetik u tercoil, yéetel chichchaj u puksiʼikʼal, maʼ tu yóotaj suut tu yiknal Jéeoba u Dios u kaajil Israeliʼ.
14 Tuláakal u nuuktakil le sacerdoteʼob bey xan tuláakal le kaajoʼ tu jach traicionartoʼob Dios, ku beetkoʼob kaʼach tuláakal le baʼaloʼob jach kʼaastak ku beetaʼal tumen uláakʼ luʼumoʼoboʼ. Tsʼoʼoleʼ tu suciokíintoʼob u yotoch Jéeoba,+ le naj u limpiokíinmaj tu kaajil Jerusalénoʼ.
15 Jéeoba u Dios u yúuchben láakʼtsiloʼobeʼ maʼ xuʼul u túuxtik máakoʼob utiaʼal u kʼaʼajsik u yiikʼoʼobiʼ, lelaʼ yaʼab u téenel tu beetaj tumen tu chʼaʼaj óotsilil tiʼ u kaajal bey xan tiʼ le lugar tuʼux kajaʼanoʼ.
16 Chéen baʼaleʼ letiʼobeʼ maʼ xuʼul u burlarkoʼob le máaxoʼob ku túuxtaʼal tu yiknaloʼob tumen le u jaajil Diosoʼ,+ maʼ tu yóotaj u yuʼuboʼob u tʼaanoʼobiʼ,+ yéetel tu burlartubaʼob tiʼ u profetaʼob Dios.+ Maʼ xuʼul u beetkoʼob tak ka pʼuʼuj Jéeoba tu contraʼobiʼ,+ seguernaj u beetkoʼob tak ka pʼáat maʼ tu páajtal u tsʼaʼakaloʼob.
17 Dios túuneʼ tu beetaj u taal u rey le caldeoʼob tu contraʼoboʼ.+ Le rey túunaʼ tu kíimsaj yéetel espada+ le xiʼipalaloʼob teʼ lugar santooʼ,+ maʼ tu chʼaʼaj óotsilil tiʼ le xiʼipalaloʼob yéetel tiʼ le x-chʼúupalaloʼoboʼ, mix tiʼ le chʼijaʼanoʼoboʼ mix tiʼ le kʼojaʼanoʼoboʼ.+ Dioseʼ tu kʼubaj tuláakal baʼal tu kʼab le reyaʼ.+
18 Le reyaʼ tu láaj bisaj tak Babilonia tuláakal le nuʼukuloʼob yanoʼob tu yotoch le u jaajil Diosoʼ, tu bisaj le nuʼukuloʼob nuuktak bey xan le mejentakoʼoboʼ. Tu bisaj xan le koʼokoj baʼaloʼob yanoʼob tu yotoch Jéeobaoʼ bey xan le koʼokoj baʼaloʼob yaan tiʼ le rey bey xan tiʼ le príncipeʼoboʼ.+
19 Tu tóokaj u yotoch le u jaajil Diosoʼ,+ tu jutaj le pakʼ yaan tu baʼpach u kaajil Jerusalénoʼ,+ tu tóokaj tuláakal le nukuch torreʼoboʼ yéetel tu xuʼulsaj tuláakal le baʼaloʼob koʼojtakoʼ.+
20 Letiʼeʼ tu bisaj xan tu luʼumil Babilonia le máaxoʼob maʼ kíimsaʼaboʼoboʼ.+ Letiʼob túuneʼ tu meyajtoʼob le rey+ bey xan u paalaloʼob tak ka káaj u reinar le persaʼoboʼ.+
21 Lelaʼ bey úuchikaʼ utiaʼal ka béeyak le baʼax tu yaʼalaj Jéeoba tiʼ Jeremíasoʼ,+ bey úuchik hasta ka tu láaj boʼotaj u sábadoʼob le luʼumoʼ.+ Le luʼumoʼ jeʼel* tuláakal le kʼiinoʼob xúumpʼattaʼanoʼ, hasta ka tu chukaj 70 años.+
22 Utiaʼal u béeytal le baʼax tu yaʼalaj Jéeoba tiʼ Jeremíasoʼ,+ tu yáax añoil táan u reinar Ciro,+ u reyil Persiaeʼ, Jéeobaeʼ tu péeksaj u puksiʼikʼal Ciro utiaʼal u túuxtik aʼalbil junpʼéel baʼal tiʼ tuláakal tuʼux ku reinar. Le baʼax tu túuxtaj aʼalbiloʼ tu beetaj xan u tsʼíibtaʼal,+ ku yaʼalik beyaʼ:
23 «Lelaʼ letiʼe baʼax ku yaʼalik Ciro, u reyil Persiaoʼ: ‹Jéeoba, u Diosil le kaʼanoʼ, tsʼoʼok u tsʼáaikten tuláakal le gobiernoʼob yaan way luʼumeʼ,+ yéetel tsʼoʼok u yaʼalikten ka in beet junpʼéel u yotoch tu kaajil Jerusalén tu luʼumil Judá.+ Jeʼel máaxak tiaʼan ichil le kaaj meyajtik le Diosaʼ, yanak Jéeoba u Dios tu yiknal, yéetel xiʼik tu kaajil Jerusalén›».+
Notas
^ Ich hebreoeʼ ku yaʼalaʼal kaʼach «100 talentos».
^ Ich hebreoeʼ ku yaʼalaʼal kaʼach «junpʼéel talento».
^ Lelaʼ maʼ xaaneʼ tu káajbal yáaxkʼiin.
^ Wa «tu tsʼoʼokbesaj u leyil le Sábado».
