Filipenses 2:1-30
2 Bey túunoʼ, wa tu yoʼolal Cristo ku páajtal a líiʼskeʼex u yóol uláakʼ máakoʼob, a kiʼimakkúuntkeʼex u yóoloʼob yéetel yaabilaj, a weʼeskeʼex ka tuukuleʼex tu yoʼolaloʼob, a weʼeskeʼextiʼob yaabilaj ku jóokʼol tu tsʼuʼ a puksiʼikʼaleʼex, bey xan a chʼaʼikeʼex óotsilil tiʼobeʼ,
2 chúukbeseʼex in kiʼimak óolal ikil u yantalteʼex junpʼéeliliʼ tuukul, junpʼéeliliʼ yaabilaj, ikil a wantaleʼex junmúuchʼ bey junpʼéeliliʼ wíinklileʼ yéetel ikil a tuukuleʼex junpʼéeliliʼ bixi.+
3 Maʼ a beetkeʼex mix baʼal chéen utiaʼal a kaxtikeʼex baʼateʼel,+ mix tu yoʼolal kaʼanal ichil,+ baʼaxeʼ yéetel kabal óolaleʼ ileʼex u maasil bey maas importanteʼob ke teʼexeʼ.+
4 Tsʼoʼoleʼ maʼ a kaxtikeʼex chéen a wutsileʼex,+ baʼaxeʼ kaxteʼex u yutsil u maasil.+
5 Mantatsʼ tuukulneneʼex jeʼex tuukulnajik Cristo Jesúseʼ,+
6 tumen letiʼeʼ kex kuxaʼan kaʼach bey Dioseʼ,+ mix juntéen máan tu tuukul u ketkuba yéetel Dios.+
7 Maʼ, baʼaxeʼ tu xúumpʼattaj tuláakal baʼax yaantiʼ, tu beetuba bey juntúul esclavoeʼ+ ka kʼuch u beetuba wíinikil.+
8 Tsʼoʼoleʼ maʼ chéen leloʼ, baʼaxeʼ le ka tu beetuba wíinikileʼ, tu mixbaʼalkúuntubaeʼ ka tu yuʼubaj tʼaan kex yanchaj tak u kíimil+ tiʼ junpʼéel u cheʼil muʼyaj.*+
9 Tu yoʼolal xan lelaʼ, Dioseʼ tu tsʼáaj tiʼ Cristo junpʼéel puesto maas nojoch,+ yéetel ichil u yutsileʼ tu tsʼáajtiʼ le kʼaabaʼ maas nojoch tiʼ tuláakal le uláakʼ kʼaabaʼoboʼ,+
10 utiaʼal beyoʼ, tu kʼaabaʼ Jesúseʼ ka xolak tuláakal máak —le máaxoʼob yanoʼob teʼ kaʼanoʼ, teʼ luʼumaʼ bey xan le yanoʼob yáanal luʼumoʼ—,+
11 yéetel tuláakal máakeʼ ka u yaʼal tu táan u maasil máakoʼobeʼ Jesucristoeʼ Yuumtsil+ utiaʼal u alabartaʼal Dios, le Taataoʼ.
12 Le oʼolaleʼ, in sukuʼuneʼex, jeʼex suukil a wuʼuyikeʼex tʼaan le tiaʼanen ta wiknaleʼexoʼ, beora minaʼanen ta wiknaleʼexaʼ, ilawileʼex a maas uʼuyikeʼex tʼaan. Seguernak a kaxtik a salvacióneʼex yéetel saajkilil bey xan yéetel kikilankil.
13 Tumen Dioseʼ letiʼ muʼukʼaʼankúuntikeʼex ikil u tsʼáaikteʼex u tsʼíibolalil yéetel u páajtalil a beetkeʼex wa baʼax; letiʼeʼ bey uts tu tʼaan u beetkoʼ.
14 Seguernak a beetkeʼex tuláakal baʼal x-maʼ tutukchiʼil+ mix yéetel baʼateltʼaanil,+
15 utiaʼal maʼ u yantal a culpaʼex yéetel utiaʼal ka ilaʼakeʼex inocenteʼex, ka ilaʼakeʼex u paalaleʼex Dios+ mix baʼal kʼaas paʼapakʼaʼanteʼex kex tiaʼaneʼex ichil junpʼéel kʼasaʼan generación+ maʼatech u beetik baʼax tojeʼ. Ichil le generaciónaʼ teʼexeʼ táan a léembaleʼex jeʼex sáasiloʼob teʼ yóokʼol kaabaʼ.+
16 Macheʼex tubeel u tʼaanil le kuxtaloʼ,+ utiaʼal ka yanak baʼax oʼolal u kiʼimaktal in wóol tu kʼiinil Cristo, tumen teneʼ in wojleʼ maʼ beyen jeʼex juntúul máak chéen kunel u yáalkabeʼ wa chéen kunel u kíimskuba meyajeʼ.
17 Tsʼoʼoleʼ kex ka pʼáatken jeʼex le u ofrendail vino+ ku weʼekel yóokʼol le sacrificio+ yéetel yóokʼol le meyaj* ka beetkeʼex yoʼolal le fe yaanteʼexoʼ, teneʼ yaan u sen kiʼimaktal in wóol ta wéeteleʼex.
18 Teʼexeʼ bey xan unaj u kiʼimaktal a wóoleʼex tin wéeteloʼ.
19 Teneʼ kin páaʼtikeʼ wa u voluntad Yuumtsil Jesúseʼ yaan in séeb túuxtik Timoteo+ ta wiknaleʼex utiaʼal u líikʼil in wóol le kéen in wojéelt bix u bin tiʼ teʼex.
20 Tumen minaʼanten uláakʼ máak jeʼex Timoteo ka sen tuukulnak ta woʼolaleʼex yéetel u jaajil u yóoleʼ.
21 Tumen tuláakal le u maasil máakoʼoboʼ chéen u yutsiloʼob ku kaxtikoʼob, maʼ le baʼaloʼob yaan yil yéetel Jesucristooʼ.
22 Chéen baʼaleʼ teʼexeʼ a wojleʼex baʼax tsʼoʼok u yeʼesik Timoteo yéetel u kuxtal, tumen jeʼex u beetik juntúul hijotsil+ yéetel u taataeʼ, letiʼeʼ múul meyajnaj tin wéetel bey esclavo utiaʼal u maas tsʼaʼabal ojéeltbil le maʼalob baʼaloʼob ku taal tiʼ Diosoʼ.
23 Le oʼolaleʼ letiʼ le máax in tukultmaj in túuxtik ta wiknaleʼex chéen pʼelak in wilik baʼax kun úuchul tin wéeteloʼ.
24 U jaajileʼ kin confiar tiʼ Yuumtsileʼ maʼ kun xáantaleʼ tak teen bíin xiʼiken ta wiknaleʼex.+
25 Chéen baʼaleʼ beoraaʼ kin tuklik kʼaʼabéet in túuxtik ta wiknaleʼex Epafrodito in sukuʼun, máax in wéet meyaj yéetel u soldado xan Cristo, le máax xan ta túuxteʼex utiaʼal ka u yáanten tiʼ baʼax kʼaʼabéettenoʼ,+
26 tumen letiʼeʼ taak u láaj ilkeʼex, yéetel jach lubaʼan u yóol tumen ta wojéelteʼex kʼojaʼanchaji.
27 U jaajileʼ, jach óolak kíimik le ka kʼojaʼanchajoʼ, chéen baʼaleʼ Dioseʼ tu chʼaʼaj óotsilil tiʼ letiʼ, bey xan tiʼ teen, utiaʼal maʼ u maas yaʼabtal baʼaxoʼob beetik u yaatal in wóol.
28 Le oʼolaleʼ táan in túuxtik tu séebaʼanil utiaʼal u kaʼa kiʼimaktal a wóoleʼex le kéen a wileʼex, yéetel teneʼ ka xuʼuluk in sen chiʼichnaktal.
29 Le beetkeʼ kʼameʼex yéetel kiʼimak óolal tu kʼaabaʼ Yuumtsil jeʼex suukileʼ, maʼ u xuʼulul a weʼeskeʼex yaabilaj tiʼ máakoʼob jeʼex letiʼeʼ,+
30 tumen ikil u meyajtik Cristoeʼ* óolak kíimik; tu tsʼáaj u kuxtal tu chiʼ kíimil utiaʼal u yáantken tiʼ le baʼaxoʼob kʼaʼabéetchajten le ka pʼáat minaʼaneʼex tin wiknaloʼ.+
Notas
^ Ilawil «U cheʼil muʼyaj», página 2584.
^ Wa «le santo meyaj».
^ Uláakʼ bix u traducirtaʼaleʼ «ikil u meyajtik Yuumtsileʼ».
