Hebreos 11:1-40
11 Fejeʼ letiʼe u jach creertik máak yaan u yúuchul le baʼax táan u páaʼtikoʼ.+ Juntúul máak yaan u fejeʼ convencido de ke jach jaaj le baʼax ku creerkoʼ kex maʼ tu páajtal u yilaʼal.
2 Yaʼab tiʼ le máakoʼob kuxlajoʼob úuchjeakiloʼ* tu yeʼesoʼob junpʼéel fe beyaʼ le beetik tu kiʼimakkúuntoʼob u yóol Dios.
3 Tu yoʼolal fejeʼ k-tsʼáaik cuentaeʼ le baʼaxoʼob beetaʼanoʼoboʼ tsʼaʼaboʼob tu tsoolol jeʼex úuchik u yaʼalik Dioseʼ. Bey túunoʼ tiʼ Dioseʼ meyajnaj baʼaloʼob maʼ tu páajtal u yilaʼaloʼob utiaʼal u beetik baʼaloʼob ku páajtal u yilaʼaloʼob.
4 Tu yoʼolal fejeʼ Abeleʼ tu kʼubaj tiʼ Dios junpʼéel sacrificio maas maʼalob ke le tu kʼubaj Caínoʼ.+ Tu yoʼolal le fe tu yeʼesaj Abeloʼ Dioseʼ tu kʼamaj u sacrificio+ yéetel beyoʼ tu yeʼesaj toj u kuxtal. Tsʼoʼoleʼ kex kíimeʼ láayliʼ táan k-kaanbal+ tiʼ le fe tu yeʼesoʼ.
5 Tu yoʼolal fejeʼ Enokeʼ+ bisaʼab táanxel tuʼux utiaʼal maʼ u yilik le kíimiloʼ, yéetel mix tuʼux kaxtaʼabi tumen Dioseʼ tu bisaj táanxel tuʼux.+ Chéen baʼaleʼ táanil tiʼ u bisaʼal Enokeʼ Dioseʼ tu yeʼesaj jach ku lúubul utsil tiʼ.
6 Wa minaʼan u fe máakeʼ maʼ tu páajtal u lúubul utsil tiʼ Dios, tumen le máax ku natsʼkuba tu yiknal Dioseʼ kʼaʼabéet u creertik jach tu jaajil yaan Dios. Kʼaʼabéet xan u creertik jach tu jaajil ku tsʼáaik baʼaloʼob maʼalobtak tiʼ le máaxoʼob ku tsʼáaik u yóol u kaxtoʼob utiaʼal u adorartoʼoboʼ.+
7 Tu yoʼolal fejeʼ Noéeʼ+ tu yuʼubaj u tʼaan* Dioseʼ ka tu beetaj junpʼéel arca+ utiaʼal u salvarkuba letiʼ yéetel u láakʼtsiloʼob. Lelaʼ tu beetaj le ka aʼalaʼabtiʼ tumen Dios yaan u yúuchul baʼaloʼob mix juntéen ilaʼakoʼob.+ Tu yoʼolal u fejeʼ tu yeʼeseʼ le yóokʼol kaabaʼ ku náajaltik u xuʼulsaʼal.+ Tu yoʼolal u fejeʼ aʼalaʼab toj u kuxtal tu táan Dios.
8 Tu yoʼolal fejeʼ Abraháneʼ+ le ka tʼaʼaneʼ tu beetaj le baʼax aʼalaʼabtiʼoʼ ka jóokʼ u binbal tiʼ le lugar kun tsʼaabil bey herencia tiʼoʼ, letiʼeʼ jóokʼ u binbal kex maʼ u yojel tuʼuxiʼ.+
9 Tu yoʼolal fejeʼ kuxlaj bey juntúul j-táanxel luʼumil teʼ luʼum aʼalaʼab u tsʼaʼabaltiʼoʼ, kajlaj jeʼex u kajtal máak tiʼ junpʼéel luʼum maʼ u tiaʼaleʼ.+ Kajlaj tiʼ najoʼob beetaʼanoʼob yéetel nookʼ,+ yéetel bey xan úuchik u kajtal Isaak yéetel Jacob teʼ luʼum jeʼeloʼ, tumen tak tiʼ letiʼob tu yaʼalaj Dios u tsʼáaik.+
10 Abraháneʼ tu beetaj lelaʼ tumen táan kaʼach u páaʼtik le kaaj jach tu jaajil yaan u cimientoiloʼoboʼ. Le kaajaʼ Dios beetmil yéetel letiʼ u arquitectoil.+
11 Tu yoʼolal fejeʼ Saraeʼ tsʼaʼabtiʼ u páajtalil u yantal u paalal kex tsʼoʼok u máan u edadil tiʼ.+ Letiʼeʼ u yojleʼ le máax tsʼáa le promesaoʼ ku béeykuntik baʼax ku yaʼalik.*
12 Bey túunoʼ tu yoʼolal juntúul máak ku tuklaʼal kaʼach maʼ tu páajtal u yantal u paalaleʼ*+ yanchaj yaʼab máakoʼob+ jeʼex u yaʼabil u estrellailoʼob kaʼaneʼ, yéetel sen yaʼabchajoʼob jeʼex le arena yaan tu jáal le kʼáaʼnáab mix máak ku páajtal u xokikoʼ.+
13 Tak le ka kíim le máakoʼobaʼ láayliʼ yaan u fejoʼobeʼ. Tsʼoʼoleʼ kex maʼ béeychajak kaʼach le baʼaxoʼob aʼalaʼabtiʼoboʼ+ utiaʼaloʼobeʼ bey tsʼoʼok u yilkoʼob u béeytaloʼobeʼ.+ Letiʼobeʼ tu táan tuláakal máak tu yaʼaloʼob de ke j-táanxel luʼumiloʼob yéetel chéen uʼulaboʼob teʼ luʼum tuʼux yanoʼoboʼ.
14 Le máaxoʼob ku tʼaanoʼob beyaʼ ku chíikbeskoʼob jach u tsʼaamaj u yóol u kaxtoʼob junpʼéel lugar utiaʼal u pʼáatloʼob kajtaliʼ.
15 Chéen baʼaleʼ wa ka seguernak u kʼaʼajsikoʼob kaʼach le lugar tuʼux lukʼoʼoboʼ+ jeʼel u kaxtikoʼob kaʼach bix jeʼel u suutoʼobeʼ.
16 Pero beoraaʼ táan u yilik u tiaʼalintikoʼob junpʼéel lugar maas maʼalob, junpʼéel lugar yaan baʼax u yil yéetel le kaʼanoʼ. Dioseʼ maʼatech u suʼlaktal tu yoʼolaloʼob ikil u yaʼalikoʼob u Diosoʼob,+ tumen letiʼeʼ tsʼoʼok u preparartik junpʼéel kaaj utiaʼaloʼob.+
17 Tu yoʼolal fejeʼ Abraháneʼ le ka probartaʼabeʼ+ jeʼel u páajtal u yaʼalaʼal tu kʼubaj Isaakeʼ. Abraháneʼ tu kʼamaj yéetel kiʼimak óolal le promesaoʼ yéetel tu yóotaj u kʼub u juntúuliliʼ paal.+
18 Lelaʼ tu yóotaj u beet kex aʼalaʼantiʼ kaʼach: «Le a paalal kun antaloʼ tiʼ Isaak kun taal».+
19 Chéen baʼaleʼ Abraháneʼ ku creertik kaʼach de ke Dioseʼ jeʼel u páajtal u líiʼsik u hijo ichil le kimenoʼoboʼ. Tsʼoʼoleʼ jeʼel u páajtal u yaʼalaʼaleʼ bey líiʼsbil beetaʼabik u hijo ichil le kimenoʼoboʼ. Lelaʼ tu yeʼesaj baʼax kun úuchul le kéen máanak kʼiin.+
20 Tu yoʼolal fejeʼ Isaakeʼ tu bendecirtaj Jacob+ yéetel Esaú,+ tu yaʼalaj bix kun bintiʼob kéen máanak kʼiin.
21 Tu yoʼolal fejeʼ Jacobeʼ le taʼaytak u kíimiloʼ+ tu bendecirtaj cada juntúul tiʼ u hijoʼob José,+ yéetel xolaj adorar táan u jetsʼik u muukʼ yóokʼol u xóolteʼ.+
22 Tu yoʼolal fejeʼ Joséeʼ le taʼaytak u kíimiloʼ tʼaanaj tiʼ u jóokʼbal le israelitaʼob tiʼ u luʼumil Egiptooʼ, tsʼoʼoleʼ tu yaʼalaj xan baʼax u kʼáat ka beetaʼak yéetel u baakeloʼob.*+
23 Tu yoʼolal fejeʼ u taataʼob Moiséseʼ tu taʼakoʼob Moisés desde ka síiji,+ lelaʼ tu beetoʼob durante tres meses. Letiʼobeʼ tu taʼakoʼob tumen tu yiloʼob jach kiʼichkelem,+ yéetel maʼ tu chʼaʼajoʼob saajkil tiʼ baʼax u yaʼalmaj le reyoʼ.+
24 Tu yoʼolal fejeʼ Moiséseʼ le ka nojochchajeʼ+ maʼ tu yóotaj ka aʼalaʼak wa letiʼeʼ u hijo le princesaoʼ,*+
25 baʼaxeʼ maas tu yóotaj ka maltratartaʼak paʼteʼ yéetel u kaajal Dios ke ka u kiʼimakkúunt u yóol junsúutuk yéetel le kʼebanoʼ.
26 Moiséseʼ tu yilaj maas maʼalob ka muʼyajnak jeʼex juntúul máax yéeyaʼaneʼ* ke ka yanaktiʼ u ayikʼaliloʼob Egipto. Letiʼeʼ tu chʼikaj u paakat tiʼ le boʼol kun tsʼaabiltiʼoʼ.
27 Tu yoʼolal fejeʼ tu pʼataj Egipto,+ yéetel maʼ tu chʼaʼaj saajkil tiʼ le reyoʼ.+ Letiʼeʼ chúukpaj u yóol u aktáant le problemasoʼ tumen bey táan kaʼach u yilik Dioseʼ, le máax maʼ tu páajtal u yilaʼaloʼ.+
28 Tu yoʼolal fejeʼ tu festejartaj le Pascuaoʼ* yéetel tu wiʼiwitsʼaj kʼiʼikʼ tu marcoil le joonajoʼoboʼ, utiaʼal beyoʼ u ángel Dioseʼ maʼ u kíimsik u yáax hijoʼob le israelitaʼoboʼ.+
29 Tu yoʼolal fejeʼ le kaajoʼ tu kʼáatmáansaj le Mar Rojo jeʼex u máan máak yóokʼol tikin luʼumeʼ,+ chéen baʼaleʼ le egipcioʼoboʼ láaj búuloʼob le ka tu yóotoʼob kʼáatmáanoʼ.+
30 Tu yoʼolal fejeʼ le israelitaʼoboʼ marcharnajoʼob ichil siete días tu baʼpach u pakʼiloʼob Jericó, ka túun láaj níik le pakʼoʼoboʼ.+
31 Tu yoʼolal fejeʼ Rahab le koʼolel chéen bey u máanoʼ maʼ kíim paʼteʼ yéetel le máakoʼob maʼ tu yuʼuboʼob tʼaanoʼ, tumen letiʼeʼ tu kʼamaj yéetel kiʼimak óolal le máaxoʼob bin u chʼúuktoʼob le kaajoʼ.+
32 ¿Tiʼ máax uláakʼ jeʼel in tʼaaneʼ? U jaajileʼ jeʼel u bineltikten tiempo wa ka tʼaanaken tiʼ Gedeón,+ Barak,+ Sansón,+ Jefté,+ David+ bey xan tiʼ Samuel+ yéetel tiʼ le u maasil profetaʼoboʼ.
33 Tu yoʼolal fejeʼ letiʼobeʼ baʼatelnajoʼob tu contra reyoʼobeʼ ka ganarnajoʼob,+ tu beetoʼob baʼax toj tu táan Dios, tu yoʼolal leloʼ Dioseʼ yaan baʼax tu yaʼalaj u tsʼáaiktiʼob.+ Letiʼob xaneʼ tu nupʼoʼob u chiʼ leónoʼob,+
34 tu luʼsoʼob u muukʼ le kʼáakʼoʼ,+ púutsʼoʼob tiʼ u yej espada,+ tsʼaʼab u muukʼoʼob tumen Dios.+ Letiʼobeʼ jach yanchaj páajtalil tiʼob utiaʼal u baʼateloʼob,+ tu yáalkabaansoʼob le soldadoʼob taaloʼob baʼateʼel tu contraʼoboʼ.+
35 Yanchaj koʼoleloʼob kaʼa kuxkíintaʼab u láakʼtsiloʼob kimenoʼob,+ chéen baʼaleʼ uláakʼ máakoʼobeʼ kex jach beetaʼab u muʼyajoʼobeʼ maʼ tu xulaj u meyajtikoʼob Dios utiaʼal ka jáalkʼabtaʼakoʼobiʼ. Letiʼobeʼ bey úuchik u beetkoʼoboʼ utiaʼal xan ka líiʼsaʼakoʼob ichil le kimenoʼoboʼ chéen baʼaleʼ maas maʼalob ke le bix líiʼsaʼabik u maasiloʼoboʼ.
36 Uláakʼoʼob xaneʼ burlartaʼaboʼob yéetel jaʼajatsʼaʼaboʼob, tsʼoʼoleʼ maʼ chéen leloʼ, kʼaʼaxoʼob xan yéetel cadenaʼob+ yéetel oksaʼaboʼob cárcel.+
37 Yanoʼobeʼ muruxtuntaʼaboʼob,+ probartaʼab u fejoʼob, jóoʼsaʼab kaʼabúuj tiʼob,* wa kíimsaʼaboʼob yéetel espada.+ Uláakʼoʼobeʼ máanoʼob jejeláas tuʼux u búukintmoʼob u kʼéewelil taman yéetel u kʼéewelil chivo,+ letiʼobeʼ tu máansoʼob óotsilil, muʼyajnajoʼob+ yéetel maltratartaʼaboʼob.+
38 Le yóokʼol kaabaʼ maʼ tu náajaltik kaʼach ka yanak le jach utsul máakoʼob ichilaʼ. Le máakoʼobaʼ máanoʼob tiʼ desiertoʼob, tiʼ montañaʼob, yéetel tu taʼakubaʼob tiʼ sajkaboʼob+ bey xan tiʼ áaktunoʼob.
39 Chéen baʼaleʼ tuláakal le máakoʼobaʼ kex kʼaʼamoʼob tumen Dios yoʼolal u fejoʼobeʼ letiʼobeʼ maʼ páajchaj u yilkoʼob u béeytal le baʼax prometertaʼanoʼ.
40 Lelaʼ bey úuchikaʼ tumen Dioseʼ u chʼaʼtukultmaj u tsʼáaiktoʼon junpʼéel baʼal maas maʼalob,+ beyoʼ letiʼob yéetel toʼoneʼ junmúuchʼ ken k-chúukaʼantal tiʼ tuláakal baʼal.
Notas
^ Wa «Yaʼab tiʼ le k-úuchben láakʼtsiloʼoboʼ».
^ Wa «tu chʼaʼaj saajkilil tiʼ».
^ Wa «jeʼel u páajtal u confiar máak tiʼ letiʼeʼ».
^ Wa «kimeneʼ».
^ Wa «baʼax u kʼáat ka beetaʼak utiaʼal u muʼukul».
^ Wa «u hijo u hija Faraóniʼ».
^ Ich griegoeʼ ku yaʼalaʼal kaʼach «Cristo».
^ Ilawil página 2575.
^ Wa «jóoʼsaʼab yaʼab xéexetʼal tiʼ u wíinkliloʼob».
