Salmos 115:1-18
115 Jéeoba Dios, toʼoneʼ mix baʼal unaj u tsʼaʼabaltoʼon, mix baʼal k-merecertik,pero a kʼaabaʼeʼ ku merecertik u alabartaʼal,+tumen nojoch a yaabilaj yéetel chúukaʼan a wóol.+
2 ¿Baʼaxten unaj u yaʼalik le kaajoʼob:
«¿Tuʼux yaan a Dioseʼex?»?+
3 K-Dioseʼ tiaʼan teʼ kaʼanoʼ,letiʼeʼ ku beetik tuláakal baʼax uts tu tʼaan.
4 Pero le imagenoʼob ku adorartik le kaajoʼoboʼ beetaʼan de plata yéetel de oro,chéen wíinik beetmiloʼob.+
5 Yaan u chiʼob, pero maʼ tu páajtal u tʼaanoʼob.+
Yaan u yichoʼob, pero maʼ tu páajtal u paakatoʼob.
6 Yaan u xiknoʼob, pero maʼ tu páajtal u yuʼubikoʼob mix baʼal.
Yaan u niʼob, pero maʼ tu páajtal u yuʼubikoʼob u book mix baʼal.
7 Yaan u kʼaboʼob, pero maʼ tu páajtal u machkoʼob mix baʼal.
Yaan u yookoʼob, pero maʼ tu páajtal u xíimbaloʼob.+
Jach mix junpʼéel ruido ku páajtal u beetkoʼob yéetel u kaaloʼob.+
8 Le máaxoʼob beetkoʼoboʼ yaan u pʼáatloʼob jeʼex letiʼoboʼ,+bey xan le máaxoʼob ku confiaroʼob tiʼ letiʼoboʼ.+
9 U kajnáalileʼex Israel, kʼub a wóoleʼex tiʼ Jéeoba,+letiʼ áantkeʼex, bey junpʼéel escudo yanil tiʼ teʼexeʼ.+
10 U paalal Aarón,+ kʼub a wóoleʼex tiʼ Jéeoba,letiʼ áantkeʼex, bey junpʼéel escudo yanil tiʼ teʼexeʼ.
11 Teʼex ka adorarkeʼex Jéeobaeʼ, kʼub a wóoleʼex tiʼ Jéeoba,+letiʼ áantkeʼex, bey junpʼéel escudo yanil tiʼ teʼexeʼ.+
12 Jéeobaeʼ maʼatech u tuʼubsikoʼon, yaan u bendecirkoʼon.
Yaan u bendecirtik u kaajil Israel,+yaan u bendecirtik u paalal Aarón.
13 Jéeobaeʼ yaan u bendecirtik le máaxoʼob adorarkoʼ,le mejentakoʼoboʼ bey xan le nuuktakoʼoboʼ.
14 Jéeobaeʼ yaan u beetik a yaʼabtaleʼex,teʼex yéetel a paalaleʼex.+
15 Bendecirtaʼakeʼex tumen Jéeoba,+le Máax Beetmil le kaʼan yéetel le luʼumoʼ.+
16 Le kaʼanoʼ u tiaʼal Jéeoba,+pero le luʼumoʼ u tsʼaamaj tiʼ wíinik.+
17 Le kimenoʼoboʼ maʼatech u alabarkoʼob Jéeoba,*+maʼatech u alabartaʼal tumen le máaxoʼob ku binoʼob yáanal luʼumoʼ.+
18 Pero toʼoneʼ yaan k-alabartik Jéeoba,*desde bejlaʼeʼ tak kʼiinoʼob minaʼan u xuul.
¡Alabartaʼak Jéeoba!*
Notas
^ Ich hebreoeʼ ku yaʼalaʼal kaʼach «Jah». Lelaʼ u abreviaciónil le kʼaabaʼ Jéeobaoʼ.
^ Ich hebreoeʼ ku yaʼalaʼal kaʼach «Jah». Lelaʼ u abreviaciónil le kʼaabaʼ Jéeobaoʼ.
^ Ich hebreoeʼ ku yaʼalaʼal kaʼach «Jah». Lelaʼ u abreviaciónil le kʼaabaʼ Jéeobaoʼ.
