Jeʼex tsʼoʼok a wilik teʼ folletoaʼ, le Bibliaoʼ ku tsʼáaik yaʼab tsolnuʼukoʼob jeʼel u yáantkecheʼ yéetel jeʼel u yáantik a familiaeʼ. Jéeobaeʼ u kʼáat ka yanakteʼex kiʼimak óolal. Tsʼoʼoleʼ wa ka tsʼáaikeʼex táanil a meyajtikeʼexeʼ «tuláakal túun le uláakʼ baʼaloʼobaʼ yaan xan u tsʼaʼabalteʼex» (Mateo 6:33). Dioseʼ u kʼáat ka a amigote. Le oʼolaleʼ ilawil baʼax jeʼel a beetik utiaʼal a maas biskaba tu yéeteleʼ, tumen lelaʼ letiʼe baʼax maas maʼalob jeʼel u beetik máakoʼ (Mateo 22:37, 38).

LE BIBLIAOʼ KU YAʼALIK: «‹Teneʼ yaan in beetkinba taatatsil tiʼ teʼex, yéetel teʼexeʼ yaan a kʼuchul a beetabaʼex in hijoʼex yéetel teʼexeʼ in hijaʼex›, ku yaʼalik Jéeoba, le Máax jach táaj yaan u poderoʼ» (2 Corintios 6:​18). Dioseʼ u kʼáat u bisuba ta wéetel, le oracionoʼ ku yáantkech a natsʼaba tiʼ letiʼ. Jéeobaeʼ ku yaʼalik: «Maʼ u jáawal a orareʼex» (1 Tesalonicenses 5:​17). Letiʼeʼ uts tu tʼaan ka a tsikbalttiʼ baʼax ka tuklik yéetel bix a wuʼuyikaba (Filipenses 4:6). Wa ka orar yéetel a familiaeʼ, yaan u yilkoʼob ka creertik yaan Dios.

Baʼaleʼ maʼ chéen unaj a waʼalik tiʼ Dios baʼax ka tuklikiʼ, kʼaʼabéet xan a wuʼuyik u tʼaan. ¿Bix jeʼel a beetkeʼ? Letiʼe ken a xok le Biblia yéetel le jóoʼsaʼaniloʼoboʼ (Salmo 1:1, 2). Tuukulnen tiʼ baʼax ka xokik (Salmo 77:11, 12). Utiaʼal a wuʼuyik xan u tʼaan Dioseʼ kʼaʼabéet a bin teʼ muchʼtáambaloʼoboʼ (Salmo 122:1-4).

Uláakʼ baʼax jeʼel u yáantkech a bisaba yéetel Jéeobaeʼ letiʼe ka tsikbalt tiʼ uláakʼ máakoʼob baʼax ku kaʼansikoʼ. Wa jach ka tʼaan tiʼ letiʼeʼ, maas yaan a náatsʼal tu yiknal (Mateo 28:19, 20).

BEET LELAʼ:

• Jóoʼs tiempo utiaʼal a orar yéetel a xokik le Biblia sáamsamaloʼ

• Áant a familia u tsʼáa táanil u meyajt Dios maʼ le náaysaj óoloʼoboʼ

LE BIBLIAOʼ KU YAʼALIK: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8). Jóoʼs u kʼiinil yéetel u yorail utiaʼal u yantalteʼex le adoración ich familiaoʼ * (Génesis 18:​19). Baʼaleʼ utiaʼal u biskuba a familia yéetel Dioseʼ sáamsamal unaj a chʼaʼikeʼex en cuentail baʼax ku yaʼalik. Le Bibliaoʼ ku yaʼalik: «Kʼaʼabéet a kaʼansik tiʼ a paalaleʼex yéetel a tsikbaltikeʼextiʼob [baʼax ku yaʼalik Jéeoba] le kéen kulakeʼex ta wotocheʼex, le kéen xíimbalnakeʼex teʼ bejoʼ, le kéen chilakeʼex bey xan le kéen líiʼkeʼex» (Deuteronomio 6:​6, 7). Chʼaʼtukult a beetkeʼex jeʼex Josueeʼ, letiʼeʼ tu yaʼalaj: «Teen yéetel le máaxoʼob yanoʼob tin wotochoʼ yaan k-meyajtik Jéeoba» (Josué 24:15).

BEET LELAʼ:

• Beet u programail baʼax ken a xokeʼex yéetel chʼaʼ en cuentail baʼax kʼaʼabéet tiʼ cada juntúul máax yaan ichil a familia