Ich yaʼab jaʼaboʼobeʼ, toʼon u j-jaajkunajoʼon Jéeobaeʼ t-jóoʼsaj, t-tʼoxaj yéetel meyajnajtoʼon jejeláas bibliaʼob. Baʼaleʼ ka máan kʼiineʼ, t-ilaj u kʼaʼabéetil k-jóoʼsik junpʼéel Biblia séeb jeʼel u naʼataʼaleʼ, beyoʼ le máakoʼoboʼ yaan u kʼuchul «u chúukaʼan kʼaj óoltoʼob» u jaajil jeʼex u kʼáat Diosoʼ (1 Timoteo 2:3, 4). Le oʼolal tu jaʼabil 1950, káaj k-jóoʼsik ich inglés jujunjaats tiʼ le Biblia U Suttʼaanil Túumben Luʼum, lelaʼ tsʼoʼok u traducirtaʼal ich maas tiʼ ciento treinta idiomaʼob, yéetel ilaʼab ka pʼáatak jach jeʼex yanik le úuchben tsʼíiboʼoboʼ.

Kʼaʼabéetchaj u jóoʼsaʼal junpʼéel Biblia séeb u naʼataʼal. Le idiomaʼoboʼ ku kʼexpajloʼob ken máanak kʼiin, le oʼolal yaʼab tiʼ le bibliaʼoboʼ ku pʼáatal talam u naʼataʼal jujunpʼéel tʼaanoʼobiʼ. Tsʼoʼoleʼ yaan úuchben tsʼíiboʼob tsʼoʼok u kaxtaʼaloʼobeʼ, ku yáantajoʼob utiaʼal ka maas naʼataʼak tubeel le tʼaanoʼob ich hebreo, arameo yéetel griego, le tʼaanoʼob meyajnajoʼob utiaʼal u tsʼíibtaʼal le Bibliaoʼ.

Kʼaʼabéetchaj u traducirtaʼal junpʼéel Biblia jach jeʼex yanik u Tʼaan Diosoʼ. Le máaxoʼob traducirtik le Bibliaoʼ, unaj u tsʼíibtikoʼob jach le baʼax ku yaʼalik Dios teʼ yáax tsʼíiboʼob beetaʼanoʼoboʼ. Baʼaleʼ tiʼ yaʼab bibliaʼobeʼ, maʼatech u tsʼaʼabal u kʼaabaʼ Diosiʼ: Jéeoba.

Kʼaʼabéetchaj junpʼéel Biblia ka u tsʼáa nojbeʼenil tiʼ le Máax beet u yantaloʼ (2 Samuel 23:2). Teʼ Biblia U Suttʼaanil Túumben Luʼumoʼ, óoliʼ siete mil u téenel ku chíikpajal u kʼaabaʼ Jéeoba jeʼex yanik teʼ úuchben tsʼíiboʼoboʼ, lelaʼ jeʼel u páajtal a wilik teʼ chan oochel yaan kabaloʼ (Salmo 83:18). Jach yaʼab meyaj yanchaj u beetaʼal utiaʼal ka jóoʼsaʼak le Bibliaoʼ, baʼaleʼ lelaʼ jatsʼuts u xoʼokol tumen maʼ talam u naʼataʼal baʼax ku yaʼalik Diosiʼ. Wa yaan, bey xan wa minaʼan le Biblia ichil le idioma ka tʼankoʼ, ilawil ka suukchajak a xokik sáamsamal u Tʼaan Dios (Josué 1:8; Salmo 1:2, 3).

• ¿Baʼaxten kʼaʼabéetchaj u jóoʼsaʼal le Biblia U Suttʼaanil Túumben Luʼumoʼ?

• ¿Baʼax unaj u suuktal u beetik sáamsamal tuláakal le máax taak u yojéeltik baʼax u kʼáat Diosoʼ?