JESUSEʼ tsʼoʼok óoxpʼéel jaʼab yéetel táanchumuk káajak u kʼaʼaytaj, letiʼeʼ u yojel tsʼoʼok u náatsʼal u kʼiinil u kíimil. U nuuktakil le judíoʼoboʼ táan u kaxtik bix jeʼel u kíimskoʼobeʼ, baʼaleʼ saajkoʼob u líikʼil le kaaj tu contraʼoboʼ, tumen ku yilkoʼob Jesús bey utúul profetaeʼ. Satanaseʼ tu kʼaskúuntaj u tuukul Judas, utúul tiʼ le doce apostoloʼob, utiaʼal ka u kon Jesusoʼ. U nuuktakil le judíoʼoboʼ tu boʼotoʼob yéetel treinta u taakʼinil plata.

Teʼ áakʼab ku kʼiimbesaʼal le Pascuaoʼ, Jesuseʼ tu muchʼuba yéetel u apostoloʼob utiaʼal u kʼiimbeskoʼob. Ka tsʼoʼok u yaʼalik tiʼ Judas ka jóoʼkeʼ, Cristoeʼ tu káajsaj upʼéel túumben kʼiimbesaj: u Janal Yuumtsil. Tu chʼaʼaj u xéetʼ waajeʼ ka payalchiʼinaji, ku tsʼoʼoleʼ ka tu máansaj tiʼ le once apostoloʼoboʼ. Ka tsʼoʼokeʼ tu yaʼalaj: «Lelaʼ in wíinklil kʼubaʼan tiʼ kíimil ta woʼolaleʼex. Beeteʼex lelaʼ utiaʼal a kʼaʼajsikeneʼex». Ku tsʼoʼoleʼ tu tsʼáajtiʼob upʼéel copa vinoeʼ, ka tu yaʼalaj: «Le ukʼulaʼ letiʼ le [pacto] jaajkunaʼan yéetel in kʼiʼikʼel[oʼ]» (Lucas 22:19, 20).

Teʼ áakʼab jeʼeloʼ, Jesuseʼ jach yaʼab baʼaxoʼob tu kaʼansaj tiʼ u apostoloʼob. Tu tsʼáaj tiʼ letiʼob upʼéel túumben ley, tu yaʼalajtiʼob ka u paklan yaabiltubaʼob. Letiʼeʼ tu yaʼalajtiʼob: «Wa ka yaabiltkabaʼex ta baatsileʼexeʼ tuláakal yóokʼol kaab [ken] u kʼaj óolteʼ teʼexeʼ in j-kaambaleʼex» (Juan 13:34, 35). Tu yaʼalajtiʼob maʼ u lúubul u yóoloʼob yoʼolal le baʼax kun beetbiltiʼoʼ, ka tsʼoʼokeʼ payalchiʼinaj tu yoʼolaloʼob. Ku tsʼoʼokol u kʼaayoʼobeʼ binoʼob tu jardinil Getsemaní.

Teʼeloʼ Jesuseʼ xolajeʼ ka payalchiʼinaj jach tu jaajil u yóol tiʼ Jéeoba. Le tiaʼanoʼoboʼ, chéen ka jáan kʼuch u jaats soldadoʼob yéetel uláakʼ máakoʼob u chʼaʼamaj u espadaʼob bey xan le j-kʼiinoʼob utiaʼal u machoʼob Jesusoʼ. Utiaʼal u yeʼesiktiʼob máax Jesuseʼ, Judaseʼ tu natsʼuba u tsʼuʼutsʼ jeʼex u yaʼalmiltiʼoboʼ. Le soldadoʼob túunoʼ tu machoʼob Jesús, baʼaleʼ le apostoloʼoboʼ púutsʼoʼob.

Jesuseʼ tu yaʼalaj tu táan u nojoch juezil le judíoʼoboʼ, letiʼeʼ u Hijo Dios. Le máaxoʼob juzgartoʼ tu yaʼaloʼobeʼ leloʼ upʼéel kʼaakʼas tʼaan, yoʼolal lelaʼ jeʼel tak u yaʼalaʼal ka kíimsaʼakeʼ. Tu beetoʼob u bisaʼal tu táan Pilato, u gobernadori Roma. Letiʼeʼ tu yileʼ maʼ jaajtak le baʼaxoʼob ku yaʼalaʼal tu contra Jesusoʼ, baʼaleʼ le máakoʼoboʼ tu sen kʼáatoʼobtiʼ ka u yaʼal ka kíimsaʼak, bey túunoʼ tu kʼubajtiʼob utiaʼal ka u kíimsoʼob.

Jesuseʼ bisaʼab tak tiʼ upʼéel tuʼux ku kʼaabaʼtik Gólgota, teʼeloʼ bajaʼab u kʼaboʼob bey xan u yookoʼob tiʼ upʼéel cheʼ tumen u soldadoiloʼob Roma. Teʼ súutuk jeʼeloʼ, kex óoliʼ bey chúumuk kʼiineʼ, téek éeʼjochʼeʼenchaji. Le ka kíim Jesusoʼ tu tíituba le luʼumoʼ. Ka tsʼoʼokeʼ tsʼaʼab tiʼ upʼéel muknal chʼakaʼan tiʼ tuunich, ka sáaschaj tuláakʼ kʼiineʼ, le j-kʼiinoʼoboʼ tu makoʼob maʼalob u jool yéetel tu pʼatoʼob máaxoʼob kanáantik. ¿Bey wa túun tsʼoʼokik tiʼ Jesusoʼ? Maʼatech, tumen jach taʼaytak u yúuchul le maas nojoch milagro tsʼoʼok u yilaʼaloʼ.

(Chʼaʼabaʼan tiʼ Mateo capítulo 26 yéetel 27, Marcos capítulo 14 yéetel 15, Lucas capítulo 22 yéetel 23 yéetel Juan capítulo 12 tak 19.)