1. ¿Baʼax payalchiʼi ken k-il teʼ xookaʼ?

YAʼABACH máak way yóokʼol kaabeʼ u kʼaj óol u payalchiʼi wa u oracionil le padrenuestrooʼ. Jesús kaʼans utiaʼal u yeʼesik baʼax jeʼel u páajtal u kʼáataʼal tiʼ Dioseʼ yéetel jach nojoch baʼax u kʼáat u yaʼale. Koʼox ilik le yáax óoxpʼéel baʼal ku kʼáataʼal teʼ payalchiʼaʼ, beyoʼ yaan a naʼatik tubeel baʼax jach ku kaʼansik le Bibliaoʼ.

2. ¿Baʼax óoxpʼéel baʼal tu yaʼalaj Jesús jeʼel u páajtal k-kʼáatik tiʼ Dioseʼ?

² Jesuseʼ tu yaʼalaj tiʼ máaxoʼob chʼenxikintik: «Payalchiʼineneʼex beyaʼ: K-Yuum yanech teʼ j-kaʼanoʼ, kiliʼichkúunsaʼak [wa santificartaʼak] a kʼaabaʼ. Taalak a [Reino]. Beetaʼak baʼax a kʼáat way luʼumeʼ jeʼel bix u beetaʼal teʼ j-kaʼanoʼ» (Mateo 6:9-13). ¿Baʼax u kʼáat yaʼal le óoxpʼéel baʼal ku kʼáataʼal tiʼ Diosaʼ?

3. ¿Baʼax kʼáatchiʼiloʼob unaj k-núukik?

³ Yaʼab baʼax tsʼoʼok kanik tiʼ u kʼaabaʼ Dios. Tsʼoʼok xan k-ilik baʼax tsʼoʼok u beetik tu yoʼolal wíinikoʼob yéetel baʼax ken u beet maʼ tun xáantal tu yoʼolaloʼob. Baʼaleʼ ¿baʼax tu tsʼáaj naʼatbil Jesús ka tu yaʼalaj «taalak a [Reino]»? ¿Baʼax u Reino Dios? U taalbaleʼ, ¿bix u santificartik u kʼaabaʼ Dios? ¿Baʼax yaan u yil u taalbal le Reino yéetel ka béeyak baʼax u kʼáat Diosoʼ?

4. ¿Baʼax u Reino Dios, yéetel máax u Reyil?

⁴ U Reino Dioseʼ upʼéel gobierno tsʼaʼan tumen Jéeoba. U Reyileʼ letiʼ xan yéeymil. ¿Máax túun le Rey u yéeymoʼ? Jesucristo. Jesuseʼ maas jach nojoch tu tséel le jalaʼach wíinikoʼoboʼ, le oʼolal ku yaʼalaʼal «u Yuumtsil yuumtsiloʼob yéetel u [Rey reyoʼob]» (Apocalipsis 17:14). Jesuseʼ jach yaan u páajtalil utiaʼal u beetik yaʼab baʼaloʼob maʼalobtak; mix utúul jalaʼach wíinik ku páajtal u ketkuba tu yéetel, kex jeʼel bukaʼaj maʼalob baʼaloʼob ka u beeteʼ.

5. ¿Tuʼux yaan u Reino Dios, yéetel yóokʼol baʼax kun gobernar?

⁵ ¿Tuʼux kun antal u Reino Dios utiaʼal u gobernar? Utiaʼal k-núukikeʼ tukle: ¿tuʼux yaan Jesús? Jeʼex tsʼoʼok a kanikoʼ, le ka tsʼoʼok u kíimsaʼal yéetel u kaʼa kuxkíintaʼaleʼ, suunaj teʼ kaʼanoʼ (Beetaʼanoʼob 2:23). U Reino Dios túuneʼ tiʼ yaan teʼ kaʼanoʼ. Le beetik tiʼ le Reinooʼ ku yaʼalaʼal «u [reinoi] kaʼan» (Mateo 4:17). Kex tiʼ yaan teʼ kaʼanoʼ, yaan u gobernar yóokʼol le Luʼumaʼ (Apocalipsis 11:15).

6, 7. ¿Baʼaxten Jesuseʼ utúul jach maʼalob Rey?

⁶ Jesuseʼ utúul jach maʼalob Rey. ¿Baʼaxten k-aʼalik lelaʼ? Yáaxeʼ, mix bikʼin kun kíimil. Jesuseʼ maʼ jeʼex le jalaʼach wíinikoʼoboʼ, le beetik le Bibliaoʼ ku yaʼalik tu yoʼolal: «Chéen letiʼ [...] maʼ tu kíimil [...,] kuxaʼan tiʼ sáasil tuʼux mix máak ku páajtal u natsʼikubaiʼ» (1 Timoteo 6:16). Le oʼolal tuláakal baʼax ken u beeteʼ utiaʼal mantatsʼ u yutsil, yéetel yaʼab maʼalob baʼaloʼob ken u beete.

⁷ Le Biblia ku yaʼalik tu yoʼolal Jesús: «U pixan Yuumtsileʼ, tiʼ bíin yanak mantatsʼ tu yóokʼoleʼ, utiaʼal [u tsʼáaik naʼatil tiʼ], sáasil tuukul, ojéelajil, [...] muukʼ, kʼaj óolal yéetel u sajbeʼentsil Yuumtsil. Maʼ bíin pʼis óolnak chéen tu yoʼolal baʼax ku tsikbaltaʼaliʼ, maʼ bíin [juzgarnak] chéen tu yoʼolal x-mukul tʼaanoʼobiʼ[.] Bíin toj pʼis óolnak utiaʼal le [óotsiloʼoboʼ], bíin u kanáant ka tsʼaʼabak baʼaxoʼob ku náajmatikoʼob» (Isaías 11:2-4). Le tʼaanoʼobaʼ ku  yeʼeskoʼobeʼ Jesuseʼ, yáanal u Reinoeʼ, yaan u beetik baʼax toj yéetel yaan u chʼaʼik óotsilil tiʼ wíinikoʼob. ¿Maʼ wa ta tsʼíiboltik utúul gobernante jeʼex letiʼoʼ?

8. ¿Máaxoʼob kun gobernar yéetel Jesús?

⁸ Baʼaleʼ Jesuseʼ maʼ tu juun kun gobernariʼ, yaan uláakʼ máakoʼob kun gobernaroʼob tu yéetel. Le apóstol Pablooʼ tu yaʼalaj tiʼ Timoteoeʼ, wa ku chúukpajal u yóoloʼobeʼ, «yaan [u reinaroʼob] tu yéetel» Cristo (2 Timoteo 2:12). Jach beyoʼ, Pablo, Timoteo yéetel uláakʼ utsul máakoʼob yéeyanoʼob tumen Dioseʼ yaan u gobernaroʼob yéetel Jesús teʼ kaʼanoʼ. ¿Jaytúul le yéeyaʼanoʼoboʼ?

9. ¿Jaytúul máak kun gobernar yéetel Jesús, yéetel baʼax kʼiin ka káaj u yéeyaʼaloʼob?

⁹ Jeʼex t-ilaj tu 7 xookil le libroaʼ, le apóstol Juanoʼ tsʼaʼab u yil utúul «j-taman [wa Jesús] waʼalakbal yóokʼol u puʼukil [Sión] [wa le tuʼux yaan teʼ kaʼan bey Reyiloʼ]. Tu yéeteleʼ yaan ciento cuarenticuatro mil máakoʼob tsʼíibtaʼan tu táan joʼoloʼobeʼ u kʼaabaʼ le j-tamanoʼ yéetel u kʼaabaʼ u Taata». ¿Máaxoʼob le 144,000 máakoʼobaʼ? Le apóstol Juanoʼ ku yaʼaliktoʼon máaxoʼobiʼ: «Leloʼobaʼ letiʼ le máaxoʼob [...] táan u binoʼob tu paach le j-tamanoʼ jeʼel tuʼuxak ka xiʼikeʼ. Toʼokoʼob tiʼ ichil [le máakoʼob] bey yáax siibal utiaʼal Jajal Dios yéetel utiaʼal le j-tamanoʼ» (Apocalipsis 14:1, 4). Le 144,000 máakoʼob túunaʼ, disipuloʼob tiʼ Cristo yéeyaʼanoʼob utiaʼal u gobernaroʼob tu yéetel teʼ kaʼanoʼ. Ken tsʼoʼokok u kíimloʼob yéetel u kaʼa kuxkíintaʼaloʼob teʼ kaʼanoʼ, yaan u reinaroʼob yéetel Jesús tu yóokʼol le Luʼumaʼ (Apocalipsis 5:10). Dioseʼ tu kʼiinil le apostoloʼob ka káaj u yéeyik le 144,000 máakoʼobaʼ.

10. Jéeobaeʼ, ¿baʼaxten jach uts úuchik u tsʼáaik Jesús yéetel le 144,000 máakoʼob utiaʼal u gobernarkoʼob le Luʼumaʼ?

¹⁰ Jéeobaeʼ jach uts úuchik u tsʼáaik Jesús yéetel le 144,000 máakoʼob utiaʼal u gobernarkoʼob le Luʼumaʼ. Yáaxeʼ, Jesuseʼ síij bey wíinikeʼ, le oʼolal u kʼaj óol u muʼyaj  wíinikoʼob. Pabloeʼ tu yaʼaleʼ Jesuseʼ «ku páajtal u chʼaʼik toʼon óotsilil tu yoʼolal u minaʼanil k-muukʼ tumen letiʼ xaneʼ tu mukʼyajtaj tuláakal u jejeláasil [talamiloʼob] jeʼel bix toʼoneʼ, baʼaleʼ maʼ j-kʼebanchajiʼ» (Hebreob 4:15; 5:8). Le máaxoʼob kun gobernar tu yéeteloʼ tsʼoʼok xan u muʼyajtikoʼob baʼaxoʼob ku muʼyajtik wíinikoʼob. Tsʼoʼok u baʼateltik maʼ u lúubloʼob tiʼ u tsʼíibolal u bakʼeloʼob yéetel tsʼoʼok xan u muʼyajtikoʼob u jejeláasil kʼojaʼanil. Le oʼolal ku páajtal u naʼatkoʼob baʼax talamiloʼob ku muʼyajtik wíinik.

11. ¿Baʼaxten tu yaʼalaj Jesús tiʼ u disipuloʼob ka u kʼáatoʼob ka beetaʼak baʼax u kʼáat Dios teʼ kaʼanoʼ?

¹¹ Jesuseʼ maʼ chéen tu yaʼalaj ka kʼáataʼak tiʼ Dios ka taalak u Reinoiʼ; tu yaʼalaj xan tiʼ u disipuloʼob ka u kʼáatoʼob «ka beetaʼak baʼax u kʼáat [Jéeoba] way luʼumeʼ jeʼel bix u beetaʼal teʼ j-kaʼanoʼ». Teʼ kaʼanoʼ, le utsul angeloʼoboʼ mantatsʼ ku beetkoʼob baʼax u kʼáat Dios. Baʼaleʼ, jeʼex t-kanaj tu 3 xookil le libroaʼ, utúul kʼasaʼan angeleʼ tu xulaj u beetik baʼax u kʼáat Dios yéetel tu beetaj u kʼebantal Adán yéetel Eva. Tu 10 xookil le libroaʼ yaan k-ilik baʼax ku kaʼansik le Biblia tu yoʼolal le kʼasaʼan ángel ku kʼaabaʼtik Satanasaʼ. Letiʼ yéetel uláakʼ angeloʼob tu tsʼáajubaʼob tu tséeleʼ chaʼab u pʼáatloʼob teʼ kaʼan tsʼeʼetsʼek kʼiinoʼoboʼ. Tu kʼiiniloʼob túun Jesuseʼ, maʼ tuláakal le angeloʼob yanoʼob teʼ kaʼan táan u beetkoʼob kaʼach baʼax u kʼáat Diosoʼ. Baʼaleʼ lelaʼ xuʼul ka káaj u gobernar Jesús teʼ kaʼanoʼ, tumen baʼatelnaj tu contra Satanás (Apocalipsis 12:7-9).

12. Apocalipsis 12:10, ¿baʼax kaʼapʼéel baʼal ku yaʼalik úuchi?

¹² Le Bibliaoʼ tu yaʼalaj yaan u yúuchul lelaʼ: «Tin wuʼuyaj jumpʼéel kʼaʼamkach tʼaan teʼ j-kaʼanoʼ, táan u yaʼalik: Tsʼoʼok u kʼuchul le [salvacionoʼ], le páajtaliloʼ yéetel u [reino] Jajal Dios, yéetel u páajtalil u Cristo; tumen tsʼoʼok  u puʼulul táankab [Satanás,] u j-takpool k-sukuʼunoʼob, le máax takik u pooloʼob yéetel kʼiin yéetel áakʼab tu táan k-Jajal Dios» (Apocalipsis 12:10). Le tekstoaʼ kaʼapʼéel baʼal ku yaʼalik úuchi. Yáaxeʼ, káaj u gobernar u Reino Dios tu kʼab Jesucristo. U kaʼapʼeleʼ, jóoʼsaʼab Satanás teʼ kaʼanoʼ, ka puʼul way Luʼumeʼ.

13. ¿Baʼax úuch ka luʼsaʼab Satanás teʼ kaʼanoʼ?

¹³ Jeʼex ken k-kanil tuláakʼ xookoʼ, le kaʼapʼéel baʼaloʼobaʼ tsʼoʼok u yúuchloʼob. ¿Baʼax úuch ka luʼsaʼab Satanás teʼ kaʼanoʼ? Le Bibliaoʼ ku yaʼalik: «¡Kiʼimakchajak túun a wóoleʼex, kaʼaneʼex, yéetel teʼex kajaʼaneʼex[iʼ!]» (Apocalipsis 12:12). Le utsul angeloʼob túunoʼ kiʼimakchaj u yóoloʼob tumen, úuchik u tojolchʼintaʼal Satanás yéetel u kʼasaʼan angeloʼobeʼ, tuláakal le máaxoʼob pʼáatoʼob teʼ kaʼanoʼ ku yuʼubkoʼob u tʼaan Jéeoba yéetel láaj maʼalob u biskubaʼob. K-ilik túuneʼ, teʼ kaʼanoʼ, táan u beetaʼal baʼax u kʼáat Diosiʼ.

14. ¿Baʼax káaj u yúuchul úuchik u puʼulul Satanás way Luʼumeʼ?

¹⁴ ¿Kux túun teʼ Luʼumaʼ? ¿Baʼax úuchi? Le Bibliaoʼ ku yaʼalik: «[¡]Óotsiloʼob le máaxoʼob kajaʼanoʼob teʼ j-luʼumoʼ yéetel teʼ j-kʼáaʼnáaboʼ! Tumen le kʼaasibaʼaloʼ tsʼoʼok u yéemel ichileʼex, pʼujaʼan, tumen yojel chéen jumpʼíit kʼiin pʼaatal tiʼ» (Apocalipsis 12:12). Satanaseʼ jach pʼujaʼan tumen tojolchʼintaʼab teʼ kaʼanoʼ yéetel maʼ yaʼab kʼiinoʼob pʼaatal tiʼ. Le oʼolal táan u beetik u yantal talamiloʼob way Luʼumeʼ. Tuláakʼ xookoʼ tiʼ ken k-tʼaan tiʼ le talamiloʼobaʼ. Baʼaleʼ tu yoʼolal le baʼax táan u beetik Satanasoʼ, ¿bix ken u béeykuntil le Reino baʼax u kʼáat Dios utiaʼal le Luʼumaʼ?

15. ¿Baʼax u kʼáat Dios utiaʼal le Luʼumaʼ?

¹⁵ Táanileʼ, maʼalob ka a kʼaʼajs baʼax u kʼáat Dios utiaʼal le Luʼumaʼ. Jeʼex ta kanil tu 3 xookil le libroaʼ, Jéeobaeʼ u kʼáat ka pʼáatak bey upʼéel paraíso le Luʼumaʼ yéetel ka chuʼupuk yéetel utsul máakoʼob minaʼan u kíimloʼob. Úuchik u kʼebantal Adán yéetel Eva tu yoʼolal Satanaseʼ,  maʼ jáan béeychaj baʼax u tukulmaj Dios utiaʼal le Luʼumaʼ, baʼaleʼ le baʼax u tukulmoʼ maʼ kʼexpajkiʼ. Jéeobaeʼ láayliʼ u kʼáat ka béeychajak le tʼaanoʼobaʼ: «Le utsil máakoʼoboʼ bíin utiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Salmo 37:29). U Reino Dios kun béeykuntik le baʼax ku yaʼalik le tekstoaʼ. ¿Bix ken u beetil?

16, 17. ¿Baʼax ku yaʼalik Daniel 2:44 yoʼolal u Reino Dios?

¹⁶ Daniel 2:44 ku yaʼalikeʼ «tu kʼiiniloʼob [táan u gobernar le reyoʼoboʼ], u [Diosil] kaʼaneʼ bíin u líikʼes jumpʼéel [reino] mix bikʼin bíin [xuʼulsaʼak], bíin pʼáatak utiaʼal minaʼan u xuul, mix bikʼin bíin tʼonkíintaʼak tumen mix jumpʼéel múuchʼ kaaj, baʼaleʼ yaan u xuʼulsik jumpuliʼ tuláakal le uláakʼ [reinoʼoboʼ]». Le tʼaanoʼobaʼ, ¿baʼax ku kaʼansiktoʼon tiʼ u Reino Dios?

¹⁷ Yáaxeʼ, ku yaʼalikeʼ u Reino Dioseʼ yaan u tsʼaʼabal «tu kʼiiniloʼob [táan u gobernar le reyoʼoboʼ]», wa tu kʼiinil yaan uláakʼ gobiernoʼob way Luʼumeʼ. U kaʼapʼeleʼ, ku yeʼesikeʼ le Reinoaʼ utiaʼal mantatsʼ. Mix upʼéel gobierno kun páajtal tu yéetel, mix xan upʼéel gobierno kun jeelintik. U yóoxpʼeleʼ, ku yeʼesik yaan u yantal upʼéel baʼateʼel ichil u Reino Dios yéetel u gobierno wíinikoʼob; u Reino Dios kun ganar. Ku tsʼoʼokoleʼ, chéen letiʼ kun gobernar tu yóokʼol le Luʼumaʼ yéetel wíinikoʼobeʼ yaan u kuxtaloʼob yáanal le maas maʼalob gobierno jeʼel u yantaloʼ.

18. ¿Bix u kʼaabaʼ le baʼateʼel kun antal ichil u Reino Dios yéetel u gobierno wíinikoʼoboʼ?

¹⁸ Le Bibliaoʼ ku jach tʼaan tiʼ le baʼateʼel kun antal ichil u Reino Dios yéetel u gobierno wíinikoʼoboʼ. Ku yaʼalikeʼ, ken náatsʼak u kʼiinil le baʼatelaʼ, le kʼasaʼan angeloʼoboʼ yaan u tuskoʼob «u [reyiloʼob] yóokʼol kaab». ¿Utiaʼal baʼax? «Utiaʼal u baʼatelil u nojoch kʼiinil [...] Jajal Dios, tiʼ máax yaan tuláakal páajtalil.» Le reyoʼobaʼ yaan u muʼuchʼloʼob «tiʼ le kúuchil ku kʼaabaʼintik ich  hebreoeʼ Armagedón» (Apocalipsis 16:14, 16). Le kaʼapʼéel versiculoʼobaʼ ku yeʼeskoʼobeʼ le baʼateʼel kun antal ichil u gobierno wíinikoʼob yéetel u Reino Dioseʼ ku kʼaabaʼtik Armagedón.

19, 20. Bejlaʼeʼ, ¿baʼax beetik maʼ u béeytal baʼax u kʼáat Dios utiaʼal le Luʼumaʼ?

¹⁹ ¿Baʼax ken u béeykunt u Reino Dios yéetel u baʼatelil Armagedón? Kʼaʼajaktoʼoneʼ Jéeobaeʼ u kʼáat ka suunak paraísoi le Luʼumaʼ, ka chuʼupuk yéetel utsul wíinikoʼob minaʼan kʼeban tu wíinkliloʼob yéetel ka meyajtaʼak tumen letiʼob. ¿Baʼax beetik maʼ u béeytal bejlaʼeʼ? Yáaxeʼ, kʼeban wíinikoʼon, le oʼolal k-kʼojaʼantal yéetel k-kíimil. Baʼaleʼ, jeʼex t-kanil tu 5 xookil le libroaʼ, Jesuseʼ kíim t-oʼolal utiaʼal u páajtal k-kuxtal minaʼan u xuul. Mi kʼajaʼantech le baʼax tu yaʼalaj le apóstol Juanaʼ: «Tumen Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16).

²⁰ U kaʼapʼeleʼ, yaʼab máakoʼobeʼ maʼ uts baʼax ku beetkoʼobiʼ. Ku tuusoʼob yéetel kʼaas bix u kuxtaloʼob. Maʼ u kʼáat u beetoʼob baʼax ku yaʼalik Diosiʼ. Le máaxoʼob beetik baʼax maʼ utseʼ, yaan u xuʼulsaʼaloʼob tu baʼatelil Armagedón (Salmo 37:10). Le gobiernoʼob xanoʼ maʼ tu yaʼalkoʼob tiʼ le máakoʼob ka u beetoʼob baʼax u kʼáat Diosoʼ. Yaʼab tiʼ le gobiernoʼobaʼ maʼ tu béeytal u controlartikoʼob kaaj, yaan xaneʼ jach kʼasaʼanoʼob tu yéetel. Le Bibliaoʼ tʼáalkab u yaʼalikeʼ wíinikeʼ tsʼoʼok u gobernar chéen «utiaʼal u beet loob tiʼ u yéet j-xiibil» (Eclesiastés 8:9).

21. ¿Bix ken u béeykuntil le Reino baʼax u kʼáat Dios utiaʼal le Luʼumaʼ?

²¹ Baʼaleʼ ken tsʼoʼokok Armagedoneʼ, chéen u Reino Dios kun gobernar tu yóokʼol wíinikoʼob. Le Reinoaʼ yaan u béeykuntik baʼax u kʼáat Dios yéetel yaan u taasik yaʼabach utsiloʼob. Yáaxeʼ, yaan u kʼalik Satanás yéetel u  kʼasaʼan angeloʼob (Apocalipsis 20:1-3). Ku tsʼoʼoleʼ yaan u taasik le utsiloʼob ku béeytal úuchik u kʼubik u kuxtal Jesús t-oʼolaloʼ, le beetik le wíinikoʼob ku yuʼubkoʼob u tʼaan Dioseʼ yaan u xuʼulul u kʼojaʼantaloʼob yéetel u kíimloʼob, yaan u kuxtaloʼob utiaʼal mantatsʼ (Apocalipsis 22:1-3). Yaan xan u sutik paraísoi le Luʼumaʼ. Bey ken u béeykuntil baʼax u kʼáat Dios utiaʼal le Luʼumaʼ yéetel yaan u santificartik u kʼaabaʼ Diosoʼ. ¿Baʼax u kʼáat u yaʼal lelaʼ? U kʼáat yaʼaleʼ, yáanal le Reinooʼ, tuláakal máak kun eʼesik tsiikil tiʼ u kʼaabaʼ Jéeoba.

22. ¿Bix k-ojéeltik maʼ taal u Reino Dios tu kʼiinil tiaʼan Jesús way Luʼumeʼ mix xan le táant u líiʼsaʼaloʼ?

²² Jesuseʼ ka tu yaʼalaj tiʼ u disipuloʼob ka u kʼáatoʼob tiʼ Dios ka taalak le Reinooʼ, tu tsʼáaj naʼatbil maʼ taalak le Reino teʼ kʼiinoʼob jeʼeloʼ. ¿Taal wa túun ka bin Jesús teʼ kaʼanoʼ? Maʼatech, tumen Pedro yéetel Pabloeʼ tu yaʼaloʼobeʼ ka suunaj Jesús teʼ kaʼanoʼ, tiʼ béeychaj le baʼax u yaʼalmaj le Salmo 110:1: «Yuumtsileʼ [wa Jéeobaeʼ] tu yaʼalaj tiʼ in Yuumtsil: Kulen tin x-noʼoj kʼabil, tak le ken in tsʼáa a [enemigoʼob bey] u kúuchilil a tʼalkúuntik a wookoʼob[eʼ]» (Beetaʼanoʼob 2:32-35; Hebreob 10:12, 13). Jesús túuneʼ yanchaj u páaʼtaj.

23. 1) ¿Baʼax kʼiin ka káaj u gobernar u Reino Dios? 2) ¿Baʼax ken k-il tuláakʼ xookoʼ?

²³ ¿Bukaʼaj páaʼtaj tu beetaj? Ichil u jaʼabiloʼob 1870, u  múuchʼ máakoʼob táan u yilik u jach ojéeltkoʼob baʼax ku yaʼalik le Bibliaoʼ, kʼuch u naʼatoʼobeʼ tu jaʼabil 1914 tiʼ kun tsʼoʼokol u páaʼtaj Jesusiʼ. (Utiaʼal a wojéeltik u maasil tiʼ le fecha jeʼelaʼ, ilawil le tipʼaʼanil «1914: upʼéel jaʼab tuʼux béeychaj nojoch profecíaʼob tiʼ le Bibliaoʼ».) Le baʼaxoʼob káaj u yúuchul tu jaʼabil 1914 ku yeʼesik jach jaaj le baʼax kʼuch u naʼat le u múuchʼ máakoʼobaʼ. Le baʼaxoʼob u yaʼalmaj le Biblia táan u béeytaloʼob bejlaʼoʼ ku yeʼesikeʼ Cristoeʼ beetaʼab Reyil tu jaʼabil 1914; teʼ jaʼab jeʼeloʼ tiʼ káaj u gobernar u Reino Diosiʼ. Le beetikeʼ tiʼ yanoʼon teʼ «jumpʼíit kʼiin pʼaatal» tiʼ Satanasoʼ (Apocalipsis 12:12; Salmo 110:2). Le oʼolal k-aʼalikeʼ u Reino Dioseʼ maʼ kun xáantal ken u béeykunt baʼax u kʼáat Dios utiaʼal le Luʼumaʼ. ¿Máasaʼ lelaʼ upʼéel baʼal jach maʼalob? Baʼaleʼ ¿jach wa jaaj? Uláakʼ xookoʼ yaan u yeʼesik baʼax jach tu jaajil ku kaʼansik le Biblia tu yoʼolal lelaʼ.