LE KA tsʼíibtaʼab le Biblia ich ebreo yéetel griegooʼ maanal setenta utéenel ku chíikpajal le tʼaan «Seol» ich ebreo yéetel le tʼaan «Hades» ich griegooʼ. Tu kaʼapʼéelal upʼéeliliʼ baʼax u kʼáat u yaʼaloʼob yéetel yaan u yiloʼob yéetel le kíimiloʼ. Tiʼ yaʼab Bibliaʼobeʼ le tʼaan «Seol» yéetel «Hadesoʼ» bey u suʼutloʼobaʼ: «tsʼuʼ luʼum», «muknal», «kúuchil kimenoʼob», «metnal», «infierno» yéetel jejeláas uláakʼ bixi. Tiʼ yaʼab tʼaanoʼobeʼ minaʼan upʼéel tʼaan jach u kʼáat u yaʼal le baʼax u kʼáat u yaʼal le tʼaan ebreo yéetel griegooʼ. ¿Baʼax túun jach u kʼáat u yaʼal le tʼaan «Seol» yéetel «Hadesoʼ»? Koʼox ilik jujumpʼéel tekstos tuʼux ku chíikpajloʼob.

Eclesiastés 9:10 ku yaʼalik: «Teʼ j-muknal [wa Seol] tuʼux bíin xiʼikechoʼ, maʼ tu yúuchul tuukuliʼ, mix kʼaj óolal, mix ojéelaj». Le Seoloʼ, ¿letiʼ wa túun le muknaloʼ? Maʼatech. Le Bibliaoʼ ken tʼaanak tiʼ u muknal utúul máakeʼ maʼatech u meyaj le tʼaan Seol wa Hades tiʼoʼ, yaanal tʼaanoʼob ich ebreo wa griego ku meyaj tiʼ. Le Seol xanoʼ maʼ upʼéel muknal tuʼux ku mukik u láakʼtsiloʼob máakiʼ mix xan upʼéel nojoch zanja tuʼux ku paʼteʼ mukaʼal yaʼab máakoʼobiʼ (Génesis 49:30, 31).

Le Biblia túunoʼ, ken tʼaanak tiʼ le «Seol» wa «Hadesoʼ», ¿baʼax u kʼáat u yaʼale? Upʼéel baʼal maas nojoch ke upʼéel nuxiʼi zanja beetaʼan utiaʼal u muʼukul yaʼab máakoʼob. Jeʼex Isaías 5:14 ku yaʼalikeʼ le Seoloʼ (teʼ Biblia ich mayaoʼ ku yaʼalik «muknal») «minaʼan u pʼiisil jeʼekʼabil», u japmaj u chiʼ «utiaʼal u lukʼik kaaj». Le Seol túunoʼ u jeʼemaj u chiʼ utiaʼal u lukʼik yaʼabach kimenoʼob, yéetel maʼatech u naʼajtal (Proverbios 30:15, 16). Le Seoloʼ maʼatech u chuʼupul jeʼex u yúuchul yéetel le cementerioʼoboʼ (Proverbios 27:20). K-ilik túuneʼ le Seol wa Hadesoʼ minaʼan u xuul u nojchil. Le oʼolaleʼ maʼ upʼéel kúuchil yaan tiʼ upʼéel tuʼuxiʼ, chéen upʼéel bix u yaʼalaʼal bey yaan tuʼux táan u jeʼelel le kimenoʼoboʼ. Ken kíimik óoliʼ tuláakal máakeʼ bey ka xiʼik jeʼelel teʼ Seol wa Hadesoʼ.

U kaʼansik le Biblia yaan u kaʼa líiʼsaʼal le kimenoʼoboʼ, ku yáantkoʼon k-naʼat tubeel baʼax le Seol wa Hadesoʼ. Le Bibliaoʼ ku yeʼesikeʼ le kimenoʼob yanoʼob teʼ Seol wa Hadesoʼ yaan u kaʼa  jóoʼloʼob (Job 14:13; Beetaʼanoʼob 2:31; Apocalipsis 20:13). * Ku yaʼalik xaneʼ teʼ Seol wa Hadesoʼ tiʼ yaan máaxoʼob meyajt Diosiʼ bey xan yaʼab tiʼ le máaxoʼob maʼ tu beetoʼoboʼ (Génesis 37:35; Salmo 55:15). Le oʼolal ku yaʼalik «yaan u kaʼa [...] kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ» (Beetaʼanoʼob 24:15).