XOOK 5
¿Baʼax oʼolal tu beetaj Dios le Luʼumaʼ?
1. ¿Baʼaxten tu beetaj Dios le Luʼumaʼ?
Jéeobaeʼ tu beetaj le Luʼumaʼ utiaʼal u kajtal wíinikiʼ. Adán yéetel Evaeʼ maʼ beetaʼaboʼob utiaʼal u kajtaloʼob kaʼaniʼ tumen letiʼe ángeloʼob beetaʼanoʼob utiaʼal u kajtaloʼob kaʼanoʼ (Job 38:4, 7). Jéeobaeʼ tu tsʼáaj le yáax wíinik kajtal tiʼ junpʼéel kiʼichkelem paraíso ku kʼaabaʼtik kaʼach u jardínil Edén (Génesis 2:15-17). Adán yéetel u paalaleʼ yaan u páajtal kaʼach u kuxtaloʼob mantatsʼ way Luʼumeʼ. Xok Salmo 37:29; 115:16.
U jardínil Edéneʼ chéen junxóotʼ Luʼum kaʼachi. Le beetik Adán yéetel Evaeʼ unaj u yaʼabtal u paalaloʼob utiaʼal u sutkoʼob paraísoil tuláakal le Luʼumaʼ (Génesis 1:28). Le Luʼumaʼ mix bikʼin kun xuʼulsbil, beetaʼab tumen Dios utiaʼal u kajtal wíinikiʼ. Xok Salmo 104:5.
Chaʼant le video ¿Baʼaxten tu beetaj Dios le Luʼumaʼ?
2. ¿Baʼaxten bejlaʼeʼ le Luʼumaʼ maʼ junpʼéel paraísoiʼ?
Le Luʼumaʼ maʼ junpʼéel paraísoiʼ tumen Adán yéetel Evaeʼ maʼ tu yuʼuboʼob u tʼaan Diosiʼ le beetik jóoʼsaʼaboʼob tiʼ u jardínil Edén. Le Bibliaoʼ ku yaʼalikeʼ le Luʼumaʼ kʼuʼub «tiʼ le kʼasaʼan máakoʼoboʼ» (Job 9:24). Xok Génesis 3:23, 24.
¿Tsʼoʼok wa u tuʼubul tiʼ Jéeoba baʼax oʼolal tu beetaj le Luʼumaʼ? Maʼatech. Letiʼeʼ tuláakal baʼax ku yaʼalikeʼ ku béeykuntik, tsʼoʼoleʼ yaan u poderil tiʼ u beetik (Isaías 45:18). Jéeobaeʼ yaan u kaʼa sutik paraísoil le Luʼumaʼ utiaʼal u disfrutartik u kuxtal wíinikiʼ. Xok Salmo 37:11, 34.
3. ¿Bix kun sutbil paraísoil le Luʼumaʼ?
Jesús kun sutik paraísoil le Luʼumaʼ tumen letiʼ gobernartik u Reino Dios. Letiʼ yéetel le ángeloʼoboʼ yaan u xuʼulskoʼob u enemigoʼob Dios teʼ guerra ku kʼaabaʼtik Armagedónoʼ. Tsʼoʼoleʼ yaan u kʼalik Satanás ich mil años. Jesúseʼ yaan u kanáantik le máaxoʼob meyajtik Diosoʼ le oʼolal maʼ tun kíimloʼob teʼ Armagedónoʼ. Kéen tsʼoʼokkeʼ yaan u kuxtaloʼob mantatsʼ teʼ Paraísooʼ. Xok Apocalipsis 20:1-3; 21:3, 4.
4. ¿Baʼax kʼiin u xuʼulul k-sufrir?
Jesúseʼ tu yaʼalaj ‹baʼaxoʼob kun eʼesik› taʼaytak u xuʼulsaʼal le kʼasaʼaniloʼ. Le baʼaxoʼob kʼaastak ku yúuchul bejlaʼeʼ ku yeʼesik kuxaʼanoʼon tiʼ u tsʼook kʼiiniloʼob le «yóokʼol kaabaʼ». Xok Mateo 24:3, 7-14, 21, 22.
Jesúseʼ yaan u luʼsik le baʼaxoʼob beetik k-sufrir tu yáamil le mil años kun gobernar desde teʼ kaʼanoʼ (Isaías 9:6, 7; 11:9). Letiʼeʼ jujunpʼíitil ken u luʼsil u kʼeban le máaxoʼob meyajtik Diosoʼ. Bey kun xuʼulsbil tiʼ le kʼojaʼaniloʼ, le chʼíijloʼ yéetel le kíimiloʼ. Xok Isaías 25:8; 33:24.
5. ¿Máaxoʼob kun kajtaloʼob teʼ Paraísooʼ?
Jeʼel a kʼaj óoltik máaxoʼob u yaabiltmoʼob Dios teʼ tuʼux ku muchʼkuba u testigoʼob Jéeobaoʼ
Le máaxoʼob beetik baʼax u kʼáat Dioseʼ yaan u kajtaloʼob teʼ Paraísooʼ (1 Juan 2:17). Jesúseʼ tu yaʼalaj tiʼ u discípuloʼob ka u kaxtoʼob le utsul máakoʼoboʼ utiaʼal u kaʼanskoʼob yoʼolal Dios. Bejlaʼeʼ táan u kaʼansaʼal u millonesil máakoʼob utiaʼal u kajtaloʼob teʼ Paraísooʼ (Sofonías 2:3). Yaʼab familiaʼob ku adorarkoʼob Dios tuʼux ku muchʼkuba u testigoʼob Jéeoba, teʼeloʼ ku kankoʼob le consejos ku tsʼáaik le Biblia tiʼ le máaxoʼob tsʼokaʼan u beeloʼoboʼ yéetel tiʼ le taatatsiloʼoboʼ. Xok Miqueas 4:1-4.
