XOOK 3
¿Tiʼ Dios wa u taal le jatsʼuts promesaʼob yaan teʼ Bibliaoʼ?
1. ¿Máax beet u yantal le Bibliaoʼ?
Le Bibliaoʼ ku yaʼalikeʼ Dioseʼ u prometermaj yaan k-kuxtal mantatsʼ way Luʼumeʼ (Salmo 37:29). Jéeobaeʼ tu yéeyaj 40 máakoʼob chúukaʼan u yóoloʼob utiaʼal u tsʼíibtikoʼob le Bibliaoʼ. Ichileʼ yaan 66 libroʼobiʼ. Tsʼoʼok u máan kex 3,500 años tsʼíibtaʼak le yáax cinco libroʼob tumen Moisésoʼ, le u tsʼook librooʼ maas tiʼ 1,900 años tsʼíibtaʼak tumen apóstol Juan. Le baʼax ku yaʼalik le Bibliaoʼ tiʼ Dios u taal. Letiʼeʼ tu usartaj u espíritu santo utiaʼal u tsʼáaik tu tuukul le máakoʼob baʼax ken u tsʼíibtoʼoboʼ (2 Samuel 23:2). Le baʼax ku yaʼalikoʼ u tuukul Dios maʼ u tuukul wíinikiʼ. Jéeoba beet u yantal le Bibliaoʼ. Xok 2 Timoteo 3:16; 2 Pedro 1:20, 21.
Chaʼant le video ¿Máax beet u tsʼíibtaʼal le Bibliaoʼ?
2. ¿Baʼaxten k-creertik baʼax ku yaʼalik le Bibliaoʼ?
¿Baʼaxten k-creertik tiʼ Dios u taal le Bibliaoʼ? Tumen wíinikeʼ maʼ tu páajtal u yaʼalik baʼax kun úuchul, pero le Bibliaoʼ tuláakal baʼax ku yaʼalikeʼ maʼ tu fallar, ku láaj béeytal (Josué 23:14). Chéen Jéeoba ku páajtal u yaʼalik le baʼaloʼob maʼ úuchkoʼoboʼ. Xok Isaías 42:9; 46:10.
Le Bibliaoʼ junpʼéel libro jach especial tumen tiʼ Dios u taal. Tsʼoʼok u tʼoʼoxol u millonesil Bibliaʼob ich yaʼab idiomaʼob. Kex úuchbeneʼ maʼ tu bin tu contra le cienciaoʼ. Tsʼoʼoleʼ kex 40 máakoʼob tsʼíibteʼ maʼ tu kʼexpajal baʼax ku yaʼalik. Le kéen k-xok le Bibliaoʼ k-tsʼáaik cuenta u yaabiltmoʼon Dios, tsʼoʼoleʼ le baʼax ku yaʼalikoʼ ku beetik u kʼexik u kuxtal máak. Le baʼaloʼobaʼ ku yeʼesik baʼaxten u millonesil máakoʼobeʼ ku creerkoʼob le Bibliaoʼ u Tʼaan Dios. Xok 1 Tesalonicenses 2:13.
Chaʼant le video ¿Bix jeʼel a wojéeltik jaaj baʼax ku yaʼalik le Bibliaoʼ?
3. ¿Tiʼ baʼax ku tʼaan le Bibliaoʼ?
Le Bibliaoʼ ku tʼaan tiʼ le jatsʼuts promesaʼobaʼ: ku yaʼalik baʼax u tukultmaj Dios utiaʼal wíinik. Ku tsikbaltik baʼaxten le yáax máakoʼ xuʼul u kajtal teʼ Paraísooʼ yéetel ku yaʼalikeʼ yaan u kaʼa suut paraísoil le Luʼumaʼ. Xok Apocalipsis 21:4, 5.
Teʼ Bibliaoʼ yaan leyoʼob, nuʼuktajoʼob yéetel consejoʼob. Ku yaʼalik xan bix u tratartik Dios le máakoʼoboʼ yéetel ku páajtal k-ojéeltik u jatsʼuts modosiʼ. Le Bibliaoʼ ku yáantkoʼon k-kʼaj óolt Dios yéetel ku yaʼalik bix jeʼel k-amigotikeʼ. Xok Salmo 19:7, 11; Santiago 2:23; 4:8.
4. ¿Baʼax jeʼel u yáantkoʼon k-naʼat le Bibliaoʼ?
Utiaʼal u naʼataʼal baʼax ku yaʼalik le Bibliaoʼ Jesúseʼ táanil ku chʼaʼchiʼitik baʼax ku yaʼalik le tekstoʼoboʼ tsʼoʼoleʼ ku tsolik. Le folletoaʼ bey xan u beetkoʼ ku yaʼalik le tekstooʼ tsʼoʼoleʼ ku tsolik. Xok Lucas 24:27, 45.
Jach táaj jatsʼutstak le promesaʼob ku yaʼalik Diosoʼ. Kex beyoʼ yaan máakoʼobeʼ maʼ u kʼáat u yojéeltoʼobiʼ, hasta yaneʼ ku tsʼíikil le kéen tsikbaltaʼaktiʼ le promesaʼobaʼ. Pero techeʼ, seguernak a kaanbal tumen le baʼax tsʼáaik kuxtal minaʼan u xuuloʼ letiʼe u kʼaj óoltaʼal Diosoʼ. Xok Juan 17:3.
