Lelaʼ letiʼe baʼax tu yaʼalaj u jaats científicoʼob le ka tʼaanajoʼob tiʼ bix tsʼoʼok u jach kʼexpajal le climaoʼ. Wa teech ka creertik yaan juntúul Dios beetmil tuláakal baʼal yéetel u yaabiltmoʼoneʼ, maʼ xaaneʼ le baʼax tu yaʼalaj le científicoʼobaʼ ku beetik a tuukul tiʼ bix jatsʼutsil u beetmil Dios le Luʼumaʼ. Letiʼeʼ tu beetaj junpʼéel bix jeʼel u páajtal u yutstal tu juunaleʼ.

Chéen baʼaleʼ kex jach maʼalob u beetmil Dios le Luʼumaʼ tsʼoʼok u pʼáatal maʼ tu páajtal u maʼalobtal tu juunal tumen tsʼoʼok u sen contaminartaʼal. ¿Yaan wa baʼax ta tʼaan ken u beet Dios utiaʼal u kaʼa maʼalobkíintik le Luʼumaʼ?

Le tekstoʼob ku chíikpajal teʼ cuadrooʼ ku yeʼeskoʼobeʼ le Luʼumaʼ maʼ tun xuʼulsbil yéetel yaan u kaʼa maʼalobtal.

• Dios beetmil le Luʼumoʼ. «Tu káajbaleʼ Dioseʼ tu beetaj le kaʼanoʼoboʼ bey xan le luʼumoʼ» (Génesis 1:1).

• Dios u yuumil tuláakal le baʼaloʼob yaan way Luʼumoʼ. «Le luʼum yéetel tuláakal baʼax chupmiloʼ u tiaʼal Jéeoba a» (Salmo 24:1).

• Dioseʼ maʼ tu beetaj le Luʼum utiaʼal ka xuʼulsaʼakoʼ. «Jach maʼalob úuchik u beetik u cimientoil le luʼumoʼ, mix bikʼin u péeksaʼal tuʼux yaan» (Salmo 104:5).

• Dioseʼ ku yaʼalikeʼ mantatsʼ kun antal kuxtal way Luʼumeʼ. «Letiʼ u jaajil Dios, letiʼ tsʼáa forma tiʼ le luʼumoʼ, [ . . . ] letiʼeʼ maʼ chéen tu beetiʼ, tu beetaj utiaʼal u kajtal máakoʼobiʼ» (Isaías 45:18).

• Dioseʼ ku yaʼalikeʼ u beetmaj le Luʼum utiaʼal u kajtal wíinikoʼ. «Le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ» (Salmo 37:29).

Le ka tu beetaj Dios le Luʼumaʼ tu beetaj junpʼéel bix maʼ u xuʼulul u yantal kuxtal ichiliʼ, chéen baʼaleʼ lelaʼ chéen jeʼel u béeytal wa k-kanáantik yéetel wa maʼ t-contaminartikeʼ. Le Bibliaoʼ ku yaʼalikeʼ Dioseʼ tsʼoʼok u tsʼáaik u kʼiinil utiaʼal u xuʼulsik tiʼ le máaxoʼob kʼaskúuntikoʼob le Luʼum chéen utiaʼal u kaxtikoʼob u yutsiloʼoboʼ (Apocalipsis 11:18).

Le kéen béeychajak lelaʼ, Dioseʼ yaan u yutskíintik le Luʼumaʼ, yaan u sutik paraísoil yéetel yaan u tsʼáaik «baʼax ku tsʼíiboltik tuláakal baʼax kuxaʼan» (Salmo 145:16).