Yaan máakoʼob tuklikeʼ maʼ xaaneʼ tsʼoʼok u kʼeʼexel le baʼax ku yaʼalik u Tʼaan Diosoʼ. Chéen baʼaleʼ le profeta Isaíasoʼ tu yaʼaleʼ u Tʼaan Dioseʼ «ku pʼáatal utiaʼal mantatsʼ» (Isaías 40:8). ¿Baʼaxten jeʼel u páajtal k-aʼalikeʼ tuláakal le jatsʼuts baʼaloʼob ku yaʼalik u Tʼaan Diosoʼ maʼ kʼexpajkiʼ?

Dioseʼ yaan poder tiʼ utiaʼal u beetik ka pʼáatak mantatsʼ u Tʼaan yéetel maʼ u kʼeʼexel tumen mix máak. Úuchjeakileʼ kéen copiartaʼak u Tʼaan Dioseʼ, le máaxoʼob beetkoʼ jach ku xokikoʼob cada junpʼéel letra utiaʼal u yilkoʼob maʼ u kʼexkoʼob le baʼax ku tsʼíibtikoʼoboʼ, maʼ u tsʼáaikoʼob u maasil mix u luʼskoʼob wa baʼaxiʼ. Kex beyoʼ tumen kʼeban máakoʼobeʼ yaan jujunpʼéel baʼaloʼob maʼ maʼalob tu tsʼíibtoʼobiʼ. Baʼaleʼ lelaʼ maʼ tu kʼexaj le baʼax ku yaʼalik u Tʼaan Dios.

Teʼ kʼiinoʼobaʼ yaʼab úuchben tsʼíiboʼob tsʼoʼok u kaxtaʼal tiʼ u Tʼaan Dios. Le beetkeʼ wa yaan baʼax jelaʼan tiʼ junpʼéel úuchben tsʼíibeʼ jeʼel u páajtal u keʼetel yéetel uláakʼ utiaʼal u yilaʼal máakalmáak le kʼaschajaʼanoʼ (wa taak a wojéeltik u maasileʼ ilawil le xook «¿Tsʼoʼok wa u kʼeʼexel le baʼax ku yaʼalik le Bibliaoʼ?» tiaʼan teʼ jw.org).

Tuukulnakoʼon tiʼ le úuchben tsʼíiboʼob kaxtaʼab tu añoil 1947 kʼaj óolaʼan bey Rollos del Mar Muertooʼ. Leloʼobaʼ kaxtaʼab ichil junpʼéel sajkab naatsʼ tiʼ le Mar Muerto tumen jujuntúul beduinoʼob (árabeʼob suuk u viajaroʼob teʼ desiertooʼ). Le úuchben tsʼíiboʼobaʼ ku taaskoʼob junjaats tiʼ u Tʼaan Dios yéetel tsʼíibtaʼaboʼob walajki maas tiʼ dos mil añosaʼ. Le máaxoʼob kaʼanchajaʼan u xookoʼoboʼ tu ketoʼob le baʼax ku yaʼalik u Tʼaan Dios yaantoʼon teʼ kʼiinoʼobaʼ yéetel le úuchben rolloʼob kaxtaʼaboʼ. ¿Baʼax tu yiloʼobiʼ?

Tu yiloʼobeʼ le u Tʼaan Dios yaantoʼon bejlaʼoʼ igual yéetel le yáax tsʼíibtaʼaboʼ. * Le kéen xakʼaltaʼak le tsʼíiboʼob maas úuchbentakoʼoboʼ ku yilaʼaleʼ maʼ kʼexpajak u Tʼaan Diosiʼ. Lelaʼ ku yeʼesikeʼ Dioseʼ tsʼoʼok u beetik maʼ u kʼexpajal baʼax ku yaʼalik u Tʼaan tak teʼ kʼiinoʼobaʼ.

Lelaʼ ku yeʼesikeʼ jeʼel u páajtal k-confiar tiʼ le baʼax ku yaʼalik u Tʼaan Diosoʼ. Teʼ xook ku segueroʼ yaan k-ilik baʼax ku kaʼansiktoʼon le profetaʼob yoʼolal Diosoʼ.