Maʼatech. Le Luʼumaʼ maʼ tun xuʼulsbil, maʼ tun tóokbil yéetel maʼ tun beetbil uláakʼ. Le Bibliaoʼ ku yaʼalikeʼ Dioseʼ tu beetaj le Luʼum utiaʼal ka kajlak wíinik mantatsʼiʼ.

•   «Le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ» (Salmo 37:29).

•   «Jach maʼalob úuchik a beetik u cimientoil le luʼumoʼ, mix bikʼin u péeksaʼal tuʼux yaan» (Salmo 104:5).

•   «Le luʼumaʼ yaan u pʼáatal utiaʼal mantatsʼ» (Eclesiastés 1:4).

•   «Letiʼ tsʼáa forma tiʼ le luʼumoʼ, letiʼ beetmil utiaʼal u tsʼáaik teʼ tuʼux unaj u yantaloʼ, letiʼeʼ maʼ chéen tu beetiʼ, tu beetaj utiaʼal u kajtal máakoʼobiʼ» (Isaías 45:18).

 Dioseʼ maʼ ken u chaʼa u xuʼulsaʼal le Luʼum tumen wíinik yéetel le contaminaciónoʼ, le guerraʼoboʼ wa yoʼolal uláakʼ baʼaloʼob ku beetkoʼ. Le Bibliaoʼ ku yaʼalikeʼ Dioseʼ yaan u «xuʼulsik tiʼ le máaxoʼob táan u kʼaskúuntikoʼob le luʼumoʼ» (Apocalipsis 11:18). ¿Bix túun ken u beetil Dios?

 Letiʼeʼ yaan u láaj luʼsik u gobierno wíinik tumen letiʼobeʼ maʼ tu kanáantkoʼob le Luʼumaʼ, tsʼoʼoleʼ yaan u tsʼáaik junpʼéel gobierno maʼalob u beetik tuláakal baʼal (Daniel 2:44; Mateo 6:9, 10). Le Reinoaʼ yaan u gobernartaʼal tumen Jesús, u Hijo Dios (Isaías 9:6, 7). Le tiaʼan Jesús way Luʼumeʼ tu controlartaj junpʼéel kʼaʼamkach iikʼ (Marcos 4:35-41). Le kéen gobernarnak Jesús way Luʼumeʼ yaan u páajtal u controlartik tuláakal baʼal, jeʼex le iikʼoʼ. Tsʼoʼoleʼ yaan u túumbenkuntik tuláakal baʼal utiaʼal ka pʼáatak jeʼex yanil kaʼach u jardínil Edéneʼ (Mateo 19:28; Lucas 23:43).

 Maʼatech. Yaʼab máak bey u tuklikoʼ tumen maʼ maʼalob bix u naʼatkoʼob 2 Pedro 3:7, tuʼux ku yaʼalik: «Le kaʼan yéetel le luʼum yaan bejlaʼaʼ tsʼaʼanoʼob junpáayil utiaʼal u xuʼulsaʼaloʼob yéetel kʼáakʼ». Koʼox ilik kaʼapʼéel baʼal jeʼel u yáantkoʼon k-naʼat tubeel le tekstoaʼ:

1.   Teʼ Bibliaoʼ le tʼaan «kaʼan», «luʼum» yéetel «kʼáakʼoʼ» jejeláas baʼax u kʼáat u yaʼaloʼob. Por ejemploeʼ Salmo 97:1, ku yaʼalik: «¡Jéeobaeʼ tsʼoʼok u kʼuchul u beetuba Reyil! Kiʼimakchajak u yóol le luʼumoʼ. Kiʼimakchajak u yóol le yaʼabkach islaʼoboʼ». Teʼelaʼ le kéen u yaʼal yóokʼol kaab wa luʼumeʼ táan u tʼaan tiʼ le máakoʼoboʼ.

2.   U contekstoil 2 Pedro 3:7, ku tsolik baʼax u kʼáat u yaʼal «le kaʼan», «le luʼum» yéetel le «kʼáakʼ» ku yaʼalaʼaloʼ. Le versículo 5 yéetel 6, ku tʼaan tiʼ le Búulkabal anchaj tu kʼiiniloʼob Noéoʼ. Ku yaʼalikoʼobeʼ teʼ kʼiinoʼob jeʼeloʼ xuʼulsaʼab «le luʼum» wa tuláakal le kʼasaʼan máakoʼoboʼ. Jeʼex k-ilkoʼ maʼ letiʼe Luʼum tuʼux yanoʼon xuʼulsaʼaboʼ (Génesis 6:11). Le tekstooʼ ku yaʼalik xaneʼ xuʼulsaʼab le kaʼanoʼ, leloʼ u kʼáat u yaʼaleʼ xuʼulsaʼab le máakoʼob ku gobernaroʼob teʼ kʼiinoʼoboʼ. K-ilik túuneʼ maʼ letiʼe Luʼum wa yóokʼol kaab xuʼulsaʼaboʼ, baʼaxeʼ letiʼe kʼasaʼan máakoʼoboʼ. Noé yéetel u familiaeʼ maʼ kíimoʼob teʼ Búulkabaloʼ, letiʼob beet u kaʼa yaʼabtal u kajnáaliloʼob le yóokʼol kaabaʼ (Génesis 8:15-18).

 Teʼ Búulkabaloʼ xuʼulsaʼab le kʼasaʼan máakoʼoboʼ, bey xan kun úuchul yéetel le «kʼáakʼ» wa xuʼulsajil ku yaʼalik 2 Pedro 3:7. Maʼ letiʼe Luʼum kun xuʼulsbiloʼ baʼaxeʼ letiʼe kʼasaʼan máakoʼoboʼ. Dioseʼ ku yaʼalikeʼ yaan u yantal «junpʼéel túumben kaʼan yéetel junpʼéel túumben luʼum [...]. Teʼeloʼobaʼ mantatsʼ yaan u yantal justiciaiʼ» (2 Pedro 3:13). Le «túumben luʼum» wa le máaxoʼob meyajtik Diosoʼ yaan u yantaltiʼob «junpʼéel túumben kaʼan» wa junpʼéel túumben gobierno, lelaʼ u Reino Dios. Tsʼoʼoleʼ yáanal u Reino Dioseʼ le Luʼumaʼ yaan u suut junpʼéel jatsʼuts Paraísoil (Apocalipsis 21:1-4).