Toʼon u testigoʼon Jéeobaeʼ jach uts tʼaan k-tsikbaltik tiʼ tuláakal máak le baʼax ku kaʼansik le Bibliaoʼ, tak tiʼ le máaxoʼob ku yaʼalikoʼob maʼ tu interesar tiʼoboʼ. Leloʼ k-beetik tumen k-yaabiltmaj Dios bey xan k-éet máakil (Mateo 22:37-39). Le yaabilaj k-uʼuyik yoʼolal Diosoʼ ku péeksikoʼon k-tsʼoʼokbesik le meyaj tu yaʼalaj Jesús ka k-beetoʼ (Hechos 10:42; 1 Juan 5:3). Le oʼolal toʼoneʼ k-tsikbaltik tiʼ le máakoʼob le baʼax ku yaʼalik le Biblia jeʼex tu beetil le profetaʼob úuchjeakiloʼ (Jeremías 25:4). Tsʼoʼoleʼ le yaabilaj k-uʼuyik yoʼolal k-éet máakiloʼ ku péeksikoʼon k-tsikbalttiʼob le baʼaxoʼob ken u beet u Reino Diosoʼ. Kex yaan hora maʼ tu jach interesar tiʼobeʼ toʼoneʼ k-kaʼa suut xíimbaltoʼob tumen k-ojel jeʼel u salvartik u kuxtaloʼobeʼ (Mateo 24:14).

 Tsʼoʼoleʼ yaan horaeʼ le kéen ka suunakoʼon tu yotoch le máaxoʼob maʼ tu yeʼesoʼob interésoʼ yaʼab u téeneleʼ ku jóokʼol juntúul máax taak yuʼubikoʼon. Lelaʼ ku yúuchul tumen:

•   U yuumil najeʼ ku bin kajtal táanxel tuʼux.

•   Yaan uláakʼ máax kajaʼan teʼ naj ku interesartiʼ le baʼax k-tsikbaltikoʼ.

•   Le máakoʼoboʼ ku kʼexik u tuukuloʼob yoʼolal le baʼaxoʼob ku sen úuchul teʼ yóokʼol kaabaʼ, bey xan yoʼolal le baʼaxoʼob ku aktáantkoʼob ichil u kuxtaloʼoboʼ. Le oʼolal ku taaktal u kaanbaloʼob tumen «ku tsʼáaikoʼob cuenta kʼaʼabéet u nuʼuktaʼaloʼob tumen» Dios (Mateo 5:3). Tak le máaxoʼob u pʼekmoʼob le baʼaxoʼob k-tsikbaltikoʼ jeʼel u kʼexik u tuukuloʼob jeʼex tu beetil apóstol Pabloeʼ (1 Timoteo 1:13).

 Chéen baʼaleʼ maʼatech k-obligartik mix máak u yuʼub le baʼax k-tsikbaltikoʼ (1 Pedro 3:15). Cada máak kun yéeyik u religión (Deuteronomio 30:19, 20).