¿Ñee nuu Dios guiráʼ ladu la?
Ni ricabi Biblia
Ruuyaʼ Dios guiráʼ ni nuu ne riquiiñeʼ poder stiʼ modo racala’dxi’ (Proverbios 15:3; Hebreos 4:13). Qué rusiidiʼ Biblia nuu Dios guiráʼ ladu, sínuque rusiidini ti espíritu laabe ne nápabe paraa nabézabe.
Ximodo nga Dios: Ti espíritu nga laabe (Juan 4:24). Nga runi nin ti binni qué zanda gu’ya’ laabe (Juan 1:18). Lu ca visión ni riete lu Biblia ná ti lugar si nuu Dios ne qué riete nuube guiráʼ ladu (Isaías 6:1, 2; Apocalipsis 4:2, 3, 8).
Paraa nabézabe: Napa Dios ti lugar guibáʼ ra nabeza (1 Reyes 8:30). Lu Stiidxaʼ Dios riete ti biaje guyuu ca ángel ra nuu Jehová, a ne bizuhuaacaʼ nezalube, nga rusihuinni napa Dios ti lugar ra nabeza guibáʼ (Job 1:6).
Pa cadi guiráʼ ladu nuu Dios ¿ñee zanda gápabe naa la?
Zanda. Neca nabeza Dios guibáʼ nabé rizaaláʼdxibe binni ni nabeza lu Guidxilayú riʼ. Laaca ruuyabe pabiáʼ runi binni stipa pur guzuubaʼ stiidxabe ne racanebe laacaʼ (1 Reyes 8:39; 2 Crónicas 16:9). ¿Ximodo rusihuínnibe rizaaláʼdxibe ne rápabe laanu yaʼ?
Ora runi orarnu: Rucaadiaga Jehová ca oración stinu órapeʼ rúninu ca ni (2 Crónicas 18:31).
Ora nuunu triste: «Nuu Jehová gaxha de cani maʼ gucadé ladxidóʼ; rulabe cani maʼ biree gana (Salmo 34:18)
Ora caquiiñeʼ gudiicabe conseju laanu: Riquiiñeʼ Jehová stiidxaʼ, Biblia, para gudii laanu sabiduría ne para gacané laanu cadi guixélenu de lu neza stiʼ (Salmo 32:8)
¿Ñee dxandíʼ nuu Dios guiráʼ ladu la?
Ni runi cré binni: Nuu Dios guiráʼ ladu.
Ni dxandíʼ: Cadi nabeza Dios lu Guidxilayú nin lu universu (1 Reyes 8:27). Lu Biblia ná guiráʼ ca beleguí ne guiráʼ ca ni bizáʼ Dios riniʼcaʼ pabiáʼ nandxoʼbe (Salmo 19:1). Peru nga qué riníʼ nabeza Dios lade guiráʼ cosa ni maʼ bizáʼ, cásica qué zanda chuʼ ti pintor ndaaniʼ ti cuadru ni maʼ bitiee. Cásica randa runibiaʼluʼ tu bitiee ti cuadru, zacaca nga guiráʼ ni maʼ bizáʼ Dios, rusihuínnicani ca cualidad ni qué rihuinni stibe, casi poder, sabiduría ne guendarannaxhii (Romanos 1:20)
Ni runi cré binni: Cadi dxandíʼ napa Dios stale poder, purtiʼ pa ñuube ndaaniʼ Guidxilayú riʼ ñánnabe xi guiráʼ cazaaca
Ni dxandíʼ: Espíritu santu nga stipa stiʼ Dios ne riquiiñebe ni para gánnabe xi cazaaca guiráʼ ladu ne para gúnibe intiica cosa ora tiica si sin chuʼbe lugar ca (Salmo 139:7).
Ni runi cré binni: Salmo 139:8 rusihuinni nuu Dios guiráʼ ladu, purtiʼ racá ná «pa niguiʼbaʼ guibáʼ racá ñuuyaʼ lii, ne pa ñataʼ ndaaniʼ baʼ laaca ñuuluʼ racá».
Ni dxandíʼ: Cadi caníʼ textu riʼ nuu Dios guiráʼ ladu, sínuque ni cusiene ni nga zanda gacanebe laanu ra tiica si nuunu.
a Lu Biblia ná Jehová nga lá Dios.
Laaca zándaca ziuuláʼdxiluʼ ca ndiʼ
CANI RINABADIIDXAʼ BINNI DE BIBLIA
¿Xii nga espíritu santu?
Ruchaaga Biblia espíritu santu né «batanáʼ» Dios. ¿Xiñee yaʼ?
TU LAADU
Gunabaʼ chigánnacabe lii
Biiyaʼ ximodo zanda guicabi Biblia xiixa pregunta nápaluʼ o binibiaʼ chaahuiʼ ca testigu stiʼ Jehová.