Miguel o «San Miguel», casi runibiáʼ caadxi religión laabe, zeeda gaca sti lá ni riete lu Biblia modo runibiáʼcabe Jesús ante ne despué de gueedabe lu Guidxilayú. a Lu Biblia ná gudindediidxaʼ Miguel ne Binidxabaʼ despué de guti Moisés ne gucanebe ti ángel para chisaana ti mensaje stiʼ Dios ra nuu profeta Daniel (Daniel 10:13, 21; Judas 9). Runi defender Miguel derechu napa Jehová de guni mandar ne rucaalú ca enemigu stiʼ Dios. Nga runi nuu razón para chinebe lá riʼ, ni riníʼ «Tuu nga casi Dios» (Daniel 12:1; Apocalipsis 12:7).

 Guidúʼyanu xiñee rininu naca Jesús arcángel Miguel.

•   Miguel «nga arcángel» (Judas 9). Título arcángel rinÍʼ ni «jefe stiʼ ca ángel» ne riete ni lu chupa versículo stiʼ Biblia. Ne guiropaʼ biaje ra riete ni ricá ni arcángel, ndiʼ riníʼ ti ángel si nga napa título riʼ. Despué de biasa Jesús de lade guetu, lu tobi de ca versículo riʼ ná «ziete Señor de guibáʼ, zudii orden né voz stiʼ arcángel» (1 Tesalonicenses 4:16). Casi na relatu riʼ, Jesús nga napa voz stiʼ arcángel. Nga runi, zanda guininu Jesús nga Miguel, arcángel.

•   Miguel nga xaíque stiʼ ejércitu stiʼ ca ángel ni nuu guibáʼ. «Bicaalú Miguel ne ca ángel stiʼ dragón que», o Binidxabaʼ (Apocalipsis 12:7). Nápabe stale autoridad guibáʼ. Ne lu Biblia ná laabe nga «tobi de ca príncipe jma risaca» (Daniel 10:13, 21; 12:1). David Aune, ti expertu lu Nuevo Testamento guníʼ naca Miguel «xaíque stiʼ ca ejércitu stiʼ ca ángel ni nuu guibáʼ».

   Lu Biblia riete lá sti binni ni napa autoridad luguiáʼ ca ejércitu stiʼ ca ángel ni nu guibáʼ. Lu ti versículo ná bihuinni «Señor Jesús dede guibáʼ né ca ángel nandxóʼ stiʼ lade bele» (2 Tesalonicenses 1:7, 8 Mateo 16:27). Ne lu 1 Pedro 3:21, 22 ná guyé Jesús «guibáʼ ne maʼ zuba ladu derechu stiʼ Dios, ne ca ángel ne ca ni napa autoridad ne ca ni napa poder ruzuubacaʼ stiidxabe». Que nibí Dios Jesús ne Miguel para gácacaʼ xaíque stiʼ ca ejércitu stiʼ ca ángel. Nga runi zanda guininu ngaca binni nga Jesús ne Miguel ne cadi chupa binni gadxé nga laacabe.

•   «Zuzuhuaa» Miguel «dxi gapa binni yuubaʼ» ni qué huayuu dxi guihuinni (Daniel 12:1). Lu libru stiʼ Daniel riete diidxaʼ «zuzuhuaa» ne riníʼ ni zuni ti rey xiixa nabé risaca (Daniel 11:2-4, 21). Óraca, Jesucristu, ni naca «Stiidxaʼ Dios», zaca «Rey stiʼ guiráʼ rey» ne zunduuxe guiráʼ ca enemigu stiʼ Dios ne zapa xquidxi Dios (Apocalipsis 19:11-16). Zúnibe ni dxi «guzulú gran tribulación», dxi ca «ziuu stale yuubaʼ dede dxi bizulú guidxilayú hasta nagasi, qué huayuu dxi chuʼ yuubaʼ casi laani» (Mateo 24:21, 42).