Lucas 22:1-71

XHÍDXINI LU

Biyubi ca sacerdote modo guuticaʼ Jesús (1-6)
Biʼniʼ preparárcabe últimu Pascua (7-13)
Gudíxhebe gaca Guendaroxhi stiʼ Señor (14-20)
«Lu mexaʼ ra zubaʼ riʼ naguixhenáʼ ni cayuni traicionar naa» (21-23)
Biʼniʼ discutírcabe tuu nga huaniisi ládecabe (24-27)
Pactu ni biʼniʼ Jesús para ti Reinu (28-30)
Guníʼ Jesús zuni negar Pedro laa (31-34)
Caquiiñeʼ chuʼ binni listu; chupa espada (35-38)
Oración ni biʼniʼ Jesús lu dani Olivo (39-46)
Gunaazecabe Jesús (47-53)
Biʼniʼ negar Pedro Jesús (54-62)
Biʼniʼ búrlacabe Jesús (63-65)
Biʼniʼ juzgar Sanedrín laabe (66-71)

22 Mayaca ganda dxi gaca Saa stiʼ Pan Sin Levadura,* ni runibiáʼ binni casi Pascua.* ² Peru qué guidxela ca sacerdote principal ne ca escriba modo guuticaʼ Jesús, purtiʼ cadxíbicaʼ ca binni guidxi que. ³ Óraque guyuu Binidxabaʼ ndaaniʼ ladxidóʼ Judas —ni láʼ Iscariote, ni nuu lade ca Doce que—, ⁴ ne guyé ra nuu ca sacerdote principal ne ca capitán stiʼ templu para gabi laacabe ximodo guni entregar* Jesús lu nácabe. ⁵ Guizáʼ biéchecabe ne guníʼcabe gudiicabe laabe bueltu.* ⁶ Guyuu Judas de acuerdu, ne dede óraque nisi cuyubi pora jma galán guni entregar* laabe lu náʼ ca hombre que, peru cadi guni ni nezalú binni. ⁷ Gunda primé dxi raca Saa stiʼ Pan Sin Levadura,* dxi rudiicabe sacrificiu stiʼ Pascua. ⁸ Óraque biseendaʼ Jesús Pedro ne Juan, ne rábibe laacaʼ: «Laché, ne laguni preparar Pascua para guidoʼno». ⁹ Para nacaʼ: «¿Paraa racaláʼdxiluʼ guni preparardu ni yaʼ?». ¹⁰ Óraque gúdxibe laacaʼ: «Laguuyaʼ, ora guiuutu ndaaniʼ guidxi, zadxaagalutu ti hombre nuaʼ ti jarru de yu daʼ nisa. Lachinanda laabe ne laguiuu ndaaniʼ yoo ra guiuube. ¹¹ Ne lagabi dueñu stiʼ yoo ca: “Cayabi Maestru lii: «¿Paraa nuu cuartu para ca invitadu ra zanda gahuaniaʼ ca discípulo stinneʼ Pascua riʼ?»”. ¹² Ne zuluíʼ hombre que laatu ti cuartu naroʼbaʼ ni nuu luguiáʼ, ra nuu guiráʼ mueble. Laguni preparar pascua ca raqué». ¹³ Para bireecaʼ zecaʼ ne bidxélacaʼ ni casi peʼ modo gudxi Jesús laacaʼ, ne biʼniʼ prepararcaʼ guiráʼ ni zaquiiñeʼ para Pascua que. ¹⁴ Ne ora gunda hora, gurinebe* ca apóstol que ruaa mexaʼ. ¹⁵ Ne rábibe laacaʼ: «Qué gánnatu pabiáʼ napaʼ gana gahuaniaʼ laatu Pascua riʼ ante guzulú guneʼ sufrir; ¹⁶ purtiʼ cayabeʼ laatu maʼ qué zahuaruaʼ ni sti biaje dede ora gaca cumplir ni lu Reinu stiʼ Dios».* ¹⁷ Ne gucuaabe ti copa, bidiibe xquixe peʼ Dios ne guniʼbe: «Cada tobi gueʼ de copa riʼ ne gutiidiʼ ni lu náʼ stobi, ¹⁸ purtiʼ cayabeʼ laatu, de yannadxí para delante maʼ qué zeeruaʼ vinu dede ora gueeda Reinu stiʼ Dios».* ¹⁹ Ne laaca gucuaabe ti pan, bidiibe xquixe peʼ Dios, gundaabe ni, bidiibe ni laacaʼ ne guniʼbe: «Ndiʼ nga runi representar cuerpu stinneʼ, ni chigudieeʼ para gacané laatu. Cadi gusaana de gúnitu ndiʼ para guietenaláʼdxitu naa». ²⁰ Ne ngaca bíʼnibe né copa que, despué de gudoxhícabe. Gúdxibe laacaʼ: «Copa riʼ nga runi representar pactu* nacubi, ni chiguzulú ora guxhieeʼ rini stinneʼ, para gacané laatu. ²¹ »Peru, laguuyaʼ, lu mexaʼ ra zubaʼ riʼ naguixhenáʼ ni cayuni traicionar naa. ²² Purtiʼ dxandíʼ peʼ maʼ cheʼ Xiiñiʼ Hombre* casi maca nexheʼ gaca ni. Peru, ¡pobre si de hombre ni guni traicionar laabe!». ²³ Para bizulú caníʼ ca apóstol que tu tobi de laacaʼ chiguni traicionar laabe. ²⁴ Ne laaca bizulú cayuni discutir ca discípulo que tuu nga ruuyacabe laa casi tobi ni huaniisi ládecabe. ²⁵ Para rábibe laacaʼ: «Ca rey stiʼ ca nación runi mandarcaʼ binni modo racaláʼdxicaʼ, ne ca ni napa autoridad runibiáʼcabe laacaʼ casi binni ni runi cosa galán pur xcaadxi. ²⁶ Peru laatu cadi gácatu zacá. Ni gaca casi tobi ni huaniisi ládetu, naquiiñeʼ gaca casi tobi ni jma nahuiiniʼ, ne tobi ni guni dirigir la? naquiiñeʼ guni tender xcaadxi. ²⁷ ¿Tuu nga ni jma risaca?* ¿Ni cayó la?* o ni cayuni tender? ¿Cadi dxandíʼ ni cayó la? Peru naa nuaaʼ ládetu casi tobi ni cayuni tender. ²⁸ »Laatu nga ca ni qué huasaana naa lu ca prueba ni huadideʼ. ²⁹ Naa cayuneniaʼ laatu ti pactu* para ti reinu, cásica maʼ biʼniné Bixhozeʼ naa ti pactu, ³⁰ para goto ne guetu ruaa mexaʼ stinneʼ lu Reinu stinneʼ ne cuitu lu trono para guni juzgartu ca 12 tribu stiʼ Israel. ³¹ »Simón, Simón, biiyaʼ, maʼ gunabaʼ Binidxabaʼ guicaa guiratu para guniibi dxacha laatu casi riguíbicabe trigu. ³² Peru maʼ bineʼ rogar Dios pur lii ti cadi gaca fe stiluʼ débil. Ne lii, ora ibiguétaluʼ la? biquidxi fe stiʼ ca bíʼchiluʼ». ³³ Óraque ná Pedro rabi laabe: «Señor, maʼ nuaaʼ listu para guseguyoocabe naa ra guieguyooloʼ ne gateniaʼ lii». ³⁴ Peru rábibe laa: «Pedro, cayabeʼ lii qué zuundaʼ ti gallu yannadxí ante guiniʼluʼ chonna biaje qué runibiaʼluʼ naa». ³⁵ Ne laaca gudxi Jesús laacaʼ: «Dxi biseendaʼ laatu sin bolsahuiiniʼ para bueltu nin bolsa de guendaró ne nin elaguidi, qué ñaadxaʼ laatu gastiʼ, ¿njaʼ?». Para bicábicaʼ: «¡Coʼ!». ³⁶ Óraque gúdxibe laacaʼ: «Peru yanna, ni napa bolsahuiiniʼ para bueltu, chiné ni, ne laaca chiné ti bolsa de guendaró; ne tu qué gapa espada, gutoo xhaba ne siʼ tobi. ³⁷ Purtiʼ cayabeʼ laatu napa xidé gaca cumplir ni maca cá lu Stiidxaʼ Dios luguiaʼyaʼ: “Biʼniʼ tratárcabe laabe casi ti binni qué iquiiñeʼ”. Ne cayaca cumplir ni luguiaʼyaʼ». ³⁸ Óraque gúdxicaʼ laabe: «Señor, biiyaʼ, raríʼ nuu chupa espada». Para rábibe laacaʼ: «Né ngasi». ³⁹ Bireesícabe, zeʼ Jesús lu dani Olivo, casi maca biaa guni; ne laaca zinanda ca discípulo laabe. ⁴⁰ Ne ora yendácabe raqué, gúdxibe laacaʼ: «Laguni orar para cadi guiábatu lu tentación». ⁴¹ Bixélebe de laacaʼ chupa chonna pasu.* Bizuxíbibe ne bizulú cayuni orarbe ⁴² ne caniʼbe: «Bixhozeʼ, pa naluʼ la? gulee copa riʼ de naa. Peru cadi gaca ni racalaʼdxeʼ, sínuque ni racaláʼdxiluʼ». ⁴³ Óraque beeda ti ángel de guibáʼ ra nuube ne bidii stipa laabe. ⁴⁴ Peru de tantu cayuubaʼ ladxidoʼbe, guníʼnebe Dios biaʼ gúndatiʼ, ne guca nisaluna stibe casi gota rini ni cayaba layú. ⁴⁵ Ne ora biluxe biʼniʼ orarbe, biásabe ne guyebe ra nuu ca discípulo stibe ne yendabe laacaʼ nisiaasicaʼ, purtiʼ maʼ bidxágacaʼ de tantu nuucaʼ triste. ⁴⁶ Para gúdxibe laacaʼ: «¿Xiñee nisiaasitu pue? Laguiasa ne cadi gusaana de guni orartu para cadi guiábatu lu tentación». ⁴⁷ Laga caniʼruʼ Jesús, málasi zeeda stale binni. Zániru tobi de ca Doce que, ni láʼ Judas, bidxíñabe Jesús para gudiibe bixiduʼ laa. ⁴⁸ Peru gudxi Jesús laabe: «Judas, ¿ñee né ti bixiduʼ nga cayuni traicionarluʼ Xiiñiʼ Hombre la?».* ⁴⁹ Ne ora biʼyaʼ ca ni nuu gaxha de Jesús xi chigaca, gunabadiidxacaʼ: «Señor, ¿zaa gucáʼludu né espada la?». ⁵⁰ Tobi de laacaʼ bicaalú esclavu stiʼ sumo sacerdote* ne bigabe diaga ladu derechu. ⁵¹ Peru ná Jesús: «Maʼ ngasi». Ne gudaʼnaʼ diaga esclavu que ne bianda. ⁵² Óraque gudxi Jesús ca sacerdote principal, ca capitán stiʼ templu ne ca ancianu ni ziyubi laabe: «¿Zeedanetu espada ne palu para guinaazetu naa casi rinaazecabe ti gubaanaʼ la? ⁵³ Guiráʼ dxi guyuaaʼ ládetu ndaaniʼ templu ne qué ninaazetu naa. Peru ndiʼ nga hora stitu ne hora runi mandar guelacahui». ⁵⁴ Despué de gunaazecaʼ Jesús, yenecaʼ laabe ne guluucaʼ laabe ndaaniʼ lidxi sumo sacerdote.* Peru de zitu zinanda Pedro laabe. ⁵⁵ Ne ora bíʼnicabe ti bele galaa patiu que ne gurícabe juntu, laaca gurí Pedro ládecabe. ⁵⁶ Peru ora biʼyaʼ ti criada laabe zúbabe ra cuzaaniʼ bele que, biiyadxí laabe ne guníʼ: «Laaca guzané hombre riʼ laabe». ⁵⁷ Peru biʼniʼ negar Pedro ni. Gúdxibe laa: «Gunaa, qué runebiaʼyaʼ diaʼ laabe». ⁵⁸ Qué nindaa de ngue, biiyaʼ sti binni laabe ne guníʼ: «Laaca tobi de laacabe lii». Peru bicabi Pedro: «Coʼ, hombre, cadi de laadícabe naa». ⁵⁹ Gudiʼdiʼ si biaʼ ti hora, bizulú caníʼ stobi: «¡Dxandíʼ peʼ laaca guzané hombre riʼ laabe! Rihuinni dxíchica de Galilea laa». ⁶⁰ Para bicabi Pedro: «Qué gannaʼ xi caniʼluʼ, hombre». Oraqueca, laga caníʼrube, biindaʼ ti gallu. ⁶¹ Óraque bidxiguetalú Señor ne biiyadxí Pedro, ne raqué nga bietenalaʼdxiʼ Pedro ni gudxi Señor laa: «Ante guʼndaʼ ti gallu yannadxí, zaniʼluʼ chonna biaje qué runibiaʼluʼ naa». ⁶² Para bireebe fuera ne biinabe dede guyuu yuubaʼ ladxidoʼbe. ⁶³ Yanna, ca hombre ni cayapa Jesús que, bizulú cayuni búrlacaʼ laabe ne caguíñecaʼ laabe. ⁶⁴ Despué de bichiicaʼ lube, gúdxicaʼ laabe: «Pa profeta lii, gudxi laadu, ¿tu gudapa lii?». ⁶⁵ Ne caníʼcabe stale cosa* contra laabe. ⁶⁶ Ne ora birá gueelaʼ, guca reunir ca ancianu stiʼ guidxi que, ca sacerdote principal ne ca escriba. Yenécabe Jesús ndaaniʼ sala stiʼ Sanedrín* ne gúdxicabe laa: ⁶⁷ «Gudxi laadu pa lii nga Cristu». Para rábibe laacaʼ: «Neca gabeʼ ni laatu, qué lica zuni cretu. ⁶⁸ Ne pa ninabadiidxaʼ laatu xiixa, qué nicábitu naa. ⁶⁹ Peru, dede yannadxí para delante, zabí Xiiñiʼ Hombre* ladu derechu stiʼ Dios ni napa poder». ⁷⁰ Óraque gunabadiidxaʼ guiracaʼ laabe: «Yanna, ¿ñee lii nga Xiiñiʼ Dios la?». Para bicábibe laacaʼ: «Naa, laapetu caniʼtu ni». ⁷¹ Para nacaʼ: «¿Ñee caquiiñerunu jma testimonio la? Laapenu binadiáganu ni de ruaabe».