Marcos 14:1-72

XHÍDXINI LU

Biyubi ca sacerdote modo guuticaʼ Jesús (1, 2)
Bindaateʼ ti gunaa aceite rindáʼ naxhi íquebe (3-9)
Traición stiʼ Judas (10, 11)
Últimu Pascua (12-21)
Gudíxhebe gaca Guendaroxhi stiʼ Señor (22-26)
Guníʼ Jesús zuni negar Pedro laa (27-31)
Biʼniʼ orarbe ti lugar láʼ Getsemaní (32-42)
Gunaazecabe Jesús (43-52)
Biʼniʼ juzgar Sanedrín laabe (53-65)
Biʼniʼ negar Pedro Jesús (66-72)

14 Yanna, maʼ xhupa si gubidxa cayaadxaʼ para gaca Pascua* ne Saa stiʼ Pan Sin Levadura.* Peru ca sacerdote principal ne ca escriba cuyúbicaʼ modo guinaazecaʼ ne guuticaʼ Jesús.* ² Purtiʼ caniʼcaʼ: «Cadi gúninu ni lu saa, pacaa zándaca gucaalú guidxi riʼ laanu». ³ Dxi nuube ndaaniʼ guidxi Betania, laga cayobe* ra lidxi Simón ni gupa lepra que, beeda ti gunaa ra nuube, naazeʼ ti frascu* dxaʼ de aceite rindáʼ naxhi nabé caru, de nardo* puro. Bixhélebe ruaa frascu que ne bindaatebe ni ique Jesús. ⁴ Ora biʼyaʼ chupa chonna de ca ni nuu raqué ni guca riʼ, bidxiichicaʼ ne guniʼcaʼ entre laacaʼ: «¿Xiñee bixhiibe aceite rindáʼ naxhi riʼ pue? ⁵ Ñanda nidoo aceite rindáʼ naxhi riʼ jma de 300 denariu...* ¡ne ñanda nicaa ca pobre bueltu ca!». Ne guizáʼ bidxiichinecaʼ* gunaa que. ⁶ Peru gudxi Jesús laacabe: «Zaa nuube. ¿Xiñee nuutu guchiichitu laabe pue? Jneza ni bíʼnibe pur naa. ⁷ Purtiʼ siempre ziuu ca pobre ládetu ne zanda gacanetu laacaʼ ora tiica si, peru naa cadi siempre ziuaaʼ ládetu. ⁸ Biʼniʼ gunaa riʼ ni zanda guni; bindaateʼ aceite rindáʼ naxhi lu cuerpu stinneʼ, purtiʼ mayaca gaca entierru stinneʼ. ⁹ Gábecaʼ laatu, lu guidubi guidxilayú, intiica lugar gaca predicar ca noticia galán, laaca zaníʼcabe ni biʼniʼ gunaa riʼ para guietenaláʼdxicabe laa». ¹⁰ Óraque guyé Judas Iscariote, tobi de ca Doce que, ra nuu ca sacerdote principal para guni entregar* Jesús lu nácabe. ¹¹ Ora binadiágacabe ni, biéchecabe ne biʼniʼ prometércabe gudiicabe laabe bueltu.* Ngue runi bizulú biyúbibe pora jma galán guni traicionarbe Jesús. ¹² Yanna, primé dxi raca Saa stiʼ Pan Sin Levadura,* dxi nápacabe costumbre gudiicabe sacrificiu stiʼ Pascua, gunabadiidxaʼ ca discípulo stibe laabe: «¿Paraa racaláʼdxiluʼ chuudu ne guni preparardu Pascua para goloʼ pue?». ¹³ Óraque biseendabe chupa de ca discípulo stibe ne gúdxibe laacaʼ: «Laché ndaaniʼ guidxi ca. Racá zadxaagalú ti hombre laatu, nuabe ti jarru de yu daʼ nisa. Lachinanda laabe ¹⁴ ne, ra tiica guiuube, lagabi dueñu stiʼ yoo que: “Ná Maestru: «¿Paraa nuu cuartu para ca invitadu ra zanda gahuaniaʼ ca discípulo stinneʼ Pascua riʼ?»”. ¹⁵ Ne zuluiʼbe laatu ti cuartu naroʼbaʼ ni nuu luguiáʼ, ra nuu guiráʼ mueble ne maʼ nuu listu. Laguni preparar ni raqué para laanu». ¹⁶ Para biree ca discípulo que zecaʼ, biuucaʼ ndaaniʼ guidxi que ne guca guiráʼ ni casi peʼ modo guníʼ Jesús; óraque biʼniʼ prepararcaʼ guiráʼ ni zaquiiñeʼ para Pascua que. ¹⁷ Ne ora bixhinni, bedané Jesús ca Doce que. ¹⁸ Ne, laga zúbacabe* ruaa mexaʼ ne cayócabe, gudxi Jesús laacabe: «Gábecaʼ laatu zuni traicionar tobi de laatu naa, tobi de ca ni cayoné naa raríʼ». ¹⁹ Guizáʼ triste guyuucabe ne tobi pur tobi gudxi laabe: «Cadi naa diaʼ, ¿njaʼ?». ²⁰ Óraque gúdxibe laacaʼ: «Tobi de ca Doce riʼ laabe, ni ugadxe pan stiʼ ndaaniʼ bladuʼ* ra ugadxeʼ pan stinneʼ. ²¹ Maʼ cheʼ Xiiñiʼ Hombre,* cásica maca bicaacabe de laa. Peru ¡gapagá si ni guni traicionar Xiiñiʼ Hombre!* Jma galán para laa cadi ñale». ²² Ne laga cayócabe, gucuaa Jesús ti pan, biʼniʼ ti oración,* gundaa ni, bidii ni laacabe ne guníʼ: «Laguicaa; ndiʼ nga runi representar cuerpu stinneʼ». ²³ Ne gucuaabe ti copa, bidiibe xquixe peʼ Dios ne bidiibe ni laacaʼ, ne güeʼ guiracaʼ ruaa copa que. ²⁴ Ne gúdxibe laacaʼ: «Ndiʼ nga runi representar rini stinneʼ, “rini stiʼ pactu”,* ni chiguixii para gacané stale binni. ²⁵ Gábecaʼ laatu maʼ qué zeeruaʼ vinu dede ora guidxiña dxi gueeʼ vinu cubi lu Reinu stiʼ Dios».* ²⁶ Ne últimu, biindasícabe para gusisácacabe Dios,* zécabe lu dani Olivo. ²⁷ Óraque gudxi Jesús laacabe: «Guiratu zucheetu,* purtiʼ maca cá lu Stiidxaʼ Dios: “Zuneʼ herir pastor ne zareeche ndase ca dendxuʼ”. ²⁸ Peru, ora maʼ biasaʼ de lade gueʼtuʼ, ziaaʼ Galilea primé que laatu». ²⁹ Óraque ná Pedro rabi laabe: «Neca guchee* guirácabe, naa qué zuneʼ ni». ³⁰ Para ná Jesús rabi laabe: «Gábecaʼ lii yannadxí, gueelaʼ riʼ, ante guʼndaʼ ti gallu chupa biaje, zaniʼluʼ chonna biaje qué runibiaʼluʼ naa». ³¹ Peru qué ñaanadxí Pedro de niníʼ: «Neca gateniaʼ lii, qué ziuu dxi guinieeʼ qué runebiaʼyaʼ lii». Ne ngueca guníʼ xcaadxi que. ³² De raqué yendácabe ti lugar láʼ Getsemaní, ne gúdxibe ca discípulo stibe: «Lacuí raríʼ laga guneʼ orar». ³³ Ne yenebe Pedro, Santiago ne Juan, ne guizáʼ triste biʼniʼ sentirbe ne gúpabe ti yuubaʼ roʼ. ³⁴ Ne gúdxibe laacaʼ: «Nabé naná yuubaʼ nuu ndaaniʼ ladxiduáʼ riʼ, zuluáʼ maʼ chiguutini naa.* Laguiaana raríʼ ne lagataná». ³⁵ Ne bixelehuiinibe de laacaʼ, bizuxíbibe ne cayuni orarbe pa ñanda si cadi ñedandá hora que. ³⁶ Ne nabe: «Abba,* Bixhozeʼ, zanda gúniluʼ guiráʼ cosa; gulee copa riʼ de naa. Peru cadi gaca ni racalaʼdxeʼ, sínuque ni racaláʼdxiluʼ». ³⁷ Bibiguétabe ra nuucaʼ ne yendabe laacaʼ nisiaasicaʼ. Ne gunabadiidxabe Pedro: «Simón, ¿gúsiluʼ la? ¿Ñee qué ñápaluʼ stipa para ñatanaluʼ neca ti hora la? ³⁸ Lagataná ne cadi gusaana de guni orartu para cadi guiábatu lu tentación. Neca racalaʼdxiʼ binni guni ni jneza, peru débil cuerpu stiʼ».* ³⁹ Ne yeguni orarbe sti biaje ne laaca ngueca gunábabe. ⁴⁰ Ne ora bibiguétabe sti biaje yendabe laacaʼ nisiaasicaʼ, purtiʼ guizáʼ maʼ daʼ bacaandaʼ lucaʼ. Ne qué nidxélacaʼ xi ñábicaʼ laabe. ⁴¹ Ne beedabe guionna biaje ne gúdxibe laacaʼ: «¡Yanna peʼ nga nisiaasitu ne caziiláʼdxitu! ¡Maʼ biáʼcatiʼ! ¡Maʼ bidxiña hora! Laguuyaʼ, chiguni entregárcabe* Xiiñiʼ Hombre* lu náʼ ca pecador. ⁴² Laguiasa, chuunu. Laguuyaʼ, maʼ zedadxiña ni chiguni traicionar naa». ⁴³ Oraqueca, laga caníʼrube, beeda Judas, tobi de ca Doce que, zedané stale binni ni naaze espada ne palu, ca binni biseendaʼ ca sacerdote principal, ca escriba ne ca ancianu. ⁴⁴ Yanna, maca guníʼ traidor que zudii señal riʼ: «Ni gudieeʼ ti bixiduʼ, ngue nga laabe. Laguinaazeʼ laabe, lachiné laabe ne laguuyaʼ cadi guxooñebe». ⁴⁵ Ngue runi guyé Judas derechu ra nuube, bidxiña laabe ne guníʼ: «¡Rabí!», ne bidii ti bixiduʼ laabe. ⁴⁶ Oraqueca gunaazecabe Jesús ne zinécabe laa. ⁴⁷ Peru gulee tobi de ca ni zuhuaa raqué espada stiʼ, biaaxha luguiáʼ esclavu stiʼ sumo sacerdote* que ne bigá diágabe. ⁴⁸ Peru gudxi Jesús laacabe: «¿Zeedanetu espada ne palu para guinaazetu naa casi rinaazecabe ti gubaanaʼ la? ⁴⁹ Guiráʼ dxi guyuaaʼ ládetu ndaaniʼ templu maʼ cusiideʼ ne qué ninaazetu naa. Peru guca ndiʼ para gaca cumplir ni ná Stiidxaʼ Dios». ⁵⁰ Bisaana guiracaʼ laabe ne bixooñecaʼ. ⁵¹ Peru de gaxha zinanda ti joven laabe, nacu ti lari de lino chaʼhuiʼ. Gucalaʼdxiʼ binni ninaazeʼ laabe, ⁵² peru bisaanabe lari de lino stibe ne bixooñebe xieeládibe.* ⁵³ De raqué yenécabe Jesús ra nuu sumo sacerdote,* ne guca reunir guiráʼ ca sacerdote principal, ca ancianu ne ca escriba. ⁵⁴ Peru de zitu si zinanda Pedro laabe dede ra biuu lu patiu stiʼ sumo sacerdote, gurinebe ca ni runi dxiiñaʼ ra yoo que ne cadxaabe gaxha de ti bele. ⁵⁵ Yanna, ca sacerdote principal ne guiráʼ ca ni nuu lu Sanedrín* que cuyúbicaʼ tu gudii testimonio contra Jesús para guuticaʼ laabe, peru qué guidxélacaʼ nin tobi. ⁵⁶ Stale binni candisaʼ falsu luguiabe, peru gadxé gadxé ni caniʼcaʼ. ⁵⁷ Ne laaca bizuhuaa caadxi binni ne cudiicaʼ testimonio falsu riʼ contra laabe: ⁵⁸ «Binadiágadu guniʼbe: “Zusabaʼ templu ni bicuí binni riʼ ne lu chonna si gubidxa zuneʼ stobi peru qué zaquiiñeʼ binni para gucuí ni”». ⁵⁹ Peru dede nin raríʼ cadi ngueca testimonio cudiicaʼ. ⁶⁰ Óraque bizuhuaa sumo sacerdote* que galahuiʼ de laacabe ne gunabadiidxaʼ Jesús: «¿Qué zaniʼluʼ xiixa la? ¿Xii ndiʼ cugaaniʼ ca hombre riʼ luguialuʼ pue?». ⁶¹ Peru nin ti diidxaʼ qué niníʼ Jesús ne qué nicabi. Ngue runi, bizulú biʼniʼ interrogar sumo sacerdote que laabe. Gunabadiidxaʼ: «¿Ñee lii nga Cristu, Xiiñiʼ Dios la?».* ⁶² Para bicabi Jesús laabe: «Naa. Ne zuuyatu Xiiñiʼ Hombre* zuba ladu derechu stiʼ Dios ni napa poder ne zeeda lu za».* ⁶³ Ora binadiaga sumo sacerdote que ndiʼ, gucheza xhaba ne guníʼ: «¿Ñee caquiiñerunu jma testigu la? ⁶⁴ Maʼ binadiágatu caniʼbe contra Dios.* ¿Xi riníʼ íquetu yaʼ?». Guiracaʼ guniʼcaʼ naquiiñeʼ gátibe. ⁶⁵ Óraque bichá xhinni chupa chonna lube, bichiicaʼ lube, guluucaʼ puñete laabe ne guniʼcaʼ: «¡Pa profeta lii, gudxi laadu tu gudapa lii!». Ne gudapasícabe ruaabe, ziné ca guardia stiʼ tribunal que laabe. ⁶⁶ Laga nuu Pedro lu patiu xagueteʼ que, beeda tobi de ca criada stiʼ sumo sacerdote.* ⁶⁷ Ora bíʼyabe cadxaa Pedro gaxha de bele que, biiyadxibe laa ne gúdxibe laa: «Lii laaca canazaneluʼ Jesús de Nazaret». ⁶⁸ Peru biʼniʼ negarbe ni. Gúdxibe laa: «Qué runebiaʼyaʼ laabe ne qué lica gannaʼ xii nga caniʼluʼ». Óraque guyebe ra entrada* que. ⁶⁹ Peru biiyaʼ criada que laabe ne gudxi ca ni zuhuaa raqué sti biaje: «Ndiʼ nga tobi de laacabe». ⁷⁰ Laaca biʼniʼ negarbe ni. Qué nindaa de ngue, gudxi ca ni zuhuaa raqué Pedro: «Dxandíʼ tobi de laacabe lii, purtiʼ rihuinni dxíchica de Galilea lii». ⁷¹ Óraque bizulú biʼniʼ maldecir ne cayuni jurar: «¡Qué runebiaʼyaʼ hombre ni caniʼtu ca!». ⁷² Ne oraqueca biindaʼ ti gallu guiropa biaje ne bietenalaʼdxiʼ Pedro ni guníʼ Jesús: «Ante guʼndaʼ ti gallu chupa biaje, zaniʼluʼ chonna biaje qué runibiaʼluʼ naa». Guizáʼ biinabe dede guyuu yuubaʼ ladxidoʼbe.