Santiago 5:1-20
5 Yanna lagucaadiaga, laatu ca ricu, laguunaʼ ne lachuu triste pur ca desgracia ni chigueeda luguiatu.
2 Maʼ qué iquiiñeʼ* guiráʼ cosa risaca nápatu, ne maʼ cayó bandaa* xhábatu.
3 Maʼ gucuá tini oro ne plata stitu, ne zusihuinni tini que stóndatu ne zunitiluni laatu. Ne zaca guiráʼ ni maʼ bitáletu casi ti bele lu ca últimu dxi.
4 ¡Lagucaadiaga! Cucaa ca trabajador ni gundisaʼ cosecha stitu ridxi, purtiʼ caʼruʼ quíxetu laacaʼ, ne maʼ binadiaga Jehová* Dios stiʼ ca ejércitu ridxi stiʼ ca ni gundisaʼ cosecha stitu, purtiʼ canábacaʼ chuʼ tu gacané laacaʼ.
5 Huayápatu guiráʼ ni huayacaláʼdxitu ndaaniʼ guidxilayú ne huayúnitu guiráʼ ni huayápatu gana. Cayoto ne carooto* casi rusiroocabe ti yuze ni chigati.
6 Huayuni condenartu ne huayuutitu binni nachaʼhuiʼ.* Nga runi rucaalúcabe laatu.
7 Nga runi hermanu caʼ, lagapa paciencia hasta lu presencia* stiʼ Señor. Laguuyaʼ xi runi ti campesinu ni cabeza guindisaʼ ti cosecha galán, qué riree gana dede ora guiaba ca primé nisaguié ne ca últimu nisaguié.
8 Zaqueca laatu, lagapa paciencia, laguzuhuaa dxiichiʼ, purtiʼ maʼ gaxha nuunu de presencia* stiʼ Señor.
9 Hermanu caʼ, cadi gaca quejartu de ni guni stobi, para cadi gaca juzgartu. Laguuyaʼ, maʼ gaxha nuu ni runi juzgar que.*
10 Hermanu caʼ, laguni huantar ora gacanatu ne lagapa paciencia casi biʼniʼ ca profeta ni guníʼ de lu lá* Jehová.*
11 Ridúʼyanu pabiáʼ dichoso ca ni maʼ biʼniʼ huantar. Maʼ nánnatu xi guiráʼ biʼniʼ huantar Job ne nánnatu xi biʼniʼ Jehová* pur laabe, nga runi yanna maʼ nánnatu pabiáʼ nadxii Jehová* binni ne pabiáʼ riá* laacabe.
12 Nga runi hermanu ni nadxieeʼ caʼ, cadi guni jurartu pur guibáʼ nin pur guidxilayú nin pur intiica cosa. Laguiníʼ «ya» pa zúnitu xiixa, ne laguiníʼ «coʼ» pa qué zúnitu ni, ti cadi gaca condenartu.
13 ¿Nuu tuuxa ni cayuni sufrir ládetu la? Cadi gusaana de guni orar. ¿Nuu tuuxa nayecheʼ ládetu la? Guʼndaʼ salmo.
14 ¿Nuu tuuxa huará* ládetu la? Guiniʼné ca ancianu de congregación ne guni orarcaʼ pur laabe ne cuʼcaʼ aceite íquebe de lu lá* Jehová.*
15 Zianda ni huará* que ora gaca oración né fe ne zandisaʼ Jehová* laabe. Ne pa biʼniʼ cometerbe ti pecadu la? zuni perdonar Dios laabe.
16 Nga runi, cada tobi guni confesar guiráʼ ca pecadu stiʼ ne cada tobi guni orar pur stobi, ti guiándatu. Purtiʼ napa oración stiʼ ti binni nachaʼhuiʼ* stipa.
17 Guca Elías ti hombre de sentimientu cásica laanu. Peru dxi biʼniʼ orarbe de guidubi ladxidoʼbe para cadi guiaba nisaguié la? qué ñaba diʼ nisaguié chonna iza arondaʼ.
18 De raqué biʼniʼ orarbe sti biaje, ne biaba nisaguié ne bidii guidxilayú ni gó binni.
19 Hermanu ni nadxieeʼ caʼ, pa nuu tobi de laatu guixeleʼ de ni dxandíʼ peru gacané stobi laa guibiguetaʼ,
20 ne gusaana ca cosa malu ni cayuni la? ganna binni ni gudxiguetaʼ laabe ca culá laabe* de lu guendaguti, ne zuni perdonar Dios guiráʼ ca pecadu stibe.
Nota
^ Lit. «Maʼ biuʼdxuʼ».
^ O «polilla».
^ Lit. «maʼ bisirooto ladxidoʼto».
^ O «justo».
^ Lit. «maʼ zuhuaa ni runi juzgar que ra puertaʼ».
^ O «xlá».
^ O «napa misericordia».
^ Raríʼ caniʼbe de tobi ni huará en sentidu espiritual.
^ O «xlá».
^ O zándaca «ni maʼ bidxaga».
^ O «justo».
