CAPÍTULO 35

¿Ximodo zanda gaca xhamiguaʼ Dios?

Dxi gudiʼdiʼ Gabriel ti guendanagana bidii cuenta pabiáʼ risaca gaca tobi xhamigu Dios. Sicaríʼ guniʼbe: «Dxi napaʼ 12 iza zeʼ bixhozeʼ ne bisaana laadu. Ngue runi ti huaxhinni, nuaa’ ra cuartu stinneʼ ne cayuneʼ orar Jehová ne canabaʼ laa guibiguetaʼ bixhozeʼ ra lidxeʼ».

Neca naná nuu ladxidóʼ Gabriel bizulú biindaʼ Biblia. Bidxélabe ti versículo ra bicaa ti salmista caadxi diidxaʼ para Jehová, nani sicaríʼ: «Ra nuuluʼ ridxiña binni ni cayacaná; lii racaneluʼ ca huérfanu» (Salmo 10:14). Yendá ca diidxaʼ riʼ ndaaniʼ ladxidóʼ Gabriel. Laabe guniʼbe: «Ora biindaʼ ca ni bidieeʼ cuenta racala’dxi’ Jehová gacané naa ne cusietenaláʼdxibe naa laabe nga bixhozeʼ. Ne gástiruʼ sti cosa jma galán que gaca Jehová bixhózeluʼ».

¿ÑEE cazaacaluʼ ni bizaaca Gabriel la? Zándaca cazaacaluʼ ni bizaacabe o zándaca coʼ. Peru cadi guianda lii racala’dxi’ Jehová gaca xhamíguluʼ laa. Biiyaʼ xiná Biblia: «Laguidxiña ra nuu Dios ne laa zadxiña laatu» (Santiago 4:8). Neca qué ridúʼyanu Jehová racala’dxi’ gaca xhamígunu laa.

Pa racaláʼdxiluʼ gaca xhamíguluʼ Dios caquiiñeʼ gúniluʼ xiixa. Guzéʼtenu ti ejemplu. Para ganda guiroobaʼ ti yagahuiiniʼ ni nápaluʼ, ¿xi naquiiñeʼ gúniluʼ yaʼ? Naquiiñeʼ gápaluʼ ni, guzuhuaaluʼ ni ti lugar ra igaani ne guzeeluʼ ni guiráʼ dxi. Ngaca nga ni naquiiñeʼ gúninu para gaca xhamígunu Dios. Peru, ¿xi naquiiñeʼ gúniluʼ para jma gaca xhamíguluʼ Dios yaʼ?

Nabé risaca guni estudiarnu Biblia

Para ganda gaca xhamigu chupa binni la? caquiiñeʼ guiniʼcaʼ diidxaʼ ne gucaadiágasaacaʼ. Ne ngaca nga naquiiñeʼ gúninu para gaca xhamígunu Dios. Peru ¿ximodo zanda gucaadiáganu Jehová yaʼ? Ra guidúʼndanu ne guni estudiarnu stiidxabe, Biblia (Salmo 1:2, 3).

Zándaca guiníʼ íqueluʼ huaxiéʼ galán nga guni estudiarluʼ. Zándaca jma riuuláʼdxiluʼ gúʼyaluʼ televisión, quíteluʼ videojuegu o cheluʼ paxaraa né ca xhamíguluʼ. Peru pa racaláʼdxiluʼ gaca xhamíguluʼ Dios caquiiñeʼ gú’ndalu’ Biblia, purtiʼ zacá zanda gucaadiágaluʼ laabe.

Cadi guiníʼ íqueluʼ zareeluʼ gana pa gú’ndalu’ Biblia. Zándaca ziuuláʼdxiluʼ gú’ndalu’ Biblia neca guiníʼ íqueluʼ cadi para lii ni. Peru primeru caquiiñeʼ cueeluʼ tiempu. Zanda gúniluʼ ni bi’ni’ ti baʼdudxaapaʼ láʼ Lais. Laabe guniʼbe: «Napaʼ ti horariu. Guiráʼ siadóʼ ruundaʼ ti capítulo stiʼ Biblia». Ne María, ti baʼdudxaapaʼ de 15 iza, guníʼ: «Guiráʼ huaxhinni ante chigaseʼ ruundaʼ Biblia ti ratu».

¿Pora rábiluʼ zanda gú’ndalu’ Biblia yaʼ? Ante guicábiluʼ, primeru biiyaʼ ni ná  recuadru ni zeeda lu yaza 292. De racá la? bicaa raríʼ pora zanda gú’ndalu’ Stiidxaʼ Dios neca media hora guiráʼ dxi.

․․․․․

Galán nga gápaluʼ ti horariu. Peru zándaca gaca nagana para lii ora guzulú gú’ndalu’ Biblia. Zándaca guizaacaluʼ ni bizaaca Jezreel, ti hombrehuiiniʼ de 11 iza, sicaríʼ guniʼbe: «Nuu parte de lu Biblia raca nagana para naa guieneʼ». Peru cadi guireeluʼ gana. Cadi guiaandaʼ lii ora gú’ndalu’ Biblia cucaadiágaluʼ xhamíguluʼ, Jehová. Pa qué gusaana de gú’ndalu’ Biblia jma ziuuláʼdxiluʼ ni ne zabeenduluʼ stale cosa galán.

Cadi gusaana de guni orarluʼ

Oración nga tobi de ca regalu jma galán maʼ bidii Jehová laanu, purtiʼ zacá randa rinínenu laa. Zanda guiníʼneluʼ Jehová ora tiica si, ridxíʼ ne huaxhinni. Ne nuube listu para gucaadiágabe lii. Nga runi lu Biblia ná lu intiica ni cadídinu gábinu Dios xi caquiiñenu, guni orarnu, guni rogarnu ne gudiʼnu xquixe peʼ laa (Filipenses 4:6).

Ndiʼ riníʼ zanda gábiluʼ Jehová guiráʼ ni cazaacaluʼ. Casi xi guendanagana nápaluʼ ne xi naguu xizaa lii. Peru laaca galán gudiiluʼ xquixe peʼ laabe. Cásica rudii binni xquixe peʼ ti xhamigu pur ni bi’ni’ pur laa la? zacaca nga naquiiñeʼ gudiʼnu xquixe peʼ Jehová pur guiráʼ ni maʼ huayuni pur laanu (Salmo 106:1).

Bicaa xi pur rudiiluʼ xquixe peʼ Jehová.

․․․․․

¿Xi zanda gúniluʼ pa maʼ qué ganda guni huantarluʼ ca guendanagana stiluʼ yaʼ? Biblia ná: «Bilaa ni nualuʼ luguiáʼ Jehová, ne laabe zanaazebe lii. Qué ziuu dxi gudiibe lugar guiaba ni runi ni jneza» (Salmo 55:​22).

Bicaa xiixa ni naguu xizaa lii ni ñuulá’dxilu’ ñábiluʼ Jehová ora guni orarluʼ laa.

․․․․․

Cadi gusiaandaluʼ ximodo gucané Dios lii

Nuu sti cosa ni caquiiñeʼ gúniluʼ para gaca xhamíguluʼ Dios. Bicaa David canción riʼ: «Lagudii cuenta ne laguuyaʼ pabiáʼ nachaʼhuiʼ Jehová» (Salmo 34:8). Dxi bicaabe canción riʼ, cadi tan xadxí gudíʼdibe ra nagana. Gucala’dxi’ rey Saúl ñuuti laabe. Nga runi, gupa xidé yegucachilube ra nuu ca filisteu, ca enemigu stibe ne qué nindaa binibiáʼ ca binni riʼ laabe ne gucaláʼdxicaʼ ñuuticaʼ laabe. Peru bilabe. ¿Xi bíʼnibe yaʼ? Bíʼnibe casi ora cayaca íquebe (1 Samuel 21:​10-15).

Peru qué niníʼ ique David gunda bilá de raqué purtiʼ si nuu xpiaaniʼ. Ora bizulú bicaabe canción ca bidiibe xquixe peʼ Jehová pur bilá laabe, sicaríʼ guniʼbe: «Gunabadiidxaʼ Jehová, ne laabe bicábibe naa, ne bilabe naa de guiráʼ ni ruchibi naa» (Salmo 34:4). Pur ni bizaacabe riʼ gunda guniʼbe ca diidxaʼ riʼ: «Lagudii cuenta ne laguuyaʼ pabiáʼ nachaʼhuiʼ Jehová». *

Biʼniʼ stipa guietenaláʼdxiluʼ ximodo gucané Jehová lii ne bicaa ni raríʼ. Zanda gácani ti cosa nahuiiniʼ ra bíʼyaluʼ ximodo gucanebe lii.

․․․․․

Cada tobi de laanu nga naquiiñeʼ guni stipa para gaca xhamigu Dios, neca rusiidiʼ bixhózenu ne jñaanu laanu ni dxandíʼ rusiidiʼ Biblia. ¿Ñee cayúniluʼ stipa gaca xhamíguluʼ Dios la? Pa ca’ru’ la? zacané capítulo riʼ lii gúniluʼ ni. Zaguu Jehová ndaayaʼ lii pa gúniluʼ stipa gaca xhamíguluʼ laa, ne Biblia peʼ ná: «Laguinabaʼ ne zacaatu, laguyubi ne zadxélatu» (Mateo 7:7).

ZADXÉLALUʼ JMA INFORMACIÓN LU CAPÍTULO 38 NE 39 LU VOLUMEN UNO STIʼ LIBRU RIʼ

NI ZADÚʼYANU LU STI CAPÍTULO CA

¿Ñee raca nagana para lii guiníʼneluʼ binni de Dios la? ¿Xi zanda gúniluʼ para guni defenderluʼ ni runi creluʼ?

[Nota]

TEXTU NI ZANDA GACANÉ LII

«Dichoso ca ni nanna caquiiñeʼ Dios» (Mateo 5:3).

NI ZANDA GÚNILUʼ

Pa gúʼndaluʼ tapa yaza stiʼ Biblia ti dxi la? zalúxeluʼ ni lu ti iza.

¿ÑEE NANNUʼ NI LA?

Racalaʼdxiʼ Jehová gácaluʼ xhamigu, pur nga cayuundaluʼ libru riʼ ne zinándaluʼ ca conseju ni zeeda lu Biblia (Juan 6:44).

¡BIZULÚ BIʼNIʼ NI!

Ndiʼ nga ca ni chiguneʼ para chuulaʼdxeʼ guneʼ estudiar Biblia: ․․․․․

Ndiʼ nga ca ni chiguneʼ para guneʼ orar guiráʼ dxi: ․․․․․

¿Xi zanda guinabadiidxaʼ bixhozeʼ ne jñaa de tema riʼ? ․․․․․

¿XI RINÍʼ ÍQUELUʼ?

● ¿Xi zanda gúniluʼ para chuuláʼdxiluʼ guni estudiarluʼ Biblia?

● ¿Xiñee racalaʼdxiʼ Jehová guni orarnu laa neca nácanu binni ruchee?

● ¿Xi gúniluʼ para gaca ca oración stiluʼ jma galán?

[Ni caníʼ/Epígrafe]

«Dxi nahuiineʼ, ngueca ca ngueca rinieeʼ lu ca oración stinneʼ. Peru yanna runeʼ stipa gabeʼ Dios ni rizaacaʼ guiráʼ dxi. Nga runi maʼ gadxé gadxé ni rabeʼ Dios ora runeʼ orar» (Eva).

[Imagen ne cuadru]

 biiyaʼ xi zanda guiziidiluʼ ora gúʼndaluʼ Biblia

1. Gulí ti relatu zeeda lu Biblia ni chuuláʼdxiluʼ. Para ganda guiéneluʼ ni, gunabaʼ Jehová gudii lii sabiduría.

2. Biindaʼ chaahuiʼ ni. Cadi gúʼndaluʼ nagueenda. Bixuiʼlú ni cayuundaluʼ, zanda gúniluʼ stipa gúʼyaluʼ ne gunadiágaluʼ ni caníʼ binni ni riete lu relatu ca. Pa gúniluʼ ni, ziaananeluʼ ni cayuundaluʼ.

3. Gunabadiidxaʼ laca lii. Despué de gúʼndaluʼ ti relatu zeeda lu Biblia, gunabadiidxaʼ laca lii:

● ¿Xiñee bidii Jehová lugar guicá relatu riʼ lu Biblia pue?

● ¿Guná de ca binni ni riete lu relatu riʼ galán chinandaʼ ejemplu stiʼ, ne gunáʼ nga ca ni coʼ?

● ¿Xi rusiidiʼ relatu riʼ naa?

● ¿Xi rusiidiʼ ni naa de ca ni runi Jehová ne de modo naca?

4. Biʼniʼ ti oración. Gudxi Jehová xi guiráʼ maʼ biziidiluʼ ne xi maʼ gudixhe íqueluʼ gúniluʼ. Ne cadi guiaandaʼ lii gudiiluʼ xquixe peʼ laabe pur Stiidxabe, Biblia.

[Imagen]

«Stiidxaluʼ zeeda gaca ti lámpara para ñeeʼ ne ti biaaniʼ para neza ra rizayaʼ» (Salmo 119:105).

[Imagen ne cuadru]

biiyaʼ xi nga ni jma risaca gúniluʼ primé

¿Ñee riníʼ íqueluʼ qué gápaluʼ tiempu para guni orarluʼ ne guni estudiarluʼ Biblia la? Ti cosa ni zacané lii nga gánnaluʼ xii nga naquiiñeʼ gúniluʼ primé.

Gúninu ti experimentu: Guluu caadxi guié ndaaniʼ ti vasu ne de racá bichá caadxi yuxi luni. ¿Xi bizaaca? Biaʼsi biaba guiráʼ ni, ¿njaʼ?

Yanna bichá yuxi ca primeru ndaaniʼ vasu ne de racá guluu ca guié ca. ¿Xi bizaaca? Maʼ qué ñuu diʼ guiráʼ ni, ¿njaʼ? ¿Xiñee yaʼ? Purtiʼ yanna primeru bichaluʼ yuxi ca ne despué ca guié ca.

¿Xi zanda guiziidiluʼ de laani? Pa primeru gúniluʼ ca cosa jma nahuiiniʼ, casi gaca divertirluʼ, maʼ qué zápaluʼ tiempu para gúniluʼ ca cosa jma risaca, casi ca cosa espiritual. Nga runi Biblia ná caquiiñeʼ ganna ca xpinni Cristu «xii nga ni jma risaca» (Filipenses 1:10). Pa chinándaluʼ conseju riʼ, zápaluʼ tiempu para gúniluʼ ca cosa espiritual ne para gaca divertirluʼ. Cadi guiaandaʼ lii, pa gúniluʼ ca cosa ni jma risaca ca primeru la? zabeenduluʼ stale cosa galán.

[Imagen]

Gaca xhamígunu Dios zeeda gácani casi ti yagahuiiniʼ, naquiiñeʼ gápanu ni para guiniisi ni