Panda testigu stiʼ Jiobá runibiaʼluʼ. Zándaca xpecínuluʼ laadu, o zándaca nuu de laadu runineluʼ dxiiñaʼ o rineluʼ scuela; ne zándaca huanínedu lii de cani rusiidiʼ Biblia. Peru tupeʼ nga laadu, ne xiñee ruínedu binni de cani runi credu yaʼ.

Cásica guiráʼ binni laadu. Ládedu nuu hombre ne gunaa ni biniisi gadxé gadxé modo, nuu binni ni napa bueltu ne nuu ni qué gapa. Nuu de laadu gupa religión stiʼ, xcaadxi qué ñuni cré Dios dxiqué; peru ante gácadu testigu stiʼ Jiobá, guiradu guleedu tiempu para biziidiʼ chaahuidu cani rusiidiʼ Biblia (Hechos 17:11). Biʼniʼ credu ni bizíʼdidu ne despué gudixhe íquedu guni adorardu Jiobá Dios.

Ribeendudu ni galán ora ridúʼndadu Biblia. Cásica guiráʼ binni laadu, rápadu guendanagana ne laaca binni ruchee laadu; peru cumu rúnidu stipa pur gúnidu ni na ca conseju stiʼ Biblia lu xquendanabánidu guiráʼ dxi la? nabánidu jma galán (Salmo 128:1, 2). Nga nga tobi de ca razón ni nápadu para güínedu binni de ca cosa galán ni cazíʼdidu lu Biblia.

Nabánidu casi modo na Dios. Guiráʼ cani rusiidiʼ Biblia racanécani laadu guni sentirdu galán. Ne laaca racanécani laadu guni respetardu binni, gácadu nachaʼhuiʼ ne cadi cuánadu. Racaneni laadu gaca xquendabiaanidu nayá, gúnidu xiixa ni zacané binni, ne racanedu chuʼ ca familia ca tobi si ne guibánicaʼ casi na Dios. Nanna dxíchidu «biaʼca risaca irá binni nezalú Dios». Nga runi, laadu ca testigu stiʼ Jiobá, nuudu lu guidubi Guidxilayú, zadu de guiráʼ raza ne guidxi. Neca casi guiráʼ binni laadu, peru nácadu ti guidxi ni gástiruʼ stobi casi laa (Hechos 4:13; 10:34, 35).

• Xiñee zanda guininu cásica guiráʼ binni nga ca testigu stiʼ Jiobá.

• Xi maʼ bisiidiʼ Biblia laadu.