1. Ximodo cayuni sentir Marta, ne xiñee.

GUNÍʼ ique ximodo nuu Marta. Qué ganda gusiaandaʼ ra bicaachicabe bizaʼnaʼ: ndaaniʼ ti cueva ni bitágucabe ti guié ngola ruaa. Guizáʼ naná nuu ladxidoʼbe ne cayuni sentirbe casi ora nuabe ti cosa nanaa, casi guié ni nutaaguʼ ruaa baʼ ra gaʼchiʼ bizáʼnabe. Qué ganda guni crebe maʼ qué guinni bizáʼnabe ni nabé nadxiibe. Maʼ raca tapa gubidxa de guti Lázaro, ne dede dxi que riuu riree binni ziganna laabe ralídxibe ne cayacaʼ laabe.

2, 3. 1) Xi zándaca biʼniʼ sentir Marta ora biʼyaʼ Jesús. 2) Xi bisihuinni ca diidxaʼ ni guníʼ Marta.

² Yanna zuhuaa Marta nezalú hombre ni jma gunnaxhii Lázaro. Nanna dxíchinu gucaná ladxidoʼbe sti biaje ora bíʼyabe Jesús, purtiʼ laa si nga ñanda ñuni xiixa para cadi ñati bizáʼnabe. Peru laga caníʼnebe Jesús, ora nuucabe fuera de guidxi Betania, jma ziyatadxí ladxidoʼbe. Ne ratu si que maʼ gutadxí ladxidoʼbe ora bíʼyabe pabiáʼ nachaʼhuiʼ Jesús ne ora bisihuinni cayá laabe. Jesús gunabadiidxaʼ laabe caadxi cosa ni gucané laabe iguidxi fe stibe ne guni crebe ziasa binni lade gueʼtuʼ. Ora cayuíʼcabe diidxaʼ que, dede bicaani Marta guiníʼ ca diidxaʼ ni qué ziuu dxi guiaandaʼ riʼ: «Ma bine cre lii nga Cristu, Xiiñi Dios ni beeda ndaani guidxilayú riʼ» (Juan 11:27).

³ Rihuinni dxíchica nabé naguidxi fe stiʼ Marta. Neca cadi stale ni ruzeeteʼ Biblia de laabe, peru ejemplu stibe rusiidini laanu ximodo iguidxi fe stinu ne guni crenu zanda gacané Dios laanu. Peru ante guidúʼyanu ximodo zanda gacané ejemplu stibe laanu, guidúʼndanu primé relatu ni zeeda lu Biblia ra cayeeteʼ de laabe.

4. Panda binnilidxi Marta, ne ximodo bidxaagacabe Jesús.

⁴ Guzéʼtenu ni bizaaca chupa chonna beeu ante. Nabeza Lázaro ndaaniʼ guidxi Betania, nazaaca dxichi ne cabeza guidxaagalú  ti binni nabé risaca, ne binni riʼ nga Jesucristu. Raríʼ ridúʼyanu laaca ra nabézabe nabeza Marta ne María, guiropaʼ bizáʼnabe. Chupa chonna binni ni ruundaʼ de Biblia nacaʼ Marta nga huaniisi lade guiónnacabe, purtiʼ lu ca relatu ca rieeteʼ laabe nga ridxaagalube binni ralídxicabe ne laabe nga ruzeeteʼ ca relatu ca primé (Juan 11:5). Gastiʼ diʼ xiixa ni gabi laanu pa bichaganáʼ tobi de laacabe, peru ni nánnanu nga nabé guca xhamígucabe Jesús. Dxi bicheeche Jesús diidxaʼ ndaaniʼ guidxi Judea, ra nabé bicaalúcabe laa ne gucananaláʼdxicabe laa, stale biaje riguiaana Jesús ralídxicabe. ¡Nanna pabiáʼ ratadxí ladxidoʼbe ora rigánnabe laacaʼ yaʼ!

5, 6. 1) Xiñee nabé guyuu xhiiñaʼ Marta dxi yeganna Jesús laacaʼ. 2) Xi biʼniʼ María ora yendá Jesús ralidxi.

⁵ Nánnanu biʼniʼ Marta stale dxiiñaʼ ti cadi guiaadxaʼ gastiʼ binnilidxi ne guibánicaʼ galán. Ne guidubi dxi nisi maʼ canayúnibe buelta ndaaniʼ yoo, ne cumu chiganna Jesús laacabe la? jmaruʼ si stale ni cayúnibe. Laabe gudixhe íquebe gúnibe ti guendaró de guiráʼ lú ni chuulaʼdxiʼ binni jma risaca biʼniʼ invitarbe que, ne ca binni ni zándaca chiné. Dxiqué nabé risaca para binni guidxaagalú tuuxa ralidxi. Cásipeʼ guiuu binni ni biʼniʼ invitárcabe, rudiicabe ti bixiduʼ laa, rindádicabe guelaguidi ñee, riguiibicabe ñee ne riguucabe aceite rindáʼ naxhi ique (biindaʼ Lucas 7:44-47). Ne laaca ruuyacabe cadi guiaadxaʼ ni gó binni ca ne cúʼcabe listu ra gasiʼ.

⁶ Rihuinni dxíchica naquiiñeʼ guni Marta ne María stale dxiiñaʼ. Neca nuu biaje rieeteʼ de María casi ti gunaa jma nadá ne jma riníʼ ique xi naquiiñeʼ guni que benda la? laaca gucanebe Marta ora bizulú cayaca ca dxiiñaʼ que, peru ora bedandá Jesús, maʼ gadxé ni bíʼnibe. Cásipeʼ yendá Jesús ralídxicabe bizuluca cusiidiʼ, ¡ne jnézapeʼ modo biʼniʼ ni! Maʼ gadxepeʼ Jesús de ca xaíque yuʼduʼ bibani tiempu stiʼ. Purtiʼ laabe runi respetarbe gunaa ne riuuláʼdxibe gusiidibe laacaʼ de Reinu stiʼ Dios, ne de ngue nga ni jma bisiidibe. Dede cayecheʼ María gurí xañee Maestru stiʼ, ne cucaadiaga primé ne últimu diidxaʼ caniʼbe.

7, 8. Xiñee bidxiichi Marta, ne xi bíʼnibe ra maʼ qué ñanda ñuni huantarbe.

⁷ Zanda guxuíʼlunu xi cayuni sentir Marta óraque. Stale cosa nga naguu xaíquebe: gúnibe guendaró ne guiráʼ ni caquiiñeʼ gaca para guni tenderbe ca binni ni yeganna laabe. Ne laga zeʼ zeedabe ra cayúnibe guiráʼ bieque que, ruuyabe zuba béndabe ne ¡cadi cayuni gastiʼ! Zándaca bixhunilú Marta o dede bixhidxi xii para gusihuinni cadxiichi. Pa bíʼnibe zacá la? riénenu xiñee, purtiʼ qué zanda diʼ gúnibe guiráʼ dxiiñaʼ que stúbibe.

 ⁸ De raqué maʼ qué ñanda ñuni huantar Marta ne bicaa ridxi: «Señor, ñee nouʼ jneza cayuni bendaʼ, cudii lugar cayune irá ndi stube la? Gudxi laabe gueda acané be naa» (Luc. 10:40). ¡Guizáʼ nadipaʼ guníʼ Marta! Ora guniʼbe ca diidxaʼ riʼ, rihuínnica gucaláʼdxibe ñabi Jesús María ñasa ne ñacané laabe.

9, 10. 1) Xi bicabi Jesús Marta. 2) Xiñee nánnanu qué nusihuinni Jesús qué risaca dxiiñaʼ nadipaʼ ni cayuni Marta.

⁹ Zándaca nabé bidxagayaa Marta modo bicabi Jesús laa, ne dede yanna stale binni ni ruundaʼ Biblia nabé ridxagayaacaʼ modo bicabi Jesús. Né diidxaʼ nadóʼ gúdxibe Marta: «Ah Marta, Marta [...]. Aque stale ni naguu xaíque luʼ, ne nuu lu xizaa pur laa. Peru tobi si nga ni naquiiñe uyubi binni ne María ma ulí ni jma risaca. Ne iruti zaxha ni laa» (Luc. 10:41, 42). Xi gucalaʼdxiʼ Jesús niníʼ né ca diidxaʼ riʼ. Ñee gucaláʼdxibe niniʼbe nabé runi Marta dxiiñaʼ purtiʼ ricá ique gapa stale cosa risaca, o bisihuínnibe qué risaca guiráʼ dxiiñaʼ cayuni Marta pur guni guendaró que la?

¹⁰ Coʼ, cadi zacá diʼ ni. Jesús nanna cayuni Marta guendaró que de guidubi ladxidóʼ ne bisihuinni nadxii laabe. Ne laaca nanna Jesús cadi malu diʼ guni binni ti guendaró nanixe para cani ziganna laa, purtiʼ cadi xadxí guyebe «ti endaró» ni biʼniʼ Mateo para laabe (Luc. 5:29). Cadi pur guendaró diʼ que nga bilidxe Jesús Marta, sínuque pur ni bisihuinni jma risaca para laa. Cumu jma gucuá íquebe gúnibe ti guendaró de guiráʼ lú la? biaandaʼ laabe pa nuu sti cosa jma risaca. Xi laani yaʼ.

11, 12. Ximodo guniʼné Jesús Marta.

¹¹ Guyé Jesús, tobi lucha Xiiñiʼ Dios, ralidxi Marta para gusiidiʼ de Bixhoze. Ne nga nga ni jma risaca, cadi guendaró nanixe ni biʼniʼ Marta que ne nin ca guiráʼ dxiiñaʼ biʼniʼ que. Nanna dxíchinu nabé triste guyuu Jesús ora biʼyaʼ cadi cucaadiaga xhamiga guiráʼ ni cusiidiʼ que, purtiʼ ñacané cani laa niguidxi fe stiʼ, peru neca zaqué, bidiibe lugar laa quixhe ique xi guni. * Peru qué zucaadibe María gacané benda, ne pur ngue maʼ qué gucaadiaga ni cusiidibe.

 ¹² Para gunda gudixhedxí Jesús ladxidóʼ Marta, né diidxaʼ nadóʼ guníʼ labe chupa biaje ne gudxi laabe cadi naquiiñeʼ cuʼ xaíquebe ne chuʼbe xizaa pur gúnibe stale cosa. Cumu stale cosa galán ngue chigusiidiʼ Jesús la? ñanda ñúnibe ti guendaró huiiniʼ si ti nucaadiágabe laa. Rihuinni dxíchica qué nucueeza Jesús María pur gulí «ni jma risaca»: gucaadiaga laabe ne guiziidiʼ de laabe.

13. Xi zanda guizíʼdinu pur ni gudxi Jesús Marta.

¹³ Ni bizaaca ndaaniʼ lidxi Marta, rusiidiʼ ni laanu stale cosa. Rusiidiʼ ni laanu cadi naquiiñeʼ gudiʼnu lugar chuʼ xiixa ni gucueeza laanu chuʼnu «gaxha de Dios» (Mat. 5:3, TNM). Ne ora gápanu biuuzaʼ, naquiiñeʼ guidxaagalunu binni galán ne gúninu  dxiiñaʼ cásica biʼniʼ Marta; peru cadi naquiiñeʼ chúʼpenu xizaa pur gúninu stale cosa dede guiaandaʼ laanu xii nga ni jma risaca. Ora maʼ nuunu né xcaadxi xpinni Cristu, ni jma naquiiñeʼ guicá íquenu nga cuʼsaanu gana laanu ne guininu xiixa ni zeeda lu Stiidxaʼ Dios ni gacané laanu, ne cadi para si chidoʼno (biindaʼ Romanos 1:11, 12). Ti guendaró huiiniʼ si zanda gacané laanu iguidxi fe stinu.

14. Xiñee nánnanu gucuaa Marta conseju ni bidii Jesús laa de guidubi ladxidóʼ.

¹⁴ Ñee yenanda Marta conseju ni bidii Jesús laa la? Nanna dxíchinu yenándabe ni. Sicaríʼ bizulú apóstol Juan guníʼ de relatu stiʼ Lázaro: «Nadxii Jesús guionna cabe, Marta ne María ne Lázaro» (Juan 11:5). Maʼ gudiʼdiʼ chupa chonna beeu de guyé Jesús Betania, ne rihuínnica cadi naná diʼ nuu ladxidóʼ Marta pur ni gudxi Jesús laa, ne cadi daʼ diʼ xiana, sínuque gucuaabe conseju stiʼ Jesús de guidubi ladxidoʼbe. Raríʼ ridúʼyanu pabiáʼ naguidxi fe stiʼ Marta, ne zacá bisaanabe ti ejemplu galán para laanu, purtiʼ guiranu nga ziuu ora zulídxecabe.

15, 16. 1) Xi biʼniʼ Marta ora guca huará Lázaro. 2) Xiñee biiyaʼ Marta ne María pur gana si gulézacaʼ Jesús.

¹⁵ Dxi guca huará Lázaro, nánnanu gupa Marta laabe. Birá si ni bíʼnibe para chuʼ bizáʼnabe galán ne guianda, peru laga zidiʼdiʼ dxi jmaruʼ si malu nuu. Neca birá si ni cayuni ca bizáʼnabe, ra zidiʼdiʼ hora biiyacaʼ gastiʼ cadi cayacané laabe. ¡Nanna panda biaje biiyaʼ Marta modo nayati nuu lú bizaʼnaʼ, ne bietenalaʼdxiʼ guiráʼ biaje guyuucaʼ nayecheʼ ne dxi guyuucaʼ triste yaʼ!

¹⁶ Ora biʼyaʼ Marta ne María qué ganda guianda bizáʼnacaʼ, oraqueca biseendacaʼ tu chitidxi Jesús ra canagucheeche diidxaʼ. Ni cheʼ ca zazá chupa gubidxa para chindá ranuu Jesús ne gábibe laa «huará Lázaro, xhamigu» (Juan 11:1, 3). Ca baʼdudxaapaʼ que nánnacaʼ nadxii Jesús Lázaro ne nanna dxíchica zúnibe intiica si para gacanebe xhamígube. Peru ñee zindabe ante gatiʼ Lázaro la? Pa cabeza Marta ne María guedandá Jesús nagueenda la? qué nindaa biiyacaʼ pur gana si gulézacaʼ laabe, purtiʼ guti Lázaro.

17. Xiñee naná nuu ladxidóʼ Marta, ne xi bíʼnibe ora gúnnabe mayaca chindá Jesús Betania.

¹⁷ Biinaʼ Marta ne María ora gutiʼ bizáʼnacaʼ, de raqué biiyacaʼ chuʼ guiráʼ ni caquiiñeʼ para igaachiʼ bizáʼnacaʼ ne laaca bidxagalucaʼ guiráʼ ca binni ni ziganna laacaʼ, ca binni de Betania ne ca binni ni nabeza gaxha de laani. Peru nin lú Jesús. Nánnanu zeʼ ora jma naná nuu ladxidóʼ Marta. Gudiʼdiʼ si tapa gubidxa,  málasi gúnnabe maʼ zeeda Jesús ne mayaca chindá Betania. Neca nabé triste nuu Marta óraque, biasa ne qué liica ñabi María gastiʼ, bixooñeʼ ne yechagalú Jesús (biindaʼ Juan 11:18-20).

18, 19. Xi biʼniʼ cré Marta de ca gueʼtuʼ ca, ne xiñee naroʼbaʼ fe stibe.

¹⁸ Cásipeʼ biʼyaʼ Marta Maestru stiʼ, gúdxibe laa ni maʼ napa dxi cuchiiñaʼ guirópacabe, rábibe laa: «Pa ñuu lu rarí la? Señor, qué ñati di bizanaʼ». Neca maʼ guti bizáʼnabe, nánnabe zándaruʼ guni Jesús xiixa pur laa, purtiʼ guniʼbe: «Peru laca nanna irá ni inaba lu lu Dios la? zudii lii». Oraqueca guníʼ Jesús caadxi diidxaʼ ni biquidxi fe stibe, rabi laabe: «Zabani bizaʼna luʼ» (Juan 11:21-23).

¹⁹ Ora guníʼ Jesús ca diidxaʼ riʼ, guníʼ ique Marta ni chiguni Dios despué, ngue runi rábibe laa: «Nanna zabani be dxi iluxe guidxilayú, ra ibani irá binni» (Juan 11:24). ¡Aque naroʼbaʼ fe napa Marta xa! Dxiqué guyuu caadxi binni ni bisiidiʼ de religión  ni binibiáʼcabe casi ca saduceu. Laacaʼ qué ñuni crecaʼ pa zabani gueʼtuʼ sti biaje, neca zacá, Marta biʼniʼ cré de guidubi ladxidóʼ ni rusiidiʼ Stiidxaʼ Dios: zanda guiasa binni lade gueʼtuʼ (Dan. 12:13; Mar. 12:18). Nánnabe rusiidiʼ Jesús zabani ca gueʼtuʼ ca sti biaje ne laaca maʼ bisibani chupa chonna binni ni maʼ guti, peru qué huayuuyabe guiasa tuuxa ni maʼ ziné chupa chonna gubidxa de guti, casi Lázaro. ¡Qué ganna Marta xi cá ique Jesús guni!

20. Bisiene xi riníʼ ca diidxaʼ ni guníʼ Jesús ne ni bicabi Marta laabe ni zeeda lu Juan 11:25-27.

²⁰ Óraque guníʼ Jesús ti cosa nabé risaca ni bisihuinni maʼ bidii Bixhoze laa derechu guindisaʼ gueʼtuʼ lu guidubi naca Guidxilayú. Gúdxibe Marta: «Naa nga rusibane gueʼtuʼ, ne naa nga rudiee enda nabani». Óraque gunabadiidxabe Marta: «Ruʼnu cre nga la?». Óraque bicábibe Jesús ni bidúʼyanu ra bizulú capítulo riʼ. Marta biʼniʼ cré Jesús nga Mesías, Xiiñiʼ Dios, ne laabe nga ni nexheʼ gueeda lu Guidxilayú, casi maca guníʼ ca profeta ni bibani dxiqué (Juan 5:28, 29; biindaʼ Juan 11:25-27).

21, 22. 1) Ximodo bisihuinni Jesús riene pabiáʼ naná runi sentir binni ora gatiʼ tuuxa ni nadxii. 2) Ximodo biasa Lázaro lade gueʼtuʼ.

²¹ Ñee bisisaca Jiobá ne Jesús fe ni gupa Marta la? Bisisácacabe ni, ne zacá rihuínnini pur ni bizaaca Marta despué. Guidúʼyanu xiruʼ bizaaca: primé, bixooñeʼ Marta ziyubi benda. De raqué biiyabe nabé triste nuu Jesús ora caniʼné María nezalú guiráʼ binni ni ziganna laa. Ne biiyaʼ dxíchibe ora biʼnaʼ Jesús, ne qué nituí lú ñuuyacabe pabiáʼ naná nuu ladxidóʼ pur guti xhamigu. Despué, binadiágabe ora gunabaʼ Jesús ca binni nuu raqué cueecaʼ guié ni nutaaguʼ ruaa baʼ que (Juan 11:28-39).

²² Gudxi Marta laabe maʼ candáʼ yuudxuʼ cuerpu que, purtiʼ maʼ tapa gubidxa de guti bizaʼnaʼ. Peru Jesús bisietenalaʼdxiʼ laabe: «Ñee cadi ma gudxe lii pa guni cre lu zuuyu pabiáʼ nandxóʼ Dios la?». Biʼniʼ cré Marta, ne dxíqueca biiyaʼ pabiáʼ nandxóʼ Dios: ¡oraqueca bidii Jiobá poder Xiiñiʼ para guindisaʼ Lázaro! Qué ziuu dxi guiaandaʼ Marta guiráʼ ni biʼyaʼ dxi que: ora bicaa Jesús ridxi: «¡Lázaro, gudáʼ raríʼ!»; ora binadiágabe caxidxi cayasa Lázaro renda ca lari ni ruchéndacabe binni ora rigaachiʼ ne chaahuiʼ chaahuiʼ bidxiña ruaa baʼ que; ora guníʼ Jesús: «Lauxhedxe laabe, ne laudii lugar che be», ne qué ziuu dxi guiaandaʼ Marta ora gudiidxi dxiichicabe bizáʼnacabe (biindaʼ Juan 11:40-44). ¡Guizáʼ gutadxí ladxidóʼ Marta pur guiráʼ ni bizaaca dxi que!

23. Xi racalaʼdxiʼ Jiobá ne Jesús gúnicaʼ, ne xi naquiiñeʼ gúninu para guicaanu ca ndaayaʼ ca.

²³ Relatu riʼ rusihuinni cadi ti bacaandaʼ diʼ nga guiasa binni  lade gueʼtuʼ, sínuque nácani ti cosa nabé galán ni rusiidiʼ Stiidxaʼ Dios ne maʼ bihuinni gúcani dxiqué (Job 14:14, 15). Jiobá ne Xiiñiʼ guluucaʼ ndaayaʼ Marta, María ne Lázaro, ne laacaʼ racaláʼdxicaʼ cuʼcaʼ ndaayaʼ ca xpínnicaʼ ni napa fe. Nga runi, pa gaca fe stinu naguidxi casi guca fe stiʼ Marta, laaca zacaanu stale ndaayaʼ.

24. Padxí nga últimu biaje rieeteʼ de Marta lu Biblia.

²⁴ Sti biaje si ruzeeteʼ Biblia de Marta. Ne bizaaca ni ra cuzulú últimu semana bibani Jesús lu Guidxilayú riʼ. Cumu nanna Jesús zadxaagalú stale guendanagana ra cheʼ la? ngue runi, bibiguétabe Betania, ralidxi ca xhamígube, para gatadxí ladxidoʼbe. Ne de Jerusalén rizabe chonna kilómetru para chindabe raqué. Jesús ne Lázaro cayoxhicaʼ ralidxi Simón, ni gupa lepra, ne raríʼ nga últimu biaje rieeteʼ de Marta, relatu riʼ na: «Marta cutiidi» guendaroxhí (Juan 12:2).

25. Xiñee naca ca gunaa casi Marta ti ndaayaʼ lade ca binni ridagulisaa.

²⁵ Nabé ridxagayaanu gánnanu primé biaje rieeteʼ de Marta lu Biblia cayuni dxiiñaʼ, ne últimu biaje rieeteʼ de laabe laaca cayúnibe dxiiñaʼ, nisi cuyúbibe modo gudiibe ni caquiiñeʼ xcaadxi binni. Ca dxi stinu riʼ, riéchenu ora ridúʼyanu nuu stale gunaa runi dxiiñaʼ ne nachaʼhuiʼ casi Marta lade ca binni ridagulisaa. Ne ca gunaa riʼ nabé nápacaʼ fe, ne laani nga rucaa ni laacaʼ gacanecaʼ xcaadxi. Nanna dxíchinu qué nusaana Marta de ñapa fe, ne pur fe ni gúpabe gucaneni laabe gudxiilube ca guendanagana ni bidxaagalube despué.

26. Pora gucané fe stiʼ Marta laa.

²⁶ Chupa chonna gubidxa de gudoxhícabe, biʼniʼ huantar Marta sti yuubaʼ roʼ: biiti caadxi binni malu Maestru ni nabé nadxiibe. Ca binni qué iquiiñeʼ ne qué riaʼ riʼ gucaláʼdxicaʼ ñuuticaʼ Lázaro, purtiʼ stale binni biʼniʼ cré Jesús ra biásabe lade gueʼtuʼ (biindaʼ Juan 12:9-11). Ne sti yuubaʼ naroʼbaʼ gupa Marta nga ora gutiʼ tobi de ca binnilidxi, ne zaqué maʼ qué ñuucaʼ tobi si. Qué gánnanu padxí ne ximodo gúcani, peru ni nánnanu nga gucané fe ni gupa Marta laa para guni huantar biaʼ dxi bibani. ¡Aque naroʼbaʼ fe gupa Marta xa!