1, 2. Xi dxiiñaʼ cayuni Noé ne binnilidxi, ne xi guendanagana cadxaagalúcabe.

GUIZÁʼ maʼ bidxaga Noé purtiʼ nabé maʼ biʼniʼ dxiiñaʼ. Óraque gurí lu ti muriu caziilaʼdxiʼ ti ratu. Cusigaa deche laga cayuuyaʼ pabiáʼ naroʼbaʼ arca ni cayúnicaʼ. Nabé nadipaʼ xhoʼ alquitrán ndaʼ cayuuxiibe ne cayunadiágabe caxidxi ca herramienta ni caquiiñecabe. De ra zuba Noé, cayuuyaʼ pabiáʼ nadipaʼ dxiiñaʼ cayuni binnilidxi ra cayaca arca que. Maʼ stale iza de cayacané ca xiiñibe laabe, ca xuaalídxibe ne xheelabe ni nabé nadxiibe lu dxiiñaʼ riʼ. Nabé maʼ bíʼnicabe dxiiñaʼ, peru stáleruʼ ni cayaadxaʼ gúnicabe para guiluxe arca que.

² Ca binni que nacaʼ cayaca íquecabe. Ne dxi mayaca guilúxecabe arca que, jmaruʼ si ruxídxicaʼ ne riniʼcaʼ cadi dxandíʼ ziaba ti nisaguié naroʼbaʼ ni gundaahua guidubi Guidxilayú, casi cayabi Noé laacabe. Qué ganda guni crécabe pa ziuu dxi guizaaca xiixa ni gunitilú guidubi naca guidxilayú. Cadi cayenedícabe xiñee cuniti si Noé ne binnilidxi xtiémpucaʼ lu ti dxiiñaʼ ni qué liica ziuu ra iquiiñeʼ. Peru Jiobá, Dios ni biʼniʼ adorar Noé, qué ñuuyaʼ diʼ laabe casi ti binni ni cayaca ique.

3. Ximodo nga guzané Noé Dios.

³ Biblia na: «Noé guzané Dios ni dxandíʼ» (biindaʼ Génesis 6:9). Xi riníʼ ca diidxaʼ ca yaʼ. Qué riníʼdicani biete Dios lu Guidxilayú riʼ ne ninca qué ñe diʼ Noé guibáʼ. Ni riníʼ ca diidxaʼ riʼ nga bizuubabe stiidxaʼ Dios cásipeʼ modo gudxi laabe ne guizáʼ gunnaxhiibe laa, ne biiyabe Jiobá casi ti xhamígube ni riné laabe guiráʼ neza chebe. Gudiʼdiʼ si chupa chonna mil iza, sicaríʼ gucuá lu Biblia de Noé: «Pur modo bini cre be que bisihuinni be pabiáʼ cuchee binni guidxilayú» (Heb. 11:7). Ximodo biʼniʼ Noé ni yaʼ. Ne xi zanda guizíʼdinu de fe ni bisihuínnibe.

4, 5. Xiñee bidale guendaquéiquiiñeʼ ca dxi bibani Noé.

⁴ Noé biniisi lade binni malu, ne laga zidiʼdiʼ dxi jma malu ziyaca ca binni que. Maca zacá binni dede dxi bibani Enoc, bixhoze bixhozebiidabe, sti hombre nachaʼhuiʼ ni guzané Dios, ne guníʼ maʼ  gudixhe Dios ti dxi gunitilú guiráʼ binni malu. Peru dxi bibani Noé, gudidisú ca binni que né guiráʼ guendaquéiquiiñeʼ ni bíʼnicaʼ. Ne Jiobá biiyaʼ guizáʼ maʼ bidale guendaridinde lu guidubi naca Guidxilayú (Gén. 5:22; 6:11; Jud. 14, 15). Peru xiñee biʼniʼ ca binni que guiráʼ guendaquéiquiiñeʼ que yaʼ.

⁵ Bíʼnicabe ni pur ti cosa nabé feu ni bizaaca lade ca ángel stiʼ Dios. Tobi de laacaʼ maca bidxiideche Jiobá ra guníʼ mal de laabe ne ra bicaa Adán ne Eva gucheecaʼ, ne zacá beeda gácabe Binidxabaʼ. Ca dxi bibani Noé, guyuu xcaadxi ángel ni bidaaguʼ Binidxabaʼ ne bidxiidéchecaʼ Jiobá. Bisaanacaʼ puestu ni bidii Dios laacaʼ guibáʼ, beedacaʼ ndaaniʼ Guidxilayú casi binni ne bichaganacaʼ caadxi gunaa sicarú. Cumu nabé malu ca ángel riʼ, ruchacaʼ bi yánnicaʼ ne ruyúbicaʼ para laasicaʼ la? ca binni que laaca guca xpiaʼcaʼ casi xpiáʼcabe (Gén. 6:1, 2; Jud. 6, 7).

6. Ximodo bibani binni ca dxi guyuu ca nefilim que, ne xi gudixhe ique Jiobá guni.

⁶ Ra bichaganáʼ ca ángel riʼ ca gunaa que la? gule caadxi binni guizáʼ nasoo ne nabé nadipaʼ. Biblia na biree lácabe nefilim, ni riníʼ «ni rusaba xcaadxi binni». Pur laacabe nabé guyuu guendaquéiquiiñeʼ ndaaniʼ Guidxilayú. Ngue runi, biiyaʼ Dios «bidale guendaquéiquiiñeʼ ni cayuni binni ndaaniʼ guidxilayú riʼ, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora». Jiobá gudixhe ique gunitilú ca binni malu que ra guizaa ti gayuaa gande iza (biindaʼ Génesis 6:3-5).

7. Xi guendanagana bidxagalú Noé ne xheelaʼ ra bisiniisicaʼ ca xiiñicaʼ.

⁷ Bichaganáʼ Noé ti gunaa nabé nachaʼhuiʼ, ne dxi maʼ nápabe  jma de 500 iza gúpabe chonna xiiñibe: Sem, Cam ne Jafet. * ¡Nanna pabiáʼ nagana guca para laabe gusiniisibe ca xiiñibe lade ca binni qué iquiiñeʼ que yaʼ! Laabe ne xheelabe nabé gúpacabe laacaʼ ti cadi guicá xpiaʼ ca binni malu que laacaʼ. Ca nefilim que nabé «nadipaʼ» gúcacaʼ ne «nabé binibiaʼ binni» laacaʼ, ne guiráʼ xcuidi nabé riuuláʼdxicaʼ gácacaʼ casi laacabe. Noé ne xheelaʼ qué ñanda ñúnicaʼ gastiʼ para cadi ñanna ca xiiñicaʼ guiráʼ guendaquéiquiiñeʼ ni canayuni ca gigante que, peru ni gunda bíʼnicabe nga bisiidicabe laacaʼ de Jiobá, Dios ni nanalaʼdxiʼ guiráʼ cosa malu. Gupa xidé gucanécabe laacaʼ guiénecaʼ riuubaʼ ladxidóʼ Jiobá guʼyaʼ tinde binni ne qué riuuláʼdxibe ora qué ruzuubaʼ binni diidxaʼ (Gén. 6:6).

8. Ximodo zanda chinanda ca binni ni napa xiiñiʼ ejemplu stiʼ Noé ne xheelaʼ.

⁸ Ca dxi stinu riʼ, ca binni ni napa xiiñiʼ nánnacaʼ xi guiráʼ guendanagana bidxagalú Noé ne xheelaʼ. Yanna riʼ laaca nabé maʼ bidale guendaridinde ne binni ni qué ruzuubaʼ diidxaʼ. Ndaaniʼ stale guidxi nabé riuu ca hombrehuiiniʼ ca lu xiixa banda para guireecaʼ lú binni. Ne dede ni ruuyaʼ ca xcuidi ca o ni riguítecaʼ nabé maʼ rihuinni guendaridinde ne ra runi binni cosa malu. Peru binni ni rusiidiʼ xiiñiʼ jneza la? rúnicaʼ stipa pur gacanecaʼ laacabe para cadi guicá xpiaʼ ca binni malu laacabe ne rusiidicaʼ laacabe de Jiobá, Dios de guendariuudxi, ni chindee guiráʼ guendaridinde nuu yanna (Sal. 11:5; 37:10, 11). Zanda gusiniisi binni xiiñiʼ jneza ndaaniʼ guidxilayú malu riʼ. Noé ne xheelaʼ gunda bíʼnicaʼ ni. Ca xiiñicabe gúcacaʼ binni nachaʼhuiʼ ne ca gunaa ni bichaganácabe laaca bizuubacaʼ stiidxaʼ Jiobá lu guiráʼ ni bíʼnicaʼ.

9, 10. 1) Xi gudxi Jiobá Noé ni bichaa xquendanabani. 2) Xi gudxi Jiobá Noé de arca que ne xi naquiiñeʼ gúnibe para guilabe.

⁹ Málasi ti dxi bichaa xquendanabani Noé. Guniʼné Jiobá laabe ne gudxi laabe maʼ gudixhe ique gunitilú ca binni malu ni nabani ca dxi que, ne gudxi laabe: «Bizáʼ ti arca para lii ne biquiiñeʼ yaga ni napa tini» (Gén. 6:14).

¹⁰ Nuu tu riníʼ ique ti barcu nga arca que, peru cadi zacá diʼ ni. Qué gapa ni proa, popa, quilla nin timón. Laani gúcani ti caja ngola. Gudxi Jiobá Noé pabiaʼpeʼ naquiiñeʼ gaca arca que, ximodo gácani ne naquiiñeʼ xhúbibe alquitrán guidubi nácani, cásica ndaaniʼ ni ne zaqueca ladi ni. Ne laaca gudxi laabe: «Chigusabaʼ ti nisaguié naroʼbaʼ lu guidxilayú [...]. Guiráʼ xixé ni nabani lu guidxilayú zati». Peru bíʼninebe Noé ti pactu ti ganda guilá ne laaca guilá binnilidxi, gúdxibe laa: «Napa xidé chuʼluʼ ndaaniʼ arca ca, lii ne ca xiiñiluʼ ne  xheelaluʼ ne xheelaʼ ca xiiñiluʼ». Ne laaca gudxi Dios laabe naquiiñeʼ cuʼbe guiráʼ clase maniʼ ndaaniʼ arca que. Cani chuʼ si ndaaniʼ ni zalacaʼ (Gén. 6:17-20).

11, 12. Xi dxiiñaʼ nadipaʼ chiguni Noé, ne ximodo gunda bíʼnibe ni.

¹¹ Guizáʼ nadipaʼ dxiiñaʼ chiguni Noé. Nabé naroʼbaʼ chigaca arca que. Chigápani 133 metru de ziuulaʼ, 22 metru de xilaga ne 13 metru de nasoo. Jma naroʼbaʼ ni que ca barcu de yaga ni huayúnicabe yanna ne jma ziuulaʼ ni que ti campu ra riguítecabe futbol. Peru ñee bidxii Noé dxiiñaʼ riʼ la? Ñee guniʼbe nagana para gúnibe ni la? Ñee bichaabe caadxi cosa para cadi gácapeʼ nagana para laabe gúnibe ni la? Biblia na: «Noé bizulú biʼniʼ guiráʼ ni biʼniʼ mandar Dios laa guni. Bíʼnibe zaqué zaquepeʼ» (Gén. 6:22).

¹² Gudiʼdiʼ stale iza para biluxe Noé arca que, zándaca cuarenta o cincuenta iza. Gupa xidé bisábabe stale yaga, guyuaʼbe cani ne bigabe cani para gúnibe cani muriu, tabla, ne xcaadxi cosa. Ne despué biquiidibe cani. Arca que naquiiñeʼ gácani de chonna pisu, gápani cuartu huiiniʼ ne ti puertaʼ. Ne zándaca ora quibaʼ ique ni la? naquiiñeʼ gaca xcaadxi nasoo galaa ni ti ganda guxooñeʼ nisa guiropaʼ ladu ne laaca naquiiñeʼ gápani ventana guidubi ruaa ni luguiáʼ (Gén. 6:14-16).

13. Aparte de biʼniʼ Noé arca que, xi sti dxiiñaʼ jma nagana bíʼnibe, ne ximodo biiyaʼ ca binni que dxiiñaʼ riʼ.

¹³ Ra zidiʼdiʼ iza maʼ zihuinni ximodo chiguiluxe arca que. ¡Nanna pabiáʼ nayecheʼ guyuu Noé pur gucané binnilidxi laa yaʼ! Peru bíʼnibe sti dxiiñaʼ jma nagana. Biblia na «gudxi [Noé] laaca nusaana ca irá enda ruchee sticaʼ» (biindaʼ 2 Pedro 2:5). Nga rusihuinni gupa xidé gúcabe nadxibalú para gunda gúdxibe ca binni que zadxiña dxi zanitilucaʼ. Xi biʼniʼ ca binni que yaʼ. Jesucristu na «caʼru guiene ca xi chi gaca», purtiʼ jma nga bíʼnicaʼ ca cosa ni maca rúnicaʼ, casi gocaʼ, guecaʼ, guichaganacaʼ, ne qué nulábicaʼ Noé (Mat. 24:37-39). Nanna dxíchinu biʼniʼ búrlacabe laabe ne binnilídxibe, bicaalúcabe laabe ne zándaca dede gudíñecabe laabe ne laaca gucaláʼdxicabe nucueezacabe laabe para cadi gúnibe arca que.

14. Xi zanda guizíʼdinu de Noé ne binnilidxi.

¹⁴ Neca zacá, Noé ne binnilidxi qué ñuu dxi nireecaʼ gana. Biʼnirúcabe dxiiñaʼ para gunduuxecabe arca que, neca ca binni que nacaʼ cunitisícabe tiempu stícabe, ne ti guendahuati ngue ni cayúnicabe. Ca dxi stinu riʼ, ca familia ni naca xpinni Cristu zanda guiziidicaʼ stale de fe ni bisihuinni Noé ne binnilidxi. Ne Biblia na nabáninu ra «mayaca izaa xhi guidxilayú» (2 Tim. 3:1). Jesús na zaca ca dxi nabáninu riʼ cásica tiempu bizáʼ Noé arca que. Pa qué gulabi binni laanu ora maʼ canagucheechenu stiidxaʼ Reinu, guni búrlacaʼ laanu o dede sanándacaʼ laanu la? galán guietenaláʼdxinu ejemplu stiʼ Noé, purtiʼ laa laaca gupa ca guendanagana riʼ.

15. Tuu nga ca binnilidxi Noé ni gutiʼ dxi mayaca gusaabe 600 iza.

¹⁵ Dxi maʼ ziluxe arca que, mayaca gusaa Noé 600 iza ne dxi que nga beeda gati Lamec, bixhózebe. * Gaayuʼ iza despué guti Matusalén, bixhozebiidabe. Ne hombre riʼ bibani 969 iza, ne Biblia ruzeeteʼ laabe nga binni ni jma xadxí bibani (Gén. 5:27). Matusalén ne xiiñibe Lamec biiyarucaʼ dxi nabani Adán, primé hombre ni guyuu lu Guidxilayú.

16, 17. 1) Xi gudxi Jiobá Noé dxi napa 600 iza. 2) Xi biʼniʼ sentir Noé ne binnilidxi ora bíʼyacaʼ zeeda guiráʼ maniʼ que ra nuu arca que.

¹⁶ Dxi maʼ napa Noé 600 iza guniʼné Dios laa sti biaje, ne gudxi laabe: «Guyuu, lii ne binnilídxiluʼ ndaaniʼ arca ca». Ne laaca gudxi Jiobá laabe nuu sti cosa ni naquiiñeʼ gúnibe. Xi laani yaʼ. Gudxi laabe naquiiñeʼ cuʼbe guiráʼ clase maniʼ ndaaniʼ arca que: de ca maniʼ nayá ni riquiiñecabe para gudiicabe ofrenda naquiiñeʼ cuʼbe gadxe, ne chupa chupa de xcaadxi maniʼ (Gén. 7:1-3).

¹⁷ Nanna pabiáʼ bidxagayaa Noé ne binnilidxi ora bíʼyacaʼ zeeda guiráʼ clase maniʼ ra nuu arca que, cásica ni nahuiiniʼ zaqueca ni naroʼbaʼ, nuu ni nadóʼ, nuu ni naduxhuʼ, nuu ni zeeda zá, nuu ni zeeda papa, nuu ni zeeda chesa ne nuu ni zeeda xubi ndaaniʼ layú. Yanna, xi biʼniʼ xhuncu Noé para gunda guluu guiráʼ maniʼ guiʼxhiʼ  que ndaaniʼ arca que yaʼ. Cadi cananaazeʼ diʼ Noé laacame, ne cadi canagusixooñebe ca maniʼ que o cuyúbibe ximodo cuʼbe laacame ndaaniʼ arca que. Relatu riʼ na stúbicame «guyuucame [...] ndaaniʼ arca que» (Gén. 7:9).

18, 19. 1) Ximodo ñanda nusiénenu tuuxa ni raca nagana para laa guni cré pa dxandíʼ guca cani rieeteʼ lu relatu stiʼ Noé. 2) Ximodo bisihuinni Jiobá nuu xpiaaniʼ pur modo bilá ca maniʼ que.

¹⁸ Nuu tu raca nagana para laa guni cré pa dxandíʼ gúcani zacá. Qué randa riníʼ íquecabe ca maniʼ que nuudxicaʼ ndaaniʼ arca que. Yanna, guiníʼ ique chaahuinu ndiʼ: ñee qué gapa Dios ni bizáʼ guibáʼ ne Guidxilayú poder para gucueeza ca maniʼ duxhuʼ que ne gucaabe laacame gácacame nadóʼ la? Guietenaláʼdxinu Jiobá nga bizáʼ ca maniʼ ca ne laasibe nga zanda gucueezabe guiráʼ ni bizaʼbe. Iza despué bixhélebe nisadóʼ Xiñáʼ ne bicueezabe Gubidxa ti biaje. Yanna, ñee qué zanda gúnibe guiráʼ ni rieeteʼ lu historia stiʼ Noé la? Zanda pue.

¹⁹ Nanna dxíchinu ñanda nuyubi Dios sti modo para nulá ca maniʼ que. Peru ora gúdxibe Noé guni ti arca para guilácame bisihuínnibe nuu xpiaanibe ne rusietenalaʼdxiʼ ni laanu ni gúdxibe primé hombre bizaʼbe que ora gúdxibe laa gapa guiráʼ maniʼ nuu lu Guidxilayú (Gén. 1:28). Ne laaca galán gánnanu stale binni riquiiñeʼ historia riʼ para gusiidiʼ ca xiiñiʼ cadi binni si nga risaca para Jiobá, sínuque né ca maniʼ ni bizaʼbe.

20. Xi zándaca biʼniʼ Noé ne binnilidxi ra maʼ cayaadxaʼ sti semana si para gusaba Jiobá nisaguié naroʼbaʼ que.

²⁰ Gudxi Jiobá Noé maʼ sti semana si cayaadxaʼ para gusábabe nisaguié naroʼbaʼ que. Nabé stale dxiiñaʼ bíʼnibe ca dxi que. Bixuiʼlú  cayuuyaluʼ Noé caguu cada tobi de ca maniʼ que lugar stiʼ, caguube ni gocaʼ ne guiráʼ cosa stiʼ binnilídxibe. Nanna dxíchinu nabé biʼniʼ xheelaʼ Noé dxiiñaʼ, ne zaqueca guionnaʼ xuaalídxibe para biʼniʼ chaahuicaʼ ndaaniʼ arca que ti ganda guibánicabe ndaaniʼ ni.

21, 22. 1) Xiñee qué ridxagayaanu gánnanu qué nulabi ca binni que Noé. 2) Padxí bisaana ca binni que de guni búrlacaʼ Noé ne binnilidxi.

²¹ Peru xi biʼniʼ ca binni que ora bíʼyacaʼ guiráʼ ni cayúnicabe que yaʼ. Casi guníʼ Jesús, qué nulábicabe Noé, neca biiyacabe caguu Jiobá ndaayaʼ laabe ne dxiiñaʼ ni cayúnibe. Nin ora bíʼyacabe cayuu guiráʼ maniʼ que ndaaniʼ arca qué nuchaacabe. Ne qué ridxagayaanu gánnanu zacá biʼniʼ ca binni que, purtiʼ yanna zacaca runi binni. Laaca qué rinacaʼ guni crecaʼ pa maʼ nabáninu lu ca últimu dxi stiʼ guidxilayú riʼ, neca rihuinni dxichi zacá ni. Ne casi guníʼ apóstol Pedru, stale tu laa zuni burla cani runi cré zaca cani cá lu Biblia (biindaʼ 2 Pedro 3:3-6). Ne nánnanu zacaca nga bizaaca Noé ne binnilidxi.

²² Padxí bisaana ca binni que de guni búrlacaʼ laacabe yaʼ. Biblia ruzeeteʼ guluu si Noé binnilidxi ne guiráʼ maniʼ que ndaaniʼ arca que la? «biseeguʼ Jiobá puertaʼ que». Ni biʼniʼ Jiobá riʼ, biseeguʼ ni ruaa ca binni ni nuu gaxha ni cayuni burla laacabe. Ne pa qué ñaanadxícabe de ñuni búrlacabe la? óraruʼ bíʼyacabe maʼ cayaba nisaguié que bigánicabe, purtiʼ biaba dxacha nisaguié dede bilaahua guidubi naca Guidxilayú, cásipeʼ guníʼ Dios que (Gén. 7:16-21).

23. 1) Ximodo nánnanu qué ñecheʼ Jiobá pur guti guiráʼ ca binni malu que. 2) Xiñee naquiiñeʼ chinándanu ejemplu stiʼ Noé ca dxi stinu riʼ.

²³ Ñee biecheʼ Jiobá pur guti guiráʼ ca binni malu que la? Coʼ, qué ñéchedibe (Ezeq. 33:11). Laabe bidiibe laacaʼ stale tiempu para nuchaacaʼ xpiaʼcaʼ. Ñee ñanda nuzuubacabe stiidxaʼ Dios ne nilácabe ora biaba nisaguié naroʼbaʼ que la? Ñanda pue, ne ngapeʼ nga ni biʼniʼ Noé. Purtiʼ Noé guzané Dios, o bizuubabe stiidxaʼ lu guiráʼ ni bíʼnibe. Casi maʼ bidúʼyanu ra bizulú capítulo riʼ, Biblia na «pur modo bini cre be que bisihuinni be pabiáʼ cuchee binni guidxilayú» tiempu bibánibe. Zacapeʼ nga bíʼnibe, pur fe ni gúpabe bisihuínnibe pabiáʼ cuchee ca binni bibani ca dxi stibe. Ne laaca pur fe ni gúpabe que bilabe ne bilá binnilídxibe. Ra chinándaluʼ ejemplu stibe laaca zápanu stale ndaayaʼ, laanu ne zaqueca binnilídxinu. Cásica Noé, lii laaca zanda sáneluʼ Jiobá Dios, zanda gaca xhamíguluʼ laabe, ne qué ziuu dxi gusaana de gaca xhamígutu.