Bixuiʼlú ti gunaa guizáʼ nadxii xiiñiʼ, né stale cariñu cuzuchaahuiʼ baʼduhuiiniʼ stiʼ para cheʼ scuela. Ruuyabe pa cadi nabiidiʼ ladi, pa nayá xhaba ne pa rihuinni galán. Pur ni runi gunaa riʼ, riuu baʼduhuiiniʼ riʼ nazaaca ne rihuinni pabiáʼ rizaalaʼdxiʼ bixhoze ne jñaa laa. Zacaca nga racalaʼdxiʼ Jehová gácanu nayá lu guiráʼ ni gúninu ne ni riníʼ íquenu purtiʼ nadxii laanu. Ne ora rúninu stipa pur chuʼnu nayá la? riuʼnu nazaaca ne riníʼ binni bien de Dios ni runi adorarnu.

1. ¿Ximodo zanda chuʼ cuerpu stinu nayá?

Jehová cayabi laanu: «Naquiiñeʼ gácatu binni santo» (1 Pedro 1:​16). Para gácanu santo, caquiiñeʼ chuʼ cuerpu stinu ne xquendabiaaninu nayá. Rusihuínninu nácanu nayá ora rázenu guiráʼ dxi, riguíʼbinu xhábanu, ridúʼyanu chuʼ ra lídxinu ne xcárrunu nayá ne ora riguixhe chaahuinu guiráʼ ni nápanu. Ne laaca rigusianu ra Yoo stiʼ Reinu. Pa gácanu binni nayá la? zucaa ni binni gusisaca Jehová (2 Corintios 6:​3, 4).

2. ¿Xi cadi naquiiñeʼ gúninu para chuʼnu nayá?

Biblia cudii conseju riʼ laanu: «Gusianu laanu de guiráʼ ni runi biidiʼ cuerpu stinu ne espíritu stinu» (2 Corintios 7:1). Nga runi, nabé risaca gucáʼnanu guiráʼ cosa ni zanda guni biidiʼ cuerpu stinu o xquendabiaaninu. Ne cumu racaláʼdxinu guiechené Jehová laanu pur ca cosa ni riníʼ íquenu la? rúninu stipa para cadi guiníʼ íquenu cosa ni cadi jneza (Salmo 104:​34). Ne laaca rúninu stipa para cadi guininu diidxaʼ ni guniná stobi o diidxaʼ guidxa (biindaʼ Colosenses 3:8).

¿Xiruʼ zanda guni biidiʼ cuerpu stinu o xquendabiaaninu yaʼ? Caadxi cosa ni zanda guni biidiʼ cuerpu stiʼ binni nga cubaʼ gueza o gasaʼ bandaga coca. Laaca cadi naquiiñeʼ gácanu adictu xiixa medicamentu o gaca drogarnu. Pa gucáʼnanu ca cosa riʼ, ziuʼnu nazaaca ne zusihuínninu runi respetarnu xquendanabáninu, regalu ni bidii Dios laanu. Ne para ganda chuʼ xquendabiaaninu nayá, caquiiñeʼ gucáʼnanu caadxi cosa ni cadi jneza runi binni, casi quiteʼ tuuxa ra naca hombre o ra naca gunaa o guʼyaʼ pornografía (Salmo 119:​37; Efesios 5:5). Nuu biaje raca nagana para binni gusaana tipu viciu riʼ, peru nuu Jehová dispuestu gacané laanu gusaananu ni (biindaʼ Isaías 41:​13).

 GUIZÍʼDIRUNU JMA

3. Zusisácanu Jehová pa gácanu ti binni nayá

Ora guidúʼndanu ca ley ni bidii Jehová guidxi Israel ni guyuu dxiqué, riénenu pabiáʼ risaca para Jehová gácanu nayá. Laguundaʼ Éxodo 19:​10 ne 30:​17-​19, ne laiquiiñeʼ ca pregunta riʼ para güitu diidxaʼ:

• ¿Ximodo racané ca versículo riʼ laanu gánnanu pabiáʼ risaca para Jehová chuʼ binni nayá?

• ¿Xi zanda gúniluʼ para gácaluʼ ti binni nayá?

Riquiiñeʼ stale stipa ne tiempu para gaca tuuxa ti binni nayá. Peru zanda gúninu ni, gastiʼ naca paraa nabézanu, pa pobre o pa ricu laanu. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:

• Pa guʼyaʼ ca binni runi predicarnu nayá ca cosa stinu, ¿xiñee rábiluʼ zacané ni laacabe guni respetárcabe Jehová yaʼ?

4. Bisaana intiica viciu nápaluʼ

Pa rigúʼbaluʼ gueza, droga o nácaluʼ adictu xiixa medicamentu la? zándaca gaca nagana para lii gusaanaluʼ viciu riʼ. Peru ti cosa ni zanda gacané lii nga guiníʼ íqueluʼ xi dañu cayuni viciu riʼ cuerpu stiluʼ ne xquendanabániluʼ. Laguundaʼ Mateo 22:​37-​39, ne laguiníʼ pa cubaʼ tuuxa gueza o gapa sti viciu, ximodo zanda guxheleʼ ni laa de...

• ... Jehová.

• ... familia stiʼ ne ca xhamigu.

Biiyaʼ xi zanda gacané lii para gusaanaluʼ xiixa viciu. a Laguuyaʼ VIDEU riʼ.

Laguundaʼ Filipenses 4:​13 ne laiquiiñeʼ ca pregunta riʼ para güitu diidxaʼ:

• Pa gapa binni costumbre guni orar, guʼndaʼ Biblia ne cadi guiaadxaʼ reunión, ¿ñee rábiluʼ zanda gacané ni laabe gusaanabe xiixa viciu la? ¿Xiñee riníʼ íqueluʼ zacá yaʼ?

 5. Biʼniʼ stipa cadi gúniluʼ o guiníʼ íqueluʼ xiixa ni zuni biidiʼ xquendabiaaniluʼ

Laguundaʼ Colosenses 3:5 ne laiquiiñeʼ ca pregunta riʼ para güitu diidxaʼ:

• ¿Ximodo nánnanu ti cosa nabiidiʼ para Jehová nga guʼyaʼ binni pornografía, guseendaʼ xiixa videu o imagen ra rihuinni diidxaʼ guidxa o quiteʼ ra naca hombre o ra naca gunaa?

• ¿Ñee rábiluʼ jneza nga guinabaʼ Jehová laanu chuʼ xquendabiaaninu nayá la? ¿Xiñee rábiluʼ zacá ni yaʼ?

Biiyaʼ ximodo zanda gusaana de guiníʼ íqueluʼ cosa ni zuni biidiʼ xquendabiaaniluʼ. Laguuyaʼ VIDEU riʼ.

Biquiiñeʼ Jesús ti ejemplu para gusiidiʼ laanu xi caquiiñeʼ gúninu pa racaláʼdxinu chuʼnu nayá nezalú Dios. Laguundaʼ Mateo 5:​29, 30 ne laiquiiñeʼ pregunta riʼ para güitu diidxaʼ:

• Cadi caníʼ diʼ Jesús caquiiñeʼ peʼ guninanu laca laanu, sínuque ni nabe nga caquiiñeʼ gúninu stipa para gusaananu ca cosa ni zuniná laanu. ¿Xi caquiiñeʼ gúninu para gusaana de guiníʼ íquenu cosa ni zanda guni biidiʼ xquendabiaaninu yaʼ? b

Pa cayaca nagana para lii gusaana de guiníʼ íqueluʼ cosa ni cadi jneza, gunna rusisaca Jehová stipa ni cayúniluʼ. Laguundaʼ Salmo 103:​13, 14 ne laiquiiñeʼ ca pregunta riʼ para güitu diidxaʼ:

• Pa cayaca nagana para lii gusaana de gúniluʼ o guiníʼ íqueluʼ xiixa ni zuni biidiʼ lii, ¿ñee rábiluʼ zanda gacané ca textu riʼ lii la? ¿Xiñee rábiluʼ zacá ni yaʼ?

 XI BIZÍʼDINU

Pa gúninu stipa para gaca xpiaʼnu galán, ne chuʼ cuerpu stinu ne xquendabiaaninu nayá la? zusiéchenu Jehová.

Xi biziidiluʼ

• ¿Xiñee nabé risaca gácanu ti binni nayá?

• ¿Xi zanda gúninu para chuʼ cuerpu stinu nayá?

• ¿Xi caquiiñeʼ gúninu para gaca xpiaʼnu galán ne guiníʼ íquenu ni jneza?