¿Ñee dxandíʼ zanda gacané esperanza laanu lu xquendanabáninu la?

NAPA Daniel chii iza ne maʼ zinebe ti iza de huarabe de cáncer. Neca ca doctor ne familia stibe guniʼcaʼ maʼ qué ziándabe, peru laabe guníʼ íquebe ziándabe ne zaniisibe ne zuyúbibe modo guidxélabe ti remediu ni gusianda cáncer. Cabeza Daniel chiguuya ti doctor especialista de cáncer ni napa que laa. Peru ora bedandá dxi que, maʼ qué ñanda ñé doctor que. Bizulú Daniel biree gana ne guizáʼ guyuu triste ne despué de chupa chonna gubidxa gútibe.

Ti doctor ni runi estudiar ximodo zanda guniná o gacané esperanza binni nga guníʼ ni bizaaca Daniel riʼ. Zándaca huayunadiágaluʼ huazaaca tuuxa binni ni bizaaca Daniel riʼ. Guzéʼtenu ejemplu stiʼ ca binnigola ni mayaca gatiʼ. Nuu de laacaʼ ribézacaʼ guedaguuya ti familia sticaʼ laacaʼ, ne inque si maʼ biiyacabe familia ni cabézacabe que, ráticabe. ¿Xii nga racané laacabe guni huantárcabe dede ora gueeda familia stícabe yaʼ? ¿Ñee esperanza ca nga ni rusibani laacabe la?

Nuu stale doctor runi cré zanda guchaa xquendanabani ti binni dede chuʼ nazaaca pa gapa esperanza. Peru cadi guiráʼ doctor runi cré zacá ni. Nuu de laacabe ná gastiʼ diʼ ti prueba ni huayuni ca científicu ni gusihuinni zacá ni. Runi crécabe ca guendahuará ca nga runiná laanu ne qué zanda gacané esperanza binni para guianda.

Maʼ raca stale iza nga de runi cré binni neca gapa esperanza, qué zanda gacaneni laa. Raca jma de chupa mil iza, filósofo griegu ni láʼ Aristóteles guníʼ: «Ni riníʼ xcaandaʼ si binni nga esperanza». Ne cadi tan xadxí guníʼ Benjamin Franklin caadxi diidxaʼ ne cadxiichi guníʼ zedandá dxi zati binni ne qué ziuu dxi guʼyaʼ ni cabeza guizaaca.

Peru ¿xii nga esperanza yaʼ? ¿Ñee dxandíʼ racaneni binni guni sentir galán la? o casi ñaca ti bacaandaʼ si ni? ¿Ñee nuu xiixa razón ni zacané laanu guni crenu dxandíʼ zacané esperanza ca laanu chuʼnu nayecheʼ ne nazaaca la?