Chuʼnu galán né familia stinu ne ca xhamígunu
Stale binni raca nagana para laa chuʼ galán né xcaadxi. Guidúʼyanu caadxi conseju zeeda lu Biblia ni zacané laanu chuʼnu galán né xcaadxi.
GACANENU XCAADXI SIN CUÉZANU GUICAANU XIIXA
CONSEJU ZEEDA LU BIBLIA: «Cadi sti si tu ma cá ique tu, sínuque laucaa ique ni caquiiñe stobi» (Filipenses 2:4).
XI RINÍʼ NI. Ziuʼnu galán né binni pa guyúbinu modo gacanenu laacaʼ, lugar de guyúbinu modo gacanécabe laanu. Ti binni ni ruyubi puru si para laa qué ziuu galán né binni. Quíxhenu ti ejemplu, pa guiníʼ ique ti binni ni maʼ bichaganáʼ puru si para laa, zándaca gapa jnadxii. Ne ti binni ni nabé runi presumir ca cosa ni napa o pabiáʼ nanna qué zapa xhamigu. Ti libru ni láʼ El camino del carácter, ná: «Ca binni ni riníʼ ique puru si para laa, zapa stale guendanagana».
XI ZANDA GÚNINU
-
Gacanenu xcaadxi. Ti binni ni dxandíʼ xhamígunu, siempre nuu listu para gacané laanu. Caadxi estudiu ruzeeteʼ ora ruyubi binni gacané xcaadxi qué raca huará peʼ de depresión ne runi sentir galán.
-
Guiénenu ni runi sentir binni. Laani nga chuʼnu lugar stiʼ binni. Pa gusihuínninu riénenu ni runi sentir binni, qué zábinu laa xiixa para si guninanu laa o guni búrlanu laa para si gusituinu lú.
Pa guiénenu ni runi sentir sti binni zápanu paciencia laa. Laaca zacané guenda riʼ laanu cadi gúninu menu sti binni ne zacaneni laanu gápanu xhamígunu de sti cultura neca gadxé modo biniisi.
-
Cueenu tiempu para chuʼnu gaxha de binni. Para ganda gunibiaʼnu xcaadxi binni naquiiñeʼ cueenu tiempu para chuʼnu gaxha de laacaʼ. Ne para ganda gápanu xhamígunu naquiiñeʼ guininu diidxaʼ ni cuʼ gana ne ni zacané. Nga runi naquiiñeʼ guizíʼdinu gucaʼdiáganu ne guizaaláʼdxinu ca xhamígunu. Ti estudiu ni cadi xadxí de guca bizeeteʼ: «Ca binni ni nabé ruiʼné xcaadxi diidxaʼ, riuu jma nayecheʼ».
GUYÚBINU TU GACA XHAMÍGUNU
CONSEJU ZEEDA LU BIBLIA: «Pa guidxaagatu binni ni runi ni cadi jneza la? zunítitu ca costumbre galán ni nápatu» (1 Corintios 15:33, TNM).
XI RINÍʼ NI. Ca binni ni guidxaaganu zanda gacanecaʼ o gucaacaʼ laanu gúninu ni cadi jneza. Ca binni ni runi estudiar modo nabani binni ruzeetecaʼ dxandíʼ ni. Laacabe guníʼcabe pa nabé ridxaaga tuuxa ti binni ni riguʼbaʼ gueza o ni cayaca divorciar, zándaca guni ni rúnicabe.
XI ZANDA GÚNINU. Guyúbinu gaca xhamígunu binni ni napa cualidad galán ne runi ni jneza, ne ni ñuuláʼdxinu ñácanu casi laa. Casi binni ni nuu xpiaaniʼ, ni runi respetar binni, ni naca nachaʼhuiʼ ne hospitalariu.
XCAADXI CONSEJU ZEEDA LU BIBLIA
Biiyaʼ ca videu ni biree de lu Biblia ni zanda gacané ca guendaxheelaʼ, ca joven ne ca xcuidi para chuʼ familia sticaʼ nayecheʼ.
CADI GUININU DIIDXAʼ NI GUNINÁ
«Binni ni riníʼ sin guiníʼ ique runiná stiidxaʼ casi ra ridaabi ti espada» (PROVERBIOS 12:18).
GÁCANU NACHAʼHUIʼ
«Ti binni ni rudii de ni napa, zié ni laa galán» (PROVERBIOS 11:25).
GUNI TRATARNU BINNI CÁSICA ÑUULÁʼDXINU ÑUNI TRATÁRCABE LAANU
«Irá ni racalaʼdxi tu guni binni laatu la? ngue ca laguni laacaʼ» (MATEO 7:12).
