Pa guyúbiluʼ xi zanda gacané lii ora gatiʼ ti binni ni nadxiiluʼ la? zadxélaluʼ stale conseju peru nuu ni zacaneni lii ne nuu ni coʼ. Purtiʼ casi bidúʼyanu lu tema gudiʼdiʼ que maʼ gadxé nga cada binni ne gadxé gadxé guendanagana ridxaagalú ora gatiʼ ti binni ni nadxii. Nga runi ni zándaca gacané tuuxa nuu biaje qué zanda diʼ gacaneni sti binni.

Neca zacá nuu caadxi cosa ni zanda gacané stale binni. Stale especialista runi recomendar ni, ne ndiʼ rusihuinni qué ziuu dxi gusaana de gacané Biblia laanu, ti libru ni maʼ xadxí de gucuá.

• Caadxi especialista ná, ndiʼ nga ni jma naquiiñeʼ guni binni ora nacubi gutiʼ ti familia stiʼ. Peru zándaca gacaláʼdxiluʼ chuʼluʼ stúbiluʼ ne guidxiichiluʼ ora chuʼ tu gacané lii ne normal nga guni sentirluʼ zacá.

• Cadi guiníʼ íqueluʼ siempre naquiiñeʼ chúʼcabe gaxha de lii, peru laaca cadi galán diʼ chuʼluʼ stúbiluʼ. Zándaca despué zaquiiñeluʼ tu gacané lii, gudxi laacabe xi caquiiñeluʼ ne xi cadi caquiiñeluʼ, peru guníʼ né diidxaʼ nadóʼ.

• Depende de modo cayuni sentirluʼ, biiyaʼ pabiáʼ tiempu rábiluʼ zanda chuʼluʼ lade xcaadxi binni ne pabiáʼ tiempu chuʼluʼ stúbiluʼ.

CONSEJU NI ZEEDA LU BIBLIA: «Jma galán ora nuu chupa binni que tobi si [...]. Purtiʼ pa guiaba tobi de laacabe, stobi ca zanda gacané compañeru stiʼ para guiasa» (Eclesiastés 4:9, 10).

• Gupa ni goloʼ, zacaneni lii cadi gápaluʼ stale estrés despué de gatiʼ ti binni ni nadxiiluʼ. Gudó cuananaxhi, verdura ne cosa ni qué gapa peʼ za.

• Güeʼ ziáʼ nisa ne xcaadxi cosa ni zacané lii.

• Pa huaxiéʼ rindaanaluʼ, gatigá gudó neca ti ndaa. Laaca zanda guinábaluʼ doctor stiluʼ gudii lii xiixa vitamina. *

• Saʼ binni, guxooñeʼ o guni sti clase ejerciciu zanda gacaneni laa para cadi chuʼ triste. Nuu tu laa ora guni ejerciciu riquiiñeʼ tiempu ca para guiníʼ ique ni cazaaca. Ne xcaadxi binni runi ejerciciu para cadi tan guiníʼ ique ni cazaaca.

CONSEJU NI ZEEDA LU BIBLIA: «Guirutiʼ qué huayuu dxi gacananalaʼdxiʼ cuerpu stiʼ, sínuque ruyaanaʼ ni ne rapa ni» (Efesios 5:29, Santa Biblia: Dios habla hoy).

• Nabé risaca gasi binni biaʼ caquiiñeʼ ne jmaruʼ si pa nacubi gutiʼ tuuxa binni ni nadxii, purtiʼ jma ridxaga ne caquiiñeʼ guiziilaʼdxiʼ.

• Gupa cuidadu cadi tan gueluʼ xiixa ni napa cafeína ne alcohol. Purtiʼ ribeecani bacaandaʼ lú binni.

CONSEJU NI ZEEDA LU BIBLIA: «Jma jneza guiziilaʼdxiʼ binni ti ratu que guni xhaataʼ dxiiñaʼ purtiʼ zanda gueeda gácani casi ora nizanándanu bi» (Eclesiastés 4:6).

• Cumu maʼ gadxé nga cada binni la? biiyaʼ xii nga ni jma zacané lii despué de gatiʼ ti binni ni nadxiiluʼ.

• Stale binni jma galán runi sentir ora guiníʼ xi cayaca peru nuu tu laa qué riná guni ni. Gadxé gadxé ni riníʼ ca especialista ca de ni bizéʼtenu riʼ. Pa rábiluʼ cayaca nagana para lii gábiluʼ tuuxa ni cayuni sentirluʼ, ¿xiñee qué gábiluʼ ni ti xhamíguluʼ yaʼ?

• Ora gatiʼ ti familia, nuu binni runi sentir galán despué de guʼnaʼ peru xcaadxi binni qué randa runi ni.

CONSEJU NI ZEEDA LU BIBLIA: «Cada ladxidóʼ nanna xi riguu laa triste, ne guirutiʼ ziuu nayecheʼ ora nuuni nayecheʼ» (Proverbios 14:10).

• Nuu binni riníʼ ique para cadi guni sentir peʼ yuubaʼ, jma galán pa xhudxi o cubaʼ droga, ne zándaca guni sentirbe galán ti ratu peru zuninani laabe despué. Nga runi, jma galán pa guyúbiluʼ xiixa ni zacané lii gatadxí ladxidoʼloʼ peru sin guniná lii.

CONSEJU NI ZEEDA LU BIBLIA: «Gusianu laanu de guiráʼ ni runi biidiʼ» (2 Corintios 7:1).

• Stale binni ribee tiempu para guni xcaadxi cosa ti cadi tan guicá ique yuubaʼ ni cadiʼdiʼ.

• Para guni sentirluʼ jma galán zanda cueeluʼ tiempu para chúʼneluʼ ca xhamíguluʼ o guyúbiluʼ xcaadxi amigu, laaca zanda gúniluʼ ca cosa ni riuuláʼdxiluʼ gúniluʼ o guiziidiluʼ gúniluʼ xiixa.

• Pa chaahuidugá chaahuidugá guiaaluʼ gúniluʼ xcaadxi cosa la? dxi gudiiluʼ cuenta maʼ qué gápaluʼ tiempu para guiníʼ íqueluʼ yuubaʼ ni cadíʼdiluʼ.

CONSEJU NI ZEEDA LU BIBLIA: «Maca nuu tiempu para guiráʼ cosa […]: tiempu para gúʼnanu ne tiempu para guxídxinu» (Eclesiastés 3:1, 4).

• Ti cosa ni zacané lii nga nagueendacaʼ quixheʼ chaahuiluʼ guiráʼ ni chigúniluʼ.

• Pa quíxheluʼ ti hora para gásiluʼ, para gúniluʼ dxiiñaʼ o para gúniluʼ xcaadxi cosa la? chaahuidugá zabiguetaʼ zúniluʼ ni maʼ biaaluʼ gúniluʼ dxiqué.

• Pa gúniluʼ ca cosa ni riuuláʼdxiluʼ la? zacaneni lii guni sentirluʼ jma galán.

CONSEJU NI ZEEDA LU BIBLIA: «Ne qué zaníʼ íquebe nachucu xquendanabánibe purtiʼ zacané Dios ni dxandíʼ laabe para guiníʼ íquebe ca cosa ni cusiecheʼ ladxidoʼbe» (Eclesiastés 5:20).

• Nuu tu laa nagueendaca ricaa xiixa decisión nacubi gutiʼ familia stiʼ ne despué raca arrepentir.

• Cadi nagueendaca chibiʼluʼ sti ladu, gusaanaluʼ dxiiñaʼ stiluʼ o gusáʼbiluʼ ca cosa stiʼ binni ni nadxiiluʼ ni maʼ guti ca.

CONSEJU NI ZEEDA LU BIBLIA: «Binni riguixhe chaahuiʼ guiráʼ ni chiguni la? riree ni laa jneza. Peru ni raca luguʼ la? riaba lu guendapobre» (Proverbios 21:5).

• Stale binni riuulaʼdxiʼ guni cosa ni gusietenalaʼdxiʼ laa binni ni maʼ guti ca.

• Zanda gúʼyaluʼ foto stibe ne xcaadxi cosa para guietenaláʼdxiluʼ laabe o bicaa lu ti cuadernu ca cosa ni bizaacaneluʼ laabe. Zanda gacané ndiʼ lii cadi chuʼ peʼ yuubaʼ ladxidoʼloʼ.

• Gundisaʼ chaahuiʼ ca cosa ni gusietenalaʼdxiʼ lii xiixa galán de binni ca ne biiyaʼ ni ora rábiluʼ maʼ qué zuniná peʼ ni lii.

CONSEJU NI ZEEDA LU BIBLIA: «Bietenalaʼdxiʼ ca dxi ni maʼ gudiʼdiʼ» (Deuteronomio 32:7).

• Gulee chupa chonna gubidxa para guiziiláʼdxiluʼ o chizaluʼ.

• Pa qué naluʼ guicaaluʼ stale tiempu de vacación la? gucuaa neca ti dxi o chupa dxi para chizaluʼ o chigunibiaʼluʼ xiixa lugar o neca ti buelta si chigudiiluʼ.

• Neca ti cosahuiiniʼ si guchaaluʼ modo rúniluʼ ca cosa stiluʼ zanda gacaneni lii.

CONSEJU NI ZEEDA LU BIBLIA: «Latananda naa, chuunu ti lugar zitu para guiziiláʼdxitu ti ratu» (Marcos 6:31).

• Cadi guiaandaʼ lii ora gacaneluʼ binni lii laaca zuni sentirluʼ galán.

• Pa guti tuuxa binni ni nadxiiluʼ gucané ca xhamíguluʼ o familia stiluʼ ni nuu triste. Zándaca laaca caquiiñecabe tu gábicabe xi cayuni sentírcabe o tu quixhedxí ladxidóʼcabe.

• Pa gacaneluʼ ne quixhedxiluʼ ladxidóʼ binni zanda gacaneni lii guibániluʼ nayecheʼ sti biaje.

CONSEJU NI ZEEDA LU BIBLIA: «Jma nayecheʼ riuu binni ora rudii que ora ricaa» (Hechos 20:35).

• Zándaca zuchaa ca cosa ni jma risaca para lii despué de gatiʼ tuuxa binni ni nadxiiluʼ.

• Guníʼ ique xi cayunineluʼ xquendanabániluʼ.

• Ne pa rábiluʼ caquiiñeʼ guchaaluʼ xiixa lu xquendanabániluʼ o modo riníʼ íqueluʼ la? biʼniʼ ni.

CONSEJU NI ZEEDA LU BIBLIA: «Jma galán chuunu ra lidxi ca ni cayuubaʼ ladxidóʼ qué chuunu ra yoo cayaca saa, purtiʼ rugaandaʼ guendaguti guiráʼ binni, ne ca ni nabani naquiiñeʼ guiníʼ íquecaʼ ni» (Eclesiastés 7:2).

 Ni dxandíʼ la? gastiʼ ti cosa ni zanda gucueeza yuubaʼ runi sentir binni despué de gatiʼ tuuxa ni nadxii. Peru stale tu huayuni ca cosa ni bizéʼtenu lu tema riʼ huayacaneni laa gatadxí ladxidóʼ ora gatiʼ ti binni ni nadxii. Zándaca nuuruʼ xcaadxi ni racané binni gatadxí ladxidóʼ. Peru, pa gúniluʼ ca ni bizéʼtenu riʼ la? zuni sentirluʼ jma galán.