1. a) ¿Xi decisión naquiiñeʼ guicaa ca joven de futuro sticaʼ? b) ¿Xiñee cadi naquiiñeʼ guidxíbicabe? (Biiyaʼ ca foto ni zeeda ra ruzulú tema riʼ).

JOVEN, ¿cadi dxandíʼ dede ante nga naquiiñeʼ quixhe íquenu paraa chuunu pa racaláʼdxinu chuunu de viaje la? Guendanabani ca zeeda gaca ni casi ora chuunu de viaje, ne ora naquiiñeʼ quixhe íquenu paraa chuunu nga ora nácanu joven. Dxandíʼ, nagana nga quixhe ique binni xi guni. Ti joven láʼ Heather ná: «Ridxibeʼ guiníʼ iqueʼ xi guneʼ biaʼ dxi guibaneʼ». Pa zacaca runi sentirluʼ, bietenalaʼdxiʼ ni ná Jiobá: «Cadi chuʼluʼ xizaa, purtiʼ naa nga Dios stiluʼ. Zudieeʼ stipa lii, ya, zacaniáʼ lii» (Is. 41:10).

2. ¿Xiñee nannuʼ racalaʼdxiʼ Jiobá gapuʼ ti futuro nayecheʼ?

² Caguu Jiobá gana lii para quixhe íqueluʼ gúniluʼ ni galán para futuro stiuʼ (Ecl. 12:1; Mat. 6:20). Laabe racaláʼdxibe chuʼluʼ nayecheʼ. Zanda gudiiuʼ cuenta zacá ni ora ruuyaluʼ, runadiágaluʼ ne ora runi saborearluʼ ca cosa sicarú ni bizaʼbe. Laaca zanda guiníʼ íqueluʼ rápabe laanu ne rusiidibe laanu ximodo nga jma jneza guibáninu. Biiyaʼ xi rábibe cani rucaanáʼ ca conseju stibe: «Gulitu gúnitu ca cosa ni qué rusiecheʼ naa». Ne laaca guniʼbe:  «¡Laguuyaʼ! Ca xpinneʼ ziéchecaʼ, peru laatu zatuí lutu. ¡Laguuyaʼ! Ca xpinneʼ zucaacaʼ ridxi purtiʼ nayecheʼ ziuu ladxidoʼcaʼ» (Is. 65:12-14). Ora ricaanu decisión jneza riguʼnu naróʼ stiʼ Jiobá (Prov. 27:11).

3. ¿Xi rabi Jiobá lii guʼnuʼ?

³ ¿Xi rabi Jiobá lii guʼnuʼ yaʼ? Guníʼ ique ndiʼ. Laabe bizaʼbe ca maniʼ ca para chuʼcaʼ nayecheʼ ra gocaʼ, guecaʼ nisa ne gápacaʼ xiiñicaʼ. Peru laanu la? bizaʼbe laanu para chuʼnu nayecheʼ né xcaadxi cosa, casi gunibiaʼnu laabe ne gúninu ni nabe sin gucheʼnu (Sal. 128:1; Mat. 5:3). Biblia ná nácabe ti Dios ni nabé nadxii binni, ti Dios nayecheʼ ne bizaʼbe binni casi laabe (2 Cor. 13:11; 1 Tim. 1:11; Gén. 1:27). Nga runi ziuuluʼ nayecheʼ pa guʼnuʼ casi runi Dios. Stiidxabe ná: «Jma nayeche ni rudii que ni ricaa» (Hech. 20:35). ¿Ñee huayuu biaje guni sentirluʼ zacá ni la? Dxandíʼ ni ná ca diidxaʼ riʼ. Nga runi racalaʼdxiʼ Jiobá gusihuínniluʼ lu guiráʼ cani quixhe íqueluʼ gúniluʼ pabiáʼ nadxiiluʼ laabe ne binni (biindaʼ Mateo 22:36-39).

4, 5. ¿Xiñee guyuu Jesús nayecheʼ?

⁴ Ejemplu ni jma galán chinanduʼ nga stiʼ Jesucristu. Dxi gúcabe xcuidi la? gudxítebe ne guyuube nayecheʼ. Casi ná Stiidxaʼ Dios nuu «tiempu para guxídxinu» ne «tiempu para guichésanu» (Ecl. 3:4). Peru laaca biʼniʼ estudiar Jesús Stiidxaʼ Dios ne zaqué nga gunda gúpabe ti amistad né Bixhózebe. Dxi nápabe 12 iza nabé bidxagayaa ca maestru stiʼ yuʼduʼ que «pabiáʼ riene be ne modo ricabi be» ca pregunta ni bíʼnicaʼ laabe de Stiidxaʼ Dios (Luc. 2:42, 46, 47).

⁵ Dxi maʼ biniisi Jesús, guyuu nayecheʼ, purtiʼ biʼniʼ ni riuulaʼdxiʼ Dios. Tobi de cani riuulaʼdxiʼ Bixhózebe nga chinebe «ca diidxaʼ nacubi ne galán ra nuu ca binni pobre» ne guiniʼbe «zabiguetaʼ zuuyaʼ cani nacheepaʼ lú» (Luc. 4:18). Salmo 40:8 cusiene ximodo biʼniʼ sentir Jesús: «Riecheʼ ora guneʼ ni naluʼ, Dios stinneʼ». Nabé guyuuláʼdxibe gusiidibe binni stale cosa de Bixhózebe ni nuu guibáʼ (biindaʼ Lucas 10:21). Ti biaje bisiidibe ti gunaa ximodo guni adorar Dios. Despué gúdxibe ca discípulo stibe: «Endaró stinne nga gune ni na ni biseenda naa, ne gunduuxe dxiiña stiʼ» (Juan 4:31-34). Ni biʼniʼ laabe nayecheʼ nga gunnaxhiibe Dios ne gunnaxhiibe binni. Ne laaca zanda guni cani lii nayecheʼ.

6. ¿Xiñee galán nga gábiluʼ ti xpinni Cristu ni maʼ huaniisi xi cá íqueluʼ gúniluʼ?

⁶ Stale xpinni Cristu gúcacaʼ precursor dxi gúcacaʼ joven, ne gucané ni laacaʼ chuʼcaʼ nayecheʼ. ¿Xiñee qué gaʼbuʼ tobi de laacabe xi cá íqueluʼ gúniluʼ yaʼ? Proverbios 15:22 ná rireendú cani quixhe íquenu gúninu ora rinabadiidxanu sti binni. Cumu maʼ huaniisi ca hermanu riʼ la? zábicaʼ lii zaziidiluʼ stale cosa ni zaquiiñeʼ lii lu xquendanabániluʼ ora guzululuʼ serviciu de tiempu completu. Biziidiʼ Jesús stale cosa de Bixhoze dxi guyuucaʼ juntu guibáʼ. Peru biziidirube dxi biʼniʼ predicarbe lu Guidxilayú. Casi ora guníʼnebe binni de ca diidxaʼ nacubi ne galán que riuube nayecheʼ ora rindabe de ndaaniʼ ladxidoʼcaʼ ne ora ruzuubabe diidxaʼ neca gudíʼdibe lu guendanagana (biindaʼ Isaías 50:4; Heb. 5:8; 12:2, TNM). ¿Xiñee ziuuluʼ nayecheʼ pa guʼnuʼ serviciu de tiempu completu yaʼ? Guidúʼyanu.

7. ¿Xiñee stale joven riuulaʼdxiʼ gacané gaca binni discípulo?

⁷ Jesús guníʼ naquiiñeʼ cheʼ ca xpinni ne gacanecaʼ binni gaca discípulo ra gusiidicaʼ laacabe ni dxandíʼ (Mat. 28:19, 20). Pa riníʼ íqueluʼ iquiiñeluʼ xquendanabániluʼ para guʼnuʼ dxiiñaʼ riʼ la? jma nayecheʼ ziuuluʼ ne  zusisácaluʼ Dios. Dxandíʼ, cásica rizaaca né xcaadxi cosa, zaquiiñeʼ tiempu para jma gánnanu gúninu dxiiñaʼ riʼ. Biiyaʼ xi guníʼ ti hermanu láʼ Timothy cadi tan xadxí, laabe gúcabe precursor dxi gúcabe joven: «Riuuladxeʼ guneʼ xhiiñaʼ Jiobá de tiempu completu purtiʼ zacá rusihuinneʼ pabiáʼ nadxieeʼ laabe. Cadi casi ziaaʼ bidxelaʼ tu gudieeʼ estudiu. Peru de raqué guyaaʼ sti lugar, nin ti beeu de nuaaʼ raqué bizuluáʼ stale estudiu. Tobi de ca estudiante que bizulú guyé ra Yoo stiʼ Reinu. Despué guyaaʼ Scuela ra riziidiʼ ca Solteru gúnicaʼ Xhiiñaʼ Dios * chupa beeu, ne biseendacabe naa sti lugar. Raqué bizuluáʼ tapa estudiu. Riuuladxeʼ gusiideʼ ni dxandíʼ binni purtiʼ ruuyaʼ ximodo racané espíritu santu laacabe guchaacabe xquendanabánicabe» (1 Tes. 2:19).

8. ¿Xi huayuni caadxi joven para guni predicarcaʼ jma binni?

⁸ Nuu joven maʼ biziidiʼ sti idioma. Casi ti hermanu de Norteamérica láʼ Jacob bicaa sicaríʼ: «Dxi napaʼ gadxe iza, stale compañeru ni gupaʼ ra scuela de Vietnam laacaʼ. Racalaʼdxeʼ guinieniáʼ laacabe de Jiobá, ngue runi gupa si ti tiempu bizuluáʼ biziideʼ idioma stícabe. Biziideʼ ni jmaruʼ si purtiʼ ruchaaga revista La Atalaya ni riree lu diidxaʼ inglés né ni riree lu diidxaʼ vietnamita. Laaca guca xhamiguaʼ ca hermanu ni nuu ndaaniʼ ti congregación vietnamita ni nuu gaxha de ra lidxeʼ. Guca precursor dxi napaʼ 18 iza. Despué guyaaʼ Scuela ra riziidiʼ ca Solteru gúnicaʼ Xhiiñaʼ Dios. Biʼniʼ preparar scuela riʼ naa para guneʼ guiráʼ dxiiñaʼ ni runeʼ lu grupu vietnamita ra nuaaʼ, ra nacaʼ precursor ne tobi lucha ancianu. Stale binni vietnamita ridxagayaacaʼ ora gúʼyacaʼ biziideʼ idioma sticaʼ. Runi invitarcaʼ naa ra lídxicaʼ, ne stale biaje ruzuluáʼ ti estudiu né laacaʼ. Nuu de laacaʼ maʼ guyuunisa» (bichaaga ni né Hechos 2:7, 8).

9. ¿Xi riziidiluʼ ora gacaneluʼ binni gaca discípulo?

⁹ Stale cosa nga ni riziidiʼ tobi ora gacané binni gaca discípulo. Zaziidiluʼ guʼnuʼ xhiiñaluʼ jma jneza, guiníʼneluʼ binni galán, gapuʼ confianza laca lii ne zuni tratarluʼ binni galán (Prov. 21:5; 2 Tim. 2:24). Peru laaca runi dxiiñaʼ riʼ lii nayecheʼ purtiʼ racané ni lii gunibiáʼ chaahuiluʼ ni rusiidiʼ Biblia de ni runi creluʼ. Laacaʼ riziidiluʼ gunineluʼ Jiobá dxiiñaʼ tobi si (1 Cor. 3:9).

10. ¿Xiñee zanda chuʼluʼ nayecheʼ ra gacaneluʼ binni gaca discípulo neca huaxiéʼ tu rucaadiaga stiidxaʼ Reinu neza ra nabézaluʼ?

¹⁰ ¿Peru pa nabézaluʼ ti lugar ra huaxiéʼ tu riná gucaadiaga ca diidxaʼ nacubi ne galán stiʼ Reinu yaʼ? Neca zacá, zanda chuʼluʼ nayecheʼ ora gacaneluʼ binni gaca discípulo. ¿Xiñee yaʼ? Purtiʼ guiráʼ cani nuu ndaaniʼ congregación racanenu para guidxela ca binni ni nayá ladxidóʼ. Neca ti hermanu si guidxela ti binni ni gucaadiaga ni dxandíʼ ca, guiranu racanenu guidxela ca binni ca ne guiranu riéchenu. Guzéʼtenu ti ejemplu, ti hermanu láʼ Brandon biʼniʼ de precursor gaʼ iza ti lugar ra huaxiéʼ rucaadiaga binni stiidxaʼ Reinu. Laabe nabe: «Riuuladxeʼ guneʼ predicar ca diidxaʼ nacubi ne galán purtiʼ nga nga ni rinabaʼ Jiobá gúninu. Binduuxesiáʼ scuela gucaʼ precursor. Riuuladxeʼ cuaaʼ gana ca joven de congregación stinneʼ ne guuyaʼ ximodo riniisicabe en sentidu espiritual. Despué de guyaaʼ Scuela ra riziidiʼ ca Solteru gúnicaʼ Xhiiñaʼ Dios, biseendacabe naa de precursor sti lugar. Dxandíʼ, qué huayacaniáʼ tuuxa chúʼnisa, peru xcaadxi hermanu huayúnicaʼ ni. Nayecheʼ nuaaʼ pur gudixheʼ iqueʼ gacaniáʼ de tiempu completu ra cayaca dxiiñaʼ de gacanenu binni gaca discípulo» (Ecl. 11:6).

11. ¿Xi ti modo risaca cayacané stale joven para gaca xhiiñaʼ Dios?

¹¹ Nuu stale modo zanda gúninu xhiiñaʼ Jiobá jma. Ti ejemplu de laani nga stale joven rúnicaʼ dxiiñaʼ de voluntariu lu construcción. Caquiiñeʼ cuí gayuaa Yoo stiʼ Reinu nacubi. Nabé risaca nga gacaneluʼ cuí cani purtiʼ riguu cani naróʼ stiʼ Dios ne zacané ni lii guibanuʼ nayecheʼ. Cásica riuʼnu nayecheʼ ora rúninu intiica si sti dxiiñaʼ para Dios, laaca riéchenu ora riuʼnu né ca hermanu juntu lu dxiiñaʼ riʼ. Gacaneluʼ cuí ca yoo ra raca adorar Dios laaca zusiidiʼ ni lii stale cosa, casi gapuʼ lii ora guʼnuʼ dxiiñaʼ, guʼnuʼ dxiiñaʼ jneza ne gacaneluʼ cani ruuyaʼ gaca dxiiñaʼ.

12. ¿Xi guiráʼ zanda guʼnuʼ pa gácaluʼ precursor?

¹² Ti hermanu láʼ Kevin ná: «Dxi gucaʼ xcuidi, gupaʼ deseu de guedandá dxi guneʼ xhiiñaʼ Jiobá de tiempu completu. Gucaʼ precursor dxi napaʼ 19 iza. Para cadi gusaanaʼ ni la? bineʼ dxiiñaʼ huaxiéʼ hora né ti hermanu ni rucuí yoo. Biziideʼ gudxiibaʼ ique yoo, gucaaʼ ventana ne puertaʼ. Despué, chupa iza gucaniáʼ gaca chaahuiʼ Yoo stiʼ Reinu ne lidxi ca hermanu ni gaca feu tiidiʼ si ti huracán. Ora binadiagaʼ caquiiñeʼ stale tu gacané lu construcción guidxi Sudáfrica, bineʼ ti solicitud ne biʼniʼ invirtárcabe naa. Riuaaʼ chupa chonna semana África ra cabí ti Yoo stiʼ Reinu de racá maʼ ziaaʼ ra cabí stobi. Guiráʼ cani runi dxiiñaʼ lu construcción nácadu casi ti familia. Tobi si ra nabézadu, runi estudiardu Biblia juntu ne rúnidu dxiiñaʼ juntu. Laaca riuuláʼdxidu guni predicarnedu ca hermanu de guidxi ra nuudu guiráʼ semana. Qué niníʼ iqueʼ pa sicaríʼ nusiecheʼ guiráʼ ni gudixheʼ iqueʼ dxi nahuiineʼ que naa».

13. ¿Xiñee riuu ca joven runi dxiiñaʼ Betel nayecheʼ?

¹³ Stale hermanu ni gudixhe ique gaca precursor ne bíʼnicaʼ ni, nuucaʼ Betel  yanna riʼ. Nabé nayecheʼ riuu cani runi dxiiñaʼ Betel, purtiʼ para Jiobá guiráʼ ni raca ndaaniʼ ni. Ne familia Betel racané para guicaanu guendaró espiritual. Ti betelita láʼ Dustin ná: «Dxi napaʼ gaʼ iza, gudixheʼ iqueʼ guneʼ xhiiñaʼ Dios de tiempu completu. Biluxe biindasiáʼ scuela gucaʼ precursor. Ti iza arondaʼ despué, biʼniʼ invitárcabe naa Betel. Raríʼ biziideʼ guneʼ dxiiñaʼ né caadxi prensa rotativa ne guneʼ programar computadora. Ti cosa ni riuuladxeʼ de Betel nga ricaadu informe de ximodo ziroobaʼ dxiiñaʼ ra racanenu binni gaca discípulo lu guidubi Guidxilayú. Riuuladxeʼ chuaaʼ raríʼ purtiʼ racané dxiiñaʼ rúnidu riʼ binni para gaca xhamigu Jiobá».

14. ¿Ximodo zanda gaca prepararluʼ para guʼnuʼ xhiiñaʼ Jiobá de tiempu completu?

¹⁴ ¿Ximodo zanda gaca prepararluʼ para guʼnuʼ xhiiñaʼ Dios de tiempu completu yaʼ? Biʼniʼ stipa pur gapuʼ cualidad espiritual. Zacané cani lii gúniluʼ xhiiñaʼ Jiobá jma galán. Nga runi, biʼniʼ estudiar Stiidxaʼ Dios gatigá, guníʼ ique chaahuiʼ xi ná ni ne biʼniʼ stipa pur gusihuínniluʼ pabiáʼ fe nápaluʼ ra guni comentarluʼ lu ca reunión. Laga canazarouʼ scuela, zanda guiziidirouʼ jma ne ganda guni predicarluʼ jma jneza. Biziidiʼ guinabadiidxaluʼ binni né respetu ximodo ruuyaʼ xiixa ne bicaadiaga ni guicábibe ti gusihuínniluʼ rizaaláʼdxiluʼ binni. Laaca zanda guinábaluʼ guʼnuʼ xcaadxi dxiiñaʼ casi gusialuʼ o gacaneluʼ para guihuinni Yoo stiʼ Reinu galán. Riuulaʼdxiʼ Jiobá iquiiñeʼ cani qué rudxiibaʼ laca laa ne nuucaʼ listu para gacanecaʼ (biindaʼ Salmo 110:3; Hech. 6:1-3). Apóstol Pablo biʼniʼ invitar Timoteo para gaca misioneru purtiʼ guiráʼ ca hermanu «ruzeete pabiáʼ nachaʼhui be» (Hech. 16:1-5).

15. ¿Ximodo zanda chuʼluʼ listu para gápaluʼ ni guibanineluʼ?

¹⁵ Cani runi xhiiñaʼ Dios de tiempu completu riquiiñeʼ gúnicaʼ ti dxiiñaʼ para gápacaʼ ni guibaninecaʼ (Hech. 18:2, 3). Zanda cheluʼ cursu ni qué rindaapeʼ para gacané lii guidxeʼluʼ ti dxiiñaʼ ni guʼnuʼ huaxiéʼ hora lugar ra nabezuʼ. Gunabadiidxaʼ xcaadxi precursor ni nuu lu circuito stiluʼ ne superintendente viajante xi dxiiñaʼ jma zacané lii. Ne biʼniʼ casi ná Biblia: «Bisaana lu naʼ Jiobá cani gúniluʼ, ne dxandíʼ zaca cani quixhe íqueluʼ» (Prov. 16:3; 20:18).

16. Ora gúniluʼ xhiiñaʼ Jiobá de tiempu completu de dxi nácaluʼ joven, ¿paraa zanda gacané ni lii?

¹⁶ Zanda chuʼluʼ seguru racalaʼdxiʼ Jiobá gapuʼ ti futuro nayecheʼ (biindaʼ 1 Timoteo 6:18, 19). Ora nuuluʼ lu serviciu de tiempu completu, riuuluʼ lade xcaadxi ni cayuni xhiiñaʼ Jiobá de tiempu completu. Ndiʼ zacané lii para gacuʼ ti xpinni Cristu ni gusihuinni maʼ biniisi lu stiidxaʼ Dios. Stale tu maʼ bidii cuenta pur bíʼnicaʼ xhiiñaʼ Jiobá biaʼ gúndatiʼ dxi gúcacaʼ joven racané ni laacaʼ yanna ra maʼ bichaganacaʼ. Stale biaje, cani guca precursor ante guichaganacaʼ rúnirucaʼ ni né xheelacaʼ (Rom. 16:3, 4).

17, 18. ¿Ximodo rusihuinni cani riguixhe íquenu gúninu xi nuu ndaaniʼ ladxidoʼno?

¹⁷ Cani riguixhe íquenu gúninu rusihuinni cani xi nuu ndaaniʼ ladxidoʼno. Sicaríʼ ná Salmo 20:4 de Jiobá: «Gudiibe lii guiráʼ ni guinabaʼ ladxidoʼloʼ, ne gacanebe lii cueenduluʼ ni galán lu guiráʼ ni quixhe íqueluʼ». Nga runi guníʼ ique xi racaláʼdxiluʼ gúniluʼ né xquendanabániluʼ, xi cayuni Dios yanna ne xi zanda guʼnuʼ lu xhiiñabe. De racá gudixhe ique guʼnuʼ ni riuulaʼdxiʼ Jiobá.

¹⁸ Guizáʼ nayecheʼ ziuuluʼ ra guʼnuʼ xhiiñaʼ Jiobá biaʼ gándatiʼ, purtiʼ zaquiiñeluʼ xquendanabániluʼ para gusisácaluʼ laabe. Nga runi «guyuu nayecheʼ ora guʼnuʼ ni na Jiobá, ne laa zudii lii guiráʼ ni guinabaʼ ladxidoʼloʼ» (Sal. 37:4).