1. ¿Xi riníʼ ique stale binni de guendanabani ni qué zaluxe?

 STALE binni rapa ni ró ne rúnicaʼ stipa gúnicaʼ ejerciciu para ganda chuʼcaʼ nazaaca, neca zacá qué ribézacabe guibánicabe sin qué chuʼ dxi gáticabe. Zándaca para laacabe nagana guizaaca ndiʼ o qué riuuláʼdxicabe guizaaca ni purtiʼ riníʼ íquecabe zacanácabe pur ca guendanagana redané ora maʼ bioʼxhoʼ binni. Peru Jesús guníʼ zanda gapa binni «guendanabani ni qué zaluxe» ne nácani ti ndaayaʼ stiʼ Dios casi riete lu Juan 3:16 ne 5:24.

2. ¿Xi riete lu Juan capítulo 6 de guendanabani ni qué zaluxe? (Juan 6:​39, 40).

² Ti dxi biʼniʼ Jesús ti milagru para gudii pan ne benda para gó stale binni. a Guendaridxagayaa ni bíʼnibe riʼ peru jmaruʼ si ni guniʼbe sti dxi que. Yenanda ca binni que laabe Capernaúm, guriá nisadóʼ stiʼ Galilea, ne raqué guniʼbe zanda guiasa ca binni ni maʼ guti ne guicaacaʼ guendanabani ni qué zaluxe (biindaʼ Juan 6:​39, 40). Guníʼ ique ca familia stiluʼ ne ca xhamíguluʼ ni maʼ guti. Rusiidiʼ ni guníʼ Jesús riʼ laanu, ziasa stale binni de lade gueʼtuʼ. Lii ne ca binni ni nadxiiluʼ zanda guicaatu guendanabani ni qué zaluxe. Peru lu Juan capítulo 6, guníʼ Jesús caadxi diidxaʼ ni raca nagana para stale binni guiene. Guiduʼndaʼ chaahuinu de laani.

3. Casi riete lu Juan 6:​51, ¿xi bisiidiʼ Jesús de laa?

³ Ca binni de Capernaúm que guníʼ íquecaʼ bidii Jesús laacaʼ ca pan que cásica bidii Jehová maná ca bixhozebiidacabe. Lu Biblia riete naca maná que «pan de guibáʼ» (Sal. 105:40; Juan 6:31). Biquiiñeʼ Jesús caadxi cosa ni  nanna ca binni que de maná para gusiidibe laacaʼ ti cosa nabé risaca. Neca naca maná que ti regalu stiʼ Dios peru ca ni gudó de laani laaca beeda gáticaʼ (Juan 6:49). Peru Jesús guníʼ laa nga ni «dxandíʼ pan de guibáʼ», «pan stiʼ Dios» ne «pan de guendanabani» (Juan 6:​32, 33, 35). Peru, despué bisiénebe xiñee maʼ gadxé maná que ne laabe. Guniʼbe: «Naa nga pan nabani ni biete de guibáʼ. Pa gó tuuxa pan riʼ qué ziuu dxi gatiʼ» (biindaʼ Juan 6:51). Peru qué ñene ca judíu que ca diidxaʼ ni guniʼbe riʼ. ¿Ximodo guiníʼ Jesús biete de guibáʼ ne naca «pan» jma risaca que maná ni bidii Dios ca bixhozebiidacabe ra biʼniʼ ti milagru yaʼ? Gudxi Jesús laacabe ti cosa ni zacané laacabe guiénecabe ni: «Pan ni chigudieeʼ nga beela ladeʼ». Peru ¿xii ndiʼ caníʼ Jesús raríʼ yaʼ? Risaca gánnanu respuesta ca purtiʼ zacá zánnanu xii nga ni zacané laanu guibaninenu ca binni ni nadxiinu para siempre. Guidúʼyanu xii nga ni guníʼ Jesús.

«PAN NABANI» NE BEELA LADI JESÚS

4. ¿Xiñee nuu tu nabé bidxagayaa ora binadiaga ni guníʼ Jesús?

⁴ Caadxi de ca ni binadiaga ni guníʼ Jesús riʼ guizáʼ bidxagayaacaʼ ora guniʼbe chigudiibe beela ládibe ti gapa binni guidxilayú guendanabani. Zándaca guníʼ íquecabe dxandíʼ peʼ chitócabe beela ladi Jesús (Juan 6:52). Peru despué, guníʼ Jesús ti cosa ni jma peʼ bidxagayaacabe, ná rabi laacabe: «Pa qué goto beela ladi Xiiñiʼ Hombre ne pa qué guetu rini stiʼ, qué zacaatu guendanabani» (Juan 6:53).

5. ¿Xiñee nánnanu qué ninabaʼ Jesús ca binni que guépecaʼ rini stibe?

⁵ Ca dxi bibani Noé, guníʼ Dios cadi gó binni rini (Gén. 9:​3, 4). Ne laaca bizeetebe ni lu Ley ni bidiibe guidxi Israel. Tutiica gó rini «naquiiñeʼ gatiʼ» (Lev. 7:27). Ne Jesús laaca bizeeteʼ ni ná Ley stiʼ Moisés (Mat. 5:​17-19). Nga runi, qué zanda diʼ guininu gunabaʼ Jesús ca judíu que gópecaʼ beela ládibe o guépecaʼ rini stibe. Né ca diidxaʼ riʼ cusiidiʼ Jesús ca binni que ximodo zanda guicaacaʼ «guendanabani ni qué zaluxe» (Juan 6:54).

6. ¿Xiruʼ zanda gacané laanu guiénenu cadi dxandíʼ peʼ nga caníʼ Jesús gócabe beela ladi ne guécabe rini stiʼ?

⁶ Cadúʼyanu cadi dxandíʼ peʼ nga caníʼ Jesús gócabe beela ladi ne guécabe rini stiʼ, purtiʼ maca huayúnibe ni ante. Casi dxi guníʼnebe Samaritana que, gúdxibe laa: «Peru binni gueʼ nisa ni gudieeʼ laa la? maʼ qué ziuuruʼ dxi gati nisa. Zaca nisa ni gudieeʼ laa ti manantial dentru de laa ra guidá nisa ni gudii guendanabani ni qué zaluxe» (Juan 4:​7, 14). b Cadi cusiene diʼ Jesús zacaa samaritana que guendanabani ni qué zaluxe pa laa gueeʼ nisa ni caree ndaaniʼ bizé que. Ne zaqueca nga cadi cayábidibe ca binni de Capernaúm que zacaacaʼ guendanabani ni qué zaluxe pa gocaʼ beela ládibe o guecaʼ rini stibe.

GADXÉ NGA NI GUDXI JESÚS STALE BINNI NE GADXÉ NGA NI GÚDXIBE CA DISCÍPULO STIBE

7. ¿Xi runi cré caadxi binni de ca diidxaʼ ni guníʼ Jesús lu Juan 6:53?

⁷ Nuu binni napa religión runi crecaʼ dxi guníʼ Jesús gócabe beela ladi ne guécabe rini stiʼ casi riete ni lu Juan 6:53 la? nácabe raqué nga gudixhestibe modo  gaca Guendaroxhí stiʼ Señor. Ne nácabe zacá ni purtiʼ dxi guca Guendaroxhí que la? guníʼ Jesús caadxi diidxaʼ cásica ni guníʼ nezalú guiráʼ binni que (Mat. 26:​26-28). Nga runi, riníʼcabe guiráʼ binni ni rié lu Guendaroxhí stiʼ Señor naquiiñeʼ gocaʼ pan ne guecaʼ vinu ni ridiʼdiʼ lu náʼ ca binni ca. ¿Ñee jneza ni riníʼcabe la? Nabé risaca gánnanu respuesta ca purtiʼ guiráʼ iza millón de binni lu guidubi naca guidxilayú ridagulisaanecaʼ laanu para guietenaláʼdxinu ni biʼniʼ Jesús. Guidúʼyanu chupa chonna cosa ni rusihuinni gadxé nga ca diidxaʼ ni riete lu Juan 6:53 ne gadxé nga ni guníʼ Jesús dxi cayaca Guendaroxhí stiʼ Señor.

8. ¿Xiiñeʼ maʼ gadxé nga ni guníʼ Jesús lu Juan 6:53 ne ni guniʼbe dxi gudíxhebe modo gaca Guendaroxhí stiʼ Señor? (Biiyaʼ ca imagen ca).

⁸ Guidúʼyanu xiñee maʼ gadxé ni guníʼ Jesús guiropaʼ biaje riʼ. Primé, ¿padxí ne paraa guníʼ Jesús ca diidxaʼ ni zeeda lu Juan 6:​53-56? Guniʼbe ca diidxaʼ ca nezalú stale binni judíu ni nuu Galilea lu iza 32 despué de ca dxi stiʼ Jesús. Guca ndiʼ ti iza ante quíxhebe ximodo naquiiñeʼ gaca Guendaroxhi stiʼ Señor ndaaniʼ guidxi Jerusalén. Guiropa, ¿tu gúdxibe ca diidxaʼ ca? Ndaaniʼ guidxi Galilea, stale de ca binni ni cucaadiaga Jesús que la? jma nuucaʼ gudiibe ni gocaʼ que guiziidicaʼ de Dios (Juan 6:26). Ne raqué nga  guníʼ Jesús caadxi diidxaʼ ni qué ñanda ñénecabe ne cumu qué ñénecabe la? nagueendaca bisaana de guni crécabe laabe. Ne nuu chupa chonna de ca discípulo que dede bisaanacaʼ de chinándacaʼ laabe (Juan 6:​14, 36, 42, 60, 64, 66). Peru ni bizaaca racá la? maʼ gadxé peʼ ni de ni bizaaca ti iza despué lu iza 33, dxi gudixhe Jesús ximodo gaca Guendaroxhí stiʼ Señor. Dxi guca Guendaroxhí que la? maʼ 11 si apóstol stibe nga nuu ra nuube, neca cadi cayene chaahuicaʼ guiráʼ ni cusiidibe laacaʼ, peru laacabe cadi nácacabe casi stale de ca binni ni nuu Galilea que. Ca apóstol riʼ maʼ biénecabe Jesús nga Xiiñiʼ Dios ne beedabe de guibáʼ (Mat. 16:16). Guluu Jesús gana laacabe pur modo nácacabe, ná rabi laacabe: «Laatu nga ca ni qué huasaana naa lu ca prueba ni huadideʼ» (Luc. 22:28). Pur guiropaʼ cosa ni maʼ guninu riʼ cayénenu cadi jneza diʼ nga ni riníʼ caadxi binni purtiʼ laacaʼ nacaʼ caguixhe Jesús ximodo gaca Guendaroxhí stiʼ Señor dxi guniʼbe ca diidxaʼ ni zeeda lu Juan 6:53. Ne nuu xcaadxi cosa ni rusihuinni cadi zacá diʼ ni.

XIMODO RACANÉ CA DIIDXAʼ NI GUNÍʼ JESÚS LAANU

9. ¿Tu para nga ca diidxaʼ ni guníʼ Jesús lu Guendaroxhí stiʼ Señor?

⁹ Lu Guendaroxhí stiʼ Señor bidii Jesús ca apóstol stiʼ pan sin levadura ne gúdxibe laacaʼ laani nga runi representar ni cuerpu stibe. Despué, bidiibe laacaʼ vinu ne gúdxibe laacaʼ laani nga runi representar ni «rini stiʼ pactu» (Mar. 14:​22-25; Luc. 22:20; 1 Cor. 11:24). Ne galán ni guniʼbe riʼ, ¿xiñee yaʼ? Purtiʼ pactu cubi riʼ la? qué ñuninédibe ni guiráʼ binni guidxilayú, sínuque né «ca binni Israel» si, ¿tu laacabe yaʼ? Laacabe nga ca binni ni maʼ bibí para guni mandarné Cristu lu Reinu stiʼ Dios (Heb. 8:​6, 10; 9:15). Óraque qué ñene diʼ ca apóstol que xi riníʼ guiráʼ ca diidxaʼ ni caníʼ Jesús que. Peru qué zandaa zabí Dios laacabe né espíritu santu ne ziuucabe lu pactu nacubi ca para guicaacabe ti lugar ra nuu Jesús guibáʼ (Juan 14:​2, 3).

10. Bizeeteʼ stiʼ cosa ni rusihuinni gadxé nga ni guníʼ Jesús dxi nuu Galilea né ni guníʼ lu Guendaroxhí stiʼ Señor (Biiyaʼ imagen ca).

¹⁰ Ne cadi guiaandaʼ laanu, lu Guendaroxhí stiʼ Señor que la? caniʼné Jesús ti grupuhuiiniʼ si, laacabe nga ni runibiaʼnu casi «grupuhuiiniʼ de dendxuʼ». Ca 11 apóstol si ni nuu ra nuu Jesús lu Guendaroxhí que nga bizuluné grupuhuiiniʼ riʼ (Luc. 12:32). Cásica laacabe ne xcaadxi binni la? zácacabe ti grupu si ne laacabe nga naquiiñeʼ gócabe pan ne guécabe vinu. Ne guirácabe zacaacabe ti lugar guibáʼ ra nuu Jesús. Nga runi, ni gudxi Jesús ca apóstol stiʼ dxi que la? gadxé peʼ ni de ni gúdxibe guiráʼ binni que dxi nuube Galilea. Raqué guniʼbe ca diidxaʼ que para ti grupu jma naroʼbaʼ.

11. ¿Ximodo nánnanu cadi para ti grupuhuiiniʼ de binni si nga ca ndaayaʼ ni guníʼ Jesús dxi nuu Galilea?

¹¹ Dxi nuu Jesús Galilea lu iza 32, caníʼnebe ca binni judíu. Peru stale de laacaʼ ni racaláʼdxisicaʼ nga gudiibe laacaʼ ni gocaʼ. Peru dxi que guníʼnebe laacaʼ de ti cosa jma risaca que guendaró: xiixa ni zudii laacaʼ ti oportunidad de guicaacaʼ guendanabani ni qué zaluxe. Laaca dxi que guniʼbe guiráʼ ni gatiʼ zanda guiásacaʼ de lade gueʼtuʼ lu últimu dxi ne guicaacaʼ guendanabani ni qué zaluxe. Raríʼ  ridúʼyanu cadi caníʼdibe de ti ndaayaʼ ni chiguicaa chupa chonna si binni ni bibí o ti grupuhuiiniʼ de binni casi ni nuu lu Guendaroxhí stiʼ Señor que, coʼ, sínuque dxi nuube Galilea que caniʼbe de ca ndaayaʼ ni zanda guicaa stale binni ne laapebe guniʼbe: «Pa gó tuuxa pan riʼ qué ziuu dxi gatiʼ. Ne pan ni chigudieeʼ nga beela ladeʼ ti gapa binni guidxilayú guendanabani» (Juan 6:51). c

12. ¿Xi caquiiñeʼ guni binni para guicaa guendanabani ni qué zaluxe casi guníʼ Jesús ni dxi nuu Galilea?

¹² Dxi nuu Jesús Galilea qué ñábidibe ca judíu que zacaa guiráʼ binni ndaayaʼ riʼ sin gúnicaʼ gastiʼ, cásica ni bibani ante ne ni gule despué. Laabe guniʼbe ca ni gó pan nga guicaani, ni caniʼbe raríʼ nga ca ni gusihuinni napa fe laabe. Stale binni ni ná xpinni Cristu laacaʼ riníʼ íquecaʼ para guilacaʼ la? caquiiñeʼ si guni crecaʼ Jesús ne nuu xcaadxi ruuyaʼ laabe casi tobi ni zanda gulá laacaʼ (Juan 6:29). Peru cadi ngasi nga laani, purtiʼ dxi guniʼné Jesús guiráʼ binni que Galilea la? nuu de laacaʼ biʼniʼ crecaʼ Jesús peru despué bixélecaʼ de laabe. ¿Xiñee bizaaca ndiʼ yaʼ?

13. ¿Xiruʼ caquiiñeʼ guni ca binni que para gusihuínnicaʼ dxandíʼ racaláʼdxicaʼ gácacaʼ ti discípulo stiʼ Jesús?

¹³ Stale de ca binni ni bidii Jesús ni gó racaláʼdxicaʼ chinándacaʼ laabe. Peru pa qué gusaana de gudiibe laacaʼ ni racaláʼdxicaʼ. Ni jma risaca para laacabe  nga ca milagru ni runi Jesús, guicaacabe guendaró sin quíxecabe ne guiziidicabe caadxi cosa ni racaláʼdxisicabe gunadiágacabe. Peru bisihuinni Jesús para ganda gaca tuuxa ti discípulo stibe la? caquiiñeruʼ guni xcaadxi cosa. Cadi beeda diʼ Jesús lu guidxilayú para si gudii ni gó binni o xcaadxi cosa ni caquiiñecaʼ, sínuque caquiiñeʼ chécabe ra nuu Jesús, ni caninu nga, gucaadiágacabe ne chinándacabe guiráʼ ni cusiidiʼ (Juan 5:40; 6:44).

14. ¿Xi caquiiñeʼ gúninu para gacané beela ladi ne rini stiʼ Jesús laanu?

¹⁴ Bisiene Jesús caquiiñeʼ gusihuínnicabe nápacabe fe. Peru ¿xii ndiʼ naquiiñeʼ gápacabe fe yaʼ? Naquiiñeʼ guni crécabe zacané beela ladi Jesús ne rini stiʼ laacabe para guicaacabe guendanabani ni qué zaluxe. Ne nabé risaca gapa ca judíu que fe ne laaca risaca gápanu ni ca dxi riʼ (Juan 6:40). Nga runi, para ganda gacané rini ne beela ladi Jesús laanu casi riete ni lu Juan 6:53 la? caquiiñeʼ guni crenu maʼ bidiibe xquendanabánibe para gulabe laanu ne cadi para chupa chonna si binni nga nuu ndaayaʼ riʼ, sínuque para stale binni (Efes. 1:7).

15, 16. ¿Xii nga ca cosa risaca ni bizíʼdinu lu Juan capítulo 6?

¹⁵ Nabé risaca ni riete lu Juan capítulo 6 para laanu ne para ca binni ni nadxiinu. Rusihuínnini pabiáʼ nadxii Jesús binni. Dxi nuube Galilea bisiándabe ca binni huará, guníʼnebe binni de Reinu stiʼ Dios ne bidiibe ni gó ca ni candaana (Luc. 9:11; Juan 6:​2, 11, 12). Peru cadi ngasi bíʼnibe, laaca bisiidibe laacaʼ laabe nga «pan de guendanabani» (Juan 6:​35, 48).

¹⁶ Ca binni ni guníʼ Jesús naca de ca «xcaadxi dendxuʼ» cadi naquiiñeʼ gocaʼ pan nin guecaʼ vinu ora maʼ cayaca Guendaroxhí stiʼ Señor (Juan 10:16). Peru zanda gacané beela ladi ne rini stiʼ Jesús laacabe. ¿Ximodo zanda gacaneni laacabe yaʼ? Ra gusihuínnicabe nápacabe fe sacrificiu ni bidii Jesús para gulá binni (Juan 6:53). Peru ca ni gó pan ne gueʼ vinu la? cusihuínnicaʼ né laacaʼ nga nuucaʼ lu pactu nacubi ni biʼniné Jesús ca xpinni ne chiguicaacaʼ Reinu stiʼ Dios ni nuu guibáʼ casi ti herencia. Nga runi, nabé risaca ni riete lu Juan capítulo 6 para guiráʼ xixenu pa nácanu ungidu o de xcaadxi dendxuʼ. Ne laaca rusihuínnini nabé risaca nga gápanu fe para guicaanu guendanabani ni qué zaluxe.