1, 2. Xi para biquiiñecabe diidxaʼ banguhuiiniʼ para quixhe ñeebe lu Stiidxaʼ Dios ni gucuá lu diidxaʼ hebreu.

LU ISAÍAS 66:1 guníʼ Jiobá zeeda gaca guibáʼ casi trono stibe ne Guidxilayú casi ra riguixhe ñeebe. Ne lu Isaías 60:13 guniʼbe: «Zusisacaʼ lugar ra riguixhe ñeeʼ». Ximodo rusisaca Jiobá lugar ra riguixhe ñee o rúnini jma galán yaʼ. Ne xi riníʼ ni para cani nabani lu Guidxilayú yaʼ.

² Ora rieeteʼ de banguhuiiniʼ para quixhe ñeebe lu Stiidxaʼ Dios ni gucuá lu diidxaʼ hebreu laaca riquiiñeni para guininu de yuʼduʼ ni guyuu ndaaniʼ guidxi Israel dxiqué (1 Crónicas 28:2; Salmo 132:7). Nabé sicarú guca yuʼduʼ que para Jiobá, purtiʼ zaqué gunda biʼniʼ adorar ne bisisaca ca xpínnibe laabe lu Guidxilayú.

3. 1) Xi racané laanu para ganda guni adorarnu Dios ca dxi riʼ. 2) Padxí bizulú yuʼduʼ stiʼ Dios biʼniʼ dxiiñaʼ.

³ Xi racané laanu guni adorarnu Dios ca dxi riʼ. Cadi ti yoo diʼ ni casi yuʼduʼ que. Laani nga ti cosa ni rusisaca Jiobá jma que ti yoo, ne laani nga «yuʼduʼ stiʼ Dios». Xii nga yuʼduʼ stiʼ Dios yaʼ. Laani nga modo maʼ gudixhe chaahuiʼ Jiobá para ganda guni adorar binni guidxilayú laa ne ganda gaca xhamígucabe laa. Ne gunda gúcani purtiʼ guti Jesús  para gulá laanu. Padxí bizulú yuʼduʼ stiʼ Dios biʼniʼ dxiiñaʼ yaʼ. Lu iza 29, dxi guyuunisa Jesús ne gulí Dios laa para gaca sacerdote ni jma risaca ndaaniʼ yuʼduʼ stiʼ Jiobá (Hebreos 9:11, 12).

4, 5. 1) Casi rieeteʼ lu Salmo 99, xi naquiiñeʼ guni ca xpinni Jiobá. 2) Xi naquiiñeʼ guinabadiidxanu laca laanu.

⁴ Rudiʼnu xquíxepeʼ Jiobá pur gudixhe chaahuiʼ modo guni adorarnu laa. Ximodo rusihuínninu ni yaʼ. Ora rusiénenu binni lá Dios nga Jiobá ne biseendabe Jesús gueeda gati pur laanu. Nabé riéchenu gánnanu jma de xhono millón de Testigu cusisácacaʼ Jiobá guiráʼ dxi. Stale binni runi cré zié guibáʼ ora gatiʼ ne raqué gusisaca Dios. Peru laanu nánnanu cadi zacá diʼ ni. Nánnanu yanna nga naquiiñeʼ gusisácanu laabe.

⁵ Ora rusisácanu Jiobá, rinándanu ejemplu stiʼ ca xpínnibe de dxiqué. Biblia na: «Jiobá nabé nandxóʼ ndaaniʼ guidxi Sión, nuube luguiáʼ de guiráʼ guidxi. Gusisácacabe laluʼ. Naroobaʼ ni ne ridxibi binni ni, nayá ni» (Salmo 99:2, 3). Stale de laacabe casi Moisés, Aarón ne Samuel, yenándacabe modo gudixhe Dios guni adorárcabe laa. Ca dxi riʼ nuu chupa grupu ne nuucaʼ tobi si para guni adorarcaʼ Jiobá. Primé grupu riʼ nga cani bibí né espíritu santu ne ante checaʼ guibáʼ para gácacaʼ sacerdote né Jesús cayúnicaʼ dxiiñaʼ ndaaniʼ yuʼduʼ stiʼ Dios ni nuu lu Guidxilayú riʼ. Ne lu guiropa grupu riʼ nuu millón de «xcaadxi dendxu» ni cayacané cani bibí né espíritu santu (Juan 10:16). Peru cada tobi de laanu naquiiñeʼ guinabadiidxaʼ laca laa: «Ñee zinandaʼ modo maʼ gudixhe Dios guni adorárcabe laa la?».

6, 7. 1) Xi bizaaca despué de gutastí congregación stiʼ ca xpinni Cristu. 2) Xi bizaaca lu iza 1919.

⁶ Apóstol Pablu maca guníʼ ziuu binni ni maʼ qué zinanda religión ni rusiidiʼ ni dxandíʼ ne maʼ zusiidicaʼ ni cadi dxandíʼ ndaaniʼ congregación (Hechos 20:28-30; 2 Tesalonicenses 2:3, 4). Bizulú ndiʼ ante guizaa 100 iza de gutastí congregación stiʼ ca xpinni Cristu. De raqué maʼ guca nagana para gánnacabe tupeʼ nga cani dxandíʼ xpinni Dios. Peru gudiʼdiʼ si gayuaa iza biquiiñeʼ Jiobá Jesús para gusihuinni tuu ngue cani cayuni ni nabe ndaaniʼ yuʼduʼ stibe.

⁷ Lu iza 1919 bihuinni dxichi tuu nga cani cayuni ni na Dios ndaaniʼ yuʼduʼ stiʼ. Laacabe bichaacabe modo nabánicabe para guni adorárcabe Dios modo riuulaʼdxiʼ (Isaías 4:2, 3; Malaquías 3:1-4). Zaqué bizulú guca ni biʼyaʼ Pablu lu ti visión. Guidúʼyanu xii nga biiyabe.

8, 9. Xii nga «jardín» o paraísu ni biiyaʼ Pablu lu ti visión.

⁸ Biquiiñeʼ Jiobá poder stiʼ para biluíʼ Pablu lu ti visión xiixa ni chiguihuinni despué (biindaʼ 2 Corintios 12:1-4). Pablu biiyaʼ xiixa ni gulee lá «jardín» o paraísu. Xii nga paraísu riʼ yaʼ. Zándaca zeeda gácani chonna cosa. Primé, Paraísu ni chigaca lu Guidxilayú riʼ (Lucas 23:43). Guiropa, paraísu stiʼ Dios o guendariuudxi ni ziuu ndaaniʼ guidxilayú cubi. Guionna, «jardín sti Dios», o, ndaayaʼ sicarú ni nápacabe de chuʼnécabe Jiobá guibáʼ (Apocalipsis 2:7).

⁹ Xiñee guníʼ Pablu binadiaga caadxi cosa ni qué zanda guiníʼ yaʼ. Purtiʼ caʼruʼ ganda ora gusiénebe guiráʼ cosa sicarú  ni bíʼyabe. Peru ca dxi stinu riʼ, laanu ca xpinni Jiobá zanda guinínenu binni de ca cosa galán ni nápanu ndaaniʼ xquidxi Jiobá.

10. Ñee ngueca nga paraísu stiʼ Dios ne yuʼduʼ stibe la?

¹⁰ Gatigá ruzeeteʼ ca libru ne ca revista stinu de paraísu stiʼ Dios. Peru, ñee ngueca nga paraísu stiʼ Dios ne yuʼduʼ stibe la? Coʼ. Casi maʼ bidúʼyanu, yuʼduʼ stiʼ Dios nga modo maʼ gudixhe chaahuibe para guni adorarnu laabe. Peru paraísu stiʼ Dios nga guendariuudxi ni rudiibe xquídxibe ne pur nga nuucaʼ tobi si. Paraísu riʼ racané guihuinni dxichi tuu nga cani cayuni dxiiñaʼ ndaaniʼ yuʼduʼ stiʼ Dios (Malaquías 3:18).

11. Xi ndaayaʼ nápanu ca dxi riʼ.

¹¹ Dede lu iza 1919, maʼ bidii Jiobá lugar binni gulené donda gápacaʼ paraísu stibe ne gacanecaʼ guiroobaʼ ni ne gácani naguidxi. Ñee cayacaneluʼ para gácani zacá la? Ñee rusisácaluʼ guenda ni maʼ bidii Jiobá lii para gunineluʼ laa dxiiñaʼ ne zacá gusisácaluʼ laa lu Guidxilayú riʼ la?

12. Xiñee nánnanu cayaca ni na Isaías 60:17. (Biiyaʼ foto ni zeeda ra ruzulú tema riʼ.)

¹² Ra maʼ zidiʼdiʼ iza huachaa stale cosa ndaaniʼ xquidxi Dios ni nuu lu Guidxilayú riʼ ne pur nga jma galán rihuinni ni. Ne ngapeʼ nga ni bizeeteʼ profeta Isaías zazaaca. Biblia na: «Lugar de guedaniáʼ cobre zedaniáʼ oro, ne lugar de guedaniáʼ guiibaʼ zedaniáʼ plata, ne lugar de guedaniáʼ yaga, zedaniáʼ cobre, ne lugar de guedaniáʼ guié, zedaniáʼ guiibaʼ; ne zuneʼ guendariuudxi casi ca xaíque stiluʼ, ne zuneʼ guendaruni jneza casi tuuxa ni gabi lii xi naquiiñeʼ guʼnuʼ» (Isaías 60:17). Ca Testigu ni nahuiiniʼ ne cani nacubi cayuu ndaaniʼ xquidxi Dios zándaca nánnacaʼ xi guiráʼ huachaa ndaaniʼ xquidxi Dios purtiʼ guyuu tu guniʼné ni laacaʼ o purtiʼ biindacabe ni lu ca libru ne ca revista stinu. Peru nuu stale hermanu ni maʼ xadxí de nuu ndaaniʼ xquidxi Dios biiyacaʼ dxi bizaaca guiráʼ ndiʼ. Laacabe nanna dxíchicabe caquiiñeʼ Dios rey Jesucristu para zaniruʼ ndaaniʼ xquídxibe. Pa gucaʼdiáganu guiráʼ ni gabi ca hermanu riʼ laanu, jma zápanu confianza Jiobá.

13. Casi na Salmo 48:13, xi naquiiñeʼ gúninu.

¹³ Guiranu naquiiñeʼ guinínenu binni de xquidxi Jiobá. Lu guidxilayú malu riʼ nabé ridxagayaanu ora gúʼyanu stale hermanu ni nuu lu guidubi Guidxilayú nuucaʼ tobi si ne nuudxicaʼ. Nga runi naquiiñeʼ guinínenu laacaʼ de xquidxi Dios ne de paraísu stibe «ca binni guibani despué» o cani jma nahuiiniʼ ne cani nacubi cayuu ndaaniʼ xquidxi Dios. Biblia na: «Lagucaa ladxidoʼto guʼyaʼ chaahuiʼ ca lindaa stini. Laguuyaʼ ca torre stiʼ ca yoo ca, para gábitu cani ca binni guibani despué» (Salmo 48:13).

14, 15. 1) Xi cosa bidxaa lu ca iza 1970. 2) Xiñee gucané ca cosa ni bidxaa riʼ xquidxi Dios.

¹⁴ Stale Testigu ni maʼ xadxí de naca xpinni Cristu huayuuyacaʼ ximodo huadxaa caadxi cosa ndaaniʼ xquidxi Dios ni nuu lu Guidxilayú riʼ ni huayacané para gácani jma naguidxi. Maʼ raca stale iza, cada neza binni ridagulisaa gupa ti siervu de congregación, cada Betel gupa ti siervu de sucursal ne Betel ni nuu Brooklyn gupa ti presidente de la Sociedad Watch Tower. Neca gupa ca xpinni Cristu riʼ tu  gacané laacaʼ, peru ti binni si nga riníʼ xi guni cada congregación, cada Betel ne Betel ni nuu Brooklyn. Peru despué de 1970 bidxaa caadxi cosa ne yanna maʼ ti grupu de binnigola nga riguixhe xi gaca. Ca dxi stinu riʼ, cada congregación napa ti grupu de binnigola, cada Betel napa ti Comité de Sucursal ne ti grupu de binnigola ni bibí né espíritu santu nga riguixhe xi guni ca testigu stiʼ Jiobá ne laacaʼ nga Grupu ni Zaniruʼ.

¹⁵ Nabé gucané cani bidxaa riʼ xquidxi Dios. Xiñee yaʼ. Gúcacani purtiʼ yanna jma maʼ riénenu Biblia. Ribeendú xquidxi Dios ni galán purtiʼ maʼ cadi ti binni si nga riguixhe xi gaca, sínuque guiráʼ binnigola ni maʼ gulí Jiobá nga zanda guiniʼcaʼ xi gaca (Proverbios 24:6; Efesios 4:8).

16, 17. De guiráʼ ni maʼ bidxaa ndaaniʼ xquidxi Dios lu ca últimu iza riʼ, gunáʼ nga ni jma riuuláʼdxiluʼ, ne xiñee.

¹⁶ Guzéʼtenu chupa chonna cosa ni maʼ bidxaa ndaaniʼ xquidxi Dios lu ca últimu iza riʼ. Casi ca libru ne ca revista stinu nabé racané cani binni ne jma ribidxi cani laacaʼ. Ne riquiiñenu ca aparatu nacubi ca para gucheechenu diidxaʼ. Nabé cayacané sitiu jw.org ca binni ni caquiiñeʼ guiziidiʼ de Dios. Guiráʼ ni cazaaca riʼ rusihuínnicani nadxii Jiobá binni ne rizaaláʼdxibe laacaʼ.

¹⁷ Laaca rusisácanu ca cosa ni bidxaa ra ridagulisaanu ti gápanu jma tiempu para guidúʼndanu stúbinu o né binnilídxinu. Ne laaca rusisácanu cani bidxaa lu ca guendaridagulisaa roʼ. ¡Jma galán raca ni cada iza! Ne laaca rusisácanu  guiráʼ ni rizíʼdinu lu ca scuela ni napa xquidxi Dios. Guiráʼ cani maʼ bidxaa ndaaniʼ xquidxi Jiobá rusihuínnicani laabe nga caguíxhebe xi gaca ndaaniʼ xquídxibe ti cadi gusaana de gácani naguidxi.

18, 19. Ximodo zanda gacanenu guihuinni xquidxi Dios jma galán.

¹⁸ Maʼ bidii Jiobá laanu ndaayaʼ de gacanenu guihuinni xquidxi jma galán. Ximodo zanda gúninu ni yaʼ. Ti modo zanda gúninu ni nga gucheechenu diidxaʼ ne gusíʼdinu binni de Biblia. Cada binni gacanenu gaca Testigu, racanenu guiroobaʼ xquidxi Jiobá (Isaías 26:15; 54:2).

¹⁹ Sti modo zanda gacanenu guihuinni xquidxi Dios jma galán nga gúninu stipa pur gápanu ca guenda ni naquiiñeʼ gapa ca xpinni Cristu. Zacá racanenu chuulaʼdxiʼ xcaadxi binni xquidxi Dios. Xii nga ni rucaa binni guidxiña xquidxi Dios, guiziidicaʼ de Jiobá ne de Jesús yaʼ. Stale biaje ni ruuyacabe nga modo laanu ne cadi pabiáʼ nánnanu.

20. Casi rieeteʼ lu Proverbios 14:35, xi naquiiñeʼ gúninu.

²⁰ Nanna dxíchinu riecheʼ Jiobá ne Jesús ora ruuyacaʼ pabiáʼ sicarú xquidxi Dios. Ne laanu laaca riéchenu ora racanenu chuʼni naguidxi. Peru jma nayecheʼ ziuʼnu ora gacanenu gaca Guidxilayú riʼ ti paraísu. Proverbios 14:35 na riecheʼ ti rey ora napa ti mozo nuu xpiaaniʼ. Nga runi, gácanu binni nuu xpiaaniʼ ne gacanenu guihuinni xquidxi Dios jma galán.