1, 2. 1) Paraa biʼniʼ adorar ca binni de dxiqué Dios. 2) Xi guníʼ ique Jesús de yuʼduʼ ni guyuu Jerusalén. 3)  Xi zadúʼyanu lu tema riʼ.

CA XPINNI Dios qué huasaana de gápacaʼ ti lugar para guni adorarcaʼ laabe. Casi Abel, zándaca bidii ofrenda Jiobá lu ti altar (Génesis 4:3, 4). Noé, Abrahán, Isaac, Jacob ne Moisés laaca bíʼnicaʼ altar (Génesis 8:20; 12:7; 26:25; 35:1; Éxodo 17:15). Jiobá gudxi ca israelita gúnicaʼ ti tabernáculo para guni adorarcaʼ laabe (Éxodo 25:8). Ne despué biʼniʼ mandarbe laacaʼ gucuicaʼ ti yuʼduʼ (1 Reyes 8:27, 29). Dxi biree ca israelita de Babilonia, bizulú bidagulisaacaʼ ndaaniʼ caadxi lugar ni biree lá sinagoga (Marcos 6:2; Juan 18:20; Hechos 15:21). Ne ca primé xpinni Cristu bidagulisaacaʼ ra lidxi tuuxa hermanu (Hechos 12:12; 1 Corintios 16:19). Ca dxi stinu riʼ, laanu ca testigu stiʼ Jiobá ridagulisaanu ndaaniʼ mil de Yoo stiʼ Reinu ni nuu lu guidubi Guidxilayú para guni adorarnu Dios.

² Nabé biʼniʼ respetar Jesús yuʼduʼ ni guyuu Jerusalén. Ora biiyaʼ ca discípulo que pabiáʼ nadxii Jesús yuʼduʼ que la? bietenaláʼdxicaʼ ni na ti salmo: «Tantu racaladxe gapa liʼdxu dede runduuxe ni naa» (Salmo 69:9;  Juan 2:17). Dxandíʼ, ca Yoo stiʼ Reinu cadi nácacani lidxi Jiobá casi guca yuʼduʼ que (2 Crónicas 5:13; 33:4). Peru naquiiñeʼ guni respetarnu cani, purtiʼ ndaaniʼ cani nga ridagulisaanu para guni adorarnu Dios. Lu tema riʼ zadúʼyanu xi rusiidiʼ Biblia de modo naquiiñeʼ gaca xpiaʼnu ndaaniʼ ca Yoo stiʼ Reinu, ximodo gápanu cani ne ximodo gacanenu para cuí jma Yoo stiʼ Reinu. *

3-5. 1) Xii nga ti Yoo stiʼ Reinu. 2) Ximodo naquiiñeʼ guidúʼyanu ca Yoo stiʼ Reinu.

³ Yoo stiʼ Reinu nga ra jma riquiiñenu para guni adorarnu Dios. Para laanu naca ca reunión ca ti regalu stiʼ Dios. Xiñee yaʼ. Purtiʼ racané cani laanu chuʼnu jma gaxha de laabe. Ne riquiiñeʼ xquidxi Jiobá cani para cuʼ gana laanu ne gusiidiʼ laanu ni caquiiñeʼ gánnanu. Cani rizíʼdinu lu ca reunión ca zeeda gácacani casi guendaró ni rudii Jiobá ne Jesús laanu guiráʼ semana. Ti ndaayaʼ nga guni invitárcabe laanu ruaa «mexa» stícabe (1 Corintios 10:21).

⁴ Lu Biblia rabi Jiobá laanu naquiiñeʼ chuunu ca reunión ca para guni adorarnu laa ne para cúʼsaanu gana laanu (biindaʼ Hebreos 10:24, 25). Cumu runi respetarnu Jiobá la? qué racaláʼdxinu guiaadxanu nin ti reunión, riáʼdxanu ora dxandipeʼ chuʼ xiixa ni gucueeza laanu. Rusihuínninu risaca para laanu ca guendaridagulisaa ca ora ridúʼndanu dede ante para ganda guicábinu lúcani (Salmo 22:22).

⁵ Pa cuídxinu ora maʼ cayaca ca guendaridagulisaa ca ne gápanu Yoo stiʼ Reinu, zusihuínninu runi respetarnu Dios. Racaláʼdxinu guiníʼcabe galán de Jiobá, lá ni cá lu ca letreru stiʼ ca Yoo stiʼ Reinu, pur modo gaca xpiaʼnu (zadxélaluʼ ni caníʼ de laani lu 1 Reyes 8:17).

6. Xi huaníʼ chupa chonna binni ora riguuyacaʼ ca Yoo stiʼ Reinu. (Biiyaʼ foto ni zeeda ra ruzulú tema riʼ.)

⁶ Rudii binni cuenta guizáʼ runi respetarnu ca Yoo stiʼ Reinu. Casi ti hombre de Turquía guníʼ nabé bidxagayaa ora biiyaʼ nayá guieʼ nuu Yoo stiʼ Reinu. Ne laaca bidxagayaabe ora biiyabe guiráʼ ca binni que zuchaahuicaʼ ne cuxidxi huiinicaʼ cudii nacaʼ laabe. Hombre que guyé guiráʼ ca guendaridagulisaa stinu ne qué nindaa guyuunisa. Ndaaniʼ ti guidxi stiʼ Indonesia gurí ti Yoo stiʼ Reinu. Ca hermanu de raqué biʼniʼ invitarcaʼ ca vecinu, alcalde stiʼ guidxi que ne xcaadxi binni ni runi xhiiñabe para chiguuyacaʼ ni. Bidxagayaa alcalde que pabiáʼ sicarú modo gurí salón que ne pabiáʼ galán rihuinni jardín que. Guniʼbe nayá rihuinni Yoo stiʼ Reinu ne ngue rusihinni rúnicabe ni rusiidicabe.

7, 8. Ximodo rusihuínninu runi respetarnu Jiobá ndaaniʼ Yoo stiʼ Reinu.

⁷ Jiobá nga runi invitar laanu ca reunión ca. Modo rácunu lari ne modo gaca xpiaʼnu raqué rusihuínnicani rusisácanu Dios. Cadi naquiiñeʼ guininu xipeʼ zanda guni binni o xi qué zanda guni. Peru laaca  cadi naquiiñeʼ gaca xpiaʼnu casi ora ñuunu ra lídxinu. Racalaʼdxiʼ Jiobá guni sentirnu galán ne cani chiganna laanu ndaaniʼ Yoo stiʼ Reinu. Peru cadi naquiiñeʼ gúninu xiixa ni gusihuinni qué gápanu respetu ca reunión ca. Nga runi qué rácanu lari modo tiica si. Ne laaca qué ruséʼndanu mensaje, qué rinínenu sti binni diidxaʼ, qué ridoʼno ne qué rideʼnu ora maʼ cayaca ca reunión ca. Ca xpinni Cristu laaca maʼ bisiidicaʼ ca xiiñicaʼ cadi guxooñecaʼ ne cadi quítecaʼ ndaaniʼ Yoo stiʼ Reinu (Eclesiastés 3:1).

⁸ Riuunu ra Yoo stiʼ Reinu para guni adorarnu Jiobá ne guizíʼdinu de laa. Nga runi qué rúninu negocio ndaaniʼ Yoo stiʼ Reinu (zadxélaluʼ ni caníʼ de laani lu Nehemías 13: 7, 8). Guietenaláʼdxinu dxi biiyaʼ Jesús caadxi binni cutoo ndaaniʼ yuʼduʼ que, nabé bidxiichibe ne guleebe ca binni que de raqué (Juan 2:13-17).

9, 10. 1) Xi runi ca testigu stiʼ Jiobá para gacanecaʼ cuí Yoo stiʼ Reinu. 2) Xi huabeendúcabe pur ca stipa ni rúnicabe. 3) Ximodo huayacané xquidxi Jiobá ca congregación ra gástipeʼ bueltu para gucuicaʼ Yoo stiʼ Reinu.

⁹ Stale testigu stiʼ Jiobá nabé rúnicaʼ dxiiñaʼ para cuí Yoo stiʼ Reinu lu guidubi Guidxilayú. Ruuyacabe ximodo cuí cani ne guni chaahuicabe cani sin guiáxacabe. Ne pur nga lu ca últimu 15 iza ni maʼ gudiʼdiʼ ca gurí gaayuʼ Yoo stiʼ Reinu cada dxi. Biaʼsi maʼ gurí 28,000 Yoo stiʼ Reinu.

¹⁰ Biblia na cani napa stale naquiiñeʼ gacanecaʼ cani huaxiéʼ napa (biindaʼ 2 Corintios 8:13-15). Nga runi xquidxi Jiobá riquiiñeʼ ca xpinni Cristu ni riuulaʼdxiʼ chigacané ne bueltu ni rudiʼnu para cuí Yoo stiʼ Reinu ra caquiiñeʼ ni. Pur ndiʼ maʼ gurí stale Yoo stiʼ Reinu para ca congregación ni qué gapa bueltu para quixe ni.

11. 1) Xi riníʼ chupa chonna hermanu de Yoo stiʼ Reinu sticaʼ yaʼ. 2) Ximodo runi sentirluʼ ora guiníʼ íqueluʼ de ca hermanu riʼ.

¹¹ Ndaaniʼ guidxi Costa Rica gurí ti Yoo stiʼ Reinu xhono si gubidxa. Ca hermanu que naca casi ñaca caníʼ xcaandacaʼ ora biiyacaʼ Yoo stiʼ Reinu que. Bidiicabe xquíxepeʼ Jiobá, xquidxi ne ca hermanu ni gucané para gurí ni. Nabé rudiicabe xquíxepeʼ Jiobá ne nayecheʼ nuucabe pur ni bisigaʼdeʼ laacabe. Nabé riuʼnu nayecheʼ ora guidúʼyanu ca hermanu rudiicaʼ xquíxepeʼ Jiobá pur ni cayuni pur laacabe. Ne riéchenu gánnanu guiráʼ hermanu de guidubi Guidxilayú gápacaʼ Yoo stiʼ Reinu  para guidagulisaacaʼ. Rihuinni dxíchica caguu Jiobá ndaayaʼ ca dxiiñaʼ cayúnicabe para cuí jma Yoo stiʼ Reinu. Xiñee yaʼ. Purtiʼ ora ribí Yoo stiʼ Reinu, jma stale binni rié ca guendaridagulisaa ca para guiziidicaʼ de Jiobá (Salmo 127:1).

12. Ximodo zanda gacanenu para cuí jma Yoo stiʼ Reinu.

¹² Ximodo zanda gacanenu cuí jma Yoo stiʼ Reinu. Nuu de laanu zanda chigacanenu para cuí cani. Ne guiranu zanda gudiʼnu bueltu para guiaxa cani. Pa gúninu biaʼ gándatiʼ para gacanenu, ziuʼnu jma nayecheʼ. Ne ni jma risaca nga zusisácanu Dios. Racaláʼdxinu chinándanu ejemplu stiʼ ca xpinni Dios ni bibani dxiqué. De guidubi ladxidóʼcabe bidiicabe bueltu para cuí yoo para guni adorárcabe Jiobá (Éxodo 25:2; 2 Corintios 9:7).

13, 14. Casi rieeteʼ lu Biblia, xiñee naquiiñeʼ chuʼ Yoo stiʼ Reinu nayá ne gata chaahuiʼ guiráʼ ni nuu ndaaniʼ ni.

¹³ Jiobá naca ti Dios nayá ne racaláʼdxibe quixhe chaahuinu guiráʼ ni gúninu. Nga runi naquiiñeʼ gusianu ra Yoo stiʼ Reinu ne quixhe chaahuinu guiráʼ cosa ni nuu ndaaniʼ ni (biindaʼ 1 Corintios 14:33, 40). Para gácanu nayá casi Jiobá, naquiiñeʼ guiníʼ íquenu, guni adorarnu laabe ne gúninu ca cosa ca modo riuuláʼdxibe. Ne laaca naquiiñeʼ gusianu laanu (Apocalipsis 19:8).

¹⁴ Pa cadi gusaana de gusianu ra Yoo stiʼ Reinu qué zatuí lunu guni invitarnu binni ca reunión stinu. Ne zacá zudiicabe cuenta dxandíʼ racaláʼdxinu guibáninu ndaaniʼ ti guidxilayú cubi ne nayá.  Ne laaca zuuyacabe runi adorarnu ti Dios nayá ni zuni Guidxilayú riʼ ti paraísu sicarú (Isaías 6:1-3; Apocalipsis 11:18).

15, 16. 1)  Xiñee nuu biaje raca nagana para binni gusiá Yoo stiʼ Reinu. 2) Xiñee naquiiñeʼ gusianu ra Yoo stiʼ Reinu. 3) Xi programa nuu ra ridagulisaaluʼ para guiá Yoo stiʼ Reinu. 4) Xi ndaayaʼ nápanu guiranu.

¹⁵ Nuu biaje raca nagana para ca hermanu gusiacaʼ Yoo stiʼ Reinu. Xiñee yaʼ. Purtiʼ gadxé gadxé ni riníʼ binni de modo guiá xiixa lugar. Nuu tu nabeza ti lugar ra nabé nuu yu dé ne beñe. Nuu tu qué gapa stale nisa o ni riquiiñeʼ para gusiané. Ne pur modo biniisinu gadxé modo guidúʼyanu ora gusiácabe xiixa lugar. Peru gastiʼ naca paraa nabézanu ne xi guiníʼ ique ca binni ni nuu gaxha de laanu cadi naquiiñeʼ gusaana de gusianu Yoo stiʼ Reinu ne quixhe chaahuinu guiráʼ ni nuu ndaaniʼ ni. Xiñee yaʼ. Purtiʼ racá nga runi adorarnu Jiobá (Deuteronomio 23:14).

¹⁶ Pa racaláʼdxinu chuʼ Yoo stiʼ Reinu stinu nayá la? naquiiñeʼ chinándanu programa ni nápacabe para guiá ni. Ca binnigola ca nga rúnicaʼ programa riʼ ne ruuyacaʼ chuʼ guiráʼ ni caquiiñeʼ para guiané ni. Ne riníʼcabe tuu nga cani gusiá. Nuu cosa ni naquiiñeʼ guiá despué de cada reunión, peru nuu xcaadxi naquiiñeʼ guiá gatigá. Guiranu nápanu ndaayaʼ de gusianu ra Yoo stiʼ Reinu.

17, 18. 1) Xi zanda guizíʼdinu de ca xpinni Jiobá de dxiqué. 2) Xiñee naquiiñeʼ guni chaahuinu Yoo stiʼ Reinu ne gusianu ni.

¹⁷ Ca xpinni Jiobá de dxiqué biiyacaʼ chuʼ yuʼduʼ que galán. Casi rey Jehoás, biʼniʼ mandar ca sacerdote stiʼ Judá guni chaahuicaʼ yuʼduʼ que né bueltu bidii guidxi que (2 Reyes 12:4, 5). Jma de 200 iza despué rey Josías laaca biquiiñeʼ bueltu bidii guidxi para guni chaahuiʼ yuʼduʼ que (2 Crónicas 34:9-11). Xi rusiidiʼ ndiʼ laanu yaʼ. Rusiidiʼ ni laanu laaca naquiiñeʼ guidúʼyanu paraa naquiiñeʼ gaca chaahuiʼ Yoo stiʼ Reinu ne gúninu ni.

¹⁸ Ndaaniʼ chupa chonna Betel huayuuyacaʼ qué raca chaahuiʼ ca Yoo stiʼ Reinu ni nuu xquídxicaʼ. Nuu biaje purtiʼ huaxiéʼ binni nanna gúnini. Ne nuu biaje purtiʼ gastiʼ bueltu para gaca chaahuiʼ cani. Peru pa qué guni chaahuinu Yoo stiʼ Reinu stinu la? chaahuiʼ chaahuiʼ zioʼxhoʼ ni. Ne ca binni ni guuyaʼ ni zaniʼcaʼ mal de laanu. Nga runi naquiiñeʼ gúninu stipa pur guni chaahuinu ne gusianu ra Yoo stiʼ Reinu ra riuunu. Zacá zusisácanu Jiobá ne zaquiiñenu xpueltu ca hermanu stinu jneza.

19. Xi zanda gúniluʼ para gusihuínniluʼ runi respetarluʼ Yoo stiʼ Reinu.

¹⁹ Ca textu ni maʼ bidúʼyanu lu tema riʼ zacanécani laanu para guni respetarnu Yoo stiʼ Reinu. Guietenaláʼdxinu guiráʼ ca Yoo stiʼ Reinu ca stiʼ Jiobá cani, ne cadi stiʼ ti binni ni o ti neza binni ridagulisaa ni. Pa runi respetarnu Jiobá, laaca zuni respetarnu ca reunión stinu ne zaqueca Yoo stiʼ Reinu. Ne de guidubi ladxidoʼno zudiʼnu bueltu para cuí Yoo stiʼ Reinu ne zúninu stipa pur gusianu cani ne guni chaahuinu cani. Nga runi, chinándanu ejemplu stiʼ Jesús ne gusihuínninu runi respetarnu ca lugar ni riquiiñenu para guni adorarnu Jiobá (Juan 2:17).