Silvia, ti enfermera, guníʼ: «Stale de ca binni ni guzayaniáʼ universidad nacaʼ nápacaʼ religión sticaʼ, peru rigúʼbacaʼ guixi ne nabé rúnicaʼ trampa ora maʼ chigúnidu examen. Neca nápacabe religión stícabe peru rihuínnica qué racaneni laacabe guibánicabe jneza».

Ti hombre láʼ Lionel guníʼ sicaríʼ: «Cani runeniáʼ dxiiñaʼ riniʼcaʼ huaracaʼ neca cadi dxandíʼ para cadi checaʼ dxiiñaʼ. Para laacabe zeeda gaca religión stícabe casi ti mueble de luju ni rizíʼ binni para guzuhuaa ndaaniʼ lidxi».

Stale binni huaxiéʼ racané religión sticaʼ laacaʼ guibánicaʼ casi na Dios. Laaca nuu stale binni riníʼ «napa religión stiʼ, peru pur guiráʼ ni runi rusihuinni cadi zinanda ni rusiidiʼ religión stiʼ» (2 Timoteo 3:5, Dios habla hoy, 1994). Ca xaíque stícabe qué rudiicaʼ ti ejemplu galán ne qué rusiidicaʼ laacabe ni caquiiñeʼ gánnacabe de Biblia para ganda guibánicabe casi na Dios. Nga runi, stale binni riníʼ ique qué rizaalaʼdxiʼ Dios modo nabani.

Biblia rusiidiʼ laanu zanda gusiéchenu Jiobá o gusiúʼbanu ladxidóʼ pur cani gúninu. Stale biaje qué nuzuubaʼ ca israelita que stiidxaʼ Dios, ngue runi «bininácabe ladxidoʼbe» (Salmo 78:40). Peru ora gaca arrepentir ti binni de guidubi ladxidóʼ ne guchaa modo nabani la? «jma zieche né cani nuu ibáʼ [laa]» (Lucas 15:7). Ora gunibiáʼ chaahuiʼ ti binni ca guenda sicarú stiʼ Bixhózenu ni nuu guibáʼ, jma rannaxhii laabe ne rucaa nga laa gannaxhii ca cosa ni nadxiibe ne gacananalaʼdxiʼ cani nanaláʼdxibe (Amós 5:15).

Sicaríʼ guníʼ ti periódicu de ca testigu stiʼ Jiobá: «Rusiidicabe binni chuʼ tobi si né binnilidxi ne racanécabe laacaʼ gácacaʼ binni runi dxiiñaʼ, cadi cuánacaʼ ne cadi gusiguiicaʼ» The Deseret News, de Salt Lake City (Utah, Estados Unidos). Ne bizeeteruʼ ni: «Dxandíʼ rinándacabe ca ley bisaana Dios lu Biblia. Ne nánnacabe qué zanda chúʼcabe galán né Dios pa cúbacabe gueza o guidxi, pa xhudxi xhaatacabe, pa quítecabe juegu ra raca ganar bueltu, pa chuʼnécabe ni cadi xheelacabe o pa gácacabe muxeʼ».

Xi ribeendú ca testigu stiʼ Jiobá purtiʼ runibiáʼ chaahuicaʼ Dios yaʼ. Sicaríʼ guníʼ Silvia: «Stale binni ni rudii medicina para gusianda ca binni huará qué raca nagana para laacaʼ quítecaʼ binni. Ngue runi, nagueenda nicá modo laacabe que naa. Peru cumu nannaʼ ximodo ruuyaʼ Jiobá * ca binni ni runi zacá la? racaneni naa cadi gacaʼ casi laacabe. Zanda guiniéʼ nabaneʼ nayecheʼ ne runeʼ sentir nexhedxí ladxiduáʼ». Nanna Silvia nabani galán pur cani bisiidiʼ religión stiʼ laa.