Betania nga ti guidxihuiiniʼ ni riaana chonna kilómetru de Jerusalén (Juan 11:18). Chupa chonna semana ante gatiʼ Jesús bizaaca xiixa raqué. Málasi guca huará Lázaro, ti xhamigu dxiña Jesús, ne guti.

Ora gunna Jesús ni bizaaca que la? gúdxibe ca discípulo stibe nisiaasiʼ Lázaro ne chigucuaanibe laa (Juan 11:11). Peru ora bíʼyabe cadi cayene ca discípulo que xii ngue caniʼbe la? gúdxibe laacaʼ: «Ma guti Lázaro» (Juan 11:14).

Tapa gubidxa despué de bigaachiʼ Lázaro yendá Jesús Betania ne biyúbibe Marta, bizaʼnaʼ Lázaro, para quixhedxibe ladxidóʼ. Sicaríʼ gudxi Marta laabe: «Pa ñuu lu rarí la? Señor, qué ñati di bizanaʼ» (Juan 11:17, 21). Para na Jesús rabi laabe: «Naa nga rusibane gueʼtuʼ, ne naa nga rudiee enda nabani. Tu guni cre naa la? neca ma guti zabani» (Juan 11:25).

Para gusihuinni Jesús zanda guni ni guníʼ que la? bidxiña ra baʼ que ne bicaa ti ridxi: «¡Lázaro, gudáʼ raríʼ!» (Juan 11:43). Guizáʼ bidxagayaa ca binni nuu raqué ora bíʼyacaʼ biree Lázaro ndaaniʼ baʼ que.

Ante guni Jesús milagru ca, maca gundísabe chupa binni de lade gueʼtuʼ. Tobi de laacabe nga xiiñidxaapaʼ Jairo. Ne ante guindísabe dxaapahuiiniʼ que laaca guniʼbe nisiaasiʼ (Lucas 8:52).

Guiropaʼ biaje que guníʼ Jesús nisiaasiʼ ca binni ni maʼ gutiʼ que. Ne biáʼsipeʼ nga bichaagabe guendaguti ca ne ora rasi binni, purtiʼ ora nisiaasiʼ binni qué rudii cuenta. Zacaca nga nuu ca gueʼtuʼ ca, maʼ qué gánnacabe gastiʼ ne maʼ qué runi sentírcabe yuubaʼ (Eclesiastés 9:5, biiyaʼ cuadru ni láʼ  «Casi ñaca nisiaasiʼ binni nga ora maʼ guti»). Ca primé discípulo stiʼ Jesús que biénecabe ximodo nuu ca gueʼtuʼ ca. Sicaríʼ bizeeteʼ  ti enciclopedia: «[Laacabe] biiyacabe guendaguti ca casi ti bacaandaʼ, ne baʼ ca ti lugar ra riziilaʼdxiʼ [...] cani gutiʼ ne qué nusaana de ñúnicaʼ ni na Dios» Encyclopedia of Religion and Ethics. *

Nabé ratadxí ladxidoʼno gánnanu cadi cayacaná cani maʼ guti, sínuque nisiaasicabe ndaaniʼ baʼ. Yanna, cumu maʼ nánnanu xi raca binni ora maʼ guti la? maʼ qué zuchíbini laanu.

Nécapeʼ guiranu riuuláʼdxinu guiziiláʼdxinu huaxhinni, tu laa ñuulaʼdxiʼ ñasi ne maʼ qué ñuu dxi nibani yaʼ. Ñee ziuu dxi guibani cani nexheʼ ndaaniʼ baʼ cásica bibani Lázaro ne xiiñiʼ Jairo la?

Sicaríʼ gunabadiidxaʼ Job dxi biʼniʼ sentir mayaca gatiʼ: «Pa gatiʼ ti hombre [...], ñee zanda guibánibe sti biaje la?» (Job 14:14).

Sicaríʼ gudxi Job Jiobá, Dios ni jma napa poder: «Lii zucaa rídxiluʼ, ne naa zacabeʼ lii. Zanabaʼ ladxidoʼloʼ cani bizáʼ naluʼ» (Job 14:15). Hombre ni biʼniʼ ni na Dios riʼ nanna dxichi racalaʼdxiʼ Jiobá guindisaʼ laa de lade gueʼtuʼ. Ñee caguite si Job laca laa la? coʼ, dxandipeʼ zaca ni guniʼbe ca.

Ora gundisaʼ Jesús cani maʼ guti bihuinni maʼ bidii Dios laabe poder para quixhedxibe guendaguti. Ne lu Biblia rieeteʼ naaze Jesús «ca llave sti enda guti» (Apocalipsis 1:18). Ne zaquiiñebe ca llave ca para guxhélebe ca baʼ ca casi bíʼnibe dxi guniʼbe guiree guié ni nuu ruaa baʼ ra gaʼchiʼ Lázaro que.

Gatigá ruzeeteʼ Biblia zadxiña dxi ziasa ca binni ni maʼ guti. Sicaríʼ gudxi ti ángel profeta Daniel: «Zaziiláʼdxiluʼ, peru ziásaluʼ para guicaaluʼ ni maʼ nexheʼ guicaaluʼ ora maʼ guiluxe ca dxi ca» (Daniel 12:13). Sicaríʼ gudxi Jesús ca saduceo, ca xaíque yuʼduʼ ni qué runi cré pa ziasa binni de lade gueʼtuʼ: «Cuchee tu purti qué ganna tu xi na Xquiʼchi Dios nin pabiáʼ nandxóʼ be» (Mateo 22:23, 29). Ne apóstol Pablu guníʼ ca diidxaʼ riʼ: «Naa rune cre zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hechos 24:15).

Padxí guiasa ca gueʼtuʼ, cani nachaʼhuiʼ ne cani cadi nachaʼhuiʼ yaʼ. Sicaríʼ gudxi ángel que Daniel: «Ora maʼ guiluxe ca dxi ca». Marta biʼniʼ cré ziasa Lázaro «dxi iluxe guidxilayú [o «últimu dxi», TNM], ra ibani irá binni» (Juan 11:24).

Ora ruzeeteʼ Biblia de «últimu dxi», caniʼni de dxi guni mandar Jesús. Pablu guníʼ xi chiguni Cristu: «Napa be xidé guni mandar be dede cuaqui dxí Dios irá cani cadi nuu né laabe tobi si. Ne ni unitilú be últimu nga enda guti» (1 Corintios 15:25, 26). Nga runi, nabé risaca guinábanu Dios gueeda Reinu stiʼ ne gaca ni na lu Guidxilayú. *

Biʼniʼ cré Job racalaʼdxiʼ Dios gusibani ca binni ni maʼ guti. Ne dxi gaca nga la? zanitilú guendaguti. Ne maʼ guirutiʼ zanabadiidxaʼ: «Ñee riluxe guirani ora gatiʼ binni la?».