Guleʼ ndaaniʼ guidxi Riga, capital stiʼ Letonia. Naa ne bizanaʼ gulezanedu jñaaʼ. Neca católica guca jñaaʼ la? ora gaca si xiixa saa nga riuudu ndaaniʼ yuʼduʼ. Dede nahuiineʼ maca runeʼ cré Dios. Peru dxi maʼ ziniiseʼ guyuuladxeʼ guneʼ xcaadxi cosa.

Bidii jñaaʼ cuenta nabé riuuladxeʼ guchiayaʼ intiica ni guuyaʼ ne uquiideʼ ni sti biaje. Cumu napa jñaaʼ stale cosa ndaaniʼ lidxi ni zándaca guchiayaʼ la? ngue runi ridxíbibe gusaanabe naa stubeʼ. Para chuʼ xi guneʼ, guziʼbe ti juguete ni zanda guchiayaʼ ne uquiideʼ sti biaje. Laani nga ti cosa ni nabé riuuladxeʼ cásica riuuladxeʼ gusayaʼ motocicleta. Bicaa jñaaʼ laʼyaʼ lu ti carrera ni runibiáʼcabe casi Zelta Mopēds ne zacá nga bizuluáʼ gudxiteʼ carrera moto ni huaxiéʼ ruxooñeʼ. Despué maʼ gudxiteʼ carrera né moto ni jma ruxooñeʼ.

Nagueenda biziideʼ ne qué nindaa maʼ binibiáʼcabe naa lu ca carrera ra riguu binni xquendanabani ra naxoo. Chonna biaje bineʼ ganar lu carrera ni runibiáʼcabe casi superbikes ni raca Letonia ne chupa biaje ndaaniʼ ca guidxi ni runibiáʼcabe casi países bálticos.

Dxi maʼ nacaʼ ti binni risaca, bidxela Evija, xnoviaʼ ni bichaganaʼyaʼ despué, ti revista stiʼ ca testigu stiʼ Jiobá ne lu ni zeeda ti cupón para guinábabe cheʼ tuuxa chiguundané laabe Biblia. Bichabe cupón que, biseendabe ni ne qué nindaa de ngue yeguundané chupa testigu stiʼ Jiobá laabe. Ca dxi que huaxiéʼ guyuuladxeʼ gannaʼ de religión, peru bidieeʼ lugar gusiidicabe xheelaʼ.

Gudiʼdiʼ si dxi, biʼniʼ invitar ca gunaa Testigu ni riguundané Evija que naa chuaaʼ ora gusiidicaʼ laabe. Bineʼ ni gunábacabe naa ne guyuuladxeʼ cani bicaadiaga que. Tobi de ca cosa ni yendá ndaaniʼ ladxiduáʼ nga ca diidxaʼ  ni zeeda lu Salmo 37:10, 11, ra guníʼ Dios zuni Guidxilayú riʼ ti paraísu. Textu riʼ na: «Ne maʼ xcaadxi si tiempu cayaadxaʼ, ne binni malu maʼ qué ziuu; neca guyúbiluʼ laacaʼ maʼ qué zadxeʼluʼ laacaʼ. Peru cani nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale guendariuudxí».

Zeʼ dxi jma guyuuladxeʼ guiziideʼ cani zeeda lu Biblia. Ne bidieeʼ cuenta stale religión rusiidiʼ ni cadi dxandíʼ. Peru nabé bidxagayaaʼ ora biiyaʼ jneza guiráʼ cani rusiidiʼ Biblia ne cadi nagana para guiene binni cani.

Ora biindanécabe naa Biblia biziideʼ nabé risaca guendanabani nezalú Jiobá (Salmo 36:9). Ngue bicaa naa guiníʼ iqueʼ pa jneza ngue quíteruaʼ lu ca carrera que. Nga runi, maʼ qué ninaʼyaʼ niguaaʼ xquendanabaneʼ ra naxoo ni rapaʼ gana nga gudieeʼ ni Jiobá. Neca guizáʼ maʼ runibiáʼ binni naa, rusisácacaʼ naa ne riuuladxeʼ guxooñeʼ lu ca carrera que la? maʼ qué nusiecheʼ cani naa.

Lu iza 1996, guyaaʼ ti guendaridagulisaa stiʼ stale guidxi ni runi ca testigu stiʼ Jiobá ni guca ndaaniʼ guidxi Tallin (Estonia), ni riaana gaxha de ti estadiu ra gudxiteʼ carrera moto. Raqué biiyaʼ stale binni ni zeeda de gadxé gadxé guidxi nuucaʼ tobi si. Ora biniti bolsa stiʼ tobi de ca gunaa ni nuu raqué, guníʼ iqueʼ maʼ qué zadxélabe ni. Peru qué nindaa bidxelaʼ sti gunaa ni nuu raqué ni ne qué niniti nin ti cosa ni nuu ndaaniʼ ni. ¡Qué guirá guidxagayaaʼ ni biiyaʼ que! Raqué nga bidieeʼ cuenta dxandíʼ runi ca testigu stiʼ Jiobá guiráʼ ni riziidicaʼ lu Biblia. Naa ne Evija biniisidu lu stiidxaʼ Dios ne lu iza 1997 guyuu nísadu.

Caadxi de cani guca xhamiguaʼ ni gudxiteniáʼ carrera moto maʼ gúticaʼ pur laani. Peru naa nabáneruaʼ pur cani biziideʼ lu Biblia, ra biindaʼ ni gunnaʼ zabidxi Jiobá cuenta naa, purtiʼ laabe nga bidiibe naa guendanabani.

Naa ne xheelaʼ bínidu dxiiñaʼ tapa iza ndaaniʼ Yoo Betel stiʼ ca testigu stiʼ Jiobá ni nuu Riga. Yanna, cusiniisidu xiiñidu, Alise, ne cusíʼdidu laabe gannaxhiibe Jiobá. Laaca ribeeʼ ti dxi lu ti semana, riguneʼ chaahueʼ carru ne xcaadxi cosa ni riquiiñecabe ndaaniʼ oficina ra rutiixhicabe diidxaʼ ni nuu Letonia. Nayecheʼ riuaaʼ ora iquiiñeʼ cani biziideʼ dxi nahuiineʼ para guneʼ xhiiñaʼ Jiobá. Ne dede yanna ruchiayaruáʼ cosa ne ruquiideʼ cani sti biaje.

Pur cani maʼ biziideʼ lu Biblia, naa ne ca binnilidxeʼ randa rúnidu dxiiñaʼ sicarú riʼ: gusíʼdidu xcaadxi binni de tobi lucha Dios ni dxandíʼ. Rihuinni dxíchica, bichaaʼ modo nabaneʼ ora gunnaʼ ziuu ti paraísu.