Ñuuláʼdxiluʼ ñánnaluʼ xi chiguizaaca despué la? Stale binni ñuulaʼdxiʼ ñanna ni. Nga runi, stale tu racalaʼdxiʼ guiníʼ xi chiguizaaca, nuu ora dxandíʼ ni riníʼcabe peru nuu ora coʼ. Guidúʼyanu ca ejemplu riʼ:

• CA CIENTÍFICU riquiiñecaʼ stale bueltu ne aparatu ni jma nacubi para guiniʼcaʼ xi chiguizaaca despué, casi xi zazaaca né Guidxilayú riʼ pur modo ziyaca biidiʼ ni, pa ziaba nisaguié sti dxi ne laaca ruuyacaʼ xi zazaaca lu xcaadxi cosa.

• CA BINNI NI RUUNDAʼ PARA GÁNNACAʼ XI ZAZAACA riniʼcaʼ xi chiguizaaca lu política ne lu ca negocio. Warren Buffett nga tobi de ca hombre jma ricu lu Guidxilayú riʼ, ne rábicabe laabe Oráculo purtiʼ riniʼbe xi negocio zareendú. Stobi de ca hombre runi dxiiñaʼ ca nga Nate Silver, ruuyaʼ ca estadística nuu para guiníʼ xi chiguizaaca lu política ne lu ca premiu ricaa binni pur ca película ni rúnicaʼ.

• NUU CAADXI GUIʼCHIʼ YOOXHO ni huaníʼ binni cá profecía lucaʼ. Nuu binni runi cré yanna nga cayaca cani bicaa Michel de Notredame (Nostradamus) lu siglu XVI, neca narenda modo cá cani. Laaca guníʼ ique stale binni ninitilú Guidxilayú riʼ 21 stiʼ diciembre 2012 purtiʼ dxiqué nga biluxe ti tiempu ni zeeda lu calendariu yooxhoʼ stiʼ ca maya.

• CA XAÍQUE YUʼDUʼ huaniʼcaʼ zazaaca xiixa desgracia ni zuniná lu guidubi naca Guidxilayú. Harold Camping nga ti profeta ni riníʼ zazaaca xiixa desgracia, laabe ne ca xpínnibe guiráʼ ladu guníʼcabe zanitilú Guidxilayú lu iza 2011. Ne ridúʼyanu bicheecabe purtiʼ nuurunu ndaaniʼ Guidxilayú riʼ.

• CA PSÍQUICO nacaʼ zanda guiniʼcaʼ xi chiguizaaca despué. Edgar Cayce ne Jeane Dixon guniʼcaʼ caadxi cosa ni bizaaca lu siglu XX peru stale de cani guníʼcabe qué ñaca cani. Casi Dixon la? guníʼ zuzulú guionna guendaridinde lu guidubi naca Guidxilayú lu iza 1958, ne Cayce guníʼ biaʼ galaa iza 1970 ziaaziʼ guidxi Nueva York ndaaniʼ nisadóʼ bani.

Nabé risaca guinabadiidxanu ndiʼ: Ñee zanda gánnanu xi zazaaca despué la? Pa ñánnanu ni, cadi dxandíʼ maʼ gadxé modo nibáninu la?