R ACA chupa chonna iza, bíʼnicabe ti encuesta jma de 800 hombrehuiiniʼ ne dxaapahuiiniʼ de gadxé gadxé religión ra gunabadiidxacabe laacaʼ pa rucaadiaga Jesús ca oración sticaʼ. Jma de 60% de laacabe guníʼ rucaadiágabe, peru tobi de laacabe bicaa «Dios» ra cá Jesús lu guendarinabadiidxaʼ que.

Xi riníʼ íqueluʼ yaʼ. Tu laa naquiiñeʼ guni orarnu. Dios la? o Jesús. * para gánnanu ni la? guidúʼyanu ni bisiidiʼ Jesús ca discípulo stiʼ.

Cadi bisiidiʼ si Jesús naquiiñeʼ guni orarnu Dios, sínuque laapebe bíʼnibe ni.

NI BISIIDIBE: Ti dxi na ca discípulo stiʼ Jesús rabi laa: «Señor, bisiidi laadu iní né du Dios». Óraque na Jesús rabi laacabe: «Ora iniʼ né tu Dios la? sicarí nga iníʼ tu: Bixhoze» (Lucas 11:1, 2). Despué, dxi bidii Jesús ti libana lu ti dani, bisiidiʼ modo naquiiñeʼ guni orarnu. Sicaríʼ guniʼbe: «Lainíʼ né Bixhoze tu». De raqué guníʼrube: «Maca nanna Bixhoze tu xii nga caquiiñe tu ante inaba tu ni laa» (Mateo 6:6, 8). Gueelaʼ ante gatiʼ Jesús gudxi ca discípulo stiʼ: «Pa guinábatu Bixhozeʼ xiixa, laabe zudiibe ni laatu ora guinábatu ni lu laʼyaʼ» (Juan 16:23, TNM). Racá ridúʼyanu, gatigá bisiidiʼ Jesús naquiiñeʼ guni orarnu Bixhoze, Jiobá, purtiʼ laaca xiiñiʼ laanu (Juan 20:17).

NI BÍʼNIBE: Sicaríʼ biʼniʼ orar Jesús Dios: «[Xquixepeʼ] lii, Bixhozeʼ. Lii nga xpixuaana ibáʼ ne guidxilayú» (Lucas 10:21). Sti biaje: «Undisa lú Jesús ibáʼ, ne na: Rudiee [xquíxepeʼ] lii, Bixhozeʼ, purti bicaa diaʼgu naa» (Juan 11:41). Ne ante gatiʼ Jesús guníʼ: «Bixhozeʼ ucuaa espíritu stinneʼ» (Lucas 23:46). Raca ridúʼyanu gudixhe Jesús ti ejemplu para laanu: naquiiñeʼ guni orarnu Jiobá, Dios «runi mandar [...] ibáʼ ne guidxilayú» (Mateo 11:25; 26:41, 42; 1 Juan 2:6). Ne ngapeʼ nga ni biʼniʼ ca xpinni Cristu ni bibani lu primé siglu.

Chupa chonna semana de biguetaʼ Jesús guibáʼ, mápeca cayuniná ca xaíque guidxi que ca discípulo stibe (Hechos 4:18). Tu biʼniʼ orárcabe para gacané laacabe yaʼ: «Irá cabe tobi si uníʼ né cabe Dios» para gudii stipa laacabe ne bíʼnicabe ni lu lá Jesús (Hechos 4:24, 30). Zacapeʼ nga bíʼnicabe, yenándacabe modo bisiidiʼ Jesús laacabe: biʼniʼ orárcabe Dios.

Chupa chonna iza despué, bicaa apóstol Pablu: «Cada iní né du Dios Bixhoze Jesucristu Señor stinu rudíʼ du [xquíxepeʼ] laa pur laatu» (Colosenses 1:3). Laaca biidibe conseju riʼ ca hermanu stibe: «Cadi guiaana dxí tu de udii tu [xquíxepeʼ] Dios Bixhoze nu saca irá ni rudii laanu». Ne laaca gúdxibe laacaʼ gúnicaʼ ni lu lá Jesús (Efesios 5:20). Sti biaje gúdxibe laacaʼ  guni orarcaʼ «Dios Bixhoze nu», peru naquiiñeʼ gúnicabe ni lu lá Jesús (Colosenses 3:17).

Cásica biʼniʼ ca primé xpinni Cristu, ora guni orarnu naquiiñeʼ gúninu casi bisiidiʼ Jesús; zacá zusihuínninu nadxiinu laabe (Juan 14:15). Sicaríʼ guníʼ ti hombre bicaa Biblia: «Nadxieeʼ Dios stinneʼ purtiʼ rucaadiágabe ora guinabaʼ laabe gacanebe naa. Zuneʼ orar laabe biaʼ dxi guibaneʼ» (Salmo 116:1, 2, Traducción en lenguaje actual). Laanu laaca zanda guininu zacá pa guni orarnu Jiobá si. *