Cadi intiica si libru nga Biblia. Luni zadxélaluʼ conseju stiʼ Dios ni bizáʼ guiráʼ ni nuu (2 Timoteo 3:16). Zanda gacané mensaje stini lii. Ne Biblia peʼ ná: «Nabani stiidxaʼ Dios ne napa poder» (Hebreos 4:12). Zanda gacané libru riʼ lii de chupa modo: zanda gudii ni lii conseju ne gacané ni lii gunibiaʼluʼ Dios ne ca promesa stiʼ (1 Timoteo 4:8; Santiago 4:8).

Rudii ni conseju. Lu Biblia zeeda conseju ni racané laanu guibáninu galán ne laaca racané ni laanu lu xcaadxi cosa.

• Guidxaaganu xcaadxi binni (Efesios 4:31, 32; 5:22, 25, 28, 33).

• Chuʼnu nazaaca (Salmo 37:8; Proverbios 17:22).

• Gúninu ni jneza (1 Corintios 6:9, 10).

• Gápanu ni iquiiñenu (Proverbios 10:4; 28:19; Efesios 4:28). *

Bidii ti guendaxheelaʼ de Asia cuenta ximodo racané ca conseju stiʼ Biblia. Cumu nacubi bichaganácabe la? cayaca nagana para laacabe chúʼcabe de acuerdu. Peru bizulú bíʼnicabe ni rusiidiʼ Biblia. ¿Xi guleendúcabe yaʼ? Vicent, guníʼ: «Ni biindaʼ lu Biblia gucané naa gudxieeluáʼ ca guendanagana né guendarannaxhii. Yanna ra maʼ zinándanu ca conseju stiʼ Biblia, maʼ nabánidu nayecheʼ». Ne Annalou, xheelabe, guníʼ: «Ti cosa ni gucané laadu nga guidúʼndadu ca ejemplu sti hombre ne gunaa ni riete lu Biblia. Yanna maʼ nuaaʼ nayecheʼ ne maʼ gudixhe íquedu gúnidu jma cosa casi guendaxheelaʼ».

Racané ni gunibiaʼluʼ Dios. Laaca bizeeteʼ Vicent ca diidxaʼ riʼ: «Ora ruundaʼ Biblia, runeʼ sentir nuaaʼ jma gaxha de Jehová». Ni guníʼ hombre riʼ racané ni laanu gudiʼnu cuenta zanda gacané Biblia laanu gunibiaʼnu Dios. Ora gúʼndaluʼ Biblia, zabeenduluʼ ni galán de ca conseju ni zeeda luni, peru laaca zacané ni lii gácaluʼ xhamigu Dios. Laaca zaziidiluʼ zabáninu jma galán despué, zudii Dios laanu ti guendanabani ni qué zaluxe ne zabáninu para siempre ndaaniʼ ti lugar nabé sicarú (1 Timoteo 6:19). Nin lu sti libru qué riete guiráʼ ca ndaayaʼ riʼ.

Pa guzulú gúʼndaluʼ Biblia ne gúniluʼ ni guiráʼ dxi la? zabániluʼ jma nayecheʼ ne zunibiaʼluʼ Dios. Peru zándaca ra ziyuundaluʼ ni, zápaluʼ stale guendarinabadiidxaʼ. Pa guizaacaluʼ ni bizéʼtenu riʼ, bietenalaʼdxiʼ ni biʼniʼ ti hombre etíope ni bibani raca jma de chupa mil iza. Gupa hombre riʼ stale pregunta ora bizulú biindaʼ Biblia, nga runi, Felipe, ti discípulo stiʼ Jesús, gunabadiidxaʼ laabe pa cayénebe ni cayuundabe, para gúdxibe hombre que: «¿Ximodo guieneʼ ni pa guirutiʼ gusiene ni naa?». * Óraque, bidiibe lugar gacané Felipe laabe (Hechos 8:30, 31, 34). Ngaca lii, pa racaláʼdxiluʼ guiéneluʼ jma de Biblia, runi invitardu lii guni rellenarluʼ formulariu ni nuu lu jw.org o gucaaluʼ ra dirección ni zeeda lu últimu yaza stiʼ revista riʼ. Laaca zanda guiníʼneluʼ ti testigu stiʼ Jehová ni nabeza neza ra lídxiluʼ o cheluʼ ra ti Yoo stiʼ Reinu. Riguʼdu gana lii gúʼndaluʼ Biblia ne gudiiluʼ lugar gacané libru riʼ lii guibániluʼ jma nayecheʼ.