Sábadu 1 de marzo de 2014, bidagulisaa 823 Testigu ndaaniʼ ti salón de asamblea ni nuu ndaaniʼ guidxi Benín (Nigeria) para güicaʼ de xiixa nabé risaca. Dede lu iza 1999, dxi gudíxhecabe cuiʼ Yoo stiʼ Reinu ndaaniʼ ca guidxi ra nabé pobre binni, maʼ gurí 3,000 Yoo stiʼ Reinu ndaaniʼ guidxi riʼ.

Dxi bidagulisaacabe riʼ biete xi guiráʼ huayaca dede lu ca iza 1920 para chuʼ ti lugar ra guni adorárcabe Jiobá ndaaniʼ guidxi riʼ. Nacubi que bidagulisaacabe ra lidxi tuuxa ne gudíxecabe xiixa lugar. Nuu caadxi guiʼchiʼ ni cusihuinni ndaaniʼ guidxi Ilesa nga gurí primé Yoo stiʼ Reinu para si gaca reunión, lu iza 1935. Lu ca iza 1938 dede 1990 bidale congregación casi chupa gayuaa jma que biaʼ nuu que: de 14 ni nuu que bedagaca cani 2,681. Stale de ca congregación que guca nagana para laacaʼ guidxélacaʼ ti lugar ra guidagulisaacaʼ. Ndaaniʼ chupa chonna Yoo stiʼ Reinu bidagulisaa dede xhoopaʼ congregación. Nuu xcaadxi lugar qué rudii diʼ Yoo stiʼ Reinu que purtiʼ nabé stale tu rié, pur ngue nuu tu rizuhuaa fuera ne riguulusicaʼ ra ventana para gucaadiágacaʼ. Nuu xcaadxi congregación ni ridagulisaa ra lidxi binni o ndaaniʼ scuela.

Sucursal stiʼ ca testigu stiʼ Jiobá naguu chaahuiʼ bueltu para cuiʼ Yoo stiʼ Reinu, ngue runi lu iza 1990 maʼ bizulú bitiiñe’ ni ca congregación. Ne para lu iza 1997 maʼ gucané ca Comité Regional de Construcción 105 congregación gucuicaʼ Yoo stiʼ Reinu sticaʼ o guni chaahuicaʼ cani. De lu iza 1997 hasta 1999 gurí 13 Yoo stiʼ Reinu. Ne nuu de laacani bindaa 7 o 15 dxi para gurí.

Neca nagueenda cabí ca Yoo stiʼ Reinu que peru caquiiñeruʼ cuiʼ jma purtiʼ cadáleruʼ Testigu Nigeria. Lu beeu abril de 1998 guníʼ sucursal que caquiiñeʼ 1,114 Yoo stiʼ Reinu guidubi Nigeria.

Lu guendaridagulisaa nabé risaca ni guca Benín que laaca guyé Don Trost, stobi de cani nuu lu Comité de sucursal de Nigeria, laabe guniʼbe: «¡Guizáʼ stale dxiiñaʼ ngue! Ne guníʼ íquedu: “Ximodo gucuidu cani yaʼ”». Lu iza 1999 bidiʼdu cuenta ximodo chigaca dxiiñaʼ que, purtiʼ beeda ca Grupu ni rucuí Yoo stiʼ Reinu, ni napa xhoopaʼ o xhono binni, para gacanecaʼ ca congregación stiʼ Nigeria gápacaʼ ra guidagulisaacaʼ. Cumu huaxiéʼ luju napa ca Yoo stiʼ Reinu riʼ la? bicuícabe biaʼ 17 de laani cada beeu lu catorce iza gudiʼdiʼ ca.

Gudxi si Don Trost, cani cucaadiaga que galán dxiiñaʼ maʼ bíʼnicaʼ bizeetebe laaca cayaadxaruʼ cuiʼ stale. Lu iza 2013, jma de 8,000 binni guca Testigu Nigeria. Don Trost guníʼ: «Para chuʼ ra guidagulisaacabe la? naquiiñeʼ cuiʼ 100 Yoo stiʼ Reinu cada iza». Lu iza 2013 que maʼ nuu 351,000 Testigu Nigeria ne maʼ nuu jma de 5,700 congregación.