WIRIKAPAI 5
Ga Mbori Ringbisapai Nga Gine Tipa Kpotosende?
1. Mbori akusi kpotosende tipagine?
Yekova akusi kpotosende tipa akumba na adee. Kpotosende nga kpurani. Sidu, gu bambata arogotise Mbori akusiyo, nga Adamu na Eva, ko aakusanga yó tipa i vungu ka hiiso ngbangbaturũ na aboro te, bambiko Mbori aima kusa amaraika tipa i niraki ngbangbaturũ yo. (Eyobo 38:4, 7) Ono Mbori amoi gu bambata kumba nangia Adamu re rogo bawene paradizo rimoho angia ati Edene. (Bambata Pai 2:15-17) Yekova afu gu maabangirise fuko na atitako nga ga raka na ngbarago nyeanye kindi auru kpotosende.—Mo gedi Atambuahe 37:29; 115:16.
Ti tonatonaha, kina ati Edene sa nangia paradizo. Si adu nga gu bambata kumba na diako re nika vunga agude aboro ki nge ki hiisi kpotosende. Si adu nga i nika hiiso kpotosende ki zogoho na ki saha dunduko niparadizo. (Bambata Pai 1:28) Mbori azonga kpotosende kusayo wa gu kura aboro naaberãha te. Si nika nyeanye kindi nigu kporo nga ga awiri aboro.—Mo gedi Atambuahe 104:5.
Mo bi gu vidio re Tipagine Mbori Akusi Kpotosende Ti Ni?
2. Tipagine adunga kpotosende ti ni niparadizo awere ya?
Adamu na Eva abasasangba Mbori, ko ki do yó kusayo Edene yo. Pa Paradizo ki gberẽ, na boro ho narengbe ka karagaha kubaha te. Tona ti gu regbo re kada ku awere, kpotosende ima hi be gbegberẽ aboro.—Mo gedi Bambata Pai 3:23, 24.
Ya mo Yekova aima mbu gu gako bambata berãpai naadu tipa awiri aboro? Wagusa te! Ko duna tanduapai dũ. Ka ko kpanga ti manga gupai ko aida ka mangaha te. (Yesaya 45:18) Ko nika karaga gu raka akaraga ko aidi awiri aboro nirakihe.—Mo gedi Atambuahe 37:11, 34.
3. Wai i nika karaga Paradizo kubaha?
I nika karaga Paradizo ku auru kpotosende ti regbo ga Yesu zogarago ni ga Mbori Bakindo. Yesu nika ye na ga Mbori amaraika ka so gu ga Mbori vura nga Aramegido ki gbarasi agu aboro dunduko nasawia Mbori. Fuo gure, Yesu nika ba Satana ku bambukiso yo tipa agarã 1,000. Ono ga Mbori aboro nika bata abata be gu gbarasahe re bambiko Yesu nika bandayo abanda. I nika raka nyeanye kindi rogo Paradizo auru kpotosende.—Mo gedi Yugoti 20:1-3; 21:3, 4.
4. Gini regbo arungo nika digo ti ni?
Gini regbo Mbori nika nyasariipa gbegberẽ apai auru kpotosende? Yesu ape gupai i nika ‘ino pa’ digida rago ti ni. Agu apai namanga rogo zegino awere nasa ga aboro raka si du ngbapai na si nayugo gupai nga ani naraka awere ti “digida rago.”—Mo gedi Matayo 24:3, 7-14, 21, 22.
Yesu nika sungo ngbangbaturũ yo kini zogorago kurii kpotosende tipa agarã 1,000. Vuru gu regbo re, ko nika nyasariipa arungo dunduko. (Yesaya 9:6, 7; 11:9) Yesu nikadu a ni Gbiamotumo na ko nika dia gu ingapai kusayo nga ga agu aboro nakpinyemu Mbori. Vurube Yesu, Mbori nika nyasariipa akaza, gbinza, na kpio.—Mo gedi Yesaya 25:8; 33:24.
5. Ada nika raka rogo gu Paradizo naye re?
Mo nika bi aboro Bambu Kindo yo nga aguyo nakpinyemu Mbori na kini idi ka fu ngbarago fuko
Agu aboro nagiasangba Mbori nika raka Paradizo yo. (1 Yoane 2:17) Yesu akedi gako abawiriki i gbata agu aboro duna umbasitise tipa ka yugopai fuyo i ini wai rengbeyo kadu ni agu aboro Mbori aida naayo. Areme, Yekova nambakada amirioni aboro tipa i raki rogo gu Paradizo nikaye ku auru kpotosende. (Zefania 2:3) Rogo agu aBambu Kindo nga ga aDezire Yekova, aboro nawirika wai kadu niwene akumbakuadee na wene abaagude na wai kadu niwene dereakumba na anaagude. Agude na avunguyo nairisombori wa sa na kini wiriki wai rengbeyo ka gbia undo be gu wene pangbanga naye be Mbori.—Mo gedi Mika 4:1-4.
