Gu wene pangbanga nga aboro nika raka nyeanye kindi auru kpotosende, si nikekehe rogo Ziazia Kekeapai. (Atambuahe 37:29) Ziazia Kekeapai na rukutu akitabu rogoho 66. Mbori asa ruru akumba 40 i kehe. Moize nake gu bambata akitabu du bisue agarã wa 3,500 kusayo. Gu mokedi nangia Yoane nake gu yangara kitabu nga ga Ziazia Kekeapai agarã susi 1,900 kusayo. Gada aberãpai abake Ziazia Kekeapai akehe? Mbori afura na abake Ziazia Kekeapai rogo ziazia toro yo. (2 Samuere 23:2) I ake agu aberãpai nga ga Mbori angianga gayo ya. Sidu, sangba Yekova du du rogo Ziazia Kekeapai.​—Mo gedi 2 Timoteo 3:16; 2 Petero 1:20, 21.

Mo bi gu vidio re Da Nga Baenge Ke Baibiri?

Ani naino ya Ziazia Kekeapai aye be Mbori mbiko gupai nga si nagumba agu apai du kumbatayo na futufutuapai dunduko tipaha. Boro ho rengbe ka gumba agu apai du kumbatayo wa gure si ki mangi kinawo te. (Yosua 23:14) Kina gu Mbori Duna Tanduapai Dũ rengbe ka gumba agu apai nzunzu du tipa aboro kumbatayo.​—Mo gedi Yesaya 42:9; 46:10.

Gu buku naye be Mbori ima du kia ti kura abuku. I ima kusa Ziazia Kekeapai rogo dungu akama afugo na bangehe nga dungu abirioni. Wa vura du Ziazia Kekeapai nigu buku naima dia dungu akutu agarã, agu apai du rogoho nandu andu sa na ga birĩ-inohe, watadu sayanisi. Berewe a, agu abake Ziazia Kekeapai naadu 40 aakenga gupai navundo tihe na gu akurayo akehe te. Kurigure, Ziazia Kekeapai nayugopa ga Mbori nyemuse, na si na ome ti ni ka aria ga aboro raka si du niwenehe. Agi apai re nasa dungu amirioni aboro i idi kuti gupai nga Ziazia Kekeapai nga Sangba Mbori.​—Mo gedi 1 ATesaroniko 2:13.

Mo bi gu vidio re Wai du Rengbe Ani ka Ino Singia Baibiri Nga Rengo?

Gu banguapai du rogo Ziazia Kekeapai nga gu wene pangbanga nga Mbori na wene ringbisapai beko tipa aboro. Ziazia Kekeapai nasakapa wai furani aboro agberesipa gayo raka rogo paradizo auru kpotosende ti tonatona ga aboro raka na wai Mbori nika karaga paradizo berewe kubaha.​—Mo gedi Yugoti 21:4, 5.

Ziazia Kekeapai na andiko rogoho na arugute nga gu naye be Mbori. Kurigure, Ziazia Kekeapai na apangbanga rogoho tipa wai Mbori anaamangapai na aboro, na agi apangbanga re nayugo asinoko furani. Sidu tie, Ziazia Kekeapai rengbe arengba ka undoro mo ini Mbori. Si nasakapa wai rengbe mo kadu nibakureako.​—Mo gedi Atambuahe 19:7, 11; Yakoba 2:23; 4:8.

Gi waraga re nika undoro kina ngba gu gene Yesu anaamangaha tipa mo girogo agu apai yo du rogo Ziazia Kekeapai. Ko anaayugo bara apai kurogo Ziazia Kekeapai na kini sakirogoyo ‘aboro kini rugutiyo nani.’​—Mo gedi Ruka 24:27, 45.

Kina wiri bete apai gbua ngba wa gu wene pangbanga naye be Mbori. Ono tie, kura aboro na nyemu gu pangbanga re te, na si naba kina gberarago ti aguyo. Ka kpotoroyo zerenga mbiko gupai nga kura aboro nasoga gu pangbanga re ya. Pa ino mo Mbori du rengbe ka sa gupai nga mo du na maabangirise tipa nyenye unga.​—Mo gedi Yoane 17:3.