Agu arogotise du na irisa i naberãpa akurayo aberã, zavura ti gu regbo du yo na zangagiatise. Gu buku nga Ten Lessons to Transform Your Marriage nagumba gupai nga, “agi arogotise re, i akanga kina kuti gayo abipai sa te. Kuba gure, i nafura afura kindi dagbatiyo riipa gu tagbagapai re. I nadegatuyo fu gayo abadiarogatise rogo iriso yo na kini mangiapai kuti agu aberãpai nga ga gayo abadiarogatise.”

BANGUA RENGO NGA GA BAIBIRI: “Nyemuse . . . agbata nga gaha pai te.”—1 AKorindo 13:4, 5.

“Ka yugo irisa fu diare nayugo gupai nga mi naabi ri na nyanyaki pa ri na si aidanga mi mangi ai gupai rengbe ka ye na gberãrago furi watadu ka gbarasa pa gaani rogatise te.”—Micah.

Ka irisa adunga ya, fugo dagba arogotise ima rengba ka da ni kina bisirahe, sawiahe, na zavura zanga irisa—nga agu asino abawetekepai agumba gupai nga si nga tonatona agu apai naye na mbutise.

“Fura bara ga badiarogatise gbegberẽ, watadu kaa ba gbegberẽ abuga tipa ni, ima rengba kaa sani ni naabi ti ni nga sunge ti ni te, si ima rengba ka gbarasa pa gani kido kutiro, na si ima rengba ka gbarasa pa gaoni rogatise.”—Brian.

MO ASADI TIRO

Mo degeturo kuti gaoni fugo dagbase gbiati gaoni mangapai tipa poso sa. Fuoho, mo ki sana tiro nga:

• ‘Bara wai mi abisira pa gi badiarogatise, na bara wai mi afu tambuahe fu ri?’

• ‘Rogo gini abangiriba mi ayugo irisa rogoho fu gi badiarogatise?’

MO FURA NA GAMO BADIAROGATISE

• Gini mangapai gbiati afugo rengbe kaa saroni ni basasa boro naaberã gupai nga i nayugo irisa funi?

• Gini mangapai gbiati afugo rengbe kaa saroni ni basasa boro naaberã gupai nga i ayugo nga irisa fu ni te?

ABERÃPAI

• Mo ke agene biata kurogo waraga nga gu mo aida i naayugo irisa foro ngbaha. Na ga badiarogatise ki mangi kina gu bangisapai re a. Mo di gu waraga du beni, ni ki di gu du bero, na oni ki mangisunge riipa wai ka yugo irisa rogo agu abangiriba oni nakekehe re.

• Mo keke asino ku sande nga gu ngba tiro gbe ti ga badiarogatise. Na kini gumbapa wai fu ga badiarogatise mo abi agu asino du ti ni re na nyanyakipaha.

“Tipa ka yugo iriso fu kumbami, mi naayugoho rogo gimi mangapai yo nga mi nabiko na nyanyakipa ko na mi naida ko du na ngbarago. Anga si ti aregbo dunduko nga mi nimangi kina ba apai te; ti kura aregbo, wiri rukutu apai nayugo gupai ayugo nga mo na ndikidi irisa.”—Megan.

Niyangaraha, anga gupai du na nyanyakipaha nga, singia mo nabi tiro nga mo na irisa te, ono gu sanahe du ho nga, ya mo gamo badiarogatise na bihe nga mo nairisa ni.

BANGUA RENGO NGA GA BAIBIRI: “Oni úkadi ngbadu inapai, na weneringise, na umbasitise, na zera, na gbanga hipai.”—AKorosaio 3:12.