Paul: Ani adu na bakere ngbarago! Rogo Ngbangba 1985 naadu, na ani aandu ku rogo gu ringara nga Liberia du West Africa yo, yo si adu nga ani nika tona mangasunge ni ni amokedi. Gaani tiyara (avion) aru rogo gu ringara nga Senegal. Anne aya: “Si adu nga ani nika dia saa gbua sa ani ki da Liberia yo!” Ani agi tingidapai nga: “Si naida agu aboro nandu ku Liberia yo zoro kusayo rogo tiyara (avion). Gu kura aboro naˈasada ka dia gu zogarago du yo kusayo, si du ka ani aandunga awere ti ni ku Liberia yo ya.” Ani araki na agu amokedi naadu Senegal yo tipa aˈuru bawe, na ani kini gi gupai rogo apangbanga nga, i aaimo dungu aboro na airangbii aambunga aboro i du bangiri gene nyemu te, ka i bi ro i naimo ro kinaho.

Anne: Ani nga agu aboro akpingo nyemu ka ndu kaa biko vovo arago ya. Natona mbu re ni tooni gude, aboro afu rimo kurii re mbiko dedede, mi aningia iragunde. Zavura mi nidu na bakere gunde ho mi agu ni rii gene! Ono ani aaida kindi ka ndu ku Liberia yo si ki vura du vurũ nga si aima rengba kadu ni kerepai.

Paul: Mi na Anne asono rogo bangisa dagbarago sa ringara aNgirisi yo ku dioyo. Avungure gbiati navungu Anne aangarasa rani ti aregbo dunduko ani tona mangasunge abazakigene nibasa tifuo sukuru. I aima du na bakere ngbarago nga ani aaida ka mangasunge na gaani raka dunduko tingba mangasunge Kindo ti aregbo dunduko. Ho garãre ada ni nga 19, mi agbia gu momu nga ga nduge ku Betere yo, na Anne aye fuo re koyo tifuo gaani rogatise rogo 1982.

Anne: Ani aima kpinyemu Betere, ono ani aima kpinyemu ka raka na kini tungusipai rogo agu aba naadu na bakere zingo abatungusipai rogoho. Ani aamangasunge wa sa na agu awirina nga akumba na adee Betere yo nga aguyo naima mangasunge mbata ni amokedi, na gayo wene kpiapai gbiati agu apai namangi fuyo asa rani ani idi ka da ni amokedi a. Ani anaamanga kparakpee tipa gipai re na ayuru dunduko tipa agarã biata, sidu, ani adu na bakere ngbarago rogo 1985 ho ani agbia waraga ni tipa ani ndu ka manga namba 79 nga ga gu riko nga ga Girada! I akedi rani ku Liberia yo, West Africa yo.

Paul: Ani abiti ku rogo gu bambata tiyara (avion) nga gu i aidihe si ndu ku Liberia yo. Aboro aagunde ni kerehe na i anaaida nga gupai kindi nga aboro ni kuru kpuyo nyemu te. Aboro anidu na bakere gunde ni kerehe si ki sa gupai nga zavura ho ndu tarambiri anaasu ni na woroho kuari, i anitangbayo na ki zubo. Tipa ani nye zezeredi, ani anaageda Atambuahe kina sa na aˈuru dunduko. Wa akpakarapai avura du vurũ rogo gu ringara re, ani aima kpinyemu gaani sunge nzunzu. Anne anaatungusapai na aˈuru dunduko, na mi kini mangisunge  Betere yo na John Charuk. a Mi aima wirika dungu apai beko mbiko ko aima raka Liberia yo tipa gbanga regbo, na ko aima ino agu akpakarapai gbiati agu apai naadu tipa awirina yo wenengai.

Anne: Tipagine du ani aye ka kpinyemu gaani sunge ti ni Liberia yo ni wiri ipo? Mbiko awirinarani. I aima yugo bakere nyemuse furani na i adu ni ruruyo. Ani aye ka mbeda gbe na yo na i ada ni gaani vovo aborokporo. I aima fu wene arugute furani na ki ngarasi rani. Tungusapai aima ngba yo ni kerehe. Aboro anidu na zinga ho boro anaasungongo ni ni gbangaha wa gu i anaaidaha ya! Aboro anaafura tipa Ziazia Kekeapai bangiri agene. Si anidu taata furani ani tona fugo na yo. Ani aima du na badungu abawiriki Baibiri berani na si aima du ni kpakarakpakaraha gbe ka gbia regbo rengbe arengba ka wirikapai na yo dunduko. Si angia bawene dagbarago!

Paul: Rogo 1989 tingbafuo ani raki rogo wiri bete zereda tipa agarã biama, tunguotunguo ariapai amangi​—vura atona berewe. Agu aboro naaida ka dia zogarago be airangbii azi gu rago naadu pati Betere rogo Bamburu 2, 1990. Tipa adiwi biata, ani aadunga na rengba ka fura na ai boro rogo kura ringara te, zavura agumerani watadu rii-basunge nga ga zegino. Zuu adu rogo aba dunduko na waawaa, riahe aadunga ni bakerehe te, na i aakodaba na dungu adee ngbaome. Gi kpakarapai re amangi tipa agarã 14 na si ki ima gbarasapa gu ringara re.

Anne: Gu kura aboro rogo kura angbatunga aasovura na kini imi aguyo naadu rogo kura angbatunga. Abanzengere ani du ngba agene dunduko. I adu na dungu aũvura beyo, na kini vo tiyo ngba iiriwo gene, na kini ndu ku rogo akporo dunduko na kini di ai guhe i anaaidaha. Tipa bete aguyo, imo aboro adu fuyo wakina imo akondo. Kangba aboro adu rogo agu aba aboro ni naakura rogoho ka mbu ringara, na bete agu kidu pati be-basunge. I aima imo ruru aDezire Yekova, kodihe na amokedi ue.

Ti ai gu regbo abasovura anaagbia agu aboro naanidu rogo agu angbatunga i anaasogaha, i anaaimo yo. Awirinarani amoi gayo raka ngba kerepai tipa ka igo awirina na ki batasi yo. Amokedi gbiati aboro Betere amangi kina gu bangisapai re. Betere yo, gu kura aDezire Yekova nga aguyo nazubo aaraka rogo agu abambu naadu kusende yo agu akurayo kini raki na ani rogo gaani abambu ariyo. Ani adu rogo gaani bambu na riikporo aboro adu rogoho saba.

Paul: Aˈuru dunduko abasovura anaaye ku Betere yo ka bihe singia ani naigo aboro yo. Ti ai gu regbo gupai re anaamanga, agurani ue anaandu ku ngbadimo Betere yo tipa ka fura na agu abasovura re, na agu akurayo ue kini ngere ti bangiri bambu kaa bi agu apai dunduko naamanga. Ka si du nga agu awirina ue nanaandu ku ngbadimo yo anakutukpa abeyo dunduko kumbatayo, gu re anaayugo gupai nga apai dunduko wenengai. Ono ka i kutukpa abeyo ku giiyo yo, si anaayugo gupai nga agu abasovura re namangapai ni kere gbegberẽhe, sidu, agu aboro nangera ti bangiri bambu anaaigo awirinarani niipo.

Anne: Rogo kura uru sa, awirina aadunga na rengba ka rugusa gu badona abasovura naadu na kere zinga ti rimoyo ku Betere yo te. Mi na gu kura wirina agbu ba mbida ime yo, yo wiri bangabangahe adu ni nga  ga õka ahe ani akisi tirani ku rogoho. Gu wirina re arimi ku rogo gi wiri tooni ba re tipa ka gbu. Agu abasovura re aye fuo re ku rogo gu bambu naadu ariyo, na abundu beyo. I asi gaani ngbadimo na bakere zinga. Paul aˈasadi ka sayo ka i rimingo koyo ani adu ni ya, ko aya, “Diare nambida ime.” Ho mi akisi ngbadimo gu wiri ba ni gu wirina nga dee re agbu rogoho, si atangba ha. Si kini idi mi moi ahe dunduko ku rogo gu wiri tooni ba igo ahe re, na si aima dia bete regbo. Mi aima du na gu kido nga agu abasovura re aabaka kina bangiriyo tipa gupai mi aamangaha, mi aima du na bakere gunde si ki sa gupai nga kpotore nikio dunduko. Si aaida mi du zezeredi mbata fu mi zaki ngbadimo. Ginipai mi nika mangaha? Mi amangi wiri guru kparakpee kusende, ki zungodi Yekova tipa undo. Mi azaki ngbadimo na mi ki fu sene fuyo zezeredi. Gu kurani sa atura re kusayo na ki ndu ku bambu mbida ime yo na ki zaki gu wiri ba gbuko mi aambakada bara ahe rogoho na ki tona ka gbataka ahe rogo gu ba re. Kina ngbako nazere nga ko aabingo ai he te. Sidu, ko gbiati gako badona ata rogo gu kura abambu gbiati agu aba naadu riibambu yo. Na berewe, i aabingo he te.

Paul: Dedede, riahe anaadunga berani ka rihe wiso te, ono gaani irisombori wiso nga ga Betere adu wakina riahe nga ga wiso. Ani dunduko aima ino gupai nga geda Baibiri na kini wisigihe nika fu ome furani ani hipai rogo aˈuru ni basasa.

Ani aima ino gupai nga ka ani ndu ka gbata riahe watadu ime, ani adunga na rengba ka banda agu aboro naagbu te, na i aima rengba ka imo yo. Dedede, Yekova anaafu agu ahe ani aaidaha ti kina wene regbo na ngba iiriwo agene. Yekova angerefuo rani na ki undo rani ani du zezeredi.

Wa apai aagberã kina kumbatayo rogo gu ringara, gu imarago nga ga rengo aakii kina kumbatayo. Badungu awirinarani azubo bara dunguhe tipa ka batasa unga yo, ono i aima banda gayo idapase nyanyaki na ki nye zezeredi gu kura akpakarapai ki vura du vurũ. Agu akurayo ape gupai nga hipai agi akpakarapai re ki vura du vurũ “aambakada yo tipa bakere gberãngbi kumbatayo.” Abaakumba gbiati paranga awirina nga akumba amangi ai gupai ni wingbaduse i arengbe ka mangaha tipa ka undo awirinayo. Agu awirina naazubo ku rogo kura aba aundo akurayo, na i atona tungusapai rogo agu arago re. I amangisunge na ai guhe i abihe nvuo yo tipa ka mbakada aBambu Kindo ngba taata gene na kini mangi adunguratise. Ti gu kere kpakarakpakara aregbo re, nduge tipa adunguratise gbiati tungusapai fu kura aboro afu maabangirise fu awirina na ki ngarasi yo ni bakerehe gbe. Ho ani aakparaka riahe ni, aroko, gbiati kura ahe, dungu awirina asanahe tipa amangu tungusapai kuba sanahe tipa aroko. Gipai re aima zio ngbadurani yo ni bakerehe. Gu badungu aboro naabi kere gbegberẽ apai na si ki mangi yo ti regbo vura aaida ka gia wene pangbanga. Kina ngbayo nazere ka bi wai aDezire Yekova adu na ngbarago na kidu na ruru bipai. Awirina adu wakina imarago rogo bitimo. (Mt. 5:14-16) Mbiko gupai nga awirinarani aatungusapai kakaka, zavura bete agu abasovura naamanga kere gbegberẽ apai aima da ni awirinarani.

Paul: Si anaaida aida ani kuru vuru Liberia ti kura aregbo. Ani akuru bara biata tipa bete regbo, na ani ki kuru bara ue tipa garã sa. Gu kura mokedi sa asakipai  wenengai tipa wai ani adu ho si adu ni nga ani mbu gu ringara re, ko aya: “Rogo gu sukuru nga ga Girada, i ayugupai furani tipa ani kpinyemu gaani sunge, na ani ima mangaha wo. Sidu, pa mbu ani awirinarani rogo gi kere kpakarapai re aima fu bakere gberãrago furani!” Ono ani adu na ngbarago nga ani aima rengba ka undo awirinarani kindi ni bakerehe gbiati sunge tungusapai Liberia yo rogo gu ringara naadu mbembedi ani aaraka rogoho.

Anne: Rogo Merekoko 1996, ani biama aguari na tarambiri nga ga Betere na nyanyakipa awaraga adu berani nibipa gu sunge namanga Liberia yo. Ani aaida ka ndu ku rogo gu ba naadu zezeredi pavuru gu ringara re kubani, baturoho adu nga akirometere 16 (amairo 10). Tifuo ani guari nibasa, i azubo gu rago ani adu rogoho re. Zingizingi abasovura azumu gayo abundu ku wege yo, i ki rugusi rani, ki gbe agurani biata kusayo rogo tarambiri, na i ki zubo na tarambiri na Paul rogoho. Si aima zigbä rani ni kerehe. Si aimanga te, ani ki bi Paul ko niye fuo rani. Kure kini uka ti kpakpuko. Ni bambataha, ani aberẽ gupai nga i ima noko, ono ani aye ka bihe nga i ano nga ko te mbiko ka ko naandunga ni nduko te! Gu kura basovura sa afõ riko ho ko aatura ko ni kusayo rogo tarambiri. Si adu ni wenepai tie nga wiri tooni aro du naadu.

Tarambiri adu kinaho mbembedi nga ga abanzengere aboro aima hihe nga aguyo naadu na bakere gunde na i aaida ka guari rogo gu ba re. Ani adiberã ka bita ha, ono wa si adu nga si aima hi, ani aru kina ti kpotoho ku zegi. He aadunga ho ka ani azadihe te. Bakama tarambiri azubo ni wiri ipo ani ki mbedi ka ti. Ani atangba rani nga ko ru, ono ko aagunde agunde nikerehe ka ru. Ani aatinga te, ono ho tarambiri aru ni, ani aima du na bakere mbugo be zada ha, na kpotorani aakio ni kerehe be gunde.

Paul: Ani angana tirani dagba rani na gu bibiriko aroko naadu tirani naima sipo dunduko, na kina ngbarani ki zere nga ani adu kindi ni unga rani. Kpata tiyara (avion) nga ga vura nga gu bundu aima nofoda ha ni kerehe na si kini ngere wa si nika ti ati adu pati rani. Si adu nga si nika ndu na ani ku Sierra Leone yo rogo gu uru nangbe tifuo ho. Sidu, ani ara kina mbembedi ho. Ho ani ada ni Sierra Leone yo, ani adu na bakere ngbarago kadu ni ungarani ono ani aabaka bangirani ni kerehe tipa agu awirinarani naadu Liberia yo.

Anne: Ani ada zezeredi rogo gu Betere du Freetown yo, yo awirinarani angere ni fuo rani wenengai. Ono pai amangi nga gu mi aaberãnga gupai nga si nika manga ya. Kpia gu kere gbegberẽ apai naamanga Liberia yo atona ka ye ku berãre yo. Mi anidu na gunde naaˈuru dunduko nga gbegberẽpai ima rengba ka manga, na mi aarengbanga ka berã wenengai te. Agu apai naamanga pati re dunduko aadunga wa ndikidi pai fere te. Dedede, mi anaazinga yuru kini kio akio na kidu na gunde nga kerepai ima rengba ka manga. Si aima kpakara fere mi naaonga. Paul anizadi bere na ki mangi kparakpee na mi. Ani anaabi abia Kindo daho mi animbu kio ni. Mi anaabihe nga mi ima rengba ka ti na kere kaza mbiko agu apai dunduko namangi re na ka mi adunga na rengba berewe ka mangasunge ni mokedi ya.

Ka bangire gonga ti gupai namangi fuo gure te. Rogo kina gu bangisa poso re, ani agbia amagazini ue. Gu kuraha sa angia gu Awake! nangia ga Banzinga 8, 1996. Si adu na gu kekeapai rogoho nga “Gupai Rengbe mo ka Mangaha ka Bakere Bakabangirise Aida ka fu Riro.” Mi aye ka rugatire awere na gupai naamanga re. Gu kura uehe angia gu Ngbaõbambu Sinziri nangia ga Merekoko 15, 1996, naadu na gu kekeapai rogoho nga “Wari gu i Agbia Gayo Ome Ni?” Gu Ngbaõbambu Sinziri re adu na sura rogoho nga ga fufurafu na kitiri puporu. Gu kekeapai re aringbisi rani kuti fufurafu nga gu ru rengbe kaa gu kindi zavura ho apoporu nakiti ni. Si asaki gupai nga, ka ani vura du ni rurungbura rani vurũ mbiko gu kere apai mangi rogo gaani raka yo, Yekova ima rengba ka undo rani ani naandu kindi kumbatayo kaa undo kura aboro. Yekova afu gu ome fere mi aaidaha ti gu regbo re vurube gi kekeapai re. (Mt. 24:45) Mi naangera tipa kekeapai wa gere, na kini dunguraha kini bandaha. Si ninaaundo re ni bakerehe gbe. Tifuo bete aregbo, mi aambunga berewe ni bakerehe be gimi bakere bakabangirise wa gu naadu mbata te.

Paul: Tifuo ani guari Liberia yo, ani anidu na bakere ngbarago ho ani anaandu ni koyo berewe. Ti digido gu garã nangia 2004, ani aima du tingba gaani sunge tipa agarã naima mbeda kuti 20. Vura aima nyasa. I aamanga mbakadapai tipa ka meka arago be-basunge yo. Ono i asana rani ni tunguotunguoho ani idi na kura vovo sunge.

Gipai re aima kpakara furani ni kerehe. Ani aima du mbembedi gbe na awirinarani Liberia yo. I adu wakina aborokporo furani, na ani aaidanga ka mbu yo te.  Ono ani aima bi wai mbata kusayo Yekova aundo rani ho ani ambu gaani aborokporo ni tipa ka ndu ku Girada yo. Sidu, ani aidi na gu vovo sunge re. I aakeda rani ku Ghana yo, gu ringara naadu kina mbembedi.

Anne: Ani akpari ni kerehe ho ani ambu Liberia ni. Kina ngbarani nazere ho Frank, nga sosono wirina ni bakumba du na tatamana ape gupai ni furani nga: “Si naida bangironi go tirani!” Na ko asakirogo yo nga: “Ani ima inoho nga bangironi ago nga tirani te, ono si naida oni kpinyemu agu awirinaroni du Ghana yo na kpotoroni yo dunduko. Gipai re ye be Yekova, sidu, oni ngerefuo agu awirina du yo wenengai.” Gupai gu wirina re apehe aima undo rani ani du regerege tipa ka manga vovo abakure rogo gu ringara nga gu kina bete aboro gbua aini rani rogoho na rogo gu ba apai adu dunduko ni vovoho rogoho.

Paul: Ono si aimanga te ani ki ye ka kpinyemu awirinarani Ghana yo na i ki da ni gaani vovo aborokporo. Badungu aDezire Yekova naadu yo! Ani aima wirika dungu apai be gu ruru vovo abakurearani nadu na nyanyaki idapase re. Na tifuo ani mangisunge Ghana yo tipa agarã 13, ani agbia gu kura tunguotunguopai berewe. I asana rani ani ndu ka mangasunge rogo gu be-basunge nga ga East Africa du Kenya yo. Wa vura duhe vurũ nga ani nazingo azingo kindi tipa agu awirinarani du Ghana yo na Liberia yo ni kerehe, ono ani ima manga vovo abakure vuru Kenya. Na ani namangasunge kindi rogo gi bakere dagbarago du na bakere zingo rogoho re.

Anne: Rogo gimi raka yo, mi ima gbia tire na kere kpakarakpakara apai, na ti kura aregbo, mi nidu na bakere gunde. Ho ani araka ni rogo kere arago na kini raki ti kere aregbo, si ima rengba ka sarani ani du na kaza na si ki sarani ani du na gunde gbiati bakabangirise. Ani arengbanga ka berã gupai nga Yekova nika banda rani be agi apai re te. Zavura awere, ho mi agia woro bundu ni, si nasa gupai nga mi ti na kaza na abe re kini kio. Ono mi ima wirika wai ka kido dunduko kuti gu undo Yekova afuhe tipa ka nyakasa rani, kodihe na gu undo nga ga awirinarani. Na mi ima bi gupai nga ho ani andu ni kindi kumbatayo kaa wisigopai, kini mangi kparakpee, kini ndu tipa adunguratise na kini tungusipai, Yekova ima rengba ka undo rani ani nye tingba gaani sunge.

Paul: Ti kura aregbo, aboro ninaasana rani nga, “Ya mo oni kpinyemu gaoni sunge?” Aringara ima rengba kadu ni bawenehe, ono si ima rengba ka du a na zanga zereda rogoho na ni kerehe. Ono ginipai tie ani nakpinyemuhe kisusi ringara? Awirinarani nga akumba na adee, nga gaani aborokporo. Wa vura duhe vurũ nga ani naye rogo arii-akporo na arago ni bakiakia, ani naberã na kini bi apai dunduko kina wai Yekova abihe. Ani aberẽ gupai nga i akedi rani ani nyakasi yo, ono ka pe guhe nga rengo, i ima nyakasa rani.

Awirinarani rogo zegino dunduko nga iiriwo mangaapai be Yekova! Ani na aborokporo rogo aba dunduko. Wa du ani kindi nga papara dungurati, gure nga aborokporo kina berani gbiati kporo. Ani ima du na gu kido nga ka ani aandu kindi kaa kido kuti Yekova, ko nika fu ome furani ani hipai ka kina ginipai fura manga vurũ.​—Frp. 4:13.