Ka mo aida ka ino boro wenengai, si naida mo wirikipai tipa agu apai ni namangihe na agu akpakarapai ni nadibehe. Wakina gure a, ka mo aida ka ino Mbori wenengai, si naida mo wirikipai tipa agu apai ko namangihe. Wa mo nika mangaha wo, kina ngbaro nika zera ka bi gupai nga ko ima manga badungu apai nga gu naundo rani ni bakerehe awere na nga gu nasaha taata ani du na wene raka kumbatayo.

Yekova Mbori nga Bakere Bakusiahe, na gu gako “apai ka i abi nga ya, i nabi he kina rogo agu ahe yo ko amangi.” (ARomo 1:20) ‘Yekova nga gu ko namangi kpotosende ni gako tandu, nanyakasi zegino be gako tatamana, nazaraga angbangbaturũ be gako rugatinapai.’ (Yeremaya 10:12) Pa wai du kusikusiahe ni iiriwoho nayugo pa ga Mbori nyemuse tipa rani.

Mo makianga pa wai Yekova ambakadi gaani raka ni bawenehe ni kusako aboro “ni kpiako.” (Bambata Pai 1:27) Gere nayugo gupai nga Mbori asaha taata furani ani yugu bete agu asino du tiko. Ko akusi rani na gu bipai nga ga toro, nga gu nasarani ani du na rengba ka rugatirani na gako abipai gbiati gako andiko. Ho ani amanga asadatise ni nyanyaki ka raka ringbisihe kuti agi andiko re, ani nagbia bakere ngbarago na gaani raka nadu na rogoyo ti ni. Na kurigure, ko nafu gu momu furani nga ga sonosa wene pagume na ko.

Ho ani abi agu ahe ni Mbori akusihe ku auru kpotosende, si nasarani ani bi wai Mbori aberã tipa rani. A wa gu mokedi nangia Pauro agumbaha, Mbori ‘ahe nga dezireko te, wa ko animangi wene pai, ki fu mai fu rani ngbangbaturũ yo, na rago ida riahe gbe, ki hihisi kpotorani yo ni riahe na ngbarago.’ (Amokedi 14:17) Mbori aafunga kina agu ahe furani si aidaha tipa ani raki te. Ko afu ahe furani ni badunguhe na ngba arikoho tipa gupai nga ani gbia ngbarago ti raka. Ono badungu apai kinaho kindi Mbori aberãpa mangaha furani.

Yekova ambakadi kpotosende tipa gupai nga aboro raki rogoho nyeanye kindi. Baibiri naya: “Kpotosende  ko afu fu awiri aboro,” na ko “amanga nga ha ni kungba he te, ko ambakadi he aboro niraki rogo ho!” (Atambuahe 115:16; Yesaya 45:18) Ada nika raka rogoho na tipa bagizo regbo wai? “Ruru aboro adía kumbo ringara, ki nye anye kindi.”—Atambuahe 37:29.

Na ngbanya kuti gipai re, Yekova ambakadi bambata kumba na dee nangia Adamu na Eva, na ki moi yo rogo gu paradizo naadu auru kpotosende i “nisópo ho ki nibanda ha.” (Bambata Pai 2:8, 15) Mbori afu wene asunge fuyo: “Oni zúga azuga, ki nge ange, ki hisi kpotosende berewe ki zogo ho.” (Bambata Pai 1:28) Rogo gi gene re, Adamu na Eva adu na gu maabangirise nga ga raka nyeanye kindi auru kpotosende. Si nafu kina gberãrago tie nga, i asia ka basasangba Mbori na mbiko gi ndupai re, i azanga gu momu nga ga du dagba gu “ruru aboro” nika ‘día kumbo ringara.’ Ono tie, a wa ani nika bihe, gayo mangaapai aˈarianga ga Yekova ringbisapai tipa kpotosende te. Ni bambatapai, ani makianga kurapai kia nga gu Mbori namangihe.

I nayamba Baibiri a nga Fugo Mbori. Tipagine Yekova afu Baibiri ti ni furani? Bambata ndupai nga, si sarani ani wirikipai tipa ko. (Asanza 2:1-5) Kina rengo ngaha nga, Baibiri akaraganga pai kuti agu asanahe dunduko ani narengbe ka sanaha tipa Mbori te—buku ho rengbe ka karagapai te. (Batungusipai 3:11) Wa vura duhe wo, agu apai dunduko du rogo Baibiri yo naundo rani ani inipai tipa Mbori. Ani nabi wai du ko rogo gu gene yo ko amanga pai ngbaha na aboro. Ani nawirikapai tipa gu ngbatunga aboro ko aida yo na aguyo ko aidanga yo ya. (Atambuahe 15:1-5) Ani nawirikapai tipa gako bipai tipa irisombori, ruru mangaapai, na aũborose. Na Baibiri nayugo abangua sino Mbori furani vurube agu afugo gbiati mangaapai nga ga Wiriko nga Yesu Kristo.—Yoane 14:9.

Kura ndupai Yekova afu Baibiri ti ni furani nga, si sarani ani ini wai rengbe ani ka raka na ngbarago, na ani kidu na maabangirise rogo raka yo. Vurube Ziazia Kekeapai, Yekova nayugo wai furani rengbe ani kadu na gu ramukporo du na ngbarago, wai ka rengba be kina agu ahe du berani, na wai ka sovura kuti abakabangirise. A wa gi magazini re nika sakarogoyo kusa, Baibiri na akaragapai rogoho kuti agu asanahe nyakipaha gbe, asanahe wa: Tipagine aboro arungo ti ni? Ginipai nika manga kumbatayo? Si nasakapai a tipa gupai Mbori namangihe tipa ka digiso gako bambata ringbisapai.

Nirengo, Baibiri nga bawene buku. Badungu apai duho nayugo gupai nga Baibiri nga kparakpara buku, du baenge kehe nga Mbori. Akumba 40 nakehe vuru agarã yo naima susa 1,600, wa vura duhe wo, gaha riipai aˈarianga tihe te mbiko Mbori du nga Baenge kehe. (2 Timoteo 3:16) I ima banda gaha kekeapai ni ruruhe tipa dungu agarã, a wa akutu kekeapai nibee nayuguhe. Kurigure, Baibiri naraka kindi aboro ki vura kaa manga ome ka rugusa kusaha, kparakaha, na gedaha. Areme, si nga gu buku i nakparakaha na ki saha ku rogo dungu afugo kisusi kura abuku dunduko. Gu gopai nga Baibiri naraka kindi nayugo gupai nga, “gu pai nga ga gaani Mbori si anyé anye kindi.”—Yesaya 40:8.

Gu kurapai berewe Mbori namangihe nga gu kparakpara mbakadapai ko amangihe tipa ka sa gako ringbisapai tipa rani si digisitihe. A wa i nifura tipaha mbata, Mbori aaida gupai nga aboro raki nyeanye kindi auru kpotosende. Ono tie, ho Adamu abasasangba Mbori ni na ki ingipai, ko gbiati awiriko azanga gu momu nga ga raka nyeanye kindi. “Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Mbiko wa Adamu aingipai ni basa ko sangba Mbori, si aangera wa ga Mbori ringbisapai tipa kpotosende adigisongo tihe te. Wai gu Yekova amangipai kuti gipai re?

Ga Yekova mangaapai aandu sa na agu asino du tiko. Ko asaringbanga Adamu na Eva ni ruruhe kina kuti gayo mangaapai, ono ko amangi mbakadapai ni nyemuse tipa atitayo kumbatayo. Rogo tatamana yo, Yekova adiberã tipa wai ka mangapai kuti gupai re, na ko ki takipande gupai ko nika mangaha tipaha nibasa. (Bambata Pai 3:15) Si adu nga Mbori nika dia  ingapai na kpio kusayo vurube Wiriko nga Yesu Kristo. Gipai re aakoda gine?

Tipa Yekova kusi aboro kusayo tii sangbana gu samungu nangia ga Adamu, ko akedi Yesu ku auru kpotosende ane ko yugupai fu aboro tipa gu gene nga ga unga na “ka tumo dungu yo ni ungako.” a (Matayo 20:28; John 14:6) Yesu arengbe ka fu tiko ni motumo mbiko ko angia rengberengbe kumba wakina Adamu. Ono Yesu aadunga wa Adamu te, ko anye ni ruruko da ti kpio. Wa duhe nga Yesu aarẽnga tipa ka kpi te, Yekova azingisiko berewe ku rogo gu raka du ngbangbaturũ yo. Yesu arengbe tie ka manga gupai Adamu azanga mangaha—kafu gu maabangirise nga ga nyenye unga fu aboro giasangba. “Bambiko wa i amoi dungu aboro ni aboro ingapai mbiko ga gu boro basapai sa, kina wo i ka maa dungu aboro ni ruru aboro bangiri Mbori mbiko ga gu boro giasangba sa.” (ARomo 5:19) Vurube ga Yesu motumo tumorii, Mbori nika digiso gu gako ringbisapai nga ngbatunga aboro dunduko raki nyeanye kindi auru kpotosende.

Ani nawirika dungu apai tipa Yekova ti gu gene ko amangipai ngbaha kuti gu kpakarapai naye mbiko ga Adamu basasangba. Ani nawirika gupai nga he ho rengbe ka ká na Yekova ti digiso gupai ko apehe te; fugoko nika “kpatare” watadu si nika digiso tihe na kidu na diabese. (Yesaya 55:11) Ani nawirikapai a tipa wai Mbori akpinyemu rani. “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko. Gi nga nyemuse re, nga nyemu Mbori adu nga ti rani te, kina rani du nyemurani ti ko, ko akedi Wiriko ko du ni motumo gaani ingaapai.”—1 Yoane 4:9, 10.

Mbori ‘ahe Wiriko ki fu ko afu tipa rani dũ,’ sidu, ani na gu kido nga Mbori nika fu kura ahe afu “fu rani dunduko” nga gu ko nakidopaha. (ARomo 8:32) Gini apai Mbori nakido paha nga gu ko nika mangaha furani? Mo ndu kumbatayo na gedapai.