Ho mo naaida ka ino boro ni, gu bambata pai mo naamangaha nga ka sana ni nga, “Rimoro nga da?” Ka si du nga mo nika sana Mbori na gu sanahe re, ginipai rengbe ko ka gumbaha?

‘Mi nga Yekova, gere nga rimore.’—Yesaya 42:8.

Gu rimo re na nyanyakipaha fu Mbori nitiko. Boro ho nafu gu rimo re fuko te; ko nasiaha nitiko. Yekova aya: “Gi nga rimore re kindi, wo i ka tingida pare fu arika ngbatunga aboro dunduko.” (Gate 3:15) Rogo Baibiri yo, rimo Mbori kuru ni badunguhe kisusi agu arimo du wa, Mbori Tanduapai Dũ, Barani, Gbia, watadu Mbori, na si nge kisusi arimo aboro, wa Abarayama, Moize, Davide, watadu Yesu. Berewe a, gupai Yekova akpinyemuhe nga aboro ini rimoko. Baibiri naya: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.”—Atambuahe 83:18.

Gu rimo re na nyanyakipaha fu Yesu. Rogo gu kparakpee i ayambaha nga Barani watadu ga Gbia Kpee, Yesu ayugupai fu apefuoko i nizungodi Mbori na agi afugo du re: ‘Ani írisi rimoro airisa.’ (Matayo 6:9) Yesu nitiko akpari fu Mbori ki ya: ‘Buba, mo táasi rimoro.’ (Yoane 12:28) Yesu amoi pa taasa rimo Mbori ni bambatapai rogo gako raka, na mbiko gi ndupai re ko arengbe ti ni ka ya rogo kparakpee yo: “Mi yugu rimoro fu yo, mi ayúgo ho ayugo.”—Yoane 17:26.

Gu rimo re na nyanyakipaha fu agu aboro ini Mbori. Bakuru kusayo, ga Mbori aboro arugutiyo na gupai nga padu yo ni bandabanda yo na pa gayo bata aaru riipa kparakpara rimo Mbori. “Rimo Yekova nga nyanyaki tumbatumba gbata; ruru boro naora koyo ki du zezeredi.” (Asanza 18:10) “Agu yo dunduko ka kpara ti rimo Yekova i abáta abata.”  (Yoere 2:32) Baibiri nayugo gupai nga, rimo Mbori nika kpara agu aboro nairiso ko. “Bambiko aboro dunduko ata ni ba sa sa na rimo gayo mbori, ono ani atá na rimo Yekova gaani Mbori nye anye kindi.”—Mika 4:5; Amokedi 15:14.

Gu rimo re nayugo agu apai du tipa Mbori. Badungu wene abawirikipai dakuti gupai nga gu rimo nga Yekova rogoyo nga, “Ko Nasa Tiko Kadu ni gu Boro Ko Aida Kadu Nga Ní.” Yekova Mbori afu dudunguro giarogopaiyo fu Moize tipa rogo gu rimoyo nga Yekova ho ko agumba agu apai ni tipa tiko nga: “Mi Nga gu Nga Mi” watadu Mi Nika Du Ni gu Boro Mi Nika Ida Kadu Nga Ní. (Gate 3:14) Rimo Mbori na rogoyo ti ni susi gu gbua nga Ko nga Bakusiahe nasa ahe dunduko si kuru. Rogo rimoko yo nayugo gupai nga ko na rengba ka sa tiko ni gu ngbatunga boro ko aida kadu nga ni na ko nasa gu boro asa ko akusi ní, watadu guhe ko akusihe, ni gu ngbatunga boro ko aida ní du nga ní watadu gu ngbatunga he ko aida si du nga ha tipa ka digiso gako kidohe. Wa duhe nga gu rimo nga ga sunge nafura tipa ga Mbori bangiriba, pagbia, watadu gako ome, kina rimoko sa nga Yekova, narukuba da nga ko na gu boro rengbe ko ka da nga ni.

Gu rimo re nayugo gupai nga Mbori nakpinyemu rani. Rogo rimo Mbori yo nayugopa ga Mbori nyemuse koyo du gako kusikusiahe ni kodihe na ani. Kurigure, pa yugo Mbori rimoko furani nayugo gupai nga ko naida ani ini ko. Gu kurapai berewe nga, ko nitiko nadiberã ka yugo rimoko furani mbata fu ani sanako asana. Si tie ziazia nga, Mbori naida ani nibi ko wa ndikidi Boro nga gu ni rengbe ani ka mbeda ambeda na ni, angianga wa gu mbori aidanga i inipai tipa ni na du tuturũ ya.—Atambuahe 73:28.

Mangasunge na rimo Mbori nayugopa gaani nyemuse fuko. Ni kpiapai, mo rengbe ka ya fu gu boro mo aida ni du ni bakureamo ni ni yambu ro ti rimoro. Wai gu rengbe mo ka du ka si du nga gu boro re kpatagara kuti gupai nga ni aidanga ka yamba rimoro te? Mo ima rengba ka bakabangiro singia gu boro re naida nzunzu kadu ni bakureamo. Kina gu bangisapai re du tipa Mbori. Yekova ima yamba rimoko fu aboro, na ko nangarasa rani ani mangisunge na ni. Ho ani amangasunge ni na ni, ani nayugo gupai fu Yekova nga ani naida kadu mbembedi na ko. Tipagine, mbiko ko ima ino ‘agu aboro naberã pa rimoko’!—Maraki 3:16.

Wirikapai tipa rimo Mbori nga nyanyakipa bambata diandue ka ino ko. Ono si aidanga ani digi kina kuho te. Si naida ani ini gini Boro du du kugii gu rimo re. Si naida ani wirikipai tipa asinoko.