Ho Sogote Nika Go ni Kusayo!
Ka si vura du nga ani ima dia sogote kpotorani yo, ani arengbanga ka du na ome kurii gu mangapai nga ga kura aboro te. Aboro wenesa nandu kindi kumbatayo ka gbia tiyo na sogote. Sidu, ginihe tie nzunzu nga ndikidi ziga tipa sogote?
Kina Yekova sa rengbe ka nyasa riipa gu sogote ani abihe areme rogo gi zegino re. Gere nzunzu nga gupai Baibiri akidohe nga ko nika mangaha.—Asanza 20:22.
MBORI NIKA NYASA RIIPA GUPAI NAYE NA SOGOTE
-
1. SATANA BAKITINGBANGA. Gu Maraika nga Satana nasamungu, du ku gi agu asogote ani abihe areme. Mbori nika gbarasa Satana na agu aboro nasoga kura aboro.—Atambuahe 37:38; ARomo 16:20.
-
2. GA SATANA ZEGINO IMA HI BE SOGOTE. Mbori nika nyasa riipa agu ahe dunduko nasa sogote si naamanga rogo zegino, kodihe na agu aboro birĩ-zogarago nga aboro biriki na agu agbia pambori nasa gupai nga sogote naandu kina kumbatayo. Mbori nika nyasa riipa gu sunge baga ahe a nga gu gasi ngba sunge biriki na kini nze rii aboro.—2 Petero 3:13.
-
3. GU ZANGARENGBA DU TI ABORO. Baibiri nape gupai a nga aboro aima dia zangarengba—nga gu nasa gupai nga i niberẽ na kidu na nyemu manga gupai duni irairaha. (ARomo 5:12) Pai sa dagba agu api re nga kadu na gu sino nga ga soga kura aboro. Mbori nika undo aboro i dibe gu sino nga ga zangarengba re na ko nika dia sogote bara sa nyenye kindi.—Yesaya 54:13.
BAIBIRI NAKIDOHE TIPA GU ZEGINO SOGOTE NIKAA DUNGA ROGOHO YA
-
1. BORO HO NIKA GBIA TINI NA IRAIRA SARANGBANGA TE . Ga Mbori Kindo nika ru ngbangbaturũ yo kaa zogarago ku auru kpotosende no, na si nika ye na rurupai nyenye kindi. (Daniere 2:44) Kparakaro gbiati gbegberẽ bipai tipa kura aboro adunga yo te. Mbori nika nyasa riipa agu apai dunduko aboro agbia tiyo na ni awere.—Ruka 18:7.
-
2. ABORO DUNDUKO NIKA DU ROGO ZEREDA. Avura adunga na zuu te. (Atambuahe 46:9) Zegino nika du ni bawene ba tipa ka raka rogoho na kina agu aboro nakpinyemu zereda nika du yo.—Atambuahe 72:7.
-
3. ABORO DUNDUKO NIKA RAKA ROGO BAWENE BA NYEANYE KINDI. Agu aboro dunduko nika raka auru kpotosende nika du na ndikidi nyemuse tipa akurayo. (Matayo 22:39) Boro ho nika du na bakere gberãrago te, watadu kadu na gberãrago mbiko agu apai naamangi ni kusayo te. (Yesaya 65:17) Ti gu regbo re boro ho nika soga kurani te, aboro dunduko nika ‘du na ngbarago tipa gu wenepia du kpaima.’—Atambuahe 37:11.
Ya mo mo naida ka raka rogo ngbatunga zegino wa gure? Zavura kina awere, badungu aboro na wirika wai ka mbu sogote ni manga yo pai kuti agu abangua arengo nga ga Baibiri. (Atambuahe 37:8) Gere nga gupai dungu amirioni aDezire Yekova amangaha rogo zegino dunduko. Wa vura duhe nga i naye rogo dungu angbatunga na apai kidu tipa yo niba kiakia, i ni kodikodi yo na kini kpinyemu tiyo.—Yesaya 2:2-4.
ADezire Yekova nika du na ngbarago tipa ka yugo gupai foro wiriki yo ho tipa wai ka hi iraira sarangbanga gbiati kparakaro. Gupai mo nika wirikaha nika undoro tipa mo tona ka mbu gu sino nga ga sogote yeye na ki sonosi gu sino nga ga nyemuse. Mo ima rengba ka wirika wai ka yugo nyemuse fu agu aboro adunga na tambuahe ya na aguyo du na sogote. Ni sangbanaha gipai re, mo nika du na ngbarago awere na gamo pagume na kura aboro nika du ni bawenehe. Kuri gure, mo nika wirika gupai rengbe mo ka mangaha tipa ka raka tii gu kindo nga ga Mbori yo sogote nikaa dunga ni berewe ya.—Atambuahe 37:29.
Gere Ima Rengba a ka Ngba Tiro
NGBAÕBAMBU SINZIRI
Ginipai ga Mbori Kindo Nika Mangaha?
Yesu aima ino gupai nga kina ga Mbori Kindo sa nika nyasa riipa agu akpakarapai du auru kpotosende ane. Ginipai Kindo namangihe tipa ka nyakasa gaani kido
