Mbori afu gu kparakpara gamahe fu aboro nga ga fura na ko na kini uka agu apai du kpotoyo yo fuko vurube kparakpee. Gu nebi nangia Davide amangi kparakpee nga: “Ako mo nga gu ko ninagia kpetambuahe! Aboro dunduko nikaye koyo du mo ni.” (Atambuahe 65:2) Ono wai gu rengbe ani ka manga kparakpee fu Mbori ko ki gihe na ki fu maku furani?

Gamo kparakpee nambugene foro mo úka kpotoro yo ku bara bangiri Mbori—du nga ka gumba gamo aberãpai fuko. (Atambuahe 62:8) Gu Mbori Du na Tanduapai Dũ nakpinyemu gu kparakpee naye kina boro kpotoseyo.

Wa vura duhe nga Mbori na dungu arimoko nga ga sunge, ko na bangisa ndikidi rimoko gbua sa. “Mi nga Yekova, gere nga rimore.” (Yesaya 42:8) Gu rimo nga Yekova kuru wa bara 7,000 rogo Ziazia Kekeapai yo. Badungu anebi namangisunge na rimo Mbori rogo irisa yo ho i aakpara ni fuko. Abarayama aya: “Ako Yekova, . . . mi gumba nga pai foro.” (Bambata Pai 18:30, NW) Wakina gure a, si naida ani mangisunge na rimo Mbori nga Yekova ho ani amanga kparakpee ni.

Mbori nagia tiko agia na gaani aberãpai ka ani vura kaa pe kina gini fugo vurũ. Fugoko nakido rani na gupai nga: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”—Amokedi 10:34, 35.

Ono tie, tipa gupai nga Mbori fu maku furani, si naida ani mangipai kisusi gu gbua nga ka manga kparakpee. Rogo gu kekeapai ngbefuo gere, ani nika makiapai tipa gupai si aida ani mangihe.