Ginipai rengbe mo ka gumbaha ka i sana ro nga, “Ya mo mo naida ka raka nyeanye kindi?” Dungu aboro rengbe ka ya i naidaha aida ono i abingo ho ni gupai si aida i berẽkuriihe te. I nape gupai nga kpio nga papara ga aboro raka, si nga gupai duwa ka si mangi wa ani araka.

Ani ya nga i aria gu sanahe re nga, “Mo naida ka kpi?” Dungu aboro rengbe ka karagapai nga oó. Ginipai gipai re ayugoho? Wa vura duhe nga ani nagbiatirani na aˈasada gbiati akpakarapai ani dunduko du na nyemu ka raka. Ziazia Kekeapai nayugo gupai nga Mbori ambakadi aboro na nyemu i raki. Nirengo, si nape gupai nga “ko ki moi nyenye apai a ku berã boro yo.”—Batungusipai 3:11.

Ono tie gu rengo pai duho nga aboro araka nga nyeanye kindi te. Ginipai tie namangi? Kurigure, ya mo pai ho Mbori namangihe tipa ka nyasariipa gipai re? Gu karagapai Ziazia Kekeapai afuhe nafu ngbarago furani, si na ngbaya dagbaha na gupai Yesu arungo ti ni na ki kpi.

Gu bambata akapita biata nga ga gu kitabu nga Bambata pai nape gupai furani nga Mbori afu gu maabangirise nga ga raka nyeanye kindi fu gu bambata arogotise nangia Adamu na Eva na ki pe gupai fuyo si aaida i mangihe tipa ka gbia gu raka re. Na gu pangbanga re nafura tipa wai i azanga giasangba Mbori na ki zanga gu mamu re. I peke agu apangbanga re ngba taata gene na padu he taata nasa kura aboro i bihe wakina kungbo apaturẽ. A wa duhe tipa aKitabu Wene Pangbanga, gu Kitabu nga Bambata Pai nafura tipaha ni gupai naima manga, na i ki ima kehe. *

Gini sangbanapai ga Adamu zanga giasangba aye na ni? Ziazia Kekeapai na karagapai nga: “Wa gbegberẽpai akuru ku zegino mbiko boro sa [Adamu], kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Ni basa Adamu sangba Mbori, ko amangi ingapai. Ko azanga gu mamu nga ga raka nyeanye kindi na ki kpi. Wangia ani atitako, ani aima dia gako ingapai. Ni sangbanaha, ani dunduko nawoka, kini gbinza na kini kpiki. Gi sakapai du tipa ndu gupai ani akpi ti ni na ngbaya na gupai aboro nainihe areme tipa  wai agude adia kura asino ti avunguyo. Ono ya mo Mbori mangipai tipa ka nyasariipa gipai re?

Nirengo, Mbori aima manga mbakadapai tipa ka batasa watadu ka ngbe guhe Adamu aingisihe be atitako, nga gu maabangirise nga ga nyenye unga. Wai du Mbori amangi gipai re?

ARomo 6:23. naya: “Mosoro ingapai nga kpio.” Gere nayugo gupai nga kpio nga sangbana ingapai. Adamu aingipai, na ko ki kpi. Wakina gure a, ani naingapai na sangbana gaani ingapai kingia kpio. Ono i avungurani na kina ingapai wa vura duhe nga gaani ingahe te. Nyemuse asa Mbori ko kedi Wiriko nga Yesu ko ye ka dia “mosoro ingapai” tirani kusayo. Wai du gipai re amangi?

Wa duhe nga kumba sa, nga rengberengbe kumba nga Adamu, naye na ingapai na kpio kurirani vurube gako basasangba, si aaida kina rengberengbe boro ye ka batasa rani be tindiro ingapai. Ziazia Kekeapai nasaka gipai re were: “Wa i amoi dungu aboro ni aboro ingapai mbiko ga gu boro basapai sa, kina wo i ka maa dungu aboro ni ruru aboro bangiri Mbori mbiko ga gu boro giasangba sa.” (ARomo 5:19) Yesu nangia “gu boro” re. Ko aye ngbangbaturũ yo na ki da ni rengberengbe kumba *, na ki kpi tipa rani. Ni sangbanaha, si taata furani ani du bangiri Mbori ni rururani na kidu na maabangirise tipa ka raka nyeanye kindi.

Tipagine si arẽarẽ ti ni Yesu kpi tipa ka manga gipai re? Ya mo ka Mbori arũngo kina ndiko gbua nga atita Adamu raki nyeanye kindi te? Nirengo, ko na kina pagbia beko tipa ka mangaha wo. Ono ka gure angia gu rii agu andiko kinako arũhe nga mosoro ingapai nga kpio. Anga gu ndiko re nga kungbo wiri taata ndiko nga gu boro naima rengba ka basa paha watadu ka ariaha te. Si na nyanyakipaha tipa ruru sarangbanga.—Atambuahe 37:28.

Ka Mbori aasaranga ngbanga kuti gupai re ni ruruhe ya, ka aboro abaka kina bangiriyo singia ko amangaha wo nibipa kura apai a. Ni kpiapai, ya mo  ka ko adiberã ni ruruhe tipa agu awiri Adamu narẽ tipa nyenye unga? Ya mo ka aboro akido kutiko tipa banda gako akidohe? Pa manga Mbori pai kuti gu ruru sarangbanga re tipa ka batasa rani nafu kido furani nga ko nikaa manga gupai amanga kindi du ni ruruhe.

Vurube kpio Yesu, Mbori azakigene furani tipa ani raki nyeanye kindi rogo Paradizo. Mo bingo agu afugo Yesu du ni kekehe rogo Yoane 3:16: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” Rogo gu gene re, pakpio Yesu aayugongo kina pa ga Mbori ruru sarangbanga sa te ono pa gako bakere nyemuse tipa aboro.

Ono tie, ginipai du Yesu arungo na ki kpi ti ni ngba gu iigirã gene furayo tipaha rogo aKitabu Wene Pangbanga re? Pa fu Yesu tiko fu kere asada na ki nye ni ruruko ayuguhe bara sa kindi nga zire du Bakitingbanga agumbaha nga aboro arengbanga ka nye ni ruruyo fu Mbori ho du yo ni rogo asada te. (Eyobo 2:4, 5) Gupai Satana agumbaha re aima rengba ka ngera wa rengo ngaha ho ko asa Adamu ni ko mangi ingapai. Ono Yesu naadu ni rengberengbe ko wakina Adamu anye ni ruruko zavura ti regbo kere arungo. (1 AKorindo 15:45) Rogo gi gene re, Yesu ayuguhe nga Adamu aima rengba ka nye niruru ko ka ko asia ka mangaha wo. Ni hi Yesu aˈasada, ko ambu kpiapai furani ani pekefuoho. (1 Petero 2:21) Mbori afu mosoro fu Wiriko tipa gako giasangba, na ki fu nyenye raka fuko ngbangbaturũ yo.

Yesu aima kpi nirengo. Gene ni zakizakihe tipa ka raka zanga na digidoho. Ya mo mo naida ka raka nyeanye kindi? Yesu aima yugo gupai si aida ani mangihe ho ko aya ni: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Agu aboro nakusa gi magazini re nayamba ro tipa mo wiriki badungu apai tipa Yekova nga ndikidi Mbori na Wiriko nga Yesu Kristo. Agu aDezire Yekova du rogo gamo dagbarago aduadu na ngbarago ka undo ro. Mo rengbe arengba a ka gbia kura apai rogo gu gaani bangiriba nga ga Internet nga www.pr2711.com/zne. ▪