AGU APAI NANDU NA GUPAI DU TI KPOTOHO: AGU APAI ANI AWIRIKAHA BE MOIZE
Da Nangia Moize?
Ginipai naye ku berãroni yo ho oni agia gu rimo ni nga Moize? Ya mo oni naberãpa . . .
-
fogogude nai aoko ru rogo baga pavuru gu di nga Nire?
-
gu kumbagude wiri Faro asonosi ko rogo gu kporo naadu na kumuko ono ka bangiriko agonga ti gupai nga ngbatungako angia Yudo ya?
-
gu kumba naraki nibabanda akandoro tipa agarã 40, Midiana yo?
-
gu kumba naafura na Yekova * barabangiri gu we naagbi ti yegbende ngua?
-
gu kumba naaru barabangiri bakindo Ezipeta, kini sanahe niwingbaduse tipa i kusi aYisaraere be sunge kanga?
-
gu kumba Mbori amangisunge naako tipa ko pepa agu Ambusa Naadu Bawe kurii Ezipeta ho gaha bakindo abasapa ndikidi Mbori ni?
-
gu kumba naanungusi aYisaraere ti regbo kura yó Ezipeta yo?
-
gu kumba Mbori amangisunge naako tipa ko kparaka Zamba Baime?
-
gu kumba Mbori afu Agu Arugute Naadu Bawe ko fuhe fu aYisaraere?
AGI apai fura ani tipaha re dunduko Moize aima mangaha gbiati dungu agu akuraha. Si airiwonga te, ka bi gupai nga aKristano, aYudo, na aMasarami dunduko nairiso gi ruru kumba re nibakerehe gbe!
Zanga kapa, Moize angia gu nebi naadu na “bakere kiki.” (Pa Fu Rugute ni Ue he 34:10-12) Ko ambu tiko Mbori mangisunge naako ngba iiriwo gene. Wa si avura duwo, ko angia boro wakina rani. A wa si adu tipa gu nebi nangia Eriya nga guko nakuru pati Moize rogo yuguyugupai ti regbo ga Yesu sunge tungusapai auru kpotosende, Moize angia boro ‘naahi dungu apai wakina rani.’ (Yakoba 5:17; Matayo 17:1-9) Moize agbiatiko na dungu apai wakina gu ani agbiatirani nani areme, ono ko ki ima du na diabese rogoho.
Ya mo oni naida ka ino wai ko amangi agi apai re? Ani wisigingo gu wenewene asino biata Moize adu nani na ki bingo agu apai rengbe ani ka wirikaha be gako kpiapai.
^ genewaraga 7 Rimo Mbori nga Yekova rogo Ziazia Kekeapai.
